Tra prenspari sani

Wan boskopu gi Kresten papa nanga mama:

Yu leki papa nanga mama di lobi yu pikin, wani taki den kon lobi Yehovah èn taki den gi den libi abra na en. San yu kan du fu yepi den fu sreka densrefi gi dati? O ten den o kaba fu du a prenspari sani dati?

Yesus ben taigi den bakaman fu en: „Go na sma fu ala kondre èn meki den tron disipel. Dopu den” (Mat. 28:19). Soleki fa a tekst disi e sori, dan a moro prenspari sani di wan sma musu du fosi a kan dopu, na fu tron wan disipel. Dati wani taki dati a no musu tron wan sma nomo di e frustan den leri fu Krestes èn di e bribi den, ma a musu du ala den sani dati tu. Disi na wan sani di srefi yongu sma kan du.

Gi yu pikin wan bun eksempre èn poti den leri fu Yehovah go dipi na ini den ati (Deut. 6:6-9). Gebroiki sosrefi a buku Yu kan de koloku fu têgo! fu leri den san na den moro prenspari tru tori fu Bijbel èn fu yepi den fu si fa den kan gebroiki Bijbel rai na ini den libi. Yepi yu pikin fu fruteri tra sma san den e bribi èn yepi den fu du dati nanga den eigi wortu (1 Petr. 3:15). Den e kisi furu leri nanga deki-ati fu yu, te den srefi e studeri, te unu abi Osofamiri Anbegi, na den konmakandra noso te den e taki nanga den bun mati fu den. Ala den sani den sani disi o yepi den fu go na fesi teleki den dopu èn srefi baka te den dopu. Tan yepi den fu si sortu tra sani den kan du fu abi wan moro bun matifasi nanga Yehovah.

Odo 20:11 e taki: „Den sani di wan boi e du e sori suma a de trutru. Na so sma kan sabi efu a e du san reti èn efu a e du sani nanga wan krin ati.” San na wan tu sani di yu boi noso meisje musu du fu sori taki a tron wan disipel fu Yesus Krestes èn taki a de srekasreka fu dopu?

Wan pikin di e go na fesi èn di wani dopu musu gi yesi na en papa nanga mama (Tori 5:29; Kol. 3:20). Luku san Bijbel e taki fu Yesus di a ben abi 12 yari: „A tan saka ensrefi na [en papa nanga mama] ondro” (Luk. 2:51). A no de fu taki dati yu no musu fruwakti taki yu pikin no o meki fowtu. Ma wan pikin di wani dopu o du muiti fu teki na eksempre fu Yesus èn sma o sabi en leki wan pikin di e gi yesi na en papa nanga mama.

A o sori tu taki a wani kon sabi den tru tori fu Bijbel (Luk. 2:46). A pikin wani go na den konmakandra? A e gi piki te a de drape? (Ps. 122:1) A e angri fu leisi èn studeri Bijbel ala dei?​—Mat. 4:4.

Wan pikin di e go na fesi èn di wani dopu e poti sani fu a Kownukondre na a fosi presi na ini en libi (Mat. 6:33). A sabi sortu frantwortu a abi fu fruteri sma san a e bribi. A e preiki na difrenti fasi èn a no e frede fu meki den skoromeester nanga en skoromati kon sabi taki en na wan Kotoigi fu Yehovah. A e si en leki wan seryusu sani te a musu hori wan lezing na a Kresten libi nanga preikiwroko konmakandra.

Fu di a no wani du sani di Yehovah no feni bun, meki a e luku bun nanga takru mati (Odo 13:20; 1 Kor. 15:33). Disi o kon na krin na ini den poku, den felem, nanga den video game di a lobi èn na a fasi fa a e gebroiki Internet.

Furu yonguwan meki den papa nanga mama yepi den fu kon frustan den tru tori fu Bijbel bun, so taki den ben kan dopu aladi den yongu ete. Meki Yehovah blesi yu te yu e yepi yu pikin fu teki a prenspari bosroiti fu tron wan mati fu en.

Wan boskopu gi a preikiman di no dopu ete:

A de wan grani fu kan dini na ini wan gemeente leki wan preikiman di no dopu ete. A moi srefisrefi fu si fa yu go na fesi. Yu kon sabi Gado fu di yu studeri a Wortu fu en èn yu poti bribi na ini den pramisi fu en.​—Yoh. 17:3; Hebr. 11:6.

A kan taki fosi yu bigin studeri nanga Yehovah Kotoigi, yu ben e go na wan tra kerki. Noso kande yu no ben e go na kerki srefi. A kan taki yu ben e du tra sani tu di no e kruderi nanga den wet fu Bijbel. Ma now a bribi fu yu meki taki yu kon abi berow. Dati wani taki dati a e hati yu trutru taki fosi yu ben e du sani di no bun. Yu drai yu libi now. Dati wani taki dati yu no wani du sani moro di no bun, ma now yu wani du san Gado feni bun.​—Tori 3:19.

A kan de so tu taki „sensi di yu ben de wan beibi, yu kon leri den sani di skrifi na ini den Santa Buku” èn dati kibri yu fu no go du sani di wan Kresten no musu du èn di de seryusu sondu (2 Tim. 3:15). Yu leri san yu musu du te yu speri wani dwengi yu fu du sani di no bun noso te tra sani e pasa di kan meki yu trangayesi Yehovah. Yu sori taki yu abi bribi fu di yu tan horibaka gi a tru anbegi èn fu di yu e fruteri tra sma san yu e bribi. Yu leri fa fu du a preikiwroko èn now yu srefi teki a bosroiti fu dini Yehovah leki wan preikiman di no dopu ete.

Ma awinsi yu kon sabi Yehovah di yu ben bigi kaba noso yu kisi leri fu Yehovah sensi pikin-nengreten, a kan taki now yu e prakseri fu du ete tu sani di e sori taki yu go na fesi: Yu wani gi yusrefi abra na Gado èn dopu. Yu e gi yusrefi abra na Yehovah te yu e taigi en na ini begi taki yu teki a bosroiti fu dini en wawan fu têgo (Mat. 16:24). Fu sori taki yu gi yusrefi abra na en, yu o dopu na ini watra (Mat. 28:19, 20). Te yu gi yusrefi abra èn yu dopu, dan yu tron wan sma di Yehovah Gado poti fu wroko gi en. Disi na wan tumusi moi grani!

Ma soleki fa yu leri na ini Bijbel, yu kan kisi tesi tu. Memre taki syatu baka di Yesus dopu „a yeye tyari [en] go na ini a sabana èn drape Didibri kon tesi en” (Mat. 4:1). Baka te yu dopu leki wan disipel fu Krestes, yu kan fruwakti moro tesi (Yoh. 15:20). Den tesi disi kan kon na difrenti fasi. Yu famiri kan frufolgu yu (Mat. 10:36). Pikin na skoro, sma na wrokope, noso sma di ben de yu mati fosi kan spotu yu. Ma no frigiti den wortu fu Yesus di skrifi na ini Markus 10:29, 30: „Fu tru mi e taigi unu: Ibri sma di gowe libi en oso, noso en brada, noso en sisa, noso en mama, noso en papa, noso en pikin, noso en gron fu mi ede èn fu a bun nyunsu ede, o kisi wán hondro tron moro leki san a abi na ini a ten disi. A o kisi oso, brada, sisa, mama, pikin, nanga gron èn a o kisi frufolgu tu. Ma na ini a ten di e kon a o kisi têgo libi.” Sobun, wroko tranga fu tan krosibei na Yehovah èn fu libi soleki fa en wani.

Efu yu wani dopu, dan taigi a fesiman fu den owruman fu yu gemeente. Den owruman o gebroiki den aksi di e kon baka a pisi disi fu taki nanga yu, so taki den kan si efu yu de so fara taki yu kan dopu. Fu sreka gi a takimakandra disi yu kan bigin luku den aksi disi gi yusrefi.

Te yu e sreka yusrefi gi den takimakandra disi, dan a bun fu teki ten fu leisi èn fu denki bun fu den tekst na ini a pisi tori. Kande yu wani skrifi wan tu sani gi yusrefi na ini a buku, noso na wan tra presi. Te yu abi a takimakandra nanga den owruman yu kan gebroiki a buku disi nanga den sani di yu ben skrifi. Efu yu no man frustan sonwan fu den aksi, dan no frede fu suku yepi na a sma di e studeri Bijbel nanga yu noso na den owruman.

No prakseri taki yu musu gi bun langa piki tapu den aksi noso taki yu musu gi ala sortu kefalek piki. A moro bun te yu gi krin piki di syatu èn te yu du dati nanga yu eigi wortu. A ben o bun tu fu gebroiki wán noso tu fu den Bijbeltekst fu sori fa Bijbel e horibaka gi a piki fu yu.

Efu yu no e frustan den moro prenspari leri fu Bijbel so bun ete, dan den owruman o seti sani, so taki yu kan kisi moro yepi. Disi o meki taki yu o man gebroiki yu eigi wortu fu sori taki yu e frustan den leri fu Bijbel, so taki yu kan dopu te fu kaba.

[Wan sani gi den owruman: Na tapu bladzijde 208-212 fu a buku disi yu kan leisi fa yu musu hori den takimakandra nanga den sma di wani dopu.]