Fa a gemeente orga èn suma e tiri en?

NA INI a fosi brifi di na apostel Paulus ben skrifi gi den sma fu Korente, a ben taki wan prenspari sani fu Gado. A ben skrifi: „Gado a no wan Gado fu bruya, ma fu freide.” Baka dati a taki wan sani di abi fu du nanga den gemeente konmakandra. A taki: „Meki ala sani pasa na wan fasi di fiti èn soleki fa sani seti.”​—1 Kor. 14:33, 40.

² Na a bigin fu a srefi brifi dati, na apostel Paulus ben gi rai fu di trobi ben de na ini a gemeente fu Korente. Paulus ben taigi den brada fu Korente fu ’de wán na ini a fasi fa den e taki’ èn fu ’de wán na ini a fasi fa den e denki èn e prakseri’ (1 Kor. 1:10, 11). Baka dati a gi den rai fu difrenti sani di ben kan pori a wánfasi na ini a gemeente. A ben gebroiki na eksempre fu a libisma skin fu sori taki wánfasi musu de èn taki a prenspari fu wroko makandra. Dati meki a ben gi ala sma na ini a Kresten gemeente a deki-ati fu sori lobi gi makandra, awinsi sortu frantwortu den ben abi (1 Kor. 12:12-26). Neleki fa den difrenti pisi fu a skin e wroko makandra, na so den sma na ini a gemeente ben o wroko makandra tu. Disi e sori taki a gemeente ben o orga bun.

³ Ma fa a Kresten gemeente ben musu orga? Suma ben o orga a gemeente? Fa sani ben o seti èn suma ben o kisi a frantwortu fu du den difrenti wroko di ben musu du? Bijbel e gi wi a piki tapu ala den aksi disi.​—1 Kor. 4:6.

NA GADO E TIRI EN ORGANISÂSI

⁴ A Kresten gemeente ben seti na a dei fu a Pinksterfesa fu a yari 33, pikinmoro 2000 yari pasa. San wi kan leri fu a gemeente dati? Na Gado ben seti en èn na en ben e tiri a gemeente. Te wi e luku san Bijbel e taki fu a sani di pasa na Yerusalem a dei dati, dan wi no e tweifri taki na Gado ben seti a gemeente fu salfu Kresten (Tori 2:1-47). A gemeente dati ben de na oso fu Gado, en osofamiri (1 Kor. 3:9; Ef. 2:19). A fasi fa a Kresten gemeente fu Gado orga na ini a ten disi èn a fasi fa a e drai, na a srefi leki fa a ben de na ini a ten fu den apostel.

⁵ A fosi Kresten gemeente ben bigin nanga sowan 120 disipel. Den ben de den fosi sma di ben kisi santa yeye soleki fa skrifi na Yoèl 2:28, 29 (Tori 2:16-18). Ma na a srefi dei dati, sowan 3000 tra sma dopu na ini watra èn den sma dati ben kon na ini a gemeente fu salfuwan. Den ben bribi den sani di den ben yere fu Krestes èn den ben „tan poti prakseri na den leri fu den apostel”. „Ibri dei Yehovah ben frulusu sma èn moro nanga moro sma ben tron bribiman.”​—Tori 2:41, 42, 47.

⁶ A gemeente na ini Yerusalem ben e gro so esi, taki a granpriester fu den Dyu bigin krutu taki den disipel ben panya a leri fu den na ini heri Yerusalem. Furu fu den nyun disipel na ini Yerusalem ben de Dyu priester di ben tron memre fu a gemeente.​—Tori 5:27, 28; 6:7.

⁷ Yesus ben taki: „Unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:8). Na dati pasa tu. Baka di sma kiri Stefanus den bigin frufolgu den Kresten na ini Yerusalem. Dati meki den disipel di ben e libi drape lowe go na Yudea nanga Samaria. Ma awinsi pe den ben go, den tan preiki a bun nyunsu èn den tan meki moro disipel, srefi na mindri den Samariasma (Tori 8:1-13). Bakaten, den ben abi bun bakapisi di den bigin preiki a bun nyunsu na mindri den sma di no ben de Dyu èn di no ben besnèi (Tori 10:1-48). A preikiwroko disi ben meki taki furu sma ben tron disipel èn taki nyun Kresten gemeente ben e seti na ini tra foto tu.​—Tori 11:19-21; 14:21-23.

⁸ Sortu sani ben seti fu sorgu taki ibriwan fu den nyun gemeente ben orga soleki fa Gado wani? Nanga yepi fu en santa yeye Gado poti brada na ini den gemeente leki skapuman fu luku den skapu fu en. A fosi leisi di Paulus nanga Barnabas go na den difrenti gemeente dati leki zendeling, den poti owruman na ini den gemeente (Tori 14:23). A Bijbel skrifiman Lukas e fruteri taki na apostel Paulus ben kon makandra nanga den owruman fu a gemeente na ini Efeise. Paulus ben taigi den: „Poti prakseri na unsrefi èn na ala den skapu, bika santa yeye poti unu leki skapuman fu teki fesi na ini a gemeente fu Gado di a bai nanga a brudu fu en eigi Manpikin” (Tori 20:17, 28). Den man disi ben man tron owruman fu di den ben e tyari densrefi soleki fa Bijbel e taki dati wan owruman musu tyari ensrefi (1 Tim. 3:1-7). Titus, di ben e wroko makandra nanga Paulus, ben kisi a frantwortu fu poti brada leki owruman na ini den gemeente na Kreita.​—Tit. 1:5.

⁹ Di moro gemeente ben seti na tra foto, den alamala ben abi owruman. Toku den apostel nanga den owruman na ini Yerusalem ben abi a frantwortu fu teki fesi gi ala den Kresten gemeente dati.

¹⁰ Na ini wan brifi di na apostel Paulus ben skrifi gi a gemeente na ini Efeise, a ben fruteri taki a Kresten gemeente ben kan tan abi wánfasi te den ben o wroko makandra soleki fa a yeye fu Gado ben e sori den èn te den ben o gi yesi na Yesus Krestes leki edeman. Na apostel ben gi den Kresten deki-ati fu abi sakafasi, fu tan hori ’a wánfasi di den kisi nanga yepi fu a santa yeye’ èn fu wroko makandra na ini freide nanga ala sma fu a gemeente (Ef. 4:1-6). Baka dati a taki fu san skrifi na ini Psalm 68:18 èn a sori taki Yehovah ben seti sani fu yepi a gemeente. Lepi Kresten brada ben o dini leki apostel, profeiti, preikiman fu a bun nyunsu, skapuman, nanga leriman. Yehovah ben o poti den man dati di abi spesrutu koni, fu yepi den sma na ini a gemeente fu abi wan tranga bribi, so taki Gado ben o prisiri nanga a heri gemeente.​—Ef. 4:7-16.

A FASI FA DEN GEMEENTE SETI NA INI A TEN DISI

¹¹ Na ini a ten disi ala den gemeente fu Yehovah Kotoigi seti na a srefi fasi leki den wan na ini a ten fu den apostel. Den alamala makandra de leki wan bigi gemeente na heri grontapu èn den sma di de tra skapu e yepi den salfu brada nanga sisa fu den (Sak. 8:23). Yesus Krestes sorgu taki a sani disi pasa. A pramisi den salfu disipel fu en taki a o horibaka gi den „ala dei te na a kaba fu grontapu” èn na dati a e du tu. Den sma di tyari kon na wán na ini a gemeente di e gro dei fu dei, e gi yesi na a bun nyunsu fu Gado. Nanga den heri ati den e gi den libi abra fu du a wani fu Yehovah èn den e dopu leki disipel fu Yesus (Mat. 28:19, 20; Mark. 1:14; Tori 2:41). Den e si Yesus Krestes, „a moro bun skapuman”, leki na Edeman fu den skapu fu Gado. Den skapu dati na den salfu Kresten nanga den „tra skapu” na ini a gemeente (Yoh. 10:14, 16; Ef. 1:22, 23). A „wán ipi” dati e tan hori a wánfasi fu den, fu di den e saka densrefi na ondro Krestes leki na edeman fu den èn den e gi yesi na „a koni srafu di de fu frutrow” di Krestes poti fu orga sani. Meki wi tan sori taki wi e frutrow a srafu disi dorodoro.​—Mat. 24:45.

KORPORÂSI DI WI E GEBROIKI FU DU A WROKO FU WI

¹² Fu man tyari a frantwortu fu gi leri na a reti ten èn fu man preiki a bun nyunsu fu a Kownukondre fosi a kaba kon, dan a koni srafu seti difrenti korporâsi. Den korporâsi disi e meki taki den abi a reti fu druk buku èn fu du tra sani. A moro makriki gi wi fu preiki a bun nyunsu, fu di den wet fu difrenti kondre e horibaka gi den korporâsi fu wi.

A FASI FA DEN BIJKANTORO ORGA

¹³ Ibri leisi te wan nyun bijkantoro opo na wan presi, dan wan Bijkantoro Komte fu dri noso moro owruman e kisi a frantwortu fu seti a wroko na ini a kondre noso na ini difrenti kondre di de ondro a tiri fu a bijkantoro dati. Wán brada fu a komte disi e dini leki fesiman fu a Bijkantoro Komte.

¹⁴ Den gemeente na ini a kontren fu ibri bijkantoro orga na ini grupu di wi e kari kring. A no ala kring bigi a srefi, fu di den brada e luku pe den gemeente de, sortu tongo den sma e taki èn omeni gemeente de na ini a kontren di de na ondro a bijkantoro. Wan kring-opziener e kisi a frantwortu fu go na den gemeente na ini wan kring. A bijkantoro e sori a kring-opziener fa a musu du en wroko.

¹⁵ Ala sma na ini den gemeente e horibaka gi den seti fu na organisâsi di e tyari wini kon gi den. Den e saka densrefi na ondro den owruman di e teki fesi na den bijkantoro, na ini den kring èn na ini den gemeente. Den sabi taki na a koni srafu di de fu frutrow e gi leri na a reti ten. Na a tra sei a de so taki den brada fu a koni srafu na ini a ten disi e saka densrefi na ondro Krestes leki edeman, den e hori densrefi na den leri fu Bijbel èn den e meki a santa yeye tiri den. Te wi alamala e wroko makandra na ini wánfasi, dan wi o ondrofeni den srefi sani leki den fosi Kresten. Bijbel e taki: „A sani dati tranga a bribi fu a gemeente trutru èn dei fu dei moro nanga moro sma ben e tron bribiman.”​—Tori 16:5.