A wroko fu Yesus e go na fesi, ma a wroko fu Yohanes e go na baka

Na a bigin fu a waran ten fu a yari 30, Yesus nanga den disipel fu en e gowe libi Yerusalem baka te den hori a Paskafesa. Ma den no e go wantewante na den oso na ini Galilea. Den e go na Yudea, pe den e dopu furu sma. Yohanes a Dopuman e du a srefi wroko disi wan yari kaba. Soleki fa a sori, a e du disi na a lagipresi fu Yordan-liba èn sonwan fu den disipel fu en de nanga en ete.

Yesus srefi no e dopu sma, ma a e meki den disipel fu en du dati. Na ini a pisi ten disi Yesus nanga Yohanes e gi leri na sma di abi berow fu den sondu di den du teige a Wetfrubontu fu Gado.​—Tori 19:4.

Ma den disipel fu Yohanes e dyarusu. Den e taigi Yohanes: „Yu ben fruteri wi fu wan man [Yesus] di ben de nanga yu. . . . We, a man dati e dopu sma èn ala sma e go na en” (Yohanes 3:26). Ma Yohanes no e dyarusu. A breiti taki so furu sma e go na Yesus èn a wani taki den disipel fu en musu breiti tu. Yohanes e taigi den: „Unsrefi yere di mi taki dati mi a no a Krestes, ma Gado seni mi kon fu waka na fesi a sma dati.” Dan a e fruteri den wan agersitori fu yepi den frustan fa den musu si a tori disi. A e taki: „Na a trowmasra abi a trowmisi. Ma te a mati fu a trowmasra e tanapu drape èn e yere a trowmasra, dan a e prisiri trutru fu yere a sten fu a trowmasra. Fu dati ede mi e prisiri srefisrefi.”​—Yohanes 3:28, 29.

Di Yohanes ben meki den disipel fu en kon sabi Yesus wan tu mun na fesi, a ben e prisiri neleki a mati fu a trowmasra. Wan tu fu den disipel bigin waka baka Yesus èn bakaten den o tron sma di salfu nanga santa yeye. Yohanes wani taki den tra disipel fu en waka baka Yesus tu. Fu taki en leti, a wroko di Yohanes e du, na fu sreka sani gi a wroko fu Krestes. Yohanes e taki: „A wroko fu a sma dati o go na fesi, ma a wroko fu mi o go na baka.”​—Yohanes 3:30.

Wan pisi ten na fesi wan tra Yohanes ben tron wan bakaman fu Yesus. Bakaten a skrifi fu pe Yesus komoto èn sortu prenspari sani Yesus du fu frulusu sma. A skrifi: „A sma di komopo fu tapusei, hei moro ala tra sma. . . . A Tata lobi a Manpikin èn a poti ala sani na ini en anu. A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yohanes 3:31, 35, 36). Disi na wan prenspari sani di sma musu sabi!

A no langa baka di Yohanes taki dati a wroko fu en ben o kon na wan kaba, Kownu Herodes e meki sma grabu en poti na strafu-oso. Herodes ben trow nanga Herodias, aladi Herodias ben de a wefi fu Filipus, na afubrada fu Herodes. Di Yohanes sori Herodes na fesi ala sma taki a sani di a du na sutadu, dan a meki den poti Yohanes na strafu-oso. Te Yesus e yere taki den sroto Yohanes, dan en nanga den disipel fu en e gowe libi Yudea èn den e „go na Galilea”.​—Mateyus 4:12; Markus 1:14.