STUDIE-ARTIKEL 28
SINGI 123 Saka yusrefi na ondro Gado tiri
Yu sabi san tru èn san no tru?
„Tanapu kánkan èn meki ala sani di tru de leki wan leribuba di tai lontu un mindribere.”—EF. 6:14.
SAN WI O LERI
Wi o luku fa wi kan sabi san na den tru tori di wi leri fu Yehovah èn san na den lei di Satan nanga den feanti fu wi wani meki sma bribi.
1. Fa yu e si a waarheid?
A PIPEL fu Yehovah lobi den tru tori di de fu feni na ini a Wortu fu en. Wi e bribi den tru tori dati (Rom. 10:17). Wi kon abi na overtoigi taki Yehovah seti a Kresten gemeente leki „wan pilari èn wan stonfutu fu a tru anbegi” (1 Tim. 3:15). Èn wi de klarklari fu saka wisrefi na ondro „den wan di e teki fesi” na wi mindri. Den e ferklari den tru tori fu Bijbel gi wi èn den e gi wi rai di e yepi wi fu du a wani fu Gado.—Hebr. 13:17.
2. Soleki fa Yakobus 5:19 e sori, dan san kan psa nanga wi baka te wi kon leri sabi a waarheid?
2 Ma aladi wi e bribi a waarheid èn wi e ferstan taki wi musu gi yesi na den rai fu Yehovah en organisâsi, tòg sma kan kori wi fu gwe libi a waarheid. (Leisi Yakobus 5:19.) Satan ben o breiti efu a ben kan meki wi lasi fertrow na ini Bijbel noso na ini den rai di wi e kisi fu Yehovah en organisâsi.—Ef. 4:14.
3. Fu san ede wi musu tai hori na san tru? (Efeisesma 6:13, 14)
3 Leisi Efeisesma 6:13, 14. Heri esi, Didibri o gebroiki lei fu kori den regering fu meki den opo densrefi teige Yehovah (Openb. 16:13, 14). Wi kan ferwakti tu taki Satan o du moro muiti fu kori a pipel fu Yehovah (Openb. 12:9). Dati meki a prenspari taki wi e leri fu si san tru èn san no tru èn wi musu leri tu fu gi yesi na a tru leri (Rom. 6:17; 1 Petr. 1:22). A sani disi prenspari efu wi wani psa a bigi banawtu libilibi.
4. San wi o luku na ini na artikel disi?
4 Na ini na artikel disi, wi o taki fu tu fasi di wi abi fanowdu fu man si san tru èn fu man gi yesi na den rai di e kmoto fu Yehovah en organisâsi. Baka dati wi o taki fu dri sani di wi musu du fu man tai hori na a tru leri.
FASI DI WI ABI FANOWDU FU MAN SI SAN TRU
5. Te wi abi bigi lespeki gi Yehovah, dan fa dati e yepi wi fu si san tru?
5 Bigi lespeki gi Yehovah. Te wi abi bigi lespeki gi Yehovah, dan dati wani taki dati wi lobi en so te, taki wi no wani du nowan enkri sani di a no feni bun. Wi e angri fu kon sabi san bun èn san no bun, san tru èn san no tru, so taki Yehovah kan feni wi bun (Odo 2:3-6; Hebr. 5:14). Noiti wi musu frede libisma moro leki fa wi lobi Yehovah, fu di den sani di e plisi libisma nofo tron na sani di Yehovah no lobi.
6. Fa frede gi libisma meki taki tin edeman fu a pipel fu Israel no taki sani leki fa den ben de trutru?
6 Efu wi ben o frede libisma moro leki fa wi lobi Gado, dan kande wi ben o bigin bribi sani di no tru. Luku na eksempre fu den 12 edeman di ben go luku a kondre di Yehovah ben pramisi den Israelsma. Tin fu den edeman dati ben e frede den Kanansma moro leki fa den ben lobi Yehovah. Den taigi den Israelsma: „Wi no o man go feti nanga den sma, bika den tranga moro wi” (Num. 13:27-31). A tru taki den Kanansma ben tranga moro den Israelsma. Ma efu wan sma ben o taki dati den Israelsma no ben o man wini den feanti fu den, dan a sma dati ben fergiti Yehovah. Den tin edeman ben musu poti prakseri na san Yehovah ben wani taki den Israelsma du. Den ben musu denki dipi tu fu den sani di a ben du gi den wan syatu pisi ten na fesi. Efu den ben du dati, dan den ben o si taki a makti fu den Kanansma ben de noti te yu ben teki en gersi nanga a bigi krakti fu na almakti Gado, Yehovah. Ma tra fasi leki den tin edeman dati, Yosua nanga Kaleb ben wani taki Yehovah feni den bun. Den taigi a pipel: „Efu Yehovah feni wi bun, dan trutru a sa tyari wi go na ini a kondre disi.”—Num. 14:6-9.
7. Fa wi kan kon abi moro lespeki gi Yehovah? (Luku a prenki.)
7 Efu wi wani abi moro lespeki gi Yehovah, dan ibri leisi te wi musu teki wan besroiti, wi musu prakseri san a feni bun (Ps. 16:8). Te yu e leisi den Bijbel tori, dan aksi yusrefi: ’Efu mi ben de na ini a situwâsi dati, dan sortu besroiti mi ben o teki?’ Fu eksempre, prakseri taki yu ben de drape e arki fa den tin edeman fu den Israelsma ben e taki dati den Israelsma no o man wini den Kanansma. Yu ben o bribi den èn yu ben o frede? Noso a lobi di yu abi gi Yehovah ben o tranga moro a frede di yu e frede libisma? Wan bigi grupu Israelsma no ben bribi Yosua nanga Kaleb di ben taki san tru. Dati meki den lasi na okasi fu go na ini a Pramisi Kondre.—Num. 14:10, 22, 23.
Suma yu ben o bribi? (Luku paragraaf 7)
8. Sortu fasi wi musu du tranga muiti fu kon abi, èn fu san ede?
8 Sakafasi. Yehovah e meki sma di abi sakafasi kon sabi san tru (Mat. 11:25). Wi ben de klarklari fu meki sma yepi wi fu kon sabi san tru (Tori 8:30, 31). Tòg wi musu luku bun taki wi no e kisi bigifasi. Te wan sma abi bigifasi, dan a kan bigin denki furu fu ensrefi. Kande a e bigin denki taki en srefi kan besroiti efu a o hori ensrefi na den gronprakseri fu Gado noso efu a o gi yesi na den rai fu na organisâsi.
9. Fa wi kan tan sori sakafasi?
9 Efu wi wani tan sori sakafasi, dan wi musu hori na prakseri taki wi na noti te wi e teki wisrefi gersi nanga Yehovah (Ps. 8:3, 4). Wi kan begi Yehovah tu fu yepi wi fu kon abi moro sakafasi èn fu de sma di wan teki leri fu en. Yehovah o yepi wi fu no denki taki den prakseri fu wi prenspari moro leki di fu en. Wi e kon sabi den prakseri fu Yehovah nanga yepi fu Bijbel èn nanga yepi fu en organisâsi. Te yu e leisi Bijbel, dan suku beweisi di e sori taki Yehovah lobi te sma abi sakafasi, ma a no lobi te sma abi bigifasi èn te den e denki tumsi furu fu densrefi. Èn du tranga muiti fu tan sori sakafasi spesrutu te yu e kisi wan grani di e meki taki trawan e poti prakseri na yu.
FA WI KAN TAN GI YESI NA SAN TRU
10. Suma Yehovah gebroiki fu gi en pipel rai èn fu tiri den?
10 Tan fertrow den rai di wi e kisi fu Yehovah en organisâsi. Na ini owruten Israel, Yehovah ben gebroiki Moses fu gi en pipel rai èn bakaten a gebroiki Yosua fu du dati (Yos. 1:16, 17). Sani ben e waka bun nanga den Israelsma te den ben e lespeki den man disi di ben e teki presi gi Yehovah Gado. Hondrohondro yari bakaten di a Kresten gemeente seti, dan den 12 apostel ben e gi Gado pipel rai (Tori 8:14, 15). Baka dati, sosrefi tra owruman na ini Yerusalem ben e gi rai. A rai di den Kresten ben e kisi fu den getrow man dati, „tranga a bribi fu den gemeente trutru èn dei fu dei moro nanga moro sma ben e tron bribiman” (Tori 16:4, 5). Na ini a ten disi, Yehovah e blesi wi tu te wi e gi yesi na den rai di wi e kisi fu na organisâsi fu en. Ma fa Yehovah ben o firi efu wi ben o weigri fu lespeki den man di a poti fu teki fesi? Fu man piki na aksi dati, dan meki wi go luku san psa di den Israelsma ben e go na a Pramisi Kondre.
11. San psa nanga den sma na ini owruten Israel di ben opo densrefi teige Moses? (Luku a prenki.)
11 Di den Israelsma ben de na pasi fu go na a Pramisi Kondre, dan prenspari man opo densrefi teige Moses èn den no ben e lespeki a frantwortu di Yehovah ben gi en. Den ben taki: „A heri pipel [a no Moses w’wan] santa èn Yehovah de na den mindri” (Num. 16:1-3). A tru taki gi Gado „a heri pipel” ben santa, ma tòg Yehovah ben poti Moses fu teki fesi na mindri a pipel fu en (Num. 16:28). Di den sma bigin krutu Moses, dan fu taki en leti, den ben e krutu Yehovah. Den no ben e poti prakseri na san Yehovah ben wani, ma den ben e poti prakseri na san den srefi ben wani. Den ben wani moro makti èn moro grani. Gado kiri den sma di ben e sutu faya gi trawan fu opo densrefi teige Moses èn a kiri dusundusun tra sma di ben e horbaka gi den (Num. 16:30-35, 41, 49). Na ini a ten disi wi kan de seiker taki Yehovah no lobi den wan di no e lespeki den seti fu na organisâsi fu en.
Gi suma yu ben o horbaka? (Luku paragraaf 11)
12. Fu san ede wi kan tan fertrow na organisâsi fu Yehovah?
12 Wi kan tan fertrow na organisâsi fu Yehovah. Son leisi a de krin taki wi musu kenki a fasi fa wi ben e ferstan wan tru tori fu Bijbel, noso wan sani di abi fu du nanga a fasi fa wi e dini Yehovah. Te dati de so, dan a Tiri Skin no e draidrai fu tyari den kenki disi kon (Odo 4:18). A Tiri Skin e du dati fu di san prenspari gi den, na taki den wani plisi Yehovah. Boiti dati, a Tiri Skin e du ala san den man fu hori densrefi na Gado Wortu di e sori ala anbegiman fu Yehovah san na a wani fu en.
13. San na „a soifri leri” èn san wi musu du nanga en?
13 Tan hori yusrefi na „a soifri leri” (2 Tim. 1:13). „A soifri leri” na den Kresten leri di de fu feni na ini Bijbel (Yoh. 17:17). Den leri disi na ala sani di wi e bribi. Na organisâsi fu Yehovah leri wi fu tan hori wisrefi na den leri dati. Solanga wi e du dati, wi o kisi blesi.
14. Fa son Kresten tapu fu hori densrefi na „a soifri leri”?
14 San kan psa te wi e tapu fu hori wisrefi na „a soifri leri”? Luku na eksempre disi: Na ini a fosi yarihondro, son Kresten ben e panya wan lei taki a dei fu Yehovah ben doro kba. Son Kresten na ini Tesalonika no go ondrosuku efu a sani dati ben tru, ma den bigin bribi en èn den ben e ferteri trawan a lei disi tu. Efu den ben hori na prakseri san Paulus ben leri den di a ben de ete nanga den, dan den no ben o bribi a lei dati (2 Tes. 2:1-5). Paulus ben gi den brada nanga sisa fu en a rai fu no bribi ala san den ben e yere. Èn fu yepi den Tesalonikasma na ini a ten di ben o kon, meki Paulus skrifi a sani disi na a kba fu a di fu tu brifi di a ben skrifi gi den: „Mi, Paulus, e seni taki unu odi. Mi srefi skrifi unu, soleki fa unu kan si na ini ala den brifi fu mi. Disi na a fasi fa mi e skrifi.”—2 Tes. 3:17.
15. Fa wi kan sorgu taki wi no e bribi lei di gersi tru tori? Gi wan eksempre. (Luku den prenki.)
15 San wi kan leri fu den sani di Paulus taigi den Tesalonikasma? Te wi e yere wan sani di no e kruderi nanga san wi leri fu Bijbel, noso te wi e yere wan span tori, dan wi musu gebroiki wi ferstan. Na ini a Sovyet-Unie, sma fu a regering ben seni wan brifi gi den brada fu wi èn den meki den brada denki taki a brifi disi ben kmoto fu na edekantoro. A brifi ben e gi wan tu fu den brada dek’ati fu bigin wan organisâsi di ben e wroko aparti fu Yehovah en organisâsi. A ben gersi leki a brifi ben kmoto fu Yehovah en organisâsi. Ma den brada di ben e dini Yehovah getrow, no meki a sani disi kori den. Den kon si taki a boskopu na ini a brifi no ben e kruderi nanga san den ben leri. Na ini a ten disi, sma di e gens a waarheid e gebroiki Internet nanga social media son leisi fu bruya wi, so taki prati kan kon na wi mindri. Na presi taki wi e ’meki sma bruya wi denki so esi’, wi musu ondrosuku efu den sani di wi e yere noso e leisi e kruderi nanga den tru tori di wi sabi kba.—2 Tes. 2:2; 1 Yoh. 4:1.
No meki leitori di gersi tru tori kori yu (Luku paragraaf 15)a
16. Soleki fa Romesma 16:17, 18 e sori, dan san wi musu du efu son sma e ferteri sani di no e kruderi nanga a waarheid?
16 Tan na ini wánfasi nanga den wan di e tai hori na Yehovah. Gado wani taki wi e anbegi en na ini wánfasi. Wi o tan de wán so langa wi e tan hori wisefi na san tru. Iniwan sma di e ferteri sani di no e kruderi nanga a waarheid e tyari prati kon na ini a gemeente, èn dati meki Gado e warskow wi fu „no bumui nanga den”. Efu wi e bemui nanga den sma disi, dan wi srefi kan bigin bribi sani di no tru èn disi kan meki wi drai baka gi Yehovah.—Leisi Romesma 16:17, 18.
17. Sortu wini wi e kisi te wi sabi san tru èn te wi e tan hori wisrefi na dati?
17 Te wi sabi san tru èn te wi e tan hori wisrefi na dati, dan wi o tan krosbei na Yehovah èn a bribi fu wi no o kon swaki (Ef. 4:15, 16). Sma no o man kori wi nanga falsi leri èn nanga falsi nyunsu, èn wi o feni kibri na Yehovah na a ten fu a bigi banawtu. Tan hori yusrefi na san tru „dan a Gado fu freide o de nanga [yu]”.—Fil. 4:8, 9.
SINGI 122 Tanapu kánkan!
a SAN WI E SI TAPU A PRENKI: A prenki disi e sori fa wan tu tenti yari psa, brada na ini a Sovyet-Unie ben kisi wan brifi di ben gersi leki a ben kmoto fu a na edekantoro. Fu taki en leti a brifi disi ben kmoto fu den sma fu a regering. Na ini a ten disi, den feanti fu wi kan gebroiki Internet fu panya wan lei fu na organisâsi fu Yehovah, soso fu meki wi bruya.