Jezus libi nanga diniwroko

Johannes e kisi moro pikinso sma, ma Jezus e tan kisi moro foeroe sma

BAKA NA Paschafesa na ini na lente (pikin dréten) foe 30 G.T. dan Jezus nanga en discipel e komoto foe Jeruzalem. Ma den no e go baka na Galiléa pe den e libi, ma den e hari go na a kondre Judéa èn e dopoe sma drape. Johannes na Dopoeman e doe a srefi wroko so wan jari kaba èn te now ete discipel e go moksi nanga en.

Jezus no e dopoe sma te joe loekoe en boen, ma en discipel e doe dati na ondro na tiri foe en. Na dopoe foe den de net soleki di foe Johannes wan symbool foe di wan djoe abi berow foe en sondoe di a ben doe na a Wetferbontoe foe Gado. Ma baka en opo-baka Jezus ben gi en discipel na komando foe dipi sma go na ondro watra na ini wan dopoe di wani taki wan tra sani. Na kristen dopoe de wan symbool dati wan sma gi ensrefi abra foe dini Jehovah en Gado.

Ma na ini a bigin disi foe Jezus diniwroko Johannes nanga en e leri èn e dopoe sma di ben abi berow, aladi den e wroko aparti. Ma den discipel foe Johannes e djaroesoe èn e tjari kragi go gi en foe Jezus: „Rabbi . . . loekoe, a man dati e dopoe sma èn ala sma e go na en.”

Na presi foe Johannes djaroesoe, a e prisiri foe di sani e waka boen gi Jezus, èn a wani dati ooktoe en discipel e prisiri. A e poti a den fesi: „Oensrefi e kotoigi gi mi dati mi ben taki: mi no de a Kristus, ma den seni mi waka na en fesi.” Dan a e gebroiki wan moi agersitori: „A sma di abi na bruid de na bruidegom. Na mati foe na bruidegom, di tanapoe èn e jere abi bigi prisiri foe na sten foe na bruidegom. Foe dat’ede a prisiri disi foe mi de dorodoro.”

Johannes leki na mati foe na bruidegom siksi moen psa kaba a ben prisiri kaba di a ben meki en discipel kon sabi Jezus. Wantoe foe den ben tron memre foe Kristus hemel bruidklasse di boo kon, èn di boo de foe kristen di ben kisi salfoe nanga jeje. Johannes ben wani dati den discipel di a abi now ooktoe go waka na baka Jezus, foe di a de na marki foe en foe sreka a pasi gi na diniwroko foe Kristus di e waka boen. Johannes e tjari kon na krin: „En moe tan kisi moro sma, ma mi moesoe tan kisi moro pikinso.”

No langa a baka kownoe Herodes e kisi Johannes. Herodes ben teki Herodias, na oema foe en brada Filippus gi ensrefi, èn efoe Johannes e ferklari na fesi foe ala sma dati na doe foe en no ben boen, dan Herodes e meki den poti en na ini straf’oso. Efoe Jezus e kisi foe jere dati den ben kisi Johannes èn poti na ini straf’oso a e hari komoto nanga en discipel foe Judéa go na Galiléa. Johannes 3:22-4:3; Tori foe den Apostel 19:4; Mattéus 28:19; 2 Korinte 11:2; Markus 1:14; 6:17-20.

◆ San a dopoe wani foe taki di ben doe na ondro na tiri foe Jezus bifo en opo-baka?

◆ Fa Johannes ben tjari kon na krin dati en discipel no nanga leti ben e kragi?

◆ Foe san-ede den ben poti Johannes na ini straf’oso?