Jezus en libi nanga diniwroko

Pe èn oten Jezus mama ben meki en?

FOE SAN-EDE Jozef e meki wan langa reis, now di a ten doro foe Maria meki a pikin? We, na keizer foe na Romeini Kownoekondre, Caesar Augustus, ben meki wan wet taki ibri sma ben moe go na en foto pe en mama meki en foe skrifi en nen na boekoe. Jozef e go soboen na a presi pe en mama ben meki en, na foto Bethlehem.

Wan lo sma de na ini Bethlehem, foe meki den skrifi den nen, èn na wán enkri presi pe Jozef nanga Maria kan feni foe sribi de wan kawpen. Dja pe boeriki nanga tra meti e de Maria e meki Jezus. Maria e domroe en na ini doekoe èn e poti en na ini wan baki, na njanjanbaki foe den meti.

Dati Caesar Augustus ben meki en wet foe sma skrifi den nen ben pasa séker na ondro na tiri foe Gado. Na sofasi Jezus ben kan gebore na ini Bethlehem, na foto di den Boekoe langaten pasa kaba ben taki a fesi dati a ben sa de na gebortoepresi foe na pramisi tiriman.

Fa disi de wan prenspari neti! Na dorosé na ini na opo gron wan krin faja e skijn lontoe wan groepoe skapoeman. A de na glori foe Jehovah! Èn na engel foe Jehovah e taigi den: ’Djonsrode ben gebore na ini Bethlehem wan ferloesoeman gi oenoe di de Kristus na Masra. Joe sa feni en na ini wan baki.’ Wantronso foeroe moro engel ete e sori densrefi èn den e singi: „Glori na ini den moro hé presi na Gado èn na grontapoe vréde a mindri sma foe boen wani.”

Te den engel gwe, den skapoeman e taki nanga makandra: „Meki wi go te na Bethlehem foe si disi san Jehovah ben meki bekenti na wi.” Nanga haasti den e go drape èn den e feni Jezus precies tapoe na presi di na engel ben sori. Te den skapoeman e ferteri san na engel ben taigi den ala sma di ben jere dati e ferwondroe. Maria e ori ala sani san ben taki èn e dodoi den na ini en ati.

Foeroe sma na ini a ten disi e bribi dati Jezus ben gebore tapoe 25 december. Ma december de na ini Bethlehem wan kowroe alen moen. Skapoeman no ben sa de ini a ten dati foe na jari na neti nanga den ipi meti foe den dorosé na ini na opo gron. Ooktoe a no ben sa de wan sani di kande de so dati na Romeini Caesar ben sa aksi wan pipel, di tokoe alaten baka ben opo tége en foe meki na reis dati na ini na ati foe na winter foe go skrifi den nen. A de krin dati Jezus ben gebore froekoe na ini na herfst (bigi dréten). Lukas 2:1-20; Micha 5:2.

◆ Foe san-ede Jozef nanga Maria ben reis go na Bethlehem?

◆ Sortoe wondroe sani ben pasa na ini na neti di Jezus ben gebore?

◆ Fa wi sabi dati Jezus no ben gebore tapoe 25 december?

[Wan prenki di e tapoe heri bladzijde 7]