Pe èn o ten Yesus gebore?

Grankownu Augustus fu a Gran Kownukondre Rome ben taki dati ala sma musu go skrifi den nen na lantibuku. Fu dati ede Yosef nanga Maria musu go na Betlehem na zuidsei fu Yerusalem pe Yosef gebore.

Furu sma kon na ini Betlehem fu skrifi den nen na lantibuku. A wan-enkri presi pe Yosef nanga Maria feni fu tan, de na ini wan pen pe buriki nanga tra meti ben e tan. Na drape Yesus gebore. Maria e domru en na ini wan krosi, dan a e poti en na ini a nyanyan-baki fu den meti.

A musu fu de so taki na Gado meki Grankownu Augustus taki dati ala sma ben musu go skrifi den nen na lantibuku. Fu san ede wi kan taki dati? Na a fasi disi Yesus ben kan gebore na ini Betlehem, a foto fu en afo Kownu David. Langa ten na fesi Gado ben meki sma skrifi taki a Tiriman di Gado pramisi Israel, ben o gebore na ini a foto disi.​—Mika 5:2.

A neti disi prenspari srefisrefi! Na ini den weigron wan bigi leti e bigin skèin na lontu wan grupu skapuman. A bigi leti na a glori fu Yehovah! Wan engel fu Gado e taigi den skapuman: „No frede, bika mi e tyari bun nyunsu di o meki ala sma prisiri. Tide wan Frulusuman gebore gi unu na ini a foto fu David. En na Krestes, a Masra. Disi na fa unu o sabi suma na en: Unu o feni wan beibi di domru na ini wan krosi èn di didon na ini wan nyanyan-baki fu meti.” Ne wantronso moro engel ben de fu si èn den ben e taki: „Gi glori na Gado na ini hemel èn meki sani waka bun na grontapu gi sma di Gado feni bun.”​—Lukas 2:10-14.

Te den engel gowe, den skapuman e taigi makandra: „Dan wi musu go na Betlehem fu si san pasa èn san na a sani di Yehovah fruteri wi” (Lukas 2:15). Esi-esi den e go na Betlehem èn den e feni a beibi Yesus leti pe na engel taki dati a ben o de. Te den skapuman e fruteri san na engel taigi den, ala sma di yere a tori disi e fruwondru. Maria ben denki fu den sani di den sma ben e taki èn a ben aksi ensrefi san den sani disi ben wani taki.

Furu sma e bribi taki Yesus gebore tapu 25 december. Ma na a ten fu december alen e fadon na ini a kontren fu Betlehem èn a kowru. Son leisi snew e fadon srefi. Wi kan frustan taki na so wan ten den skapuman no ben o sribi na dorosei na neti nanga den skapu fu den. Den Dyu ben opo densrefi wan tu leisi kaba teige a tiri fu Rome. Sobun, a no sori leki a grankownu fu Rome ben o seni den sma na ini so wan kowru alen weer fu go poti den nen na lantibuku. Soleki fa a sori, dan Yesus gebore na ini oktober.