Joe sa waka baka a sari-ati foe Gado?
„Tron sma di e waka baka Gado, leki lobi pikin.” — EFEISE SMA 5:1.
1. Foe san-ede wi alamala moesoe abi broko-ede gi na waka di sma e waka baka trawan?
FOE boen ofoe foe ogri, moro foeroe sma e waka baka trawan. Den wan di wi abi demakandra nanga den èn di wi kande e waka na den baka, kan abi krakti tapoe wi na wan fasi di de foe si. Na ondro santa jeje na skrifiman foe Odo 13:20 ben warskow: „En di e waka nanga koniman sa kon koni, ma en di e boemoei nanga donwan, a no sa waka boen nanga en.” So boen nanga boen reide Gado Wortoe e taki: „No waka baka san ogri, ma baka san boen. Na sma di e doe san boen, komoto foe Gado.” — 3 Johanes 11.
2. Baka soema wi moesoe waka èn baka sortoe fasi foe en?
2 Wi abi toemoesi boen bijbel eksempel foe man nanga oema di wi kan waka na den baka (1 Korente sma 4:16; 11:1; Filipi sma 3:17). Ma na moro prenspariwan di wi moesoe waka na en baka, na Gado. Na ini Efeise sma 4:31–5:2, baka di na apostel Paulus ben skrifi foe den eigifasi nanga wroko di wi moesoe wai pasi gi, a ben gi wi tranga foe abi „lobi sari-ati, e gi makandra pardon fri.” Disi ben tjari go na a moro prenspari penti foe deki-ati: „Foe dati-ede, tron sma di e waka baka Gado, leki lobi pikin, èn tan waka ini lobi.”
3, 4. Fa Jehovah ben froeteri foe ensrefi èn foe san-ede wi moesoe poti prakseri tapoe a de di a de wan Gado foe geregteghèit?
3 San na den pasi nanga eigifasi foe Gado di wi moesoe waka na den baka? Foeroe pisi de foe na sma di Gado de nanga den doe foe en, so leki de foe si foe na fasi fa a ben froeteri Moses foe ensrefi: „Jehovah, wan Gado nanga sari-ati èn boen-atifasi, di no e kisi atibron esi-esi èn di abi lobi-boenfasi èn waarheid pasa marki, di e kibri lobi-boenfasi gi doesoendoesoen sma, di e gi pardon foe fowtoe èn na pasa foe wet èn sondoe, ma a no sa gi fri foe strafoe kwetikweti, foe di a e tjari na strafoe foe na fowtoe foe den papa go tapoe den manpikin èn tapoe den granpikin.” — Exodus 34:6, 7.
4 Foe di Jehovah ’lobi regtfardikifasi nanga geregteghèit’, meki seiker wi moesoe kon sabi èn waka baka a pisi disi foe na sma di a de (Psalm 33:5; 37:28). A de na Mekiman, so srefi na moro hei Kroetoeman èn na Giman foe Wet foe a libismafamiri, so taki a e sori geregteghèit na ala sma (Jesaja 33:22). Disi de foe si krin ini a fasi fa a ben aksi foe sori geregteghèit èn ben meki den hori anoe na geregteghèit a mindri en pipel Israèl èn baka ten ini a Kresten gemeente.
Hori anoe na a geregteghèit foe Gado
5, 6. Fa geregteghèit ben sori ini den boemoei di Gado ben boemoei nanga Israèl?
5 Di Gado ben teki Israèl leki en pipel, a ben aksi efoe den ’ben sa gi jesi soifri na en sten èn troetroe ben sa hori en froebontoe’. Di den ben kon makandra na a foetoe foe na bergi Sinaï, den ben piki: „Ala san Jehovah taki, wi de klariklari foe doe” (Exodus 19:3-8). Fa dati ben de wan serjoesoe pramisi! Nanga jepi foe engel, Gado ben gi den Israèl sma so wan 600 wet, di den, leki wan pipel di gi densrefi abra na en, ben abi na frantiwortoe foe hori. San ben o pasa efoe wan sma no ben sa doe dati? Wan sma di sabi spesroetoe den wet foe Gado ben tjari kon a krin: „Na wortoe di ben taki nanga mofo foe engel, ben sori taki a de fasti, èn ibri pasa foe na wet èn trangajesi doe ben kisi wan refensi ini akroederi nanga geregteghèit”. — Hebrew sma 2:2.
6 Ija, wan Israèl sma di no ben gi jesi, ben kan froewakti ’refensi ini akroederi nanga geregteghèit’, no libisma geregteghèit di e mankeri sani, ma geregteghèit foe wi Mekiman. Gado ben poti difrenti strafoe gi na pasa foe na wet. Na moro serjoesoe strafoe ben de ’koti poeroe’, ofoe kiri a sma. Dati ben gebroiki gi serjoesoe pasa foe na wet, so leki na dini foe kroektoe gado, soetadoe, incest (sekslibi nanga sma foe joe eigi osofamiri), seks nanga meti, tantaman wroko, na òfer foe pikin, kiri èn na fowtoe gebroiki foe broedoe (Leviticus 17:14; 18:6-17, 21-29). Boiti dati, dan den ben sa kan „koti poeroe” ibri Israèl sma di foe espresi èn sondro foe abi berow ben pasa awansi sortoe wet foe Gado (Numeri 4:15, 18; 15:30, 31). Te den ben hori anoe na a geregteghèit disi foe Gado, dan den bakapikin foe na sma di doe ogri ben kan firi den bakapisi foe dati heri-boen.
7. San ben de wan toe foe den bakapisi foe a hori di den ben hori anoe na geregteghèit a mindri den fositen pipel foe Gado?
7 Den sortoe strafoe disi ben poti krakti a tapoe na serjoesoefasi foe pasa a wet foe Gado. Foe eksempel, efoe wan manpikin ben tron wan droengoeman èn wan tapoe-ala, den ben moesoe tjari en go na fesi lepi kroetoeman. Efoe den ben feni taki a ben de wan sma di ben doe ogri foe espresi èn di no ben abi berow, dan na papa nanga mama ben moesoe teki prati ini a hori anoe na geregteghèit (Deuteronomium 21:18-21). Den wan foe wi di de papa nanga mama kan prakseri taki a no ben de makriki foe doe dati. Ma Gado ben sabi taki a ben de fanowdoe so taki ogridoe no ben sa panja a mindri troe anbegiman (Esekièl 33:17-19). Disi ben de wan seti foe na Sma di den ben kan taki foe en: „Ala en pasi na geregteghèit. Wan Gado foe getrowfasi, di kroektoedoe no de na en; regtfardiki èn opregti a de.” — Deuteronomium 32:4.
8. Fa geregteghèit ben marki a boemoei di Gado ben boemoei nanga na kresten gemeente?
8 Baka foeroe jarihondro Gado ben trowe na nâsi Israèl èn ben teki na kresten gemeente. Ma Jehovah no ben kenki. A ben e gi ensrefi ete na geregteghèit èn den ben kan froeteri foe en leki „wan faja di e pori sani” (Hebrew sma 12:29; Lukas 18:7, 8). Foe dati-ede a ben tan abi wan seti foe poti na frede foe Gado ini a heri gemeente foe di a ben e poeroe sma di doe ogri. Kresten di ben gi densrefi abra èn di ben tron sma di e doe ogri sondro foe abi berow, ben moesoe sluit uit.
9. San na sluit uit èn san a e doe?
9 San de ini a tori foe sluit wan sma uit? Wi e feni wan troetroe eksempel ini a fasi fa wan problema ben behandel ini a fosi jarihondro. Wan kresten na ini Korente ben doe hoeroedoe nanga a wefi foe en papa èn a no ben abi berow, foe dati-ede Paulus ben gi na ordroe foe poeroe en foe na gemeente dati. Disi ben moesoe doe foe kibri na krinfasi foe Gado pipel, bika ’wan pikinso sroedeki e meki na heri deki kon soewa’. A poeroe foe en ben sa meki taki na ogridoe foe en no ben sa gi Gado nanga En pipel sjen. Na hebi strafoe foe ben sluit uit ben kan seki en so srefi foe kisi ensrefi, èn ben kan poti ini en èn ini na gemeente joisti frede gi Gado. — 1 Korente sma 5:1-13; teki gersi Deuteronomium 17:2, 12, 13.
10. Fa den dienstknekti foe Gado moesoe doe te wan sma e sluit uit?
10 Na komando foe Gado de taki efoe den e poeroe wan ogri sma, kresten sma „no [moesoe] de moro langa ini kompani foe [en] . . . , èn srefi no [moesoe] njan nanga so wan sma”.a Na so fasi a koti poeroe foe demakandra, di abi na ini toe prisiri demakandra, nanga loyaal sma di e respeki na wet foe Gado èn di e wani waka akroederi na wet dati. Sonwan foe den ben kan de famiriman di no de krosibei famiri, èn di no de wan pisi foe na srefi osofamiri. A kan de moeilek gi den famiriman dati foe gebroiki na tirilin disi foe Gado, neleki fa a no ben de makriki gi Hebrew papa nanga mama ondro na wet foe Moses foe teki prati ini a kiri foe wan gadolowsoe manpikin. Tokoe, na komando foe Gado de krin; so boen wi kan de seiker taki foe sluit sma uit de joisti. — 1 Korente sma 5:1, 6-8, 11; Titus 3:10, 11; 2 Johanes 9-11; loekoe Na Waktitoren foe 1 december 1981, bladzijde 267-272; 15 april 1988, bladzijde 14-18.
11. Fa difrenti pisi foe na sma di Gado de ben kan kon a krin ini a tori foe wan sma di sluit uit?
11 Ma memre taki wi Gado no de regtfardiki wawan; a de so srefi wan Gado di abi „lobi-boenfasi pasa marki, [wan Gado] di e gi pardon foe fowtoe èn a pasa foe wet” (Numeri 14:18). En Wortoe e tjari kon a krin taki wan sma di sluit uit kan abi berow èn kan soekoe foe kisi pardon foe Gado. San e pasa dan? Owroeman di abi ondrofeni kan miti nanga en foe kon sabi, nanga jepi foe begi èn foe loekoe sani finifini, efoe a e sori taki a abi berow foe na ogridoe di ben meki a sluit uit. (Teki gersi Tori foe den Apostel 26:20.) Efoe dati de so, dan den kan teki en baka ini a gemeente, leki fa 2 Korente sma 2:6-11 e sori taki a ben pasa nanga a man na ini Korente. Tokoe sonwan di den ben poeroe, ben gowe libi Gado gemeente jari langa kaba, so boen wan sani kan doe foe jepi den foe si na pasi foe kon baka?
Geregteghèit ini balansi nanga sari-ati
12, 13. Foe san-ede na waka di wi e waka baka Gado moesoe abi moro na ini leki foe sori na geregteghèit foe en?
12 San skrifi a fesi ben abi foe doe moro foeroe nanga wán pisi foe den eigifasi foe Gado, so leki fa tanapoe na ini Exodus 34:6, 7. Ma den vers dati e sori tapoe moro foeroe sani leki na geregteghèit foe Gado wawan, èn den wan di wani waka na en baka, no e loekoe soso foe hori anoe na geregteghèit. Efoe joe ben e meki wan model foe na tempel di Salomo ben bow, joe ben sa studeri soso wan foe den pilari foe en? (1 Kownoe 7:15-22) Nôno, bika dati pikinmoro no ben sa gi joe wan balansi prenki, foe na fasi fa a tempel ben de èn na ròl foe en. Na a srefi fasi efoe wi winsi foe waka baka Gado, dan wi moesoe waka so srefi baka den tra pasi nanga eigifasi foe en, so leki taki a abi ’sari-ati èn boen-atifasi, no e kisi ati-bron esi-esi èn abi lobi-boenfasi èn waarheid pasa marki, e kibri lobi-boenfasi gi doesoendoesoen sma, e gi pardon foe fowtoe’.
13 Sari-ati nanga a gi foe pardon na fondamenti eigifasi foe Gado, so leki fa wi e si ini na fasi fa a ben handri nanga Israèl. Na Gado foe geregteghèit no ben gi den fri foe strafoe foe fowtoe di den ben doe moro leki wan tron, ma tokoe a ben sori sari-ati nanga a gi foe pardon pasa marki. „A ben meki Moses kon sabi den pasi foe en, èn srefi den pikin foe Israèl, den wroko foe En. Jehovah abi sari-ati èn boen-atifasi, no e kisi ati-bron esi-esi èn abi lobi-boenfasi pasa marki. A no sa tan feni fowtoe alaten èn a no sa tan hori ati-bron te ten di no skotoe” (Psalm 103:7-9; 106:43-46). Ija, te joe loekoe baka na den wroko foe en ini den hondrohondro jari di pasa, dan dati e boeweisi taki den wortoe dati de troe. — Psalm 86:15; 145:8, 9; Mika 7:18, 19.
14. Fa Jesus ben sori taki a ben waka baka a sari-ati foe Gado?
14 Foe di Jesus Krestes „na a prenki foe [Gado] glori èn na soifri marki foe en fasi”, meki wi ben sa kan froewakti taki a o sori na srefi sortoe sari-ati nanga a klari di a de klari foe gi pardon (Hebrew sma 1:3). A ben doe dati, so leki fa den wroko foe en gi trawan e sori (Mateus 20:30-34). A ben poti so srefi krakti tapoe sari-ati nanga den wortoe foe en di wi e leisi na ini Lukas kapitel 15. Den dri agersitori drape e boeweisi taki Jesus ben waka baka Jehovah èn den e gi oenoe toemoesi prenspari leri.
Broko-ede gi san ben lasi
15, 16. San ben meki Jesus gi den agersitori na ini Lukas 15?
15 Den agersitori dati e kotoigi foe na sari-ati belangstelling di Gado abi gi sondari èn den e sori wi wan prenki di de ini wánfasi èn di wi kan waka na en baka. Loekoe na den bakagron foe den agersitori: „Now ala den belastingman nanga den sondari ben tan kon na [Jesus] foe arki en. Foe dati-ede den Fariseiman èn den sabiman foe boekoe ben tan e knoroe èn ben e taki: ’Na man disi e ontfanga sondari èn e njan nanga den.’” — Lukas 15:1, 2.
16 Ala den sma di ben de ini a tori ben de djoe. Den Fariseiman nanga den sabiman foe Boekoe ben prodo nanga na finifini fasi fa den, so leki fa den ben denki, ben waka baka a wet foe Moses, wan sortoe regtfardikifasi akroederi na wet. Ma Gado no ben agri nanga den sortoe sma di ben froeklari densrefi regtfardiki (Lukas 16:15). Leki fa a e sori, dan den belastingman di den ben taki foe den dja, ben de djoe di ben piki den belastingmoni gi Rome. Foe di foeroe foe den ben poeroe toemoesi foeroe moni na a skin foe den kompe djoe, meki belastingman ben de wan groepoe di sma ben broko-ai gi (Lukas 19:2, 8). Den ben si den a srefi leki „sondari”, pe joe ben abi na ini sma di e doe hoeroedoe, srefi motjo (Lukas 5:27-32; Mateus 21:32). Ma Jesus ben aksi den kerki fesiman di ben kragi:
17. San ben de Jesus fosi agersitori na ini Lukas 15?
17 „Soema na oenoe mindri di abi wan hondro skapoe, te a e lasi wán, no sa libi den neigi-tenti na neigi a baka na ini sabana èn go soekoe na wan di lasi te leki a feni en? Èn te a e feni en, a e poti en tapoe en skowroe èn e prisiri. Èn te a e doro na oso, a e kari en mati èn en birti sma kon makandra èn a e taigi den: ’Prisiri nanga mi, bikasi mi ben feni mi skapoe di ben lasi pasi.’ Mi e taigi oenoe taki na net so toe moro prisiri sa de na ini hemel foe wán sondari di abi berow leki neigitenti na neigi regtfardiki sma di no abi berow fanowdoe.” Den kerki fesiman ben kan froestan na agersitori bika skapoe nanga skapoeman ben de wan aladei sani. Foe di a ben abi broko-ede, meki na skapoeman ben libi 99 skapoe foe njan grasi na ini wèi di den sabi, ala di a ben go soekoe a wan di ben lasi pasi. A ben horidoro te leki a ben feni en èn na wan lobi fasi a ben tjari na skapoe di ben frede kon baka na a ipi. — Lukas 15:4-7.
18. San ben meki sma prisiri, so leki fa krakti ben poti tapoe dati ini na di foe toe agersitori foe Jesus na ini Lukas 15?
18 Jesus ben gi wan di foe toe agersitori: „Ofoe sortoe oema di abi tin moni foe wan drakmo, te a lasi wán moni foe wan drakmo, no e leti wan lampoe èn e sibi en oso èn e soekoe finifini te leki a feni en? Èn efoe a feni en, a e kari den mati nanga birfrow foe en kon makandra èn e taki: ’Prisiri nanga mi, bika mi feni a moni foe wán drakmo di mi ben lasi.’ Na so mi e taigi oenoe taki, prisiri e de na den engel foe Gado foe wán sondari di abi berow” (Lukas 15:8-10). Na drakmo ben abi na waarde foe pikinso moro mendri leki wan heri dei pai foe wan wrokoman. Na moni foe na oema ben kan de wan pisi foe wan famiri goedoe, ofoe a ben kan de wan pisi foe wan toe moni di meki kon tron wan gowtoe-sani. Di a moni ben lasi, a oema ben soekoe finifini foe feni en, èn dan en nanga den oema di de en mati ben prisiri. San disi e froeteri oenoe foe Gado?
Prisiri na ini hemel — Foe san?
19, 20. Den toe fosi agersitori foe Jesus na ini Lukas 15 ben go foe soema na a fosi presi èn san ben de na edeprakseri foe den?
19 Den toe agersitori disi ben de wan piki tapoe na taki di sma ben taki takroe foe Jesus, di wan toe moen a fesi ben meki sma kon sabi en leki „na toemoesi boen herder” di ben sa gi en sili gi den skapoe foe en (Johanes 10:11-15). Tokoe den agersitori na a fosi presi no ben go foe Jesus. Den lès di den sabiman foe Boekoe nanga den Fariseiman ben moesoe leri, ben go foe na fasi nanga den pasi foe Gado. Na so Jesus ben taki, taki prisiri de na ini hemel foe wan sondari di abi berow. Den kerkiman dati ben hori taki den ben dini Jehovah, ma tokoe den no ben e waka na en baka. Den sari-ati pasi foe Jesus na a tra sei ben prenki na wani foe en Papa. — Lukas 18:10-14; Johanes 8:28, 29; 12:47-50; 14:7-11.
20 Efoe wán tapoe hondro ben de wan fondamenti foe prisiri, dan wán tapoe tin moni ben de dati moro ete. Srefi ini a ten disi wi kan firi san den oema, di ben prisiri foe na feni di na moni ben feni, ben firi! Djaso toe, na lès e go foe hemel, foe di „engel foe Gado” e prisiri nanga Jehovah „foe wán sondari di abi berow”. Loekoe na den lasti wortoe „abi berow”. Den agersitori disi, foe taki en leti, ben go foe sondari di abi berow. Èn joe kan si taki ala toe ben poti krakti a tapoe, taki a fiti foe abi prisiri foe na berow foe den.
21. San wi moesoe leri foe den agersitori foe Jesus na ini Lukas 15?
21 Den kerki fesiman dati, di sani ben kori den èn di ben firi tevrede foe gi jesi frafra na a Wet, ben loekoe pasa a sani disi taki Gado abi „sari-ati èn boen-atifasi”, èn taki a de wan Gado „di e gi pardon foe fowtoe èn na pasa foe wet èn sondoe” (Exodus 34:6, 7). Efoe den ben waka baka a pisi disi foe den pasi foe Gado nanga a sma di a de, dan den ben sa warderi na sari-ati foe Jesus gi sondari di ben abi berow. Fa a de nanga wi? Wi e teki na lès na ati èn e doe en? We, loekoe san na di foe dri agersitori foe Jesus ben de.
Berow èn sari-ati a wroko
22. Te joe froeteri en sjatoe dan san Jesus ben gi leki wan di foe dri agersitori na ini Lukas 15?
22 Sma foeroetron ben kari disi na agersitori foe na lasi pikin. Tokoe te joe e leisi en joe kan si foe san-ede sonwan e prakseri foe en leki na agersitori foe na lobi foe wan papa. A e froeteri foe na moro jongoe manpikin ini wan osofamiri, di e kisi en famiri-goedoe foe en papa. (Teki gersi Deuteronomium 21:17.) Na manpikin disi e gowe na wan farawe kondre, pe a e froemorsoe ala sani ini wan loesoe fasi foe libi, moesoe teki na wroko foe loekoe agoe èn e soengoe go so lagi srefi taki a e angri foe njan na njanjan foe agoe. A e kisi ensrefi te foe kaba èn e bosroiti foe go na oso baka, awasi a de foe wroko nomo gi en papa leki wan wrokoman di den joeroe. Te a e kon krosibei foe oso, dan en papa e teki na positief stap foe gi en wan switikon, èn e hori srefi wan fesa. Na bigi brada, di ben tan na oso e wroko, e naki foetoe na a sari-ati di ben sori. Ma na papa e taki taki den moesoe prisiri foe di na manpikin di ben dede e libi now. — Lukas 15:11-32.
23. San wi moesoe leri foe na agersitori foe na lasi manpikin?
23 Sonwan foe den sabiman foe Boekoe nanga Fariseiman ben firi kande taki den ben teki den gersi nanga na bigi manpikin, di poti abrasei foe sondari di ben de leki na jongoe manpikin. Ma, den ben froestan na moro prenspari penti foe na agersitori èn wi e froestan dati toe? A e poti krakti tapoe wan aparti eigifasi foe wi hemel Tata di abi sari-ati, a de di a de klari foe gi pardon tapoe na fondamenti foe na opregti berow foe wan sondari èn a drai di a e drai baka. A ben sa moesoe boeweigi den arkiman foe doe wan sani nanga prisiri tapoe na froeloesoe foe sondari di ben abi berow. Dati de fa Gado e si sani èn fa a e handri èn den wan di e waka na en baka e handri so toe. — Jesaja 1:16, 17; 55:6, 7.
24, 25. Sortoe pasi foe Gado wi moesoe proeberi foe waka na den baka?
24 A de krin taki geregteghèit e marki ala den pasi foe Gado, èn foe dati-ede den wan di wani foe waka baka Jehovah, e warderi èn e feti a baka geregteghèit. Tokoe, a no soso volmaakti ofoe finifini geregteghèit e boeweigi wi Gado. Na sari-ati foe en nanga en lobi de bigi. A e sori disi nanga jepi foe a de di a de klari foe gi pardon tapoe na fondamenti foe troetroe berow. A fiti so boen taki Paulus ben tjari a gi di wi e gi pardon kon ini akroederi nanga a waka di wi e waka baka Gado: ’Gi makandra pardon fri so leki Gado e gi oenoe pardon fri nanga jepi foe Krestes. Foe dati-ede, tron sma di e waka baka Gado, leki lobi pikin, èn tan waka ini lobi.’ — Efeise sma 4:32–5:2.
25 Langa ten kaba troe kresten sma proeberi foe waka baka a geregteghèit foe Jehovah so boen leki en sari-ati nanga a de di a de klariklari foe gi pardon. O moro wi kon sabi en, o moro makriki a moesoe de foe wi waka na en baka ini den pisi disi. Ma fa wi kan doe disi ini a tori foe wan sma di nanga reti ben kisi tranga leri bika a ben libi wan sondoe fasi foe libi? Meki wi go loekoe dati.
[Foetoewortoe]
a „Excommunicatie (foe sluit wan sma uit) moro foeroe wani taki, na doe di den prakseri dipi foe en, pe wan groepoe e weigri foe gi den grani foe de wan memre foe den, na den wan di wan dei ben de respeki memre. . . . Na ini kresten ten excommunicatie ben kon sori tapoe wan doe foe sluit uit pe wan kerki gemeenschap e weigri sma di pasa na wet, den sakramenti, na anbegi nanga a gemeente èn kande sociaal kontakt foe sortoe fasi toe. — The International Standard Bible Encyclopedia.
San joe ben leri?
◻ Fa na geregteghèit foe Gado ben de foe si ini a gemeente foe Israèl èn ini a kresten gemeente?
◻ Boiti na geregteghèit foe Gado nomo, foe san-ede wi moesoe waka baka en sari-ati toe?
◻ San ben meki taki Jesus ben gi den dri agersitori na ini Lukas kapitel 15, èn san den moesoe leri wi?
[Prenki na tapoe bladzijde 22, 23]
Lagi gron foe er-Raha na fesi a bergi Sinaï (kroektoe-anoe sei background)
[Sma di abi a reti foe a prenki]
Pictorial Archive (Near Eastern History) Est.
[Sma di abi a reti foe a prenki na tapoe bladzijde 20]
Garo Nalbandian
[Sma di abi a reti foe a prenki na tapoe bladzijde 24]
Garo Nalbandian