A lasti Paskafesa fu Yesus e doro

Yesus nanga den fo apostel fu en de na tapu Olèif-bergi ete. Didyonsro Yesus kaba gi den leri. Den ben wani sabi o ten a o kon èn o ten a kaba fu a grontapu disi de krosibei.

Yesus du furu tapu 11 Nisan. Now a e taigi den apostel: „Unu sabi taki a Paskafesa o de baka tu dei èn sma musu tyari a Manpikin fu libisma go spikri na wan postu” (Mateyus 26:2). A kan taki Yesus e taigi den a sani disi te den e drai go baka na Betania na mofoneti.

A tamara fu en na dridewroko. Soleki fa a sori, Yesus de soso nanga den apostel fu en. Tapu tudewroko, a ben krutu den kerki fesiman èn a sori ala sma taki den man disi na hoigriman. Now den e suku fu kiri en. Dati meki a no e go na mindri tra sma tapu 12 Nisan. A no wani taki noti tapu en fu hori a Paskafesa makandra nanga den apostel fu en a tra dei, baka te son dongo. Na a ten dati 14 Nisan e bigin.

Ma fa a de nanga den edeman fu den priester nanga den owru man fu a pipel? San den e du fosi a Paskafesa bigin? Den man disi e kon makandra na ini a fesidyari fu Granpriester Kayafas. Fu san ede? Den ati e bron fu di Yesus krutu den. Now den e taki nanga makandra ’fa den o kisi Yesus nanga triki, so taki den kan kiri en’. O ten den o du dati èn fa den o du dati? Den e taki: „No du dati na a fesa, noso a pipel o meki dyugudyugu” (Mateyus 26:4, 5). Den frede fu grabu Yesus, fu di furu sma lobi en.

Disiten wan sma kon na den kerki fesiman. Na Yudas Iskariot, wan fu den apostel fu Yesus. Den kerki fesiman no e fruwakti a sani disi srefisrefi. Ma Satan poti a prakseri na ini Yudas ati fu tori en eigi Masra! Yudas e aksi den: „San unu o gi mi efu mi tori en gi unu?” (Mateyus 26:15) Fu di den kerki fesiman breiti, meki den e „agri fu gi en solfru moni” (Lukas 22:5). Omeni moni? Den e agri fu gi en 30 solfru moni. A moi fu sabi taki na a moni dati sma ben e pai gi wan srafu (Eksodes 21:32). Na so den kerki fesiman e sori taki den e wisiwasi Yesus. Den no wani lasi furu moni na en tapu. Now Yudas e bigin ’suku wan bun okasi fu tori Yesus te furu sma no de’.​—Lukas 22:6.

Na tapu a Dyu kalender, 13 Nisan e bigin tapu dridewroko te son e dongo. Disi na a di fu siksi neti di Yesus tan na ini Betania èn a de sosrefi a lasti neti di a de drape. A dei baka dati, den lasti sani musu sreka gi a Paskafesa. Den musu suku wan pikin manskapu fu srakti en baka te 14 Nisan bigin, dan den o losi a heri meti. Pe den o nyan, èn suma o sreka a nyanyan? Yesus no taigi den ete. Dati meki Yudas no man fruteri den edeman fu den priester den tori dati.

Tapu fodewroko, Yesus e seni Petrus nanga Yohanes go na Yerusalem. Kande a e du dati na brekten yuru. A e taigi den: „Go sreka a Paska-ofrandi gi wi so taki wi kan nyan en.” Den e piki en: „Pe yu wani taki wi musu sreka en?” Yesus e taki: „Te unu e go na ini a foto, unu o miti wan man di e tyari wan prapi nanga watra. Waka na en baka èn go na ini na oso pe a e go. Dan un musu taigi a sma di abi na oso: ’A Leriman seni aksi yu: „Pe a kamra de pe mi nanga den disipel fu mi kan nyan a Paska-ofrandi?”’ Dan a man o sori unu wan bigi kamra na tapu sodro di abi tafra nanga tra sani na ini. Na drape un musu sreka a Paska-ofrandi.”​—Lukas 22:8-12.

A de krin taki a sma di abi na oso na wan disipel fu Yesus. Kande a e fruwakti taki Yesus o aksi en fu hori a Paskafesa na en oso. Te den tu apostel e doro na ini Yerusalem, den e si taki ala sani e pasa soleki fa Yesus ben taigi den. Dati meki den e sreka a manskapu nanga den tra sani gi a Paskafesa, so taki Yesus nanga den 12 apostel fu en kan hori a fesa.