A lasti takimakandra nanga den sma di wani dopu

Nofo tron sma e kisi na okasi fu dopu na den kring konmakandra èn na den kongres fu Yehovah Kotoigi. Na a kaba fu a dopu-lezing, a takiman o aksi den sma di o dopu fu opo tanapu èn fu gi piki nanga wan tranga sten tapu den tu aksi di e kon now:

1. Yu abi berow fu yu sondu èn yu gi yusrefi abra na Yehovah fu du a wani fu en, fu di yu e bribi taki A o frulusu yu nanga yepi fu Yesus Krestes?

2. Yu e frustan taki te yu dopu, sma o si yu now leki wan Kotoigi fu Yehovah di e horibaka gi na organisâsi fu en?

Te den sma di o dopu piki den aksi disi nanga „iya”, dan dati e sori ala sma taki den e bribi na ini a lusu-paiman èn taki den gi densrefi abra na Yehovah fu du ala san a e aksi fu den (Rom. 10:9, 10). Den sma di wani dopu musu luku den aksi disi gi densrefi èn den musu begi te den e du dati, so taki den kan piki den aksi disi nanga den heri ati.

Yu begi Yehovah fu gi yusrefi abra na en, sobun yu pramisi en fu dini en wawan èn fu meki a wani fu en tron a moro prenspari sani na ini yu libi?

Yu de seiker now taki yu wani dopu na a fosi okasi di de?

Sortu krosi yu musu weri te yu o dopu? (1 Tim. 2:9, 10; Yoh. 15:19; Fil. 1:10)

Wi musu weri krosi „na wan lespeki fasi èn nanga krin frustan” soleki fa a fiti sma di e „anbegi Gado”. Sobun, den wan di o teki dopu no musu weri swenkrosi di e poti den skin na doro. Den no o weri krosi pe fowtow, reklame noso tra sani skrifi na tapu. Den musu weri krosi di krin èn di fiti na okasi dati.

Fa wan sma musu tyari ensrefi te a o dopu? (Luk. 3:21, 22)

A dopu fu Yesus e sori wi fa Kresten musu dopu na ini a ten disi. Yesus ben frustan taki dopu na wan seryusu sani. Disi ben kon na krin na ini a fasi fa a ben e tyari ensrefi di a dopu. Dati meki a no ben o fiti gi wi fu taki ala sortu sani fu meki sma lafu, fu swen, noso prei na ini a watra te wi e dopu. A no ben o fiti tu fu tyari wisrefi na wan fasi di kan meki taki sma no si a dopu leki wan seryusu sani. Wan nyun brada noso sisa no kan du tu leki na wini a wini wan prijs. Aladi dopu na wan prisiri okasi, toku wi musu prisiri na wan lespeki fasi.

Te yu gwenti go na den konmakandra fu a gemeente èn yu e tan wroko makandra nanga a gemeente, dan fa dati o yepi yu fu tan du san yu pramisi Yehovah di yu gi yusrefi abra na en?

Fu san ede yu musu tan abi a gwenti fu studeri èn fu go na ini a preikiwroko, srefi baka te yu dopu?

WAN TU SANI GI DEN OWRUMAN FU A GEMEENTE

Te wan preikiman di no dopu ete taki dati a wani dopu, dan den musu gi en a deki-ati fu studeri den „Aksi gi den wan di wani dopu”, di de fu feni na tapu bladzijde 185-207 fu a buku disi. Den owruman musu sori en a pisi tori di de na tapu bladzijde 182 èn di nen „Wan boskopu gi a preikiman di no dopu ete”. A tori disi e sori fa a preikiman kan sreka ensrefi gi den takimakandra di a o abi nanga den owruman. Soleki fa skrifi drape, dan te a takimakandra e hori, a sma di wani dopu kan gebroiki a buku fu en nanga den sani di a skrifi di a ben e sreka ensrefi gi a takimakandra. Ma a no de fanowdu taki wan sma luku den aksi nanga en fosi a abi a takimakandra nanga den owruman.

Efu wan sma wani dopu, dan a musu taigi a fesiman fu den owruman. Baka te a sma di wani dopu kisi na okasi fu luku a pisi „Aksi gi den wan di wani dopu”, dan a fesiman fu den owruman o aksi en efu a pramisi Yehovah na ini begi taki a o du a wani fu en. Efu a sma du dati kaba, dan a fesiman fu den owruman o seti sani, so taki tu owruman kan luku den „Aksi gi den wan di wani dopu” nanga en. Gi ibriwan fu den pisi disi wan tra owruman musu hori a takimakandra disi. A no de fanowdu fu wakti teleki wan kring konmakandra noso wan kongres o hori fu luku den aksi disi nanga a sma.

Furu tron ibriwan fu den tu pisi disi kan du na ini wán yuru. Toku a no fowtu fu teki moro ten efu dati de fanowdu. Ibriwan fu den takimakandra musu bigin nanga wan begi èn tapu nanga wan begi. Te unu e taki fu den aksi, dan den owruman noso a sma di wani dopu no musu pruberi fu kaba esi-esi. Den owruman no musu draidrai tu fu luku den aksi nanga a sma di wani dopu.

Furu tron, a moro bun fu luku den aksi nanga ibriwan fu den sma di wani dopu èn fu no du en leki grupu. Te a sma srefi gi piki tapu ala den aksi, dan den owruman o kon si moro krin efu a e frustan den sani bun, so taki den no abi fu tweifri efu a kan dopu. Boiti dati, a sma di wani dopu o man taki moro fri te den owruman e taki nanga en wawan. Efu yu musu luku den aksi nanga wan man nanga en frow, dan yu kan taki nanga den ala tu na a srefi ten.

Efu den brada musu hori a takimakandra disi nanga wan sisa, dan den musu de na wan presi pe sma man si den, ma pe sma no man yere den. Son leisi a kan de fanowdu fu aksi wan tra owruman noso wan dinari ini a diniwroko fu kon na a takimakandra. Ma yu mag tyari wan dinari, soso na a pisi di dinari kan luku nanga sma, soleki fa a tra paragraaf e sori.

Na ini gemeente pe furu owruman no de, den kan gebroiki dinari ini a diniwroko di sori taki den e si sani na wan yoisti fasi èn di sabi teki bun bosroiti, fu du den aksi di abi fu du nanga „Pisi 1−Den sani di wi leki Kresten e bribi”. Na den owruman wawan musu luku „Pisi 2−A fasi fa Kresten musu libi” nanga wan sma. Efu a gemeente no abi nofo lepi brada fu du a wroko disi, dan den owruman kan aksi a kring-opziener fu luku efu owruman fu wan tra gemeente na ini a birti kan yepi den.

Efu a sma di o teki dopu na wan pikin ete èn en papa nanga mama na anbegiman fu Yehovah, dan den musu de na a takimakandra tu. Efu den no man de na a takimakandra, dan tu owruman musu de na ibriwan fu den takimakandra disi. (Na Pisi 1 wan owruman kan go nanga wan dinari tu.)

Den owruman musu de seiker taki a sma di wani dopu e frustan den moro prenspari leri fu Bijbel. Boiti dati, den o luku efu a sma abi furu warderi gi den tru leri fu Bijbel èn efu a e sori a yoisti lespeki gi Yehovah en organisâsi. Efu a sma no e frustan den prenspari leri fu Bijbel, dan den owruman o seti sani so taki a kan kisi yepi. Dan a sma kan dopu bakaten. Trawan musu kisi na okasi fu sori moro warderi gi a preikiwroko, noso fu sori moro krin taki den e saka densrefi ondro den seti fu na organisâsi. Den owruman o luku fa den o prati a ten di den abi fu luku a pisi nanga a sma, so taki den kan de seiker taki a kan dopu. A kan de fanowdu taki den poti moro prakseri na son aksi leki na trawan, ma a prenspari taki den luku ala den aksi nanga a sma.

Baka a di fu tu takimakandra, den owruman di kisi a frantwortu fu luku den aksi disi nanga a sma o kon makandra fu luku efu a sma kan dopu. Den owruman o hori a situwâsi fu a sma na prakseri èn fa en libi ben de. A musu de krin taki a sma lobi Yehovah nanga en heri ati èn taki a e frustan den prenspari leri fu Bijbel. Nanga a lobi-ati yepi fu unu leki owruman, den wan di o dopu o de srekasreka fu de wan fayafaya preikiman fu a bun nyunsu.

Baka dati, wán noso tu fu den owruman di ben luku den aksi nanga a sma o kon makandra nanga en fu taigi en efu a kan dopu. Efu a kan dopu, dan den owruman musu taki nanga en fu a pisi di nen „A lasti takimakandra nanga den sma di wani dopu”, di de fu feni na tapu bladzijde 206, 207. Efu a sma no kaba studeri a Koloku fu têgo-buku, dan den owruman musu gi en deki-ati fu studeri go doro baka te a dopu. Taigi a sma di o dopu taki unu o skrifi a dopu dei fu en tapu en Gemeente preikiman karta. Taigi en tu taki den owruman skrifi a nen nanga tra sani fu en, so taki na organisâsi man sorgu moro bun gi den sani di abi fu du nanga na anbegi fu Yehovah Kotoigi na heri grontapu. Boiti dati, a preikiman o man teki prati na a anbegi èn a o kisi yepi fu tranga en bribi. Den owruman kan sori a nyun preikiman tu taki den no o du tra sani nanga den sani di den skrifi fu en. Den owruman o hori densrefi na a Wereldwijd gegevensbeschermingsbeleid van Jehovah’s Getuigen di de tapu jw.org. A takimakandra disi no musu langa moro leki 10 miniti.

Wán yari baka te a preikiman dopu, dan tu owruman musu taki nanga en fu gi en deki-ati nanga rai di kan yepi en. Wán fu den owruman musu de a grupu-opziener fu a preikiman disi. Efu a sma disi na wan pikin èn en papa nanga mama na anbegiman fu Yehovah, dan den musu de na a takimakandra. A takimakandra disi musu hori na wan switi fasi èn a musu gi a sma deki-ati. Den owruman o sori en fa a go na fesi leki Kresten èn den o gi en rai di o yepi en fu tan abi wan bun schema fu studeri, fu leisi Bijbel ala dei, fu hori Osofamiri Anbegi ala wiki, fu go na den konmakandra èn teki prati na den èn fu go na ini a preikiwroko ibri wiki (Ef. 5:15, 16). Efu a no kaba studeri a Kokoku fu têgo-buku, dan den owruman musu seti sani, so taki wan sma kan yepi en fu du dati. Den owruman musu prèise a sma so furu leki a kan. Nofo tron a bun kaba fu gi a sma rai fu wán noso tu sani di a musu du moro bun.