Wan legre-ofsiri di abi wan tranga bribi

Baka te Yesus hori a prenspari lezing fu en na tapu a bergi a e go na a foto Kaperna-um. Dan wan tu owru man fu den Dyu e kon na en. A sma di seni den no de wan Dyu. A de wan legre-ofsiri fu Rome.

A legre-ofsiri abi wan srafu di a lobi srefisrefi. A srafu disi siki seryusu èn a de fu dede. A legre-ofsiri no de wan Dyu, ma toku a e suku yepi na Yesus. Den Dyu e taigi Yesus taki a srafu fu a man disi „e didon na oso, fu di a lan èn a e pina hebi” (Mateyus 8:6). Kande en skin e hati en srefisrefi. Den owru man fu den Dyu e taki fu a legre-ofsiri: „A sma disi warti fu yu yepi en, bika a lobi a pipel fu wi èn ensrefi bow a snoga gi wi.”​—Lukas 7:4, 5.

Syatu baka dati Yesus e bigin waka nanga den owru man go na a oso fu a legre-ofsiri. Te den e kon moro krosibei, a legre-ofsiri e seni den mati fu en fu taigi Yesus: „Masra, no du muiti, bika mi no warti fu yu kon na ini mi oso. Dati meki mi no feni taki mi warti tu fu kon na yu” (Lukas 7:6, 7). Aladi a man disi abi sma na en ondro èn a gwenti taigi den san fu du, toku a e sori trutru sakafasi! A de heri tra fasi leki den tra Romesma di e du ogri nanga den srafu fu den.​—Mateyus 8:9.

A de krin taki a legre-ofsiri sabi taki den Dyu no e bumui nanga sma di no de Dyu (Tori 10:28). Kande na fu dati ede a e taigi den mati fu en fu taigi Yesus: „Taki wán sani nomo, so taki mi futuboi kan kon betre.”​—Lukas 7:7.

Yesus fruwondru di a yere san den taki. A e taki: „Mi e taigi unu: Srefi na ini Israel mi no feni wan sma di abi so wan tranga bribi” (Lukas 7:9). Di den mati fu a legre-ofsiri drai go baka na en oso, den kon si taki a srafu di ben siki te fu dede de gosontu now.

Baka di Yesus dresi a srafu a sori taki sma di no de Dyu, ma di e bribi, o kisi blesi tu. A e taki: „Furu sma o kon fu owstusei èn fu west-sei èn den o sidon na tafra nanga Abraham, Isak, nanga Yakob na ini a Kownukondre fu hemel.” Ma san o pasa nanga den Dyu di no abi bribi? Yesus e taki dati ’den o trowe den sma disi go na dorosei na ini a dungru. Drape den o krei èn den o kaw tifi.’​—Mateyus 8:11, 12.

Aladi den Dyu ben de den fosiwan di kisi na okasi fu tiri nanga Krestes na ini a Kownukondre, toku furu fu den no ben o kisi a grani disi. Na presi fu dati, sma fu tra kondre ben o kisi a kari fu sidon na tafra nanga Krestes „na ini a Kownukondre fu hemel”.