Aksi boksu

● Ofara wan preykiman di no dopu musu teki prati na a preykiwroko, bifo den feni en bun fu teki dopu?

Wan sma di doro a marki fu tron wan preykiman di no dopu ete, sori kba na difrenti fasi taki a de en faya angri fu de wan fu den Yehovah Kotoygi (Ps. 110:3). Wan fayafaya studie fu den Buku tyari wan kenki kon na ini en denki, en fasi fu si sani nanga en fasi fu libi. Fu na opregti angri fu plisi Yehovah èn fu du En wani, meki so wan seryusu beybri stukaman abi doronomo demakandra nanga Yehovah pipri na den gemeente konmakandra, den kringkonmakandra nanga den kongres (Hebr. 10:24, 25). Boyti taki a e fisiti so sortu konmakandra doronomo, dan so leki a e sori en ati e buweygi en tu fu meki en bribi bekenti na publiki fu di a e gi piki tapu den konmakandra, èn kande a skrifi en nen na a teyokrasiya diniwroko skoro. — Ps. 40:9, 10; om blz. 75.

Te wan beybri stukaman teki a waarheid kba èn e sori taki a e frustan a waarde fu a Kownukondre boskopu, dan a kan nyanbun fu a grani fu teki prati na a oso-fu-oso wroko. Disi na a moro prenspari wroko fu Yehovah Kotoygi (Mat. 24:14; 28:19, 20; om blz. 113). Ini a tori disi dan a preykiman di e hori a studi nanga den owruman e tyari wan hebi frantiwortu fu de seyker taki na heri libi fu a stukaman de ini akruderi nanga kresten gronprakseri. A musu abi trutru na angri fu de wan fu den Yehovah Kotoigi èn musu warderi en fu abi wan prati na a wroko di abi na ini a preyki fu a Kownukondre èn a meki fu disipri. — Gal. 6:6; w88 15/11 blz. 17; om blz. 100, 101, 174.

A mindri a ten di a stukaman doro a marki fu abi wan prati na a diniwroko èn a ten di a e pristeri en srefi gi a watra dopu no abi fu de tumusi langa. A pisiten dati en libifasi de krinkrin kba ini akruderi nanga kresten gronprakseri, ma a e mankeri ondrofeni ete ini a publiki diniwroko. Den musu gi en nofo ten fu sori taki a abi na fasti bosroyti fu abi wan doronomo nanga fayafaya prati na a preykiwroko. — Ps. 40:8; Rom. 10:9,10, 14, 15.

Leki fa a sori dan na a ten di wan sma klari fu teki dopu, a sa prati doronomo a bun nyunsu nanga trawan, ala di a e kobroyki moro leki soso wantu yuru wan mun ini a preykiwroko (w84 1/9 blz. 8 par. 2). A no de fu taki taki wi musu luku den persoonlijk omstandigheid fu iniwan sma di e aksi fu kisi dopu, aladi wi musu hori prakseri nanga a bakagron fu a sma, en libiyari, den skotu fu en èn so moro fara. Den owruman sa wani meki den bodoy di den e kisi tapu blz. 175 fu a Diniwroko-buku tyari den: „Wi belangstelling e go na den wan di dray den ati go na Yehovah èn di frustan san den fondamenti beybri waarheid wani taki. Nanga a lobifasi yepi fu unu dan den wan di o teki dopu, sa kisi a deki-ati fu teki a kresten diniwroko a den tapu èn dan den sa de srekasreka nofo fu du a prenspari wroko disi di den kisi fu du.” — Mat. 16:24; Yoh. 4:34; 1 Petr. 2:21.