A fosi wondru fu Yesus

Dri dei pasa baka di Natanael tron wan fu den fosi disipel fu Yesus. Yesus nanga wan tu fu den fosi disipel e waka go na noordsei na a distrikt Galilea pe den e tan. Den e go na a foto Kana pe Natanael e libi. Kana de na a bergikontren na noordsei fu Nasaret pe Yesus gro kon bigi. Den kisi wan kari fu go na wan trowfesa na ini Kana.

Yesus mama Maria go na a trowfesa tu. Maria gwenti nanga a famiri fu den sma di e trow èn a sori leki a e yepi tu fu gi nyanyan nanga dringi na den sma di kon na a trowfesa. Dati meki a sabi wantewante te a win kaba. A e taigi Yesus: „Den no abi win moro.”​—Yohanes 2:3.

Fu taki en leti Maria e aksi Yesus fu suku wan fasi fu yepi nanga a tori disi. A sori leki Yesus no wani, fu di a e taki: „Uma, san mi abi fu du nanga dati?” (Yohanes 2:4) Fu di Gado poti Yesus leki Kownu, meki a musu du san en hemel Tata wani en fu du, na presi fu arki famiri nanga mati. Ma Maria sabi taki a kan libi a tori disi gi en manpikin. Dati meki a e taigi den man di e yepi na a fesa: „Un musu du ala san a e taigi unu.”​—Yohanes 2:5.

Na a fesa yu abi siksi bigi watrakan di kan hori moro leki 40 liter watra. Yesus e taigi den man: „Furu den watrakan nanga watra.” Dan Yesus e taki: „Teki pikinso fu a watra, dan un tyari en go na a fesiman fu a fesa.”​—Yohanes 2:7, 8.

A fesiman fu a fesa e taki dati a win bun srefisrefi, ma a no sabi taki Yesus du wan wondru fu meki watra tron win. A e kari a trowmasra, dan a e taki: „Ala sma e poti a bun win fosi, èn te den sma kon drungu kaba, dan den e poti a win di no bun so. Yu kibri a bun win èn now fosi yu e kon nanga en.”​—Yohanes 2:10.

Disi na a fosi wondru di Yesus du. Te den nyun disipel e si a wondru disi, den e poti moro bribi na ini en. Baka dati, Yesus, en mama nanga den brada fu en e go na a foto Kaperna-um di de na a syoro na noord-westsei fu a Se fu Galilea.