Waka ini bribi!
„Wi de alaten nanga boen firi foe ati èn wi sabi dati wi, solanga wi de na oso na ini a skin, èn no de na Masra, bikasi wi e waka ini bribi, no ini a si foe sani.” — 2 KORINTE 5:6, 7.
1. San na wantoe foe den blesi di wi abi foe di wi kan si?
WAN foe den wondroe foe na libisma skin de na ai. Nanga na ferwondroe fotografis wrokosani foe na pisi foe na skin disi no wawan wi kan komoto na pasi foe sani, ma wi kan kisi boen foeroe sabi foe sani èn foeroe foe dati abi foe doe nanga a fasi fa wi de nanga tra sma. A de krin dati a no ben de na prakseri foe na Mekiman foe na ai, taki na tapoe na planeet tapoe san wi e libi wi ben moe e firi na ini doengroe èn ben sa moe feni wi pasi. Boiti foe dati a ben de en prakseri dati wi ben moe sa si èn ben sa njan boen foe en wondroe mekiwroko — libisma nanga meti, bergi nanga liba, meren nanga se, bromki nanga tra bon, na loktoe èn den moi kloroe foe wan son di e dongo. Den sma di de grantangi gi ala den presenti disi, kan bari taki nanga na palmsingiman taki: „O foeroe den wroko foe joe de o Jehovah! Joe ben meki den alamala nanga koni. Grontapoe foeroe nanga den sani di joe ben meki.” — Psalm 104:24.
2. Foe san-ede a no nofo foe meki wi letterlek ai tjari wi èn san Paulus e taki ini a tori disi?
2 O fa na ai foe si sani mag de ooktoe, tokoe a de boen kefarlek foe meki wi tjari wisrefi soso nanga dati. Efoe wi wani abi na boen-ati foe Gado, dan wi moe waka ini bribi di wi abi na ini a Mekiman foe na ai. Wi moe soekoe na tiri foe en foe kan doe san boen Na ini wan brifi gi den salfoe kompe kristen na apostel Paulus nanga reti ben taki: „Wi de alaten nanga boen firi foe ati èn wi sabi dati wi, solanga wi de na oso na ini na skin, èn no de na Masra, bika wi e waka na ini bribi, no na ini na si foe sani. Ma wi de nanga boen firi foe ati èn wani moro foeroe foe no de na ini na skin èn teki wi presi na Masra [foe di wi o dede èn kisi wan opobaka foe go kisi hemel libi]. Foe dat’ede wi e poti en ooktoe leki a marki foe wi, efoe wi abi wi oso na en, ofoe wi no de na en, foe plisi en. Bika wi alamala moe tjari kon na krin na fesi na kroetoe stoeroe foe Kristus, sodati ibri wan sma kisi san ben gi en foe den sani di nanga jepi foe na skin a ben doe, akroederi den sani di a ben doe, efoe a ben boen ofoe ogri.” — 2 Korinte 5:6-10.
3. San moe de a lostoe foe ala dienstknegti foe Jehovah di gi densrefi abra, èn sortoe aksi de waarti a moeiti foe go loekoe?
3 Ala dienstknegti foe Jehovah di gi densrefi abra — efoe den de now foe na groepoe foe na salfoe fikapisi ofoe ini a groepoe foe na „bigi ipi” di a nomroe foe den e kon moro foeroe èn di abi wan grontapoe howpoe — wani doe san boen (Openb. 7:9). Ma foe san-ede wi kan taki dati so wan bigi kefar de ini na ’waka ini na si foe sani’? Èn san a wani taki ’foe waka ini bribi’?
Kefar foe ’waka ini a si foe sani’
4. (a) Foe san-ede wi no moe waka na baka ala sani di wi e si foe a fosi tron? (b) Fa na Mekiman foe na ai e si den sani?
4 Efoe wi e meki ala sani di wi e si foe a fosi tron tjari wi èn e loekoe nomo soso tapoe san de na dorosé, dan na kefar de dati sani kan kori wi èn wi e ondrofeni ogri. Foe eksempre wan sma kan waka na tapoe wan doti di de foe santi èn wantronso si dati a doro na ini drifisanti. Ofoe wan sma kan meki den kori en nanga na switi doroséfasi foe wan sma di sori taki a de ’wan wolfoe ini skapoe-boeba’ (Matt. 7:15). Soboen wi moe loekoe boen. Na Mekiman foe na ai no e loekoe soso san de na dorosé. A ben taigi na profeti Samuel: „Gado no e si soleki libisma e si, bika libisma e si san de foe si gi na ai; ma foe na sé foe Jehovah, a e si fa na ati de” (1 Sam. 16:7). Ija, A Sma di ben meki na ai, man foe si den moro dipi prakseri nanga méne, èn na fasi fa a e kroetoe wan sma ofoe wan sani de alaten soifri. (Teki gersi Hebrewsma 4:12.) Te wi loekoe en volmaakti makti foe si sani èn inzicht dan a de troetroe a Wan di e si ala sani.
5. Foe san-ede a de toemsi prenspari dati wi kisi warskow a fesi foe den kefar foe ’a waka na ini a si foe sani’?
5 Ma foe di wi de soso libisma, dan wi no kan si krin san de ini na ati foe wan sma. Srefi nanga den koni nanga makti di wi kisi foe Gado tokoe wi de onvolmaakti èn den kan kori wi nofotron. Srefi wi égi ati kan kori wi, bika na ati „de moro verraderlek leki ini wan tra sani èn a no e loekoe pasa noti” (Jer. 17:9). A de soboen toemsi prenspari dati wi kisi warskow a fesi foe den kefar foe ’a waka ini a si foe sani’. Jehovah ben sorgoe na ini na tranga fanowdoe foe sani disi? Ija! Leki wan leri gi wi a ben meki wan tori skrifi foe wantoe aparti sanl di ben pasa di e sori o kefarlek a de foe waka soso na ini a si foe sani. — Rom. 15:4.
6. Sortoe krakti a ben abi tapoe den Israëlsma dati den ’ben e waka na ini a si foe sani’?
6 Den ondrofeni foe na pipel foe Gado foe owroeten, den Israëlsma, e meki disi kon krin na fesi. Aladi na naatsi disi di ben abi Gado boen-ati ben kan poti ensrefi na ondro na tiri foe Jehovah di no e fadon, tokoe na hipi sma di no ben de getrow ben waka na „ini den égi rai” (Ps. 81:12). Foe di den ben waka „ini a si foe sani”, meki den ben drai go na kroektoe gado ofoe gado di ben de foe si nanga letterlek ai. Di den ben loekoe nomo tapoe san ben de foe si, meki den ben e béfi foe frede gi na moro bigi makti foe nomroe foe den féjanti foe den. Foe di den Israëlsma ben e waka na ini a si foe sani èn no na ini bribi’, meki den ben e stré ooktoe nanga na tiri di Gado ben gi na ini Mozes èn ben e kragl foe a libi foe den. (Teki gersi nanga Judas 16.) Ija, èn a de krin dati foeroe foe den ben loekoe nanga djaroesoe na a fri nanga boen di a ben gersi den naatsi ben abi di ben lontoe den, ala di den ben poti a sani a wan sé, dati den sma dati ben pori krinkrin èn ben de na ondro na makti foe ogri ieje. — Lev. 18:1-3, 30.
7. San ben pasa nnaga den Israëlsma di ben trowe a tiri foe Gado?
7 San ben pasa nanga den Israëlsma di ben tanapoe na tapoe foe go den égi pasi èn di ben trowe na tiri foe Gado? We, den ben tjari Jehovah atibron kon tapoe den èn a ben hari poeroe en anoe di ben kibri den, sodati den féjanti foe den ben kan wini den! Srefi na ini na pramisi Kondre nofotron den Israëlsma ben kon na ondro katibo foe den féjanti foe den di no ben abi sar’ati (Kroetoeman 2:17-23). Kontrari nanga Mozes, di ben wégri foe ben njan boen foe grontapoe prisiri, di na groepoe foe sma di ben e tiri na ini Egypte prisiri densrefi, na pipel Israël ben soekoe, „na pisten prisiri foe sondoe”; den no ben tan waka „leki den ben si na Wan di no de foe si”. Den ben mankeri bribi. Èn prakseri dati „sondro bribi a de wan sani di no kan foe plisi [Gado].” — Hebrewsma 3:16-19; 11:6, 24-27.
8. Foe san-ede den disiten dienstknegti foe Jehovah moe teki leki wan warskow na ati den ondrofeni foe den Israëlsma foe owroeten?
8 Jehovah disiten dienstknegti kan teki den sani disi di pasa na ini owroeten leki wan warskow na ati. Ooktoe wi de ini na kefar foe kon de swaki na ini bribi ofoe srefi foe lasi wi bribi. A no kan pasa nanga wi dati wi meki den dorosé fasi foe sani abi krakti na tapoe wi èn nanga dati, waka baka ’ini na si foe sani’? Ija, èn foe dat’ede meki Jehovah ben sorgoe ini tiri gi den sma di wani dini en ini bribi. A ben gebroiki den sani di ben pasa nanga den Israëlsma èn na fasi fa a ben handri nanga den leki praktis leri gi bakaten geslagti, èn ooktoe gi wi (1 Korinte 10:11). Tapoe a fasi dati wi e kisi tranga nanga jepi foe soifri sabi nanga jepi foe wan krakti howpoe nanga hori doro.
9. Efoe wi ben sa ’waka na ini a si foe sani’, dan fa wi ben kan denki foe wan bepaalde doe èn foe theokratis seti?
9 Sondro na séker tiri disi foe wi lobi Mekiman wi ben sa de ini kefar foe tjalansi na Moro Bigi Mozes, Jezus Kristus èn frigiti dati Gado nanga Kristus e tiri troe kristen na ini a ten disi. (Teki gersi nanga 1 Korinte 11:3; Efese 5:24.) Wi ben sa kan go si na orga foe Jehovah Kotoigi leki soso wan libisma sani èn foe dat’ede ben kan firi wisrefi fri foe doe san loekoe joisti na ini wi ai (Teki gersi Kroetoeman 21:25.) Boiti foe dati, wi ben sa kan meki dan na srefi fowtoe leki wantoe di e gersi taki den e denki dati solanga wan bepaalde fasi foe doe no de kontrari nanga na konsensi foe den, ala sani de boen. Trawan kande e go denki dati na theokratis orga de gi na prisiri nanga makrikifasi foe den èn dati ala marki di poti moe meki koemakriki sodati offer no e aksi foe den. Ete wan kefar ben sa de, dati wi go kisi na denki dati den seti foe na organisaatsi moe fiti na a wani foe wi na presi foe na a wani foe Gado. Tokoe na eksempre foe wi, Jezus Kristus alaten nanga foeroe pisiri ben doe a wani foe en hemel Tata. — Psalm 40:8; Hebrewsma 10:5-10.
10. San kan de na krakti tapoe wi fasi di wi abi gi na velddienst èn tra theokratis activiteit efoe wi ben sa poti a tiri foe Gado a wan sé ofoe wi ben teki en leki wan lekti sani?
10 Foe di son sma e poti na tiri foe Gado a wan sé ofoe no e teki en so hebi, meki den ben sa kan denki dati den komakandra foe wi moe de moro sjatoe, dati den komakandrapresi gi bigi komakandra no moesoe de so farawe èn dati na studiemateriaal alaten moe de makriki èn noiti mag abi „fasti njanjan” (Hebrewsma 5:12). Na ini kondre pe kristensma abi vréde nanga rostoe, dan sonwan kan si den kownoekondre blesi leki wan sani foe en srefi èn abi na prakseri dati santa diniwroko no e aksi moeiti. Efoe wi e go kweki sowan jejefasi, dan wi ben kan tron sma di „abi moro lobi gi prisiri leki lobi gi Gado” èn kande pikinmoro poti ibri kaba foe a wiki a wan sé gi ontspanning a presi foe gi a ten dati na velddienst èn tra theocratis activiteit pe e sori opregti gi joesrefi na Jehovah (2 Timoteüs 3:1, 4). Efoe dati ben sa pasa, wi ben sa kan taki dan opregti dati wi „e waka ini bribi èn no ini a si foe sani”?
11. San kan de na bakapisi efoe wi dodoi wisrefi, ma san wi kan doe?
11 Na kefar de ooktoe dati wi go dodoi wisrefi. Wi kan meki wisrefi denki makriki dati wan lekti ede-ati ofoe wan tra sortoe problema de moro ogri leki a de troetroe. Na onvolmaakti skin foe wi kan gi wi tranga foe teki disi leki wan pardon foe no doe wan bepaalde frantwortoe, soleki na hori foe wan lezing tapoe na theokratis diniwrokoskoro. Ma a kan de so, dati noiti wi ben sa denki foe meki a srefi sortoe problema tapoe wi foe teki prati na wan ofoe tra vorm foe ontspanning A no de foe taki dati wi moe gebroiki wi gesontoe ferstan èn no moe teki serjoesoe marki foe siki leki. Ma tog wi abi fanowdoe foe span wisrefi krakti (Lukas 13:24). Èn a no de foe taki dati na ini den bosroiti foe wi wi moe gi bribi wan bigi presi, sodati wi no ’e waka’ foe soso ’na ini a si foe sani’ èn e waka soso na baka wi égi méne. — Romeini 12:1-3.
12. Na ini sortoe stré wi de, èn sortoe fasi disi e aksi foe wi sé?
12 No frigiti noiti taki wi de ini wan feti tege godelowsoe jeje krakti (Efese 6:11-18). Na moro prenspari féjanti foe wi, Satan Didibri, kan meki nanga en fetisani di de spesroetoe foe pori wi bribi na ini Jehovah, taki wi kon tanapoe na ondro hebi druk. Satan sa wroko tapoe ibri gridi firi na ini libisma èn a no sa libi en foe gebroiki ibri vorm foe overtoig di kan beni wi denki go ini wan fowtoe pasi. Efoe wi ben sroiti wisrefi na „den wan di ben tan abra” foe na „Siri” foe Gado „oema” ofoe hemel orga, dan wi de ini wan feti. Na ini na feti disi no wan sma kan go nanga verlof te leki Jehovah, di e tranga wi sodati wi kan kakafoetoe gi den aanval foe Satan, tjari wan kaba kon na a heri orga foe Didibri (Openbaring 12:16, 17; 1 Petrus 5:6-11). Soboen, wi moe de now nanga dek’ati èn abi wan firi foe a tranga fanowdoe foe na ten? Séker! — Psalm 31:24.
San a wani taki „foe waka ini bribi”
13. San a wani taki foe ’waka ini bribi’?
13 ’Waka ini bribi’ wani taki taki wi e go doro, aladi moeilek omstandigheden de, nanga bribi ini Gado na ini en makti foe tiri den foetoe foe wi èn ini a wani di a wani foe tjari wi go na boen (Psalm 22:3-5; Hebrewsma 11:6). A wani taki dati wi e wégri foe meki soso dorosé omstandigheden ofoe soifri wi égi libisma denki tjari wi. Bribi sa boewégi wi foe waka baka na pasi di Jehovah e sori, awinsi o moeilek na pasi mag de. Efoe wi ’e waka ini bribi’, wi sa de leki David, di ben taki foe Gado: „Joe sa meki mi sabi na pasi foe libi. Prisiri te joe bere-foeroe de na joe fesi; switifasi na joe reti-anoesé foe tégo (Psalm 16:11). Efoe wi e meki Jehovah tjari wi foetoestap, dan boiti foe dati a sa gi wi vréde foe jeje èn jepi wi foe wini, o bigi na makti di de tapoe wi mag de ooktoe (Johannes 16:33; Filipi 4:6, 7). Te wi e ’waka na ini bribi’. dan wi sa kon makandra geregeld nanga wi jeje brada nanga sisa foe kan studeri na bijbel makandra nanga den èn begi nanga den. — Hebrewsma 10:24, 25.
14, 15. (a) Fa Jezus ben si goedoe, wan boen nen èn foe de na ini politiek? (b) Fa Jezus ben si a tiri foe Gado soleki ben kon a krin na ini den Boekoe?
14 Efoe wi ’e waka ini bribi’, dan wi de ini boen kompani: di foe Jehovah dienstknegti foe a ten di pasa. Na moro prenspariwan foe den ben de Jezus Kristus, „na Moro Prenspari wrokoman èn Sma di e meki wi bribi kon de volmaakti”. San wi e si te wi e feti a baka „foe waka soifri na ini en foetoemarki”? — Hebrewsma 12:1-3; 1 Petrus 2:21.
15 Jezus no ben meki den tjari en kon na ini grontapoe politiek èn no ben feti noiti na baka goedoe èn wan boen nen di foeroe sma ben e soekoe. Na presi foe dati a ben sori a tapoe, dati en „Kownoekondre no de wan pisi foe na grontapoe disi”. Séker a no ben de ooktoe wan sma di ben lobi goedoe, bikasi ’a no ben abi wan presi foe poti en ede’ (Johannes 6:14, 15; 18:36; Lukas 9:57, 58). Aladi Jezus ben abi wan volmaakti ferstan, tokoe a no ben handri tapoe ensrefi, ma a ben loekoe na en hemel Tata foe tiri en. — Johannes 8:28, 29.
16. San wi kan taki foe na fasi foe Jehovah Kotoigi na ini a leti foe na eksempre foe Jezus?
16 San wi kan taki foe Jehovah Kotoigi na ini a ten disi te wi loekoe na eksempre foe Jezus? We, leki fesiman foe Gado hemel Kownoekondre wi e respeki „hé [tiri]makti”, ma wi e hori wi neutraliteit na ini politiek afersi (Romeini 13:1-7; Mattéus 6:9, 10; Johannes 17:16). Na presi foe wi feti baka goedoe nanga wan boen nen na ini na grontapoe disi, ’wi e soekoe fosi a kownoekondre’, na ini na fertrow dati Jehovah sa sorgoe gi den sani di wi abi fanowdoe foe tan a libi (Mattéus 6:24, 34; Psalm 37:25). Èn net leki Jezus „wi no e bow tapoe wi égi ferstan”, ma wi e teki nanga tangi na tiri foe wi lobi Gado (Odo 3:5, 6). Ala disi e jepi wi troetroe foe ’waka ini bribi’.
Tesi nanga blesi
17. San a pipel foe Jehovah ben moe ferdrage aladi den ’ben e waka na ini bribi’?
17 Na ini foeroe kondre wi kompekotoigi moe ferdrage ongewoon moeilekheid nanga tesi, ija srefi takroe-ati ferfolgoe. A no de foe taki dati tesi tapoe wi bribi e sori ensrefi na ini difrenti sortoe fasi. Loekoe foe eksempre den pina nanga getrow dienst foe wan owroe brada na ini Equador pikinso. Di a ben abi sowan aititenti jari a ben kon leri sabi a waarheid èn a ben leri na a ten dati foe lési nanga skrifi. Toe jari a baka a ben teki dopoe. Foe di a ben libi na ini boesikondre a ben moesoe waka dri joeroe laaga foe doro na a kownoekondrezaal. Na oema foe en ben de wan gensman èn ben go srefi so fara dati a ben kibri en krosi nanga moni foe meki a las’ati foe go na den kristen komakandra. Ma den problema disi no ben broeja wi getrow brada. Tin jari langa a ben dini ibri moen leki pisten ofoe jepi pionier èn a ben préki na ini foeroe dorpoe, pe nofotron den sma foe na dorpoe ben mishandel en. Di bakaten pionier nanga zendeling ben gi kotoigi na ini den gebied dati, foeroe sma ben go na den èn ben aksi foe wan bijbelstudie. A tranga wroko foe na faja brada disi soboen ben tjari boen wini kon. A ben dede foe kanker di a ben abi so wan 92 jari, ma na ini a moen di a ben dede a ben gi fotenti joeroe ete na a velddienst.
18. (a) San wi moe doe efoe wi wani prisiri wisrefi na ini na boen-ati foe Gado? (b) Sortoe paiman wi sa kisi efoe wi ’tan waka ini bribi èn no na ini a si foe sani’?
18 Ooktoe wi moe hori doro aladi problema nanga pina kan de (Mattéus 24:13). Efoe wi wani abi na boen-ati foe Gado, dan a de toemsi prenspari dati wi gebroiki den rai foe en, poti wi fertrow na tapoe en èn hori wisrefi aparti foe na grontapoe, foe en jejefasi èn foe den pasi foe en (Psalm 37:5; 1 Korinte 2:12 nanga Jakobus 1:27). Soboen meki wi feti foe waka na baka wi eksempre, Jezus Kristus. Meki wi offer wisrefi èn de klari foe span wisrefi na ini Jehovah glori dienst. Te wi e doe disi, dan nanga foeroe fertrow wi kan loekoe na a kontroe foe den moro bigi pramisi di wi hemel Tata ben pramisi en loyaal anbegiman. Èn fa disi sa tjari wi go na wan wondroe blesi na ini en pramisi Njoen Ordening! Èn moro foeroe wi sa kisi na paiman foe kan teki prati na ini na poti reti foe Jehovah universele soevereiniteit, efoe wi ’waka ini bribi èn no ini na si foe sani’.
Joe e memre disi ete?
◻ San de den kefar foe ’waka na ini a si foe sani’?
◻ Sortoe warskow gi Jehovah pipel de ini a ten disi na ini den ondrofeni foe den Israëlsma?
◻ San wi moe doe na presi foe wi dodoi wisrefi?
◻ San wi moe doe foe ’waka ini bribi’?
[Prenki na tapoe bladzijde 3]
Joe e go nange joe osofamiri nofotron na wan kontren foe prisiri aladi joe kompe-kotoigi foe Jehovah de bezig nanga theokratis afersi?
[Prenki na tapoe bladzijde 5]
Jezus Kristus ben gi wi wan toemsi moi eksempre. Joe e waka netleki en „na ini bribi”?