Jezus libi nanga diniwroko

Na bigi bribi foe wan legre edeman

EFOE Jezus e hori na Bergipréki foe en, dan sowan afoe foe en publiki diniwroko psa kaba. Disi wani taki dati a abi sowan wan jari nanga négi moen ete foe klari en wroko na grontapoe.

Jezus e go now na ini na foto Kapernaüm, wan sortoe tanpe pe a ben go alaten baka foe den activiteit foe en. Djaso owroeman foe den djoe e kon na en nanga wan aksi. Wan edeman ini na legre foe den Romeinsma, wan heiden ben seni den kon.

Na legre edeman abi wan lobi knegti di siki srefsrefi èn di de foe dede, èn na edeman wani sote dati Jezus dresi en knegti. Den djoe e taki srefsrefi foe na boen foe na edeman: „A de warti foe dati dati joe sori en na boen-ati disi”, den e taki, „bika a lobi na natie foe wi èn ensrefi ben bow na djoe kerki gi wi.”

Sondro foe draidrai Jezus e go nanga den man. Ma te den kon ini a birti, na legre edeman e seni mati foe taki: „Masra, no doe moeiti, bika mi no de warti dati joe kon na ondro mi dak. Foe dat’ede mi no ben feni misrefi warti foe kon na joe.”

Fa disi ben de sakafasi wortoe foe wan edeman di gwenti foe komanderi trawan. Ma seker a e denki ooktoe na Jezus ini a ferstan dati a maatschappelijk gebroiki foe wan djoe e tapoe dati den no abi kontakti nanga sma di no de djoe. Soleki Petrus ben taki: „Oen sabi heri boen dati a no mag gi wan djoe foe moksi ensrefi na wan sma foe wan tra ras ofoe foe go na en.”

Kande foe di na edeman no wani dati Jezus ondrofeni na bakapisi foe na psa foe na gwenti disi, meki a e meki en mati tjari na aksi foe en go na en: „Taki wan wortoe meki mi knegti kon boen, bika ooktoe mi na wan sma di de ondro makti èn mi abi sroedati na mi ondro, èn mi e taigi a wan: ’Go!’, dan ai go, èn a trawan: ’Kon!’ dan ai kon, èn gi mi srafoe: ’Doe disi!’ dan ai doe en.”

We, te Jezus e jere disi a e ferwondroe. „Mi e taigi oenoe na waarheid”, a e taki „na no wan sma na ini Israël mi feni sowan bigi bribi.” Bakadi a dresi a knegti foe na edeman, Jezus e meki gebroiki foe na okasi foe ferteri fa sma di no de djoe èn di e bribi sa kisi boenati nanga blesi di djoe di no e bribi ben trowe.

„Foeroe”, na so Jezus e taki „foe oostoesé èn westsé sa kon èn didon nanga Abraham nanga Izaäk nanga Jakob na tafra na ini na kownoekondre foe hemel, aladi den manpikin foe na kownoekondre sa trowe go na dorosé ini a doengroe. Na drape den sa kré èn kaw tifi.”

Den manpikin foe na kownoekondre di sa trowe go drap, na dorosé de djoe na skinfasi di no e meki gebroiki foe na okasi di den ben kisi fosi foe de tiriman nanga Kristus. Abraham, Izaäk nanga Jakob e agersi na seti foe Gado foe na Kownoekondre. Na so Jezus e ferteri dati heidensma sa kisi na kari foe te joe loekoe en boen didon na a hemel tafra „ini a kownoekondre foe den hemel”. Lukas 7:1-10; Mattéus 8:5-13; Tori foe den Apostel 10:28.

◆ Foe san-ede den djoe e taki boen foe wan heiden edeman?

◆ Foe san-ede na edeman ben sa tan aksi Jezus foe no kon na ini en oso?

◆ San Jezus ben bedoel nanga den laatste wortoe foe en?