Aksi di opo kon
◼ O furu wan preikiman musu go na den konmakandra noso du a preikiwroko fosi a kan teki dopu?
A moro prenspari bosroiti di wan sma e teki na fu teki dopu. Fu dati ede, fosi wan sma kan teki dopu, a musu sabi nofo kaba san Gado e aksi fu en. Boiti dati, a musu sori kaba taki a abi a fasti bosroiti fu hori ensrefi na den wèt fu Gado.
Kresten kisi a wèt taki den no musu misi den konmakandra. Fu dati ede wan preikiman di no dopu ete, musu sori kaba taki a abi a gwenti fu kon na den konmakandra (Heb. 10:24, 25). Moro furu a o de so taki a e gi piki na den konmakandra. A kan tu taki a poti en nen kaba na a Theokrasia Diniwroko-skoro, aladi a no musu fu du a sani disi fosi a man teki dopu.
Boiti dati, fu di Kresten kisi a wroko fu preiki a bun nyunsu èn fu meki disipel, meki wan preikiman di no dopu ete musu abi a gwenti fu du a preikiwroko fosi a teki dopu (Mat. 24:14; 28:19, 20). Omeni mun a musu preiki kaba fosi a kan teki dopu? A no de fu taki dati a musu kisi nofo ten fu sori taki a o tan abi a gwenti fu preiki fayafaya ibri mun (Ps. 78:37). Ma a no abi fu preiki tumusi langa fosi a kan teki dopu, kande baka wan tu mun kaba. Omeni yuru a musu preiki fosi? Nowan wèt de gi a sani dati. Den owruman musu luku a situwâsi fu ibri preikiman aparti èn den musu hori dati na prakseri.—Luk. 21:1-4.
Den owruman (noso dinari ini a diniwroko te furu owruman no de) di e luku den dopu aksi nanga wan sma di wani dopu, musu hori na prakseri taki ala sma e difrenti fu makandra. Den musu prakseri bun fosi den taki efu wan sma kan teki dopu. Den musu man si taki a wani tron wan Kotoigi fu Yehovah trutru èn taki a abi warderi gi a grani di a abi fu de na ini Yehovah en organisâsi èn fu du a preikiwroko. Den owruman e hori na prakseri taki a sma disi no de wan lepi Kresten ete èn taki a no abi a koni fu den dopu preikiman di abi furu ondrofeni. Efu den owruman si taki a sma no doro den markitiki fu teki dopu, dan na wan switi fasi den musu sori en nanga yepi fu Bijbel fu san ede den teki a bosroiti dati èn den musu yepi en meki a gro moro fara.