Pramisi fu a Kownukondre​—’Ala sani o kon nyun’

YU E piki wan moi switi apra fu wan bon. Yu e smeri en, dan yu e poti en na den tra apra di yu abi na ini wan baskita. Yu wroko furu yuru langa, ma toku yu no weri èn yu e firi taki yu man wroko go doro. Yu mama e piki apra na wan tra bon krosibei èn a e taki nanga den tra sma fu yu famiri èn nanga mati di kon yepi nanga a wroko. Yu e luku yu mama. A sori so yongu, neleki fa a ben de di yu ben de wan pikin-nengre. Yu no man bribi taki yu si fa a ben e kon owru na ini wan grontapu di pasa langa ten kaba. Yu si san siki ben du nanga en èn fa a ben bro en lasti bro. Yu sabi fa yu krei di den beri en. Ma now en nanga someni tra sma de na libi baka èn den de gosontu tu!

So wan ten o kon trutru. Wi sabi dati seiker. Wi sabi dati fu di Gado e du ala ten san a pramisi. Na ini Pisi 7 fu a buku disi wi o luku son sani di a Kownukondre o du syatu fosi Armagedon bigin. Wi o luku wan tu moi blesi tu di a Kownukondre o tyari kon baka dati. Wi o de nanga bigi prisiri te wi si fa Gado Kownukondre e tiri heri grontapu èn fa a „meki ala sani kon nyun”!​—Openb. 21:5.