Yeyses libi nanga diniwroko

Na lasti Paska fu Yeyses de krosibey

DI TUDEWROKO 11 Nisan e doro en kba, Yeyses e kon klari fu gi leri na den apostru na tapu na Oleyfbergi. Fa a ben de wan druk nanga weri-skin dey! Now, kande te den e dray go baka na Betaniya fu psa na neti drape, a e fruteri en apostru: „Unu sabi taki baka tu dey na paska sa feni presi, èn den sa gi na Manpikin fu libisma abra fu den anga en na wan postu.”

Leki fa a sori dan a tra dey, dridewroko 12 Nisan, Yeyses nanga en apostru wawan e psa a dey na ini wan tiri presi. Na dey na fesi, a ben piri-ay na publiki gi den kerki tiriman, èn a e frustan taki den e suku fu kiri en. Fu dati-ede dridewroko meki a no e sori en srefi fu ala sma si en, fu di a no wani taki wan sani kon a mindri na hori di a wani hori na Paskafesa nanga en apostru na neti na baka.

Disiten den granpristri nanga den owruman fu a pipri kon makandra na ini na fesidyari fu na heypristri, Kajafas. Fu di na teki di Yeyses teki den skin na dey a fesi a e hati den, meki den e seti sani fu grabu en nanga triki fasi èn fu meki den kiri en. Toku den e tan taki: „No na a fesa, so taki wan opruru no kon a mindri na pipri.” Den e frede na pipri fu di Yeyses ben de pôpi na den.

Ala di den kerki tiriman ben e meki komplòt fu kiri Yeyses, dan wan sma e kon fisiti den. Den e fruwondru taki a de wan fu Yeyses eygi apostru, Yudas Iskariyòt, na wan di Satan ben prani na takru prakseri fu tori en Masra, na ini en ati! Fa den e breyti, te Yudas e aksi: „San unu sa gi mi fu tori en na unu?” Nanga prisiri den e agri fu pay en 30 solfru moni, na prèys fu wan srafu akruderi na Wetifrubontu fu Moses. Fu sensi na ten dati, Yudas e suku wan bun okasi fu tori Yeyses na den sondro taki wan ipi sma de ini en birti.

13 Nisan e bigin dridewroko, te sondongo. Yeyses ben kon Freyda fu Yerikow, sobun disi na a di fu siksi èn lasti neti di a e psa na ini Betaniya. Na dey na baka, fodewroko, den sa abi fu sreka den kriboy sani gi na Paskafesa, di e bigin te sondongo, te na pikin skapu fu a Paska sa musu srakti èn musu losi heriheri. Pe den sa hori na fesa, èn suma sa sreka den sani?

Yeyses no fruteri den den sortu tori disi finifini, kande fu tapu pasi gi Yudas fu go taygi den granpristri den sani disi, so taki den kan kisi Yeyses na a ten fu a Paskafesa. Ma now, kande fodewroko bakadina frukufruku, Yeyses e seni Petrus nanga Yohanes komoto fu Betaniya, èn e taygi den: „Go sreka a paska gi wi, so taki wi kan nyan en.”

„Pe unu wani fu wi sreka en?”, den e aksi.

„Te unu e go na ini na foto,” Yeyses e tyari kon na krin, „dan wan man di e tyari wan watrakan nanga watra, sa kon miti unu. Waka na en baka go na ini na oso, pe a e go na ini. Èn unu musu taygi na eyginari fu na oso, ’Na Leriman e taygi yu: „Pe na fisitiman kamra de, di mi nanga mi disipri kan nyan na paska na ini?”’ Èn na man dati sa sori unu wan bigi tapusey kamra nanga ala sani na ini. Sreka en drape.”

A no abi misi, taki na eyginari fu na oso na wan disipri fu Yeyses di kande e fruwakti taki Yeyses ben sa aksi en fu kan kobroyki en oso gi na spesrutu okasi dati. Awasi fa a no fa, te Petrus nanga Yohanes e kon na ini Yerusalem, dan den e feni ala sani neleki fa Yeyses ben taki na fesi. Èn so den tu disi e sorgu taki na pikin skapu de klari èn taki ala den tra sani sreka fu sorgu gi den fanowdu fu den 13 sma di o teki prati na a Paska, Yeyses nanga den 12 apostru. Mateyus 26:1-5, 14-19; Markus 14:1, 2, 10-16; Lukas 22:1-13; Exodus 21:32.

◆ San Yeyses leki fa a e sori e du dridewroko, èn fu san-ede?

◆ Sortu konmakandra e hori na ini na oso fu na heypristri, èn fu sortu reyde Yudas e go fisiti den kerki tiriman?

◆ Suma Yeyses e seni fodewroko go na ini a foto Yerusalem, èn nanga sortu marki?

◆ San den wan disi di den seni go e miti, san e sori agen tapu den wondru krakti fu Yeyses?