Tan hori wan faste bribi
„O langa joe sa tinga tapoe toe prakseri?” — 1 KOWNOE 18:21.
1. Fa son sma e doe nanga na waarheid?
A FIRI foe degedege di de now na alasé, ben sa man foe abi makti srefi tapoe joe égi fasi fa joe de nanga Gado èn a bijbel. Son sma e jere na waarheid, den e feni en moi èn e studeri a bijbel wan pisi ten. Den e fisiti wan toe kristelek konmakandra, ma den no e ferstan troetroe taki a dini foe Gado moesoe de den libimarki. — Mattéus 13:3-9.
2. (a) Fa trawan e doe ? (b) Sortoe moi rai wi e lési ini Hebrewsma 10:36-39?
2 Trawan ben de di ben teki a waarheid, den ben gi den libi abra nanga jepi foe Jezus Kristus na Jehovah Gado èn den ben symboliseer a gi abra disi nanga a dopoe ini watra. Ma den no e go na fesi. Te na okasi de den o go wan toe joeroe ini a velddienst. Ma den no e libi troetroe ini akroederi nanga a gi di den gi den srefi abra, bikasi gi joesrefi abra na Gado sondro kondisi wani foe taki dati joe e dini en nanga joe heri ati èn serjoesoe. — Mattéus 16:24; Hebrewsma 10:36-39.
3. San Elia ben taki foe wan situwasi di e akroederi pikinso nanga disi?
3 Den sma di no sabi san foe doe kande lobi na waarheid, ma ooktoe den lobi na grontapoe. Kande den e angri te now ete na wantoe foe den owroe gwenti. A getrowfasi foe den e degedege. Langa ten psa Elia ben aksi den Israëlsma: „O langa ete joe sa tinga tapoe toe prakseri? Efoe Jehovah de a troe Gado go waka na en baka; ma efoe a de Baäl, go waka na en baka.” Ini wan vertaling a vers disi e taki so: „O langa joe sa pré tjontjon foe tanapoe na sé watra e loekoe san e go nanga san e kon?” — 1 Kownoe 18:21; The New English Bible.
4. San de na waarde foe faja dienst?
4 A pipel foe Jehovah e feni prisiri nanga kowroe-ati ini faja dienst (Titus 2:13, 14). A dienst disi e jepi den foe tan ini libi na jejefasi. Foeroe foe den, spesroetoe den di abi langa ondrofeni ini a dienst foe Gado, e sori bigi faja. Ma njoensoe di e kon foe foeroe presi e sori dati te now ete a grontapoe e kori son jongoewan ofoe njoenwan presi den gi den srefi nanga ati èn sili na a dienst foe Jehovah. Prakseri den prisiri nanga den blesi di den sa kisi te den sa graboe na waarheid ori stéfi èn go krakti na fesi na ini santa dienst, kande leki foeroeten-pionier, èn gi ensrefi sofasi nanga faja foe meki trawan kon ferstan na tranga fanowdoe foe a ten.
5. Sortoe aksi joe kan aksi joesrefi nanga reti?
5 A ben sa boen efoe joe aksi joesrefi: Mi de troetroe stéfi ini a bribi, ofoe mi e loekoe na toe sé? Mi e meki prisiri sani di no abi foeroe waarde swari ala mi ten? Mi e gi moro ten na a loekoe foe televisi, ofoe a doe foe sport ofoe a doe foe tra prisiri sani ma sani di e teki foeroe ten leki na a dienst foe Gado? Ofoe a de so taki a gi jesi nanga sakafasi èn a dini foe Gado de troetroe marki ini mi libi? Efoe a doe foe a wani foe Gado de joe libimarki, Gado sa skraki joe èn joe sa man prisiri foe tégo na ini den blesi foe en.
6. Sortoe rai ini a brifi foe Jakobus kan jepi oen foe ori wan faste bribi?
6 A de prenspari foe doe positief stap foe ori ini a tori foe tégo libi ini Gado Njoen Ordening wan faste bribi. Elia ben e gi trawan faja foe teki wan dek’ati stanpunt foe san de joisti. Jakobus ben skrifi: „Foe dat’ede saka joe srefi gi Gado, ma kakafoetoe gi Didibri èn a sa lon gwe foe joe. Go krosbé na Gado èn en sa kon krosbé na joe. Krin joe anoe, sondari, èn soifri joe ati, oen di no man teki bosroiti.” Jakobus ben skrifi gi sma di ben moesoe abi beraw foe di den ati di no ben man foe teki bosroiti ben meki den e doe wroko di no ben e prisi Gado. Den rai foe en kan de boen efoe den grontapoe pasi ben kori joe. Jakobus ben skrifi: „Meki presi gi pina èn sari èn kré. Joe lafoe moesoe tron kré, èn joe prisiri tron sari. Saka joe srefi ini Jehovah ai èn en sa meki joe hé.” — Jakobus 4:7-10.
Sabi e bow bribi
7. (a) Sortoe banti de na mindri sabi nanga bribi? (b) Foe san-ede joe moesoe gebroiki na bijbel foe kan meki joe bribi kon moro tranga?
7 Bribi de wan afersi foe fertrow. A abi leki gron soifri sabi èn ondrofeni. O moro joe sabi foe Gado èn omoro ondrofeni joe abi nanga en Wortoe èn den pasi foe en, o moro tranga joe bribi sa de. A bijbel e taki: „Bribi de a séker ferwakti foe sani foe san wan sma e howpoe a tapoe” (Hebrewsma 11:1). Fa joe ben kan abi wan séker bribi efoe joe ben abi soso wan frafra sabi foe san Jehovah ben doe? Gado gi joe na ferstan èn a koni èn a krakti foe froestan sani. Disi de presenti, èn a e ferwakti foe joe dati joe sa gebroiki den foe kon sabi moro foe en. Te joe skrifi wan sma wan brifi joe e froewakti taki a sa lési en ma no taki a sa poti en somaar tapoe wan planga ofoe libi en didon leki wan moi sani tapoe wan tafra. Joe ben lési èn studeri den brifi foe Gado gi oenoe — en Wortoe di skrifi? Te joe e studeri èn ferstan na bijbel, joe sa leri sani di joe no ben sa kon sabi na wan tra fasi. A de prenspari foe kon ferstan na warti foe den njoensoe di bijbel e gi. Wan kristelek owroeman ben taki: „Sma di e taki foe san den no man foe bribi no abi na gwenti foe studeri foeroe. Den sabi pikinso foe na bijbel — noiti den e meki a bijbel tron wan pisi foe den.”
8. San we rikomanderi te wan sma aksi wan sani di joe no man piki?
8 Efoe wan sma aksi wan sani tapoe san joe no man piki, disi e trobi joe bribi? A no de foe taki dati a no de so. No wan sma sabi ala sani. Soboen go soekoe den sani baka. Go ondrosoekoe na tekst finfini. Lési den tekst di de lontoe èn ondrosoekoe san den wani taki. Na Comprehensive Concordance of the New World Translation of the Holy Scriptures ofoe wan tra bijbelconcordantie, a boekoe Jepi foe ferstan na bijbel èn a Watch Tower Publications Indexes ofoe den index na baka ini tijdschrift nanga boekoe di a Genootschap ben tjari na doro kan jepi joe foe feni tekst di e akroederi nanga trawan, background njoensoe èn wan taki abra na tori. Kristen di abi moro ondrofeni kan gi jepi ooktoe. Wan Kotoigi nanga jari langa ondrofeni ben taki: „Ala ten mi ben kisi wan satisfaksi piki.”
9. San wi kan leri foe na eksempre foe den sma foe Berea?
9 Wi moesoe de leki den sma foe Berea, foe soema a bijbel e taki nanga grani foe di den ben e ’ondrosoekoe aladé den Boekoe foe kon sabi efoe den sani di na apostel Paulus ben e leri ben de joisti. San den ben feni no ben meki den ferwakti no kon troe. Foe dat’ede ’foeroe foe den ben kon tron bribiwan’. Wan foe den, Sópater, ben abi na grani foe go nanga Paulus na en di foe dri zendingsreis na ini Macedonië. — Tori foe den apostel 17:10-12; 20:4.
Sakafasi de fanowdoe
10. (a) Fa sabi kan gebroiki tapoe wan ferkeerti fasi? (b) Soleki joe e si en, dan fa Odo 16:5 moesoe wroko tapoe oen fasi foe doe?
10 Sabi tapoe ensrefi no de wan marki ma a e gi oen a jepi di de fanowdoe foe kisi moro warderi gi Jehovah èn en Wortoe. Wan soifri sabi, moksi nanga lobi, moesoe gi dek’ati foe abi sakafasi, èn no taki wi e prakseri moro foe oen srefi ini a tori foe oen égi prensparifasi. Na réde foe san-ede son sma e studeri, no de foe di den wani leri sabi Gado moro betre, ma foe di den wani poti densrefi nanga den égi fasi foe si sani na fesi. Kande den e kon de nanga hémemre, èn den e abi kritiek tapoe trawan — tapoe moro owroe brada nanga srefi tapoe na kristelek gemeente èn a moi wanfasi di de ini den bijbel waarheid di a gemeente e leri. — Odo 16:5; 1 Korintesma 8:1.
11. Foe pe oen kisi oen sabi nanga oen koni, èn san disi moe leri wi foe sakafasi?
11 Ma wi no abi noti di wi no ben kisi foe wan tra fonten. Wi kisi oen ferstan foe oen papa nanga mama, ma na a bigin na a Mekiman, Jehovah Gado, ben gi disi na a libisma-famiri. Wi kisi oen sabi nanga jepi foe den sma di ben jepi oen, foe boekoe di wi ben lési èn foe Gado, di de na fonten foe waarheid. Ini troe ala san wi abi biginbigin kon foe Gado. Na apostel ben skrifi: „Bikasi soema e meki joe difrenti foe wan trawan? Ja, san joe abi di joe no ben kisi? Now efoe troetroe joe ben kisi en, foe san-ede joe e gi joe srefi grani neleki joe no ben kisi en?” — 1 Korintesma 4:7.
12. Sortoe krakti punt e tjari ini oen prakseri ini Psalm 25:9 èn ini Jakobus 4:6?
12 Jehovah no e kroetoe oenoe na a koni di wi ben kisi, ma akroederi oen saka-fasi nanga oen friwani foe leri en pasi èn foe waka en. Saka-fasi nanga bribi e go anoe-na-anoe. A bijbel e taki dati Gado sa leri den „safri-atiwan” en pasi. Ooktoe e taki: „Gado de tége den hémemrewan, ma a e gi no-ferdini boenfasi na den sakafasiwan.” — Psalm 25:9; Jakobus 4:6.
13. San de wan toe eksempre foe sma di ben e meki trawan leri den?
13 Sakafasi abi na ini en dati wan sma de klari foe kenki en libi. Den apostel Petrus nanga Thomas ben de ini disi eksempre di ben e kon na fesi. Petrus ben kon na fesi na ini taki, ma abrasé foe disi a ben de so dati foeroe tron a ben moe kenki en libi, kisi pir’ai ofoe srefi strafoe. Tokoe Petrus ben de wan faja actief doe man foe a wortoe, èn en bribi èn fasi foe e doe a fosi stap nanga en dek’ati de gi oen alamala wan eksempre di e taki. Thomas no ben e bribi taki Jezus ben opobaka, ma di e ben kisi foe doe nanga a troe tori, wantronwantron a ben teki disi. Te wi fowtoe nanga ferkeerti prakseri e poti reti nanga jepi foe den Boekoe wi e sori wan sakafasi di e akroederi nanga disi? — Johannes 20:24-29.
Tesi joe bribi
14. San wan séker kristelek owroeman e doe so dati a e feni jepi foe kan kibri wan faste bribi?
14 Wan kristelek owroeman, di de wan langa ten kaba ini a waarheid, foeroetron e aksi ensrefi taki foe san-ede en bribi tan tranga ete aladi son sma di a ben sabi ben drifi gwe. A e taki dati alaten a ben ori a rai foe Paulus ini prakseri: „Tan tesi efoe joe de na ini bribi, tan bewijsi dati den feni joe boen” (2 Korintesma 13:5). Te a owroeman disi e rij go na en wroko, a e tesi ensrefi foeroetron foe di a e meki bijbelwaarheid pasa ini en prakseri. A e doe neleki a e taki foe den waarheid disi, èn ini prakseri a e ferklari èn verdédig den gi ala sortoe foe sma. A brada disi e sori na tapoe dati den publiki taki ini a Kownoekondrezaal e sori oen foeroetron dati a bijbel de troetroe a Wortoe foe Gado. Ma a e aksi: „Fa oen ben sa kan sabi den sani disi efoe oen no ben fisiti den konmakandra pe den ben taki foe den?” Dorodoro a e aksi ensrefi sani foe na boenfasi foe Gado nanga en organisaatsi. Na ini en begi na kristelek opziener disi e taki nanga warderi foe disi èn a ben taki: „Mi e taki Jehovah tangi taki a gi mi pasi foe tan nanga en pipel.” A ben sa abi voordeel gi joe efoe joe ben sa tesi tapoe wan fasi di gersi disi efoe joe de troetroe „ini a bribi”?
Begi de toemsi prenspari
15, 16. Foe san-ede begi de wan toemsi prenspari sani foe kan ori wan faste bribi?
15 A eksempre disi meki toe punt kon na fesi di de toemsi prenspari foe kan kibri wan faste bribi: begi nanga kristen konmakandra. A e psa foeroe tron dati sma nanga wan swaki bribi e begi wanwantron. Wan kristen papa e ori na ini prakseri taki Daniël ben e begi difrenti tron na wan dé, srefi baka di lanti wet tapoe sma foe begi (Daniël 6:6-10). Difrenti tron wan dé a papa disi e begi tranga foe Jehovah gi en koni èn tjari en.
16 Joe e degedege foe begi? Na psalm taki: „Jehovah de krosbé foe ala di e kari en, ala di e kari en troetroe.” Jezus ben aksi: „Efoe soboen oen, aladi oen ati e bron, sabi foe gi boen presenti na oen pikin, omoro den oen Tata, di de ini hemel, sa gi boen sani na den di e aksi foe dati?” (Psalm 145:18; Mattéus 7:11) Séker, Jehovah sa gi „boen sani” na den sma di e aksi disi nanga sakafasi.
Na rol foe konmakandra
17. Sortoe bijbel eksempre e sori o prenspari a de foe konmakandra nanga kompebribiman?
17 Boiti begi, den a kon geregeld makandra nanga kompebribiman, de ooktoe fanowdoe gi na bribi. Dritron ini a jari ala man Israëliet ben moesoe „go na fesi foe a troe Masra Jehovah”. Foe di foeroe man ben sabi na bigi jeje waarde foe den okasi disi, meki den ben e tjari den heri osofamiri go nanga den (Exodus 23:14; Lukas 2:41-45). Ooktoe Paulus ben e loekoe na fesi na den dek’ati di ben e bow a bribi di a gemeente ini Rome ben sa gi en. A ben e angri foe kon makandra drape nanga kompebribiman sodati nanga jepi foe a bribi foe makandra ’wan kenki foe dek’ati’ ben sa de èn den ben sa bow makandra. — Romeini 1:11, 12.
18. Fa den sma di abi tranga bribi e si den kristen konmakandra?
18 Sma nanga wan tranga bribi e njan boen foe ala den kristen konmakandra. Den no gwe baka a fosi joeroe ofoe den no e kon soso foe a di foe toe joeroe. Den abi warderi foe den konmakandra disi èn den e ferstan taki den e gi wan okasi foe leri èn foe kisi dek’ati èn blesi, èn taki tapoe den sortoe konmakandra disi wi kan kisi jepi foe brada di abi bigi lobi, èn foe kan gi makandra tranga foe „sori lobi èn doe boen wroko” (Hebrewsma 10:24, 25). Fa wi ben sa man kisi sowan dek’ati efoe oen no ben e de makandra nanga sma di kan gi disi?
Gi kotoigi èn oen bribi
19. Fa a bribi e kon tranga nanga a kristen kotoigi wroko?
19 Na kristen kotoigiwroko de wan tra jepi foe bow oen bribi. Jakobus ben skrifi: „Sori mi joe bribi aparti foe joe wroko, èn mi sa sori joe mi bribi nanga jepi foe mi wroko. Ja, soleki fa wan skin sondro bro dede, sotoe bribi sondro wroko dede” (Jakobus 2:18, 26). Wan prenspari wroko foe kristensma de foe leri trawan èn ibri kotoigi foe Jehovah sa ferteri joe: ’Gi kotoigi séker e bow a bribi!’ A no de soso foe boen foe na sma di e kisi leri, ma ooktoe gi na leriman. A de wan activiteit di e bow a bribi èn meki a kon tranga. Gi kotoigi e tjari joe so fara dati joe e verdedig joe bribi. A e srapoe joe denki. Ja, èn gi kotoigi foe a Kownoekondre e tjari blesi kon di komoto foe Gado makandra nanga na tiri foe a jeje di de foe si krin. — Markus 13:11; Romeini 10:14, 15.
Fertrow ini na „srafoe”
20, 21. (a) San wi moesoe ori ini prakseri ini a tori foe na „getrow èn koni srafoe”? (b) Fa wan kristen ben tjari disi kon ini wortoe?
20 A de ooktoe prenspari foe ori ini prakseri pe wi ben leri a waarheid fosi. Soema ben jepi wi foe bow oen bribi ini a bijbel nanga den pramisi di skrifi na ini? Fa wi kon ferstan san a bijbel wani taki gi oenoe ini a ten disi? Jezus ben taki dati te a ben drai kon baka a ben sa miti wan „getrow nanga koni srafoe” di ben sa gi jeje njanjan èn dati a „srafoe” di ben sa de bèzig nanga dati, ben sa poti a tapoe ala den goedoe foe a méstri. — Mattéus 24:45-47.
21 Wan kristen trowman ben taki wantron: „Jehovah organisaatsi de wan aparti fonten di de foe fertrow. Noiti ete a tjari mi ini wan ofoe tra fasi tapoe wan ferkeerti pasi. Ala san a taki abi Gado Wortoe leki gron èn a ben de a moro boen sani, gi mi, gi mi osofamiri èn gi ala sma di mi sabi. Mi kan taki troetroe taki mi bribi ben bow nanga disi.”
22. Sortoe aksi kan jepi joe foe ondrosoekoe san joe e doe foe meki joe bribi tan tranga?
22 Joe ben teki leri foe Jehovah Wortoe èn ben teki en, èn e bribi ini en? Joe gi joe libi abra na Gado èn joe symboliseer a gi abra dati nanga a dopoe ini watra? Joe e libi now akroederi na gi di joe gi joe srefi abra? Joe e aksi Gado foe tjari joe, foe kisi sabi èn bribi? Joe e go doronomo nange joe persoonlek studeri? Joe de alaten tapoe den kristen konmakandra? Joe de actief èn faja ini Gado santa dienst? Joe e ferbeter a kwaliteit foe joe activiteit tapoe na gebied foe a meki foe discipel, ofoe joe meki disi tron soso wan srepi seni? — Mattéus 28:19, 20.
23. Fa joe moesoe si problema nanga gens na ondro ai?
23 A no de foe taki dati oen alamala e feti nanga oen problema èn wi abi oen swakisé. Ma te tesi nanga gens kon tapoe oen pasi, oen no moesoe sekseki, degedege ofoe ’pré tjontjon e loekoe san e go nanga san e kon’. Ma moro foeroe oen moesoe abi wan marki na ai èn oen moesoe de séker foe na waarheid. Jakobus ben skrifi: „Oen si en leki wan reti prisiri, mi brada, te difrenti tesi e miti joe, foe di joe sabi taki na égifasi disi foe joe bribi di kisi tesi e tja horidoro kon.” Paulus ben gi na rai: „Tan na ai, tanapoe faste ini bribi, tjari joe srefi leki man, kon makti” (Jakobus 1:2, 3; 1 Korintesma 16:13). Foe tan leki kotoigi foe Jehovah ini a troe bribi, oen moesoe ontwikkel na égifasi bribi — wan froktoe foe Gado jeje. — Galasiasma 5:22, 23.
24. Foe san-ede a de so prenspari foe abi wan faste bribi?
24 Foe san-ede joe moesoe doe disi? Foe di a bribi de wan skilt tége Satan. di e ’go lontoe leki wan lew di e bari, èn e soekoe foe priti wan sma’. „Teki moro foeroe na bigi skilt foe bribi, nanga san joe sa man foe kiri den projectiel di abi faja” (1 Petrus 5:8-10; Efesesma 6:16). Efoe joe e tan ori wan faste bribi joe sa wani doe den sani tapoe Gado fasi. Joe ati sa de boen. Den wroko foe joe sa de ini akroederi nanga den instructie foe en èn joe sa go na fesi, e gro nomo tapoe na smara pasi di e tjari go na a libi. — Mattéus 7:14.
Leki wan overzicht
◻ Foe san-ede son sma e degedege, èn san den kan doe na dati?
◻ San joe leri foe sabi nanga sakafasi?
◻ Fa joe kan tranga joe bribi?
◻ Foe san-ede a de so prenspari foe tan ori wan faste bribi ?
[Prenki na tapoe bladzijde 2]
Den boekoe foe na Genootschap de wan bigi jepi foe ondrosoekoe sani di abi foe doe nanga tori èn aksi foe a bijbel