Prisiri de na hemel te wan sondari sori berow

Difrenti leisi Yesus sori o prenspari a de fu abi sakafasi (Lukas 14:8-11). A e angri fu feni man nanga uma di abi sakafasi èn di wani dini Gado trutru. Kande sonwan fu den sma di yere a boskopu fu en na bigi sondari ete.

Den Fariseiman nanga den leriman fu Wet e si taki den sortu sma disi di den e wisiwasi, e go na Yesus fu arki a boskopu fu en. Den man disi e krutukrutu. Den e taki: „A man disi e kari sondari kon èn a e nyan nanga den” (Lukas 15:2). Den Fariseiman nanga den leriman fu Wet feni taki den bun moro tra sma èn den e si a pipel leki a doti na ondro den futu. Dati meki den e kari den sma disi amharets. Na ini Hebrewtongo a wortu disi wani taki „sma fu a gron [noso, sma fu a doti]”.

Ma Yesus e sori lespeki gi den sma disi, a e sori switifasi gi den èn a e sori sari-ati gi den. Dati meki furu fu den sma disi wani arki Yesus trutru. Sma sabi sonwan fu den sma disi leki bigi sondari srefi. Ma fa Yesus feni en te son sma e krutu en fu di a e yepi den sortu sma disi? San a e piki den?

A e fruteri wan srefi sortu agersitori di a ben fruteri na ini Kaperna-um (Mateyus 18:12-14). Te Yesus e fruteri a tori, a e meki a gersi leki den Fariseiman na reti-ati sma di de na ini a skapupen fu Gado. Ma a e meki a gersi leki den mofinawan na sma di lasi pasi èn howpu no de gi den. Yesus e taki:

„Suma fu unu di abi wán hondro skapu èn di lasi wan fu den, no sa libi den tra neigitenti na neigi skapu na a sabana fu go suku a lasi skapu teleki a feni en? Te a feni a skapu, a e poti en na tapu en skowru èn a e prisiri. Te a kon na oso, dan a e kari mati nanga birtisma kon èn a e taigi den: ’Un prisiri nanga mi, bika mi feni a skapu fu mi di ben lasi.’”​—Lukas 15:4-6.

San Yesus wani sori nanga na agersitori disi? A e taki: „Mi e taigi unu taki moro prisiri o de na hemel te wán sondari abi berow, leki te neigitenti na neigi reti-ati sma no abi fu sori berow.”​—Lukas 15:7.

Den Fariseiman musu fu skreki di Yesus taki fu berow. Den e si densrefi leki reti-ati sma èn den feni taki den no abi fu sori berow. Wan tu yari pasa sonwan fu den krutu Yesus fu di a ben e nyan nanga sondari èn nanga sma di e teki belasting-moni gi lanti. Yesus ben piki den: „Mi no kon fu kari sma di e du san reti, ma mi kon fu kari sondari” (Markus 2:15-17). Den Fariseiman di feni taki den na reti-ati sma no man si taki den musu sori berow. Dati meki den engel na hemel no breiti nanga den. Ma bigi prisiri de na hemel te sondari e sori berow trutru.

Yesus e fruteri wan tra agersitori fu sori taki bigi prisiri de na hemel te sondari sori berow. A e taki fu wan sani di kan pasa na ini oso: „Sortu uma di abi tin solfru moni, ma di lasi wan fu den, no sa leti wan lampu èn sibi en oso fu suku finifini teleki a feni en? Te a feni en, a e kari den mati nanga den birtisma fu en kon èn a e taki: ’Un prisiri nanga mi, bika mi feni a solfru moni di mi ben lasi.’”​—Lukas 15:8, 9.

Yesus e sori taki na agersitori disi wani taki a srefi leki a di fu a lasi skapu. A e taki now: „Fu dati ede mi e taigi unu taki den engel fu Gado e prisiri te wán sondari abi berow.”​—Lukas 15:10.

Prakseri nomo: Den engel fu Gado wani trutru taki den sondari di ben lasi, kon bun baka nanga Gado! A sani disi wani taki furu, fu di den sondari di abi berow èn di o go na ini a hemel Kownukondre fu Gado, o kisi wan moro hei posisi leki den engel! (1 Korentesma 6:2, 3) Ma toku den engel no e dyarusu. Sobun, fa wi musu feni en te wan sma di du wan sondu e sori trutru berow èn e drai kon baka na Gado?