Yehovah anu noiti no syatu tumsi

1. Fa Moses sori taki a ben e fertrow tapu Yehovah di a tyari den Israelsma kmoto na ini Egepte?

A BUKU Hebrewsma e taki fu furu sma di ben e bribi na ini Yehovah. Wan fu den sma disi na Moses (Hebr. 3:2-5; 11:23-25). A ben sori bribi di a ben e tyari den Israelsma kmoto na ini Egepte. A no ben frede Farao nanga a legre fu en. Fu di a ben e fertrow tapu Yehovah, meki a tyari a pipel psa na ini a Redi Se èn bakaten na ini a sabana (Hebr. 11:27-29). Furu fu den Israelsma bigin tweifri efu Yehovah ben o sorgu gi den, ma Moses tan fertrow tapu a Gado fu en. Èn a ben abi leti fu du dati fu di Yehovah gi den Israelsma nyan nanga watra so taki den ben kan tan na libi na ini a drei sabana.a​—Eks. 15:22-25; Ps. 78:23-25.

2. Fu san ede Gado aksi Moses: „Yu denki taki na anu fu Yehovah syatu tumusi”? (Numeri 11:21-23)

² Aladi Moses ben abi wan tranga bribi, tòg bijna wán yari baka di Yehovah ben ferlusu den Israelsma fu Egepte, Moses bigin aksi ensrefi efu Yehovah trutru ben o man gi a pipel fu en meti fu nyan. Moses no ben man ferstan fa Yehovah ben o man du dati gi den milyunmilyun sma di ben seti kampu na ini a gran sabana. Dati meki Yehovah aksi en: „Yu denki taki na anu fu Yehovah syatu tumusi?” (Leisi Num. 11:21-23.) Na ini a tekst disi, den wortu „na anu fu Yehovah” abi fu du nanga Yehovah en santa yeye, noso a krakti di a e gebroiki fu du sani. Fu taki en leti, Yehovah ben e taigi Moses: ’Mi kan du iniwan sani di mi taki dati mi o du.’

3. Fu san ede a prenspari taki wi e poti prakseri na a sani di ben miti Moses nanga den Israelsma?

³ Oiti yu aksi yusrefi efu Yehovah o sorgu gi den sani di yu nanga yu osofamiri abi fanowdu? Awinsi yu no ben aksi yusrefi a sani dati, meki wi poti prakseri na san ben miti Moses nanga den Israelsma di den ben e tweifri efu Gado ben o man sorgu gi den. Den Bijbel gronprakseri di abi fu du nanga a tori disi o yepi wi fu kon abi a fertrow taki Yehovah o sorgu gi wi ala ten.

SAN WI KAN LERI FU MOSES NANGA DEN ISRAELSMA

4. Fu san ede furu Israelsma bigin tweifri efu Yehovah ben o man sorgu gi den?

⁴ Fu san ede so furu Israelsma bigin tweifri efu Yehovah ben o man sorgu gi den? Baka di den Israelsma nanga „furu sma fu tra kondre” ben kmoto na Egepte fu go na a Pramisi Kondre, dan den tan na ini a gran sabana wan pisi ten (Eks. 12:38; Deut. 8:15). Neleki den Israelsma, den trakondre sma bigin weri fu nyan a mana, èn den alamala bigin krutu gi Moses (Num. 11:4-6). A pipel bigin angri gi a n’nyan di den ben gwenti nyan na ini Egepte. Fu di a pipel ben e krutu gi Moses, meki a ben e denki taki na en ben musu feni meti gi ala den sma dati, ma a no ben sabi fa.​—Num. 11:13, 14.

5-6. San wi kan leri fu a fasi fa den trakondre sma ben abi krakti tapu furu fu den Israelsma?

⁵ Soleki fa a sori, dan den trakondre sma no ben de nanga tangi gi ala den sani di Yehovah ben du gi den èn den Israelsma bigin denki neleki den. A srefi sani disi kan psa nanga wi. Te trawan na wi lontu no de nanga tangi, dan wi kan bigin krutu den sani di Yehovah e gi wi. Wi kan bigin misi den sani di wi ben abi fosi, noso wi kan bigin dyarusu tapu trawan fu di den abi sani di wi no abi. Ma wi o de moro koloku te wi e leri fu de tevrede, awinsi fa a situwâsi fu wi de.

⁶ Den Israelsma ben musu prakseri taki Gado ben pramisi fu gi den furu bun sani te den ben doro na ini a nyun kondre fu den. A pramisi dati no ben o kon tru na a ten te den ben waka na ini a gran sabana, ma a ben o kon tru na ini a Pramisi Kondre. Wi o de moro koloku tu te wi e tan poti prakseri na den san di Yehovah o gi wi na ini a nyun grontapu, na presi taki wi e tan prakseri den sani di wi no abi now. Wi kan denki dipi tu fu Bijbeltekst di kan yepi wi fu kon abi moro fertrow na ini Yehovah.

7. Fu san ede wi kan de seiker taki Yehovah en anu no syatu tumsi?

⁷ Ma tòg yu ben kan aksi yusrefi fu san ede Gado aksi Moses: „Yu denki taki na anu fu Yehovah syatu tumusi?” Di Yehovah ben poti na aksi disi gi Moses, dan kande a ben wani taki Moses prakseri den tu sani disi: (1) A krakti fu en noiti no swaki. (2) A man gebroiki a krakti fu en na iniwan presi, awinsi o fara dati de. Gado ben kan gi den Israelsma bogobogo meti, aladi den ben de farawe na ini a gran sabana. Gado sori a krakti fu en di „a langa en makti anu fu yepi den” (Ps. 136:11, 12). Sobun, te wi de na ini wan muilek situwâsi, dan wi kan de seiker taki Yehovah o man yepi ibriwan fu wi, awinsi pe wi de.​—Ps. 138:6, 7.

8. Fa wi kan sorgu taki wi no e meki a srefi fowtu di furu fu den sma ben meki na ini a gran sabana? (Luku a prenki.)

⁸ Yehovah du san a ben pramisi èn a seni bun furu tokoro-fowru gi a pipel. Ma den Israelsma no taigi Gado tangi gi a wondru disi. Na presi fu dati, furu fu den kon gridi. Dei nanga neti den tan tyari bun furu tokoro-fowru kon na wán. Yehovah ati bron nanga den sma „di ben gridi srefsrefi” èn a strafu den (Num. 11:31-34). Wi kan leri wan sani fu a tori disi. Wi musu luku bun taki wi no e kon gridi. Awinsi wi gudu noso pôti, wi musu du tranga muiti fu kibri gudu „na ini hemel”. Fu man du disi, wi musu tan sorgu taki wi e kon moro krosbei na Yehovah nanga Yesus (Mat. 6:19, 20; Luk. 16:9). Te wi e du dati, dan wi kan de seiker taki Yehovah o sorgu gi wi.

9. Fu san wi kan de seiker?

⁹ Yehovah e langa en anu fu yepi a pipel fu en na ini a ten disi. Ma disi wani taki dati noiti wi o mankeri moni noso n’nyan? Nôno.b Ma wi kan de seiker taki Yehovah noiti no o drai baka gi wi. A o gi wi a krakti di wi abi fanowdu, awinsi sortu problema e miti wi. Fa wi kan sori taki wi abi a fertrow taki Yehovah o sorgu gi wi? Wi o poti prakseri na tu situwâsi: (1) Te wi abi moni fanowdu fu man sorgu gi wi osofamiri, èn (2) te wi e prakseri wi owrudei.

TE YU ABI MONI FANOWDU

10. Sortu moni problema kan miti wi?

¹⁰ Now di a kba fu a grontapu fu Satan e kon moro krosbei, wi kan ferwakti taki a libi o kon moro tranga. Dyugudyugu na ini politiek, feti, rampu, noso nyun siki di e panya na ala sei kan meki taki wi lasi wi wroko, wi kan lasi den sani di wi abi, noso kande wi o lasi wi oso srefi. Kande wi o abi fu suku wan tra wroko, noso kande wi o abi fu froisi nanga wi famiri fu go tan na wan tra presi fu man sorgu gi den. San kan yepi wi fu teki besroiti di e sori taki wi e fertrow tapu Yehovah?

11. San kan yepi yu te yu abi moni problema? (Lukas 12:29-31)

¹¹ A prenspari srefsrefi taki yu e ferteri Yehovah fu den brok’ede fu yu. Disi o de wan bigi yepi gi yu (Odo 16:3). Aksi en fu gi yu a koni di yu abi fanowdu fu man teki bun besroiti, fu yepi yu fu no bruya, èn fu no broko yu ede tumsi. (Leisi Lukas 12:29-31.) Begi en fu yepi yu fu de tevrede nanga den sani di yu abi fanowdu fu man tan na libi (1 Tim. 6:7, 8). Suku artikel di o gi yu bun rai san fu du te yu abi moni problema. Furu sma e taki dati den felem nanga den artikel di e taki fu moni problema èn di de fu feni tapu jw.org, ben de wan bigi yepi gi den.

12. San wan sma kan aksi ensrefi efu a wani teki bun besroiti gi en osofamiri?

¹² Son sma teki wan wroko di meki taki den ben musu froisi gwe farawe fu den osofamiri. Ma bakaten, furu fu den sma disi kon si taki dati no ben de wan koni sani fu du. Fosi yu teki wan nyun wroko, no luku nomo omeni moni yu o meki, ma luku tu efu a wroko disi o yepi yu nanga yu osofamiri fu tan krosbei fu Yehovah (Luk. 14:28). Aksi yusrefi: ’San kan psa nanga mi trowlibi te mi no de nanga mi trowpatna? Mi o man go na ala den konmakandra, mi o man go na ini a preikiwroko, èn mi o man de makandra nanga mi Kresten brada nanga sisa?’ Efu yu abi pkin, dan yu musu aksi yusrefi a prenspari sani disi tu: ’Fa mi o kweki mi pkin „nanga a leri èn nanga den rai fu Yehovah” efu mi no de nanga den?’ (Ef. 6:4). Te yu e teki wan besroiti, dan du san Yehovah wani. No du san famiriman noso mati di no e bribi na ini Yehovah e taigi yu fu du.c Tony, di e libi na a westsei fu Asia, ben kisi difrenti okasi fu feni wan bun wroko na ini wan tra kondre. Ma baka di a begi fu a tori èn a taki fu en nanga en wefi, dan a besroiti fu no teki nowan fu den wroko di a ben kan feni. Na presi fu dati, en nanga en wefi prakseri fa den ben kan tyari kenki kon, so taki den no ben abi fu gebroiki so furu moni moro. Tide na a dei Tony e taki: „Mi ben abi a grani fu yepi difrenti sma fu kon sabi Yehovah, èn den pkin fu wi lobi a waarheid. Mi osofamiri kon si taki so langa wi e du san Yesus ben taki na ini Mateyus 6:33, Yehovah o sorgu gi wi.”

TE WI E PRAKSERI WI OWRUDEI

13. San na wan tu sani di wi kan du nownow kba fu man sorgu wisrefi na wi owrudei.

¹³ Wi kan sori tu taki wi e fertrow tapu Yehovah te wi e seti sani gi wi owrudei. Bijbel e gi wi dek’ati fu wroko tranga so taki wi kan abi nofo moni fu man sorgu wisrefi bakaten (Odo 6:6-11). Efu wi man poti moni na wan sei gi a ten di e kon, dan dati na wan bun sani. A tru taki moni kan yepi wi na ini muilek ten (Preik. 7:12). Ma noiti wi wani taki moni tron a moro prenspari sani na ini wi libi.

14. Fa Hebrewsma 13:5 kan yepi wi fu no broko wi ede tumsi nanga a fasi fa wi o sorgu wisrefi na ini a ten di e kon?

¹⁴ Yesus ben ferteri wan tori di e sori taki wan sma di e kibri moni „no gudu na ini Gado ai” (Luk. 12:16-21). Nowan sma no sabi san o psa tamara (Odo 23:4, 5; Yak. 4:13-15). Boiti dati, Yesus ben taki dati ala sma di wani tron en disipel musu de klarklari fu „libi den sani” di den abi (Luk. 14:33). Na dati den Kresten na ini Yudea ben du na a ten fu den apostel. Den ben de klarklari fu libi ala den sani di den ben abi na baka (Hebr. 10:34). Na ini a ten disi, furu brada nanga sisa lasi den wroko fu di den weigri fu horbaka gi wan politiek partij (Openb. 13:16, 17). Fa a du kon taki den ben man du dati? Den e fertrow dorodoro na ini a sani disi di Yehovah pramisi: „Mi no o libi yu kwetikweti èn noiti mi o gowe fu yu.” (Leisi Hebrewsma 13:5.) Dati meki wi e du ala san wi man fu sorgu taki wi abi nofo moni te wi kon owru. Èn wi de seiker taki Yehovah o yepi wi efu wan sani psa di wi no ben ferwakti.

15. Fa Kresten p’pa nanga m’ma musu si den pkin fu den? (Luku a prenki.)

¹⁵ Na ini son kulturu, sma e meki pkin nanga a denki taki den pkin o sorgu gi den te den kon owru. Bijbel e taki dati na p’pa nanga m’ma musu sorgu gi den pkin fu den (2 Kor. 12:14). A no de fu taki dati te p’pa nanga m’ma kon owru, dan a kan de fanowdu taki den pkin fu den e yepi den nanga son sani. Èn furu pkin de klarklari fu gi den p’pa nanga m’ma a yepi dati (1 Tim. 5:4). Ma p’pa nanga m’ma di e fertrow tapu Yehovah e ferstan taki a prenspari srefsrefi fu yepi den pkin fu den fu tron futuboi fu Yehovah. Te den e du dati, dan den o de moro koloku leki te den e kweki den pkin nanga a denki taki den o sorgu gi den te den kon owru.​—3 Yoh. 4.

16. Fa p’pa nanga m’ma kan sreka den pkin fu den so taki den kan sorgu gi densrefi te den kon bigi? (Efeisesma 4:28)

¹⁶ Te yu e yepi yu pkin fu kon sabi fa den kan sorgu gi densrefi, dan a bun fu sori den taki yu e fertrow tapu Yehovah. Yonguyongu kba den kan leri taki a bun fu wroko tranga (Odo 29:21; leisi Efeisesma 4:28). Te den e kon moro bigi, dan yu kan yepi den fu wroko bun na skoro. P’pa nanga m’ma kan suku Bijbel gronprakseri na ini den buku fu wi fu yepi den pkin fu teki koni besroiti te a abi fu du nanga a skoroleri di den o teki. Na so den o man sorgu gi densrefi èn den o abi moro ten fu preiki noso fu pionier srefi.

17. Fu san wi kan de seiker?

¹⁷ Den getrow futuboi fu Yehovah kan de seiker taki a man sorgu gi den èn taki a wani du dati tu. Now di a kba fu a grontapu disi e kon moro krosbei, wi musu fertrow moro tapu Yehovah. Ma awinsi san e psa, wi no o tweifri srefsrefi taki Yehovah o gebroiki a makti fu en fu gi wi den sani di wi abi fanowdu. Wi kan de seiker taki a man yepi wi ala ten, awinsi pe wi de.