Abi dek’ati neleki Sadok

1-2. Suma ben de Sadok? (1 Kroniki 12:22, 26-28)

PRUBERI fu si a sani disi na yu fesi. Moro leki 340.000 man nanga uma ben kon makandra fu poti David leki kownu fu heri Israel. Dri dei langa, den man nanga uma tan na ini a bergi kontren krosbei fu Hebron. Den ben e lafu, den ben e taki tori, èn den ben e singi prèisesingi gi Yehovah (1 Kron. 12:39). Wan yonguman di nen Sadok ben de drape tu. Kande furu sma no ben o poti prakseri na en. Ma Yehovah poti prakseri na en èn a wani taki wi du dati tu. (Leisi 1 Kroniki 12:22, 26-28.) Suma ben de Sadok?

² Sadok ben de wan priester di ben e wroko skinskin nanga Granpriester Abiatar. Boiti dati, Gado ben gi Sadok furu koni èn a ben man ferstan krin san na a wani fu En (2 Sam. 15:27). Te sma ben abi yepi fanowdu, dan den ben gwenti go suku rai na Sadok. A ben de wan dek’ati man tu. Na ini na artikel disi, wi o luku fa Sadok ben sori dek’ati.

3. (a) Fu san ede den anbegiman fu Yehovah musu abi dek’ati? (b) San wi o luku na ini na artikel disi?

³ Na ini den lasti dei disi, Satan e pruberi moro leki oiti bifo fu pori a bribi di wi abi na ini Yehovah (1 Petr. 5:8). Dati meki wi musu abi dek’ati fu man hordoro teleki Yehovah pori Satan nanga na ogri grontapu fu en (Ps. 31:24). Meki wi go luku dri fasi fa wi kan sori dek’ati neleki Sadok.

HORBAKA GI GADO KOWNUKONDRE

4. Fu san ede a pipel fu Yehovah abi dek’ati fanowdu fu man horbaka gi Gado Kownukondre? (Luku a prenki.)

⁴ Leki a pipel fu Yehovah, wi e horbaka fayafaya gi Gado Kownukondre, ma nofo tron wi abi dek’ati fanowdu fu man du dati (Mat. 6:33). Fu eksempre, na ini na ogri grontapu disi, wi abi dek’ati fanowdu fu man hori wisrefi na den wet fu Yehovah èn fu man preiki a bun nyunsu fu a Kownukondre (1 Tes. 2:2). Boiti dati, den politiek problema fu a ten disi e tyari prati kon moro nanga moro na ini a grontapu disi. Dati meki wi abi dek’ati fanowdu fu no teki sei na ini den afersi disi (Yoh. 18:36). Furu fu den futuboi fu Yehovah kon abi moni problema, sma fon den, noso den ben musu koti strafu fu di den ben weigri fu teki prati na ini politiek noso fu go na ini a legre.

5. Fu san ede Sadok ben abi dek’ati fanowdu fu man horbaka gi David?

⁵ Sadok no ben go na Hebron soso fu meki prisiri fu di David ben tron kownu. A ben tyari den fetsani fu en go nanga en èn a ben de srekasreka fu feti (1 Kron. 12:38). A ben de klarklari fu go makandra nanga David fu feti teige den feanti fu Israel. Kande Sadok no ben abi ondrofeni leki fetman, ma a yonguman disi ben abi furu dek’ati.

6. Fu san ede David ben de wan bun eksempre gi Sadok? (Psalm 138:3)

⁶ Pe wan priester leki Sadok ben leri fu abi so furu dek’ati? A ben sabi furu man di ben tranga èn di ben abi dek’ati. A no de fu taki dati a leri furu fu den. Fu eksempre, di David ben e ’teki fesi na ini a legre fu Israel te den ben e go na feti’, dan ala den Israelsma ben wani taki a tron kownu (1 Kron. 11:1, 2). Ala ten David ben abi a fertrow taki Yehovah ben o yepi en fu wini den feanti fu en. (Ps. 28:7; leisi Psalm 138:3.) Sadok ben leri tu fu dek’ati man soleki Yoyada nanga en manpkin Benaya di ben de wan fetman, èn fu den 22 tra legre edeman di ben e horbaka gi David (1 Kron. 11:22-25; 12:26-28). Ala den man disi ben e du ala san den man fu poti David leki kownu èn fu kibri en libi.

7. (a) Kari wan tu eksempre fu sma na ini a ten disi di e leri wi fu abi dek’ati. (b) San yu e leri fu Brada Nsilu, soleki fa a felem e sori?

⁷ Te wi e prakseri fa trawan sori dek’ati fu man tan horbaka gi Yehovah èn gi a Kownukondre fu en, dan wi srefi wani sori dek’ati. Di wi Kownu, Krestes Yesus, ben de na grontapu, dan a weigri krinkrin fu bemui na ini den politiek afersi fu a grontapu fu Satan (Mat. 4:8-11; Yoh. 6:14, 15). Ala ten a ben abi a fertrow taki Yehovah ben o gi en a krakti di a ben abi fanowdu fu du san reti. Na ini a ten disi, wi abi furu eksempre sosrefi fu yonguman di weigri fu go na ini a legre noso fu teki prati na politiek. Kande yu kan leisi wan tu fu den ondrofenitori fu den tapu jw.org.a

YEPI DEN BRADA NANGA SISA FU YU

8. O ten owruman kan abi dek’ati fanowdu fu man yepi den brada nanga sisa fu den?

⁸ A pipel fu Yehovah lobi fu yepi makandra (2 Kor. 8:4). Ma son leisi, den abi dek’ati fanowdu fu man du dati. Fu eksempre, te feti de na ini a kondre, dan den owruman fu den gemeente e ferstan taki den brada nanga sisa abi yepi nanga dek’ati fanowdu. Kande den musu kisi buku nanga tra sani, noso kande den abi n’nyan fanowdu, krosi, noso wan presi fu tan. Son leisi, ogri ben kan miti den owruman disi. Ma fu di den lobi den brada nanga sisa, meki den e du ala san den man fu sorgu taki den e kisi san den abi fanowdu (Yoh. 15:12, 13). Na so den e teki na eksempre fu Sadok di ben abi dek’ati.

9. Soleki fa 2 Samuel 15:27-29 e sori, dan san David taigi Sadok fu du? (Luku a prenki.)

⁹ Sma ben wani du ogri nanga David. En manpkin Absalom ben de nomonomo fu kiri en fu di en srefi ben wani tron kownu (2 Sam. 15:12, 13). David ben musu gwe libi Yerusalem wantewante. A taigi den futuboi fu en: „Meki wi lowe gowe nownow, bika wi no o man lowe te Absalom kon!” (2 Sam. 15:14) Di den futuboi ben e gwe, dan David besroiti taki wan sma ben musu tan na ini Yerusalem fu luku gi en san Absalom ben abi na prakseri fu du. Dati meki a seni Sadok nanga tra priester go baka na a foto fu tan drape, so taki den ben kan taigi en san ben e psa drape. (Leisi 2 Samuel 15:27-29.) Ma den ben musu luku bun. Den sani di David ben taigi den priester fu du ben kan tyari problema kon gi den. Den ben kan lasi den libi srefi! Bijbel e sori taki Absalom ben e denki soso ensrefi, a ben abi bit’ati, èn a ben abi takr’ati. Sobun, prakseri san Absalom ben o du nanga Sadok èn nanga den tra priester efu a ben kon sabi taki David ben seni den kon drape fu luku gi en san a ben abi na prakseri fu du.

10. Fa Sadok nanga den tra priester kibri a libi fu David?

¹⁰ David aksi Sadok nanga wan tra bun mati, Husai, fu yepi en fu seti wan plan (2 Sam. 15:32-37). Husai ben musu du neleki a ben e horbaka gi Absalom èn a ben musu gi en rai fa fu go feti nanga David. A sani disi ben o gi David ten fu sreka ensrefi fu go feti nanga Absalom. Di Absalom arki a rai fu Husai, dan Husai taigi Sadok nanga Abiatar san ben psa (2 Sam. 17:8-16). Baka dati, den tu man disi sorgu taki David kon sabi san Absalom ben o du (2 Sam. 17:17). Yehovah yepi Sadok nanga den tra priester fu yepi kibri David en libi.​—2 Sam. 17:21, 22.

11. Te wi e yepi wi brada nanga sisa, dan fa wi kan sori dek’ati neleki Sadok?

¹¹ Fa wi kan sori dek’ati neleki Sadok te ogri kan miti wi brada nanga sisa èn te den abi yepi fanowdu? (1) Gi yesi na den rai di yu e kisi. Na ini den situwâsi dati, a prenspari taki wi e tan na ini wánfasi. Gi yesi na den rai fu a bijkantoro na ini a kondre fu yu (Hebr. 13:17). Owruman musu abi a gwenti fu luku den rai di e sori fa fu sreka gi rampu èn san den musu du te wan rampu de (1 Kor. 14:33, 40) (2) Abi dek’ati, ma luku bun. (Odo 22:3) Gebroiki yu ferstan. Sorgu taki yu e tan veilig. (3) Fertrow tapu Yehovah. Hori na prakseri taki Yehovah wani taki sani waka bun nanga yu èn nanga yu brada nanga sisa. A kan yepi yu fu horbaka gi yu brada nanga sisa sondro taki ogri miti yu.

12-13. San yu leri fu den ondrofenitori fu Viktor nanga Vitalii? (Luku a prenki.)

¹² Luku den ondrofenitori fu Viktor nanga Vitallii. Den tu owruman disi ben e tyari n’nyan nanga watra gi den Kresten brada nanga sisa fu den na ini Ukraini. Viktor e taki: „Wi suku n’nyan na ala sei. Nofo tron gon ben e sutu na wi lontu. Wan brada di ben abi wan wenkri, gi n’nyan leki bijdrage. A n’nyan disi yepi furu preikiman wan heri pisi ten. Di wi ben e poti sani na ini a truck fu wi, dan wan raket fadon sowan 20 meter fu pe wi ben de. A heri dei mi aksi Yehovah fu gi mi dek’ati so taki mi ben kan tan yepi den preikiman.”

¹³ „Wi ben musu abi furu dek’ati”, na so Vitalii e taki. „A fosi leisi di mi ben musu tyari n’nyan gi den brada nanga sisa, mi ben de na pasi 12 yuru langa. Mi begi Yehovah a heri pasi.” Vitalii ben abi dek’ati, ma a ben e luku bun tu. A e taki: „Mi tan aksi Yehovah fu gi mi koni èn fu yepi mi fu no denki tumsi furu fu misrefi. Mi rèi soso tapu den pasi di lanti ben gi sma primisi fu rèi na tapu. Mi si nanga mi eigi ai fa den brada nanga sisa ben e wroko makandra èn a sani disi gi mi dek’ati. Den ben e puru sani na pasi di ben e tapu sma fu rèi go doro, den ben e tyari sani kon na wán di difrenti organisâsi ben seni kon fu yepi den wan di de na nowtu, èn den ben lai den sani disi na ini truck. Boiti dati, den ben e sorgu gi presi pe mi nanga Viktor ben kan rostu te wi ben de na pasi.”

TAI HORI NA YEHOVAH

14. Fa wi ben o firi te wan sma di wi lobi drai baka gi Yehovah?

¹⁴ Wan fu den moro muilek tesi di kan miti wi, na te wan famiriman noso wan bun mati e gwe libi Yehovah (Ps. 78:40; Odo 24:10). O moro wi lobi a sma, o moro a situwâsi o muilek gi wi. Efu sowan hati sani psa nanga yu, dan a kan gi yu dek’ati te yu e prakseri fa Sadok tai hori na Yehovah.

15. Fu san ede Sadok ben abi dek’ati fanowdu fu man tai hori na Yehovah? (1 Kownu 1:5-8)

¹⁵ Sadok tan gi yesi na Yehovah di en bun mati Abiatar besroiti fu drai baka gi Yehovah. A sani disi psa na a kba fu a tiri fu David. Di David ben owru kba èn a ben de fu dede, dan en manpkin Adonia pruberi fu poti ensrefi leki kownu aladi Yehovah ben wani taki Salomo tron kownu (1 Kron. 22:9, 10). Abiatar besroiti fu horbaka gi Adonia. (Leisi 1 Kownu 1:5-8.) Di Abiatar du dati, dan a no drai baka gi David w’wan ma gi Yehovah tu. Yu kan ferstan fa Sadok ben e sari èn a fa a sani di Abiatar du hati en. Sowan 40 yari langa, en nanga Abiatar ben wroko skinskin makandra leki priester (2 Sam. 8:17). Den ala tu ben tyari a „santa kisi fu a tru Gado” (2 Sam. 15:29). Na a bigin, den ala tu ben horbaka gi David leki kownu, èn den ben du furu tra sani makandra.​—2 Sam. 19:11-14.

16. San ben yepi Sadok fu tai hori na Yehovah?

¹⁶ Aladi Abiatar ben drai baka gi David, tòg Sadok tan gi yesi na Yehovah. David ben sabi taki a ben kan fertrow Sadok ala ten. Di a kon na krin san Adonia ben wani du, dan David meki Sadok, Natan, nanga Benaya salfu Salomo leki kownu (1 Kow. 1:32-34). A ben musu fu de wan dek’ati gi Sadok fu de makandra nanga getrow anbegiman fu Yehovah, soleki Natan nanga tra man di ben e horbaka gi David. (1 Kow. 1:38, 39). Di Salomo tron kownu, a „gi Priester Sadok a wroko fu Abiatar”.​—1 Kow. 2:35.

17. Fa yu kan de leki Sadok te wan sma di yu lobi e drai baka gi Yehovah?

¹⁷ Fa yu kan de leki Sadok? Efu wan sma di yu lobi e besroiti fu gwe libi Yehovah, dan sori Yehovah taki yu e tai hori na en (Yos. 24:15). Yehovah o gi yu a krakti nanga a dek’ati di yu abi fanowdu. Begi Yehovah èn tan krosbei fu den mati fu yu di e tai hori na en. Yehovah breiti taki yu e tai hori na en èn a o blesi yu gi dati.​—2 Sam. 22:26.

18. San yu e leri fu na ondrofenitori fu Marco nanga Sidse?

¹⁸ Luku na eksempre fu Marco nanga en wefi Sidse. Den tu umapkin fu den gwe libi waarheid. Marco e taki: „Te den pkin fu yu gebore, dan yu lobi den so te. Yu ben o du ala san de fanowdu fu kibri den gi ogri. Sobun, te den e besroiti fu gwe libi Yehovah, dan a sani dati e broko yu ati.” Marco e taki moro fara: „Ma Yehovah e yepi wi fu hordoro. A e sorgu taki te Mi swaki, mi wefi tranga, èn te En swaki, dan mi tranga.” Sidse e taki: „Wi no ben o man hordoro efu Yehovah no ben gi wi a krakti di wi ben abi fanowdu. Mi ben e sari srefsrefi èn mi ben feni taki na mi meki taki den umapkin fu mi drai baka gi Yehovah. Baka wan syatu pisi ten, wan sisa di mi no ben si omeni yari, kon na mi. A poti en anu na tapu mi skowru, a luku mi na ini mi ai, dan a taki: ’Sidse, no fergiti a sani disi, a no yu fowtu!’ Fu di Yehovah e yepi mi, meki mi man tan dini en nanga prisiri.”

19. San yu o du?

¹⁹ Yehovah wani taki ala den anbegiman fu en musu abi dek’ati neleki Sadok (2 Tim. 1:7). Ma a no wani taki wi e fertrow tapu wisrefi. A wani taki wi e fertrow na en tapu. Sobun, te yu de na ini wan situwâsi pe yu abi dek’ati fanowdu, dan suku yepi na Yehovah. Yu kan de seiker taki a o yepi yu fu abi dek’ati neleki Sadok.​—1 Petr. 5:10.