A pikin di Gado pramisi

Yosef nanga Maria no e drai go baka na Nasaret, ma den e tan na ini Betlehem. Te Yesus abi aiti dei, den e besnèi en soleki fa a Wet di Gado gi Israel e taki (Lefitikus 12:2, 3). Den Dyu abi a gwenti tu fu gi wan boi en nen na a dei dati. Yosef nanga Maria e gi a boi fu den a nen Yesus, soleki fa na engel Gabrièl ben taigi den.

Moro leki wán mun e pasa èn Yesus abi 40 dei now. Pe en papa nanga en mama e tyari en go disi leisi? Den e tyari en go na a tempel na ini Yerusalem di de wan tu kilometer nomo fu a presi pe den e tan. A Wet e taki dati 40 dei baka te wan boi gebore, en mama musu tyari wan ofrandi na a tempel fu krin ensrefi.​—Lefitikus 12:4-8.

Na dati Maria e du. A e tyari tu pikin fowru leki ofrandi. Disi e sori taki Yosef nanga Maria no gudu. A Wet e taki dati wan mama ben musu tyari wan yongu manskapu nanga wan fowru leki ofrandi. Ma efu a no ben man pai gi wan manskapu, dan a ben kan tyari tu osodoifi noso tu stondoifi. Na dati nomo Maria man tyari leki ofrandi.

Wan owru man e waka miti Yosef nanga Maria na a tempel. A man disi nen Simeon. Gado ben sori en taki fosi a dede, a ben o si a Krestes noso a Mesias di ben o kon. A dei disi santa yeye e meki Simeon go na a tempel pe a e miti Yosef, Maria nanga a manpikin fu den. Simeon e teki a pikin na ini en anu.

Te Simeon e hori Yesus, a e taigi Gado tangi, dan a e taki: „Moro Hei Masra, meki yu srafu dede nanga wan korostu ati soleki fa yu taki. Bika mi ai si a sma di yu sa gebroiki fu tyari frulusu kon èn di yu sreka na fesi ala sma. A de wan leti di e puru a dungru di de tapu den trakondre sma èn a o meki yu pipel Israel kisi glori.”​—Lukas 2:29-32.

Yosef nanga Maria e fruwondru fu san den e yere. Simeon e blesi den èn a e taigi Maria taki en manpikin ’na a sma di sa meki furu sma na ini Israel fadon, ma a sa meki den opo tanapu baka’. A taigi Maria tu taki a ben o sari, iya, a ben o firi neleki wan langa feti-owru boro en.​—Lukas 2:34.

Wan tra sma de na a tempel a dei dati. A sma dati na Ana, wan umaprofeiti di abi 84 yari. Ala ten a de na a tempel. Na a srefi ten te Yosef, Maria nanga a beibi Yesus de na a tempel, Ana e waka kon miti den. A e bigin taki Gado tangi èn ala sma di wani arki a e fruteri fu Yesus.

Yu kan frustan taki Yosef nanga Maria breiti te den sani disi e pasa na a tempel! Ala den sani disi e gi den na overtoigi taki a manpikin fu den na a Pikin di Gado ben pramisi.