Tan waka nanga bribi

1. Fu san ede na apostel Paulus ben de tevrede nanga a fasi fa a ben libi?

NA APOSTEL Paulus ben sabi taki a no ben o teki langa fosi sma kiri en, ma te a ben e prakseri a fasi fa a ben libi, dan a ben de tevrede trutru. A ben taki: „Mi lon a streilon te na a kaba. Mi no lasi bribi” (2 Tim. 4:6-8). Paulus ben besroiti fu gebroiki en libi fu dini Yehovah, èn dati ben de wan koni besroiti. A ben de seiker taki Yehovah ben breiti nanga en. Wi wani teki koni besroiti tu so taki Gado kan breiti nanga wi. Fa wi kan du dati?

2. San a wani taki fu waka nanga bribi?

² Luku san Paulus ben taki fu ensrefi èn fu tra getrow Kresten: „Wi e waka nanga bribi èn no nanga san ai e si” (2 Kor. 5:7). San Paulus ben wani taki nanga den wortu disi? Na ini Bijbel, a wortu „waka” son leisi abi fu du nanga a fasi fa wan sma e besroiti fu libi. Sma di no e bribi na ini Yehovah e poti prakseri soso na den sani di den e si, e yere, noso e firi te den musu teki wan besroiti. Ma wan sma di e bribi na ini Yehovah, e poti prakseri na a wani fu en te a musu teki wan besroiti. Den sani di a sma e du e sori taki a e bribi taki Yehovah o blesi en èn taki sani o waka bun gi en te a e fiti den rai fu Yehovah di de fu feni na ini Bijbel.​—Ps. 119:66; Hebr. 11:6.

3. Sortu wini wi o kisi te wi e waka nanga bribi? (2 Korentesma 4:18)

³ A no de fu taki dati den sani di wi e si, e yere, noso e firi e yepi wi son leisi fu kon sabi sortu besroiti wi musu teki. Ma efu wi e poti prakseri soso na san wi e si noso na san wi e yere te musu teki prenspari besroiti, dan wi o kisi problema. Fu san ede dati de so? Fu di wi no kan fertrow ala ten tapu san wi e si èn san wi e yere. Efu wi e poti prakseri soso na san wi e si, na san wi e yere, noso na san wi e firi, dan te fu kba wi o du wan sani di Yehovah no feni bun (Preik. 11:9; Mat. 24:37-39). Ma te wi e waka nanga bribi, dan wi o teki besroiti di „Masra feni bun” (Ef. 5:10). Wi o abi wan korostu firi èn wi o breiti srefsrefi te wi e fiti den rai fu Gado (Ps. 16:8, 9; Yes. 48:17, 18). Èn te wi e tan waka nanga bribi, dan wi o man libi fu têgo.​—Leisi 2 Korentesma 4:18.

4. Fa wan sma kan sabi efu a e waka nanga bribi noso efu a e waka nanga san en ai e si?

⁴ Wi alamala musu aksi wisrefi: ’Tapu san mi e fertrow te mi musu teki besroiti? Mi e fertrow soso tapu den sani di mi man si, noso mi e meki den rai fu Yehovah tiri mi?’ Meki wi go luku fa wi kan sori taki wi e fertrow den rai fu Gado na ini den dri prenspari situwâsi disi: te wi musu besroiti sortu wroko wi o teki, te wi musu besroiti nanga suma wi o trow, èn te wi e kisi rai fu na organisâsi. Wi o taki fu den sani di wi musu hori na prakseri na ini ibriwan fu den situwâsi disi, so taki wi kan teki bun besroiti.

TE WI E SUKU WAN WROKO

5. San wi musu hori na prakseri te wi e suku wan wroko?

⁵ Wi alamala wani abi wan wroko di o yepi wi fu sorgu gi wisrefi èn gi wi osofamiri (Preik. 7:12; 1 Tim. 5:8). Son wroko e pai moro bun leki trawan. Son wroko e gi wan wrokoman na okasi fu meki nofo moni fu sorgu gi en osofamiri, èn a kan poti moni na wan sei tu. Tra wroko kande no e pai so furu, èn disi e meki taki wan wrokoman man pai soso gi den moro prenspari sani di en osofamiri abi fanowdu. Te wi musu besroiti efu wi o teki wan wroko, dan a no de fu taki dati wi o luku omeni moni wi o meki. Ma efu disi na a wan-enkri sani di wi e luku, dan a kan taki wi no e waka nanga bribi.

6. Fa wi kan sori taki wi e waka nanga bribi te wi musu besroiti sortu wroko wi o teki? (Hebrewsma 13:5)

⁶ Efu wi e waka nanga bribi, dan wi o luku tu efu a wroko o meki en muilek gi wi fu tan krosbei fu Yehovah. Wi ben kan aksi wisrefi: ’Efu mi teki a wroko disi, dan mi o abi fu du sani di Yehovah no lobi kwetkweti?’ (Odo 6:16-19) ’Mi o misi konmakandra, mi o abi ten fu go na ini a preikiwroko èn fu studeri Bijbel ibri wiki? Mi o abi nofo ten gi mi osofamiri?’ (Fil. 1:10) Efu a wroko no o gi yu okasi fu du ala den sani disi, dan a no ben o de wan koni sani fu teki en, awinsi a muilek fu feni wan wroko. Fu di wi e waka nanga bribi, meki wi e teki besroiti di e sori taki wi abi a fertrow taki Yehovah o sorgu gi wi.​—Mat. 6:33; leisi Hebrewsma 13:5.

7-8. Fa wan brada na ini Zuid-Amerika sori taki a e waka nanga bribi? (Luku a prenki.)

⁷ Javier,a wan brada na ini Zuid-Amerika, ben sabi o prenspari a de fu waka nanga bribi. A e taki: „Mi ben solliciteer gi wan bun wroko pe mi ben o meki tu tron so furu moni leki san mi ben e meki na a tra wroko fu mi èn a wroko disi ben o gi mi prisiri trutru.” Ma Javier ben e angri tu fu tron gewoon pionier. A e taki moro fara: „Mi meki wan afspraak nanga a manager fu go taki fu a wroko. Fosi mi go taki nanga en, mi begi Yehovah fu yepi mi fu di mi ben de seiker taki a ben sabi san moro bun gi mi. Mi ben wani kisi wan moro hei posisi na mi wrokope, ma efu a wroko no ben o yepi mi fu du moro gi Yehovah, dan mi no ben o teki en.”

⁸ Javier e ferteri: „Di mi ben e taki nanga a manager, dan a taigi mi taki a ben o psa furu taki mi ben o abi fu wroko moro langa. Na wan lespeki fasi mi sori en taki mi no ben man du dati fu di mi na wan Yehovah Kotoigi.” Iya, Javier no teki a wroko. Tu wiki baka dati, a bigin pionier. Èn moro lati a yari dati, a feni wan wroko gi wan tu dei na ini a wiki. A e taki: „Yehovah yere den begi fu mi èn a yepi mi fu feni wan wroko di e gi mi okasi fu pionier. Mi breiti so te taki mi abi wan wroko di e yepi mi fu gebroiki moro fu mi ten fu dini Yehovah nanga den brada nanga sisa fu mi.”

9. San yu e leri fu na ondrofenitori fu Trésor?

⁹ San wi musu du efu wi e kon si taki a wroko di wi abi now no bun gi wi, noso taki a e meki en muilek gi wi fu tan krosbei fu Yehovah. Luku san ben miti Trésor, di e libi na ini Kongo. A e ferteri: „Mi ben breiti srefsrefi nanga a nyun wroko fu mi. Mi ben e meki dri tron so furu moni leki san mi ben e meki fosi, èn sma ben abi furu lespeki gi mi.” Ma Trésor ben gwenti misi konmakandra, fu di a ben musu wroko moro langa. Boiti dati, son leisi den sma na en wrokope ben e dwengi en fu lei gi sma te a bisnis ben bedrigi den. Trésor ben wani tapu nanga a wroko, ma a ben frede taki a no ben o man feni wan tra wroko. San yepi en? A e taki: „Habakuk 3:17-19 yepi mi fu kon si taki awinsi mi no ben e meki so furu moni moro, tòg Yehovah ben o sorgu gi mi. Sobun, mi libi a wroko.” A e ferteri moro fara: „Furu wrokoman e denki taki wan sma o de klarklari fu du iniwan sani soso fu man abi wan wroko di e pai bun, a no abi trobi efu a no o abi ten gi en osofamiri noso gi na anbegi fu en. Mi breiti taki mi tan krosbei fu Yehovah èn fu mi osofamiri. Wán yari baka dati, Yehovah yepi mi fu feni wan bun wroko di e pai mi nofo moni fu man sorgu gi mi osofamiri. A wroko disi e gi mi okasi tu fu abi nofo ten gi a diniwroko fu Yehovah. Te wi e poti Yehovah na a fosi presi na ini wi libi, dan kande wi no o abi furu moni na a bigin, ma Yehovah o sorgu gi wi.” Iya, efu wi e fertrow den rai nanga den pramisi fu Yehovah, dan wi o teki besroiti di e sori taki wi e waka nanga bribi. Boiti dati, Yehovah o blesi wi.

TE WI MUSU BESROITI NANGA SUMA WI O TROW

10. San wi musu hori na prakseri te wi musu besroiti nanga suma wi o trow?

¹⁰ A trowlibi na wan kado fu Yehovah èn dati meki wi kan ferstan te sma e firi fu trow. Te wan sisa e prakseri fu trow nanga wan brada, dan kande a kon si taki a brada abi moi fasi, kande a feni taki a brada moi èn taki a e sorgu bun gi ensrefi, kande a lobi fa a e gebroiki en moni, kande a feni taki a e sorgu en famiri bun, noso kande a lobi fa a brada e poti prakseri na en.b Den sani disi prenspari. Ma efu a sisa e poti prakseri soso na den sani disi, dan a kan taki a e waka nanga san en ai e si.

11. Fa wi kan sori taki wi e waka nanga bribi te wi musu besroiti nanga suma wi o trow? (1 Korentesma 7:39)

¹¹ A no de fu taki dati Yehovah breiti nanga den brada nanga sisa fu wi di e gi yesi na den rai fu en te den musu besroiti nanga suma den o trow. Fu eksempre, den e fiti a Bijbel rai di e taki dati a moro bun fu no bigin nanga verkering efu den „yongu tumusi” (1 Kor. 7:36). Den e si en leki wan prenspari sani taki a sma nanga suma den o trow abi den fasi di Yehovah e taki dati wan bun masra noso wan bun wefi musu abi (Odo 31:10-13, 26-28; Ef. 5:33; 1 Tim. 5:8). Efu wan sma di no de wan Kotoigi e sori lobifiri gi den, dan den no e bigin wan verkering nanga a sma dati. Na presi fu dati, den e gi yesi na a rai di Bijbel e gi Kresten fu trow „soso nanga wan sma di de wan bakaman fu Masra”, soleki fa a skrifi na 1 Korentesma 7:39. (Leisi en.) Den brada nanga sisa e du dati fu di den sabi taki ala ten Yehovah o horbaka gi den te den abi yepi fanowdu.​—Ps. 55:22.

12. San yu e leri fu na eksempre fu Rosa?

¹² Luku na ondrofenitori fu Rosa di de wan pionier na ini Kolombia. Na en wrokope a ben gwenti miti nanga wan man di bigin sori lobifiri gi en. Rosa ben lobi a man dati. A e taki: „Mi ben feni taki a ben de wan bun man. A ben e yepi sma na ini a kontren pe a ben e tan èn mi ben feni taki a ben abi bun fasi. Boiti taki a ben e sori swit’fasi gi mi, mi ben feni taki a ben abi ala den sani di mi ben e suku na ini wan man. Ma a wan-enkri sani di ben misi, na taki a no ben de wan Kotoigi.” Rosa e taki moro fara: „A ben muilek gi mi fu taigi en taki mi no ben kan abi verkering nanga en. Na a ten dati mi ben e firi leki mi ben de mi w’wan èn mi ben wani trow. Ma mi no ben man feni wan brada na ini waarheid.” Tòg Rosa no tan poti prakseri soso na den sani di a ben man si nanga en ai. A prakseri san ben o psa nanga a matifasi di a ben abi nanga Yehovah efu a ben besroiti fu abi verkering nanga a man disi. Dati meki a besroiti fu no abi noti fu du moro nanga a en èn a tan wroko fayafaya gi Yehovah. Syatu baka dati, a kisi a kari fu go na a Skoro gi Kownukondre preikiman, èn now a de wan spesrutu pionier. Rosa e taki: „Mi de koloku trutru fu di Yehovah blesi mi so furu.” A no makelek ala ten fu du san Yehovah e aksi fu wi, spesrutu te wi ati e angri gi wan sani. Ma te wi e denki leki fa Yehovah e denki, dan ala ten sani o waka bun gi wi.

TE WI E KISI RAI FU NA ORGANISÂSI

13. San wi ben kan du te wi e kisi rai fu na organisâsi?

¹³ Wi gwenti kisi rai fu den owruman, den kring-owruman, a bijkantoro, nanga a Tiri Skin. Den rai disi e yepi wi fu dini Yehovah na a yoisti fasi. Ma fa a de te wi no man ferstan son leisi fu san ede wi kisi wan spesrutu rai? Kande wi e tweifri efu a rai dati bun. Kande wi e bigin poti prakseri srefi na den swakifasi fu den brada di gi wi a rai dati.

14. San o yepi wi fu waka nanga bribi te wi e kisi rai fu na organisâsi? (Hebrewsma 13:17)

¹⁴ Te wi e waka nanga bribi, dan wi e sori taki wi e fertrow taki Yehovah e tiri na organisâsi fu en èn taki a sabi san na a moro bun sani gi wi. Dati meki wi no e draidrai fu gi yesi, èn wi e du dati nanga wi heri ati. (Leisi Hebrewsma 13:17.) Wi sabi taki wi e yepi a gemeente fu tan na ini wánfasi te wi e gi yesi na den rai di wi e kisi (Ef. 4:2, 3). Aladi di wi sabi taki den brada di e teki fesi abi swakifasi, tòg wi de seiker taki Yehovah o blesi wi te wi e gi yesi na den (1 Sam. 15:22). Èn awinsi a rai di wi e kisi musu kenki, wi sabi taki te fu kba Yehovah o sorgu taki dati psa.​—Mika 7:7.

15-16. San yepi wan brada fu waka nanga bribi aladi a ben e tweifri na a rai di a ben kisi? (Luku a prenki.)

¹⁵ Luku wan ondrofenitori di e sori fu san ede a bun fu waka nanga bribi. Na ini Peru, furu sma e taki Spanyorotongo, ma furu sma de tu di e taki a tongo fu a pipel fu den. Wan fu den tongo dati na Quechuatongo. Furu yari kba, den brada nanga sisa di e taki Quechuatongo ben e suku sma na ini a gebied fu den di e taki a tongo disi. Ma fu di den brada ben wani hori densrefi na den wet fu a regering, meki den tyari wan tu kenki kon na ini a fasi fa den Kotoigi ben musu wroko a gebied (Rom. 13:1). A sani disi meki taki wan tu brada nanga sisa bigin aksi densrefi efu dati no ben o meki a wroko moro muilek. Ma fu di den brada gi yesi na den rai di den ben kisi, meki Yehovah yepi den fu feni furu sma di e taki Quechuatongo.

¹⁶ Kevin, di de wan owruman na ini wan Quechuatongo gemeente, ben de wan fu den brada di ben e broko en ede nanga den nyun kenki. A e taki: „Mi ben aksi misrefi: ’Fa wi o feni sma di e taki Quechuatongo?’” San Kevin du? A e taki: „Mi prakseri Odo 3:5. Èn mi prakseri Moses. A ben musu tyari den Israelsma kmoto na ini Egepte fu go na wan presi pe a ben gersi leki den no ben o man lowe gi den Egeptesma. Tòg Moses gi yesi èn fu dati ede Yehovah du wan bigi wondru fu ferlusu a pipel” (Eks. 14:1, 2, 9-11, 21, 22). Kevin besroiti fu fiti ensrefi na a nyun fasi fa den ben musu preiki. San ben de a bakapisi? A e taki: „Mi no ben man bribi fu si fa Yehovah blesi wi. Fosi, na soso waka wi ben e waka na ini a preikiwroko èn son leisi wi ben feni wán noso tu sma nomo di ben e taki Quechuatongo. Ma now wi e preiki pe furu sma de di e taki Quechuatongo. Disi meki taki now wi abi furu takimakandra, furu gobaka, èn furu Bijbelstudie. Èn moro sma e kon na den konmakandra fu wi.” Iya, te wi e waka nanga bribi, dan Yehovah o blesi wi ala ten.

17. San yu leri fu na artikel disi?

¹⁷ Wi poti prakseri na dri prenspari situwâsi pe wi musu sori taki wi e tan waka nanga bribi. Ma wi musu waka nanga bribi tu te wi musu besroiti sortu felem wi o luku, sortu sani wi o du na ini wi fri ten, sortu skoroleri wi o teki, èn fa wi o kweki wi pkin. Iya, ala ten wi musu teki besroiti di Yehovah feni bun. Awinsi sortu besroiti wi musu teki, wi no musu fertrow soso tapu san wi e si, san wi e yere, noso san wi e firi, ma wi musu hori a matifasi di wi abi nanga Yehovah na prakseri, sosrefi den rai fu en, nanga den sani di a pramisi taki a o du gi wi. Te wi e du dati, dan „fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati”.​—Mika 4:5.