KAPITEL 8
Preikiman fu a bun nyunsu
DI YEHOVAH seni en manpikin Yesus kon na grontapu, a seni wan sma kon di ben o de wan bun eksempre gi wi (1 Petr. 2:21). Te wan sma tron wan bakaman fu Yesus, dan a sma dati e preiki a bun nyunsu leki wan dinari fu Gado. Yesus ben sori taki wan sma ben o firi bun te a ben o tron wan bakaman fu en. A taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka” (Mat. 11:28, 29). Den wan di teki a kari fu Yesus si taki a du san a pramisi!
2 Yesus leki a Moro Prenspari Dinari fu Gado, ben kari difrenti sma fu tron en bakaman (Mat. 9:9; Yoh. 1:43). A leri den fa fu du a preikiwroko èn a seni den fu go du a srefi wroko di en ben e du (Mat. 10:1–11:1; 20:28; Luk. 4:43). Bakaten a seni 70 trawan fu go preiki a bun nyunsu fu Gado Kownukondre (Luk. 10:1, 8-11). Di Yesus seni den disipel disi fu go preiki, dan a taigi den: „A sma di e arki unu, e arki mi tu. A sma di no abi lespeki gi unu, no abi lespeki gi mi tu. Boiti dati, a sma di no abi lespeki gi mi, no abi lespeki tu gi a sma di seni mi kon” (Luk. 10:16). Nanga den wortu disi Yesus sori krin taki a ben gi den bakaman fu en wan seryusu frantwortu. Den ben o teki presi gi Yesus nanga a Moro Hei Gado! Na ini a ten disi a de a srefi gi ala den sma di e gi yesi na a kari fu Yesus: „Kon, tron wan bakaman fu mi” (Luk. 18:22; 2 Kor. 2:17). Ala sma di e gi yesi na a kari dati kisi a frantwortu fu Gado fu preiki a bun nyunsu fu a Kownukondre èn fu meki disipel.—Mat. 24:14; 28:19, 20.
3 Fu di wi gi yesi na a kari fu Yesus fu waka na en baka, meki wi e kisi blesi. Wi kon „leri sabi” Yehovah Gado nanga Yesus Krestes (Yoh. 17:3). Wi kon sabi fa Yehovah e du sani. Yehovah yepi wi fu kenki a fasi fa wi e denki, fu kenki a fasi fa wi de, èn fu tyari wisrefi soleki fa Bijbel e sori (Rom. 12:1, 2; Ef. 4:22-24; Kol. 3:9, 10). Fu di wi ati furu nanga warderi, meki wi gi wisrefi abra na Yehovah èn wi dopu na ini watra. Di wi dopu, dan Gado poti wi na wroko leki dinari fu en.
4 Tan hori na prakseri taki te wi e dini Gado wi no musu du ogri èn wi musu du sani nanga wan krin ati (Ps. 24:3, 4; Yes. 52:11; 2 Kor. 6:14–7:1). Wi kon kisi wan krin konsensi fu di wi e bribi na ini Yesus Krestes (Hebr. 10:19-23, 35, 36; Openb. 7:9, 10, 14). Na apostel Paulus ben gi Kresten a deki-ati fu du ala sani fu gi Gado glori, so taki den no o meki tra sma fadon. Na apostel Petrus sori wi taki efu wi wani yepi sma fu tron anbegiman fu Yehovah, dan wi musu tyari wisrefi bun (1 Kor. 10:31, 33; 1 Petr. 3:1). Fa yu kan yepi wan sma fu tron wan preikiman fu a bun nyunsu?
NYUN PREIKIMAN
5 Te yu e studeri Bijbel nanga wan sma, dan na a bigin kaba yu musu gi en deki-ati fu taki nanga tra sma fu den sani di a e leri. A kan taki nanga famiriman, mati, sma na wrokope èn nanga tra sma di a e miti na tra okasi. Disi na wan prenspari sani di wi musu du fu leri nyun sma fu tron bakaman fu Yesus èn fu preiki a bun nyunsu (Mat. 9:9; Luk. 6:40). Te a bribi fu a sma dati e kon moro tranga èn a abi a gwenti fu fruteri trawan san a e leri, dan a no de fu taki dati a o wani go na ini a preikiwroko makandra nanga a gemeente.
O TEN WAN SMA KAN TRON WAN PREIKIMAN?
6 Fosi wan sma kan go nanga yu na ini a preikiwroko, dan yu musu de seiker taki a e tyari ensrefi soleki fa Bijbel e taki. Te wan sma e go nanga wi na ini a preikiwroko, dan trawan e si en leki wan Yehovah Kotoigi. Dati meki a musu de krin taki a e libi kaba soleki fa Yehovah e taki, fosi a kan tron wan preikiman di no dopu ete.
7 A no de fu taki, dati te yu e studeri nanga wan sma èn te yu e taki nanga en fu den rai na ini Bijbel, dan yu o kon sabi san na a situwâsi fu en. Yu o sabi efu a e du den sani di a e leri. Ma toku den owruman o kon makandra nanga yu èn nanga a sma fu taki fu wan tu sani di abi fu du nanga a libi fu en.
8 A fesiman fu den owruman o seti sani, so taki tu owruman (wán fu den musu de na ini a Diniwroko Komte) kan taki fu den sani disi nanga yu èn nanga a Bijbelstudenti. Efu wan gemeente no abi nofo owruman, dan wan owruman kan hori a takimakandra disi makandra nanga wan lepi dinari ini a diniwroko. Den brada no musu draidrai fu hori a takimakandra. Efu a studenti taigi den na wan konmakandra taki a wani tron wan preikiman, dan efu a kan den kan hori a takimakandra nanga yu èn nanga yu studenti baka a konmakandra dati. A takimakandra musu hori na wan switi fasi. Fosi wan sma kan tron wan preikiman di no dopu ete, dan a musu sabi den sani di e kon now èn a musu du den tu:
(1) A musu bribi taki Bijbel na a Wortu fu Gado èn taki a skrifi nanga yepi fu en santa yeye.—2 Tim. 3:16.
(2) A musu sabi den moro prenspari leri fu Bijbel èn a musu bribi den tu, so taki te sma aksi en wan sani, a o taki san Bijbel e leri na presi fu taki fu falsi kerkileri noso san ensrefi e denki.—Mat. 7:21-23; 2 Tim. 2:15.
(3) A musu gi yesi na a komando fu Bijbel fu kon makandra nanga a pipel fu Yehovah na den gemeente konmakandra efu a situwâsi fu en no e tapu en fu du dati.—Ps. 122:1; Hebr. 10:24, 25.
(4) A musu sabi san Bijbel e leri fu hurudu, sutadu, a gwenti di sma abi fu abi moro leki wán trowpatna, èn fu homo-sekslibi. A no musu du den sani disi tu. Efu a sma na wan uma di e libi nanga wan man, noso wan man di e libi nanga wan uma, dan den musu trow soleki fa lantiwet e taki.—Mat. 19:9; 1 Kor. 6:9, 10; 1 Tim. 3:2, 12; Hebr. 13:4.
(5) A musu gi yesi na a komando fu Bijbel di e taki dati wan sma no musu dringi sopi teleki a drungu. A musu de wan sma di e tan farawe fu drugs noso fu tra sani di a no dresi, ma di abi krakti tapu a frustan.—2 Kor. 7:1; Ef. 5:18; 1 Petr. 4:3, 4.
(6) A musu frustan fu san ede a de prenspari fu no abi demakandra di no bun.—1 Kor. 15:33.
(7) A musu komoto na ini ala falsi kerki organisâsi di a ben de na ini fosi. A musu tapu fu go na den konmakandra fu den kerki dati èn fu horibaka gi den, noso fu teki prati na sani di den e du.—2 Kor. 6:14-18; Openb. 18:4.
(8) A musu de wan sma di no e moksi ensrefi nanga den politiek afersi fu grontapu.—Yoh. 6:15; 15:19; Yak. 1:27.
(9) A no musu teki prati na den dyugudyugu noso feti fu den pipel fu grontapu.—Yes. 2:4.
(10) A musu wani tron wan Kotoigi fu Yehovah trutru.—Ps. 110:3.
9 Efu den owruman no de seiker fa wan studenti e prakseri fu sonwan fu den tori disi, dan den kan leisi den tekst di skrifi dyaso èn aksi en fa a e denki. A prenspari taki a frustan taki den wan di e teki prati na a preikiwroko makandra nanga Yehovah Kotoigi, musu libi soleki fa Bijbel e leri. Den sani di a sma e taki o yepi den owruman fu si efu a e frustan a frantwortu fu wan dinari fu Gado èn efu a e tyari ensrefi na so wan fasi taki a man go ini a preikiwroko.
10 Den owruman kan taigi a studenti wantewante efu a kan tron wan preikiman. Nofo tron den kan du disi na a kaba fu a takimakandra. Efu a studenti mag tron wan preikiman, dan den owruman kan gi en wan switikon (Rom. 15:7). Den owruman musu gi a studenti deki-ati fu bigin preiki so esi leki a man èn fu meki en preikiwroko raportu na a kaba fu a mun. Den owruman kan fruteri a Bijbelstudenti taki te wan sma di tron wan preikiman di no dopu ete e meki en preikiwroko raportu fu a fosi leisi, dan den e meki wan Gemeente preikiman karta gi en èn a karta disi e tan na den tra papira fu a gemeente. Den owruman e skrifi a nen nanga tra sani fu a preikiman na tapu a karta, so taki na organisâsi man sorgu moro bun gi den sani di abi fu du nanga na anbegi fu Yehovah Kotoigi na heri grontapu. Boiti dati, a preikiman o man teki prati na a anbegi èn a o kisi yepi fu tranga en bribi. Den owruman kan sori a nyun preikiman tu taki den no o du tra sani nanga den sani di den skrifi fu en. Den owruman o hori densrefi na a Wereldwijd gegevensbeschermingsbeleid van Jehovah’s Getuigen di de tapu jw.org.
11 A kan gi wan nyun preikiman deki-ati te wi e sori taki wi wani kon sabi en moro bun èn te wi e poti prakseri na den sani di a e du na ini a diniwroko. Disi kan meki taki a o gi en preikiwroko raportu ibri mun èn taki a o du moro gi Yehovah.—Fil. 2:4; Hebr. 13:2.
12 Te den owruman si taki a Bijbelstudenti kan tron wan preikiman, dan den o gi en a buku Wi orga fu du a wani fu Yehovah. Baka te a gi en preikiwroko raportu fu a fosi leisi, dan den brada kan meki bekènti syatu na ini a gemeente taki a tron wan preikiman di no dopu ete.
YEPI YONGUWAN
13 Yongu pikin kan tron preikiman fu a bun nyunsu tu. Yesus ben meki yongu pikin kon na en èn a ben blesi den (Mat. 19:13-15; 21:15, 16). Aladi a de so taki na papa nanga mama abi a frantwortu fu yepi den pikin fu den, toku trawan na ini a gemeente kan yepi den yonguwan di wani teki prati na a Kownukondre preikiwroko. Efu yu na wan papa noso wan mama, dan hori na prakseri taki a bun eksempre di yu e gi na ini a preikiwroko o gi yu pikin deki-ati fu de fayafaya na ini a diniwroko fu Gado. Efu wan pikin e tyari ensrefi bun èn a e taki nanga trawan fu san a e bribi, dan san yu kan du fu yepi en?
14 A ben o bun efu a papa noso a mama go na wan fu den owruman fu a Diniwroko Komte fu a gemeente, so taki den brada kan seti wan takimakandra fu si efu a pikin fu den kan tron wan preikiman. Baka dati a fesiman fu den owruman o seti sani fu meki tu owruman (wan musu de fu a Diniwroko Komte) taki nanga a pikin. A papa noso mama fu a pikin (noso ala tu) di de anbegiman fu Yehovah musu de na a takimakandra tu. Efu na wan tra sma e sorgu a pikin, dan den owruman musu taki nanga a sma dati. Efu a pikin sabi den moro prenspari leri fu Bijbel èn efu a e sori taki a wani preiki trutru, dan dati e sori taki a e go na fesi. Baka te den owruman kon sabi den sani disi èn den luku wan tu tra sani di den e luku tu te den e hori a takimakandra disi nanga bigisma, dan den tu owruman kan taki efu a pikin kan tron wan preikiman di no dopu ete (Luk. 6:45; Rom. 10:10). Te den brada e hori a takimakandra nanga wan yongu pikin, dan den no abi fu taki fu ala den sani di den e taki nanga wan bigisma, efu den sani dati no abi fu du nanga pikin-nengre.
15 Te den owruman e hori a takimakandra nanga a pikin, dan den musu prèise en taki a e go na fesi èn den musu gi en deki-ati fu dopu te fu kaba. Den musu prèise a papa nanga a mama tu fu di den wroko tranga fu kweki a pikin na ini a tru anbegi. Den owruman kan taigi a papa nanga mama fu leisi a pisi „Wan boskopu gi Kresten papa nanga mama” na tapu bladzijde 179-181. Na so den o man yepi a pikin moro fara.
GI YUSREFI ABRA ÈN DOPU
16 Now di yu kon sabi Yehovah, yu kon lobi en, yu bigin tyari yusrefi soleki fa a wani èn yu bigin go na ini a preikiwroko. Ma yu musu meki a matifasi di yu abi nanga en kon moro tranga tu. Fa yu kan du dati? Yu kan gi yusrefi abra na en èn dopu.—Mat. 28:19, 20.
17 Fu gi wan sani abra na Gado wani taki dati yu e poti a sani dati aparti fu du wan wroko gi Gado. Sobun, te yu e gi yusrefi abra na Gado, dan yu e pramisi en na ini begi taki yu o dini en yu heri libi langa èn taki yu o tan waka den pasi fu en. Disi wani taki dati yu o tan dini en wawan (Deut. 5:9). Disi na wan sani di yusrefi musu du. Nowan tra sma kan du dati gi yu.
18 Ma yu musu du moro leki fu fruteri Yehovah na ini begi taki yu wani dini en wawan. Yu musu sori tra sma tu taki yu gi yusrefi abra na Gado. Yu e du dati te yu e dopu na ini watra, neleki Yesus (1 Petr. 2:21; 3:21). Ma san yu musu du efu yu teki a bosroiti fu dini Yehovah èn yu wani dopu? Dan yu musu go na a fesiman fu den owruman fu taigi en taki yu wani dopu. A o seti sani, so taki wan tu owruman kan taki nanga yu fu luku efu yu man dopu. Fu kon sabi moro fu a tori disi, dan grantangi luku a pisi „Wan boskopu gi a preikiman di no dopu ete” na tapu bladzijde 182-184 fu a buku disi, èn luku a pisi „Aksi gi den wan di wani dopu”, na tapu bladzijde 185-207.
RAPORTU DI E SORI FA A PREIKIWROKO E GO NA FESI
19 Langa ten kaba, raportu di e sori fa a tru anbegi e go na fesi na heri grontapu de wan deki-ati gi a pipel fu Yehovah. Sensi a ten di Yesus fruteri den disipel fu en taki a bun nyunsu ben o preiki na heri grontapu, tru Kresten ben wani kon sabi fa a sani disi ben o pasa.—Mat. 28:19, 20; Mark. 13:10; Tori 1:8.
20 Den fosi bakaman fu Yesus ben e prisiri te den ben e yere fa a preikiwroko ben e go na fesi (Mark. 6:30). A Bijbel buku Tori fu den apostel e fruteri wi taki sowan 120 sma ben de makandra na a dei fu a Pinksterfesa fu a yari 33 di santa yeye ben kon na tapu den disipel. Heri esi yu ben kon abi 3000 disipel èn baka dati 5000 disipel. Den ben e yere taki „ibri dei Yehovah ben frulusu sma èn moro nanga moro sma ben tron bribiman” èn taki „bun furu priester tron bribiman tu” (Tori 1:15; 2:5-11, 41, 47; 4:4; 6:7). A no de fu taki dati a ben de wan moi deki-ati gi den disipel fu yere fa a wroko e go na fesi! A musu de so, taki den span boskopu disi ben e gi den a krakti fu tan du a wroko di Gado ben gi den fu du, awinsi den ben e kisi hebi frufolgu fu den Dyu kerki fesiman!
21 Na a pisi ten fu a yari 60 te go miti 61, Paulus skrifi den Kolosesma taki a bun nyunsu ben ’e gro èn ben e meki froktu na heri grontapu’ èn taki a bun nyunsu ben „preiki gi ala sma na grontapu” (Kol. 1:5, 6, 23). Den fosi Kresten ben e gi yesi na Gado Wortu èn santa yeye ben e gi den a krakti fu preiki na ala sei, fosi a Dyu libimakandra ben kisi pori na ini a yari 70. A no de fu taki dati a ben de wan deki-ati gi den Kresten di ben tan gi yesi na Gado fu yere fa a wroko ben e go!
Yu e du ala san yu man fu sorgu taki a preikiwroko disi du finifini fosi a kaba kon?
22 Na a srefi fasi na organisâsi fu Yehovah na ini a ten disi e tan du muiti fu meki raportu fu a preikiwroko di e du soleki fa Mateyus 24:14 e taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.” Leki anbegiman fu Gado di gi densrefi abra na en, wi abi wan prenspari wroko fu du. Wi srefi musu du ala san wi man fu sorgu taki a preikiwroko du finifini fosi a kaba kon. Yehovah o sorgu taki a wroko disi du soleki fa a wani èn efu wi abi wan prati na dati, dan a o feni wi bun.—Esek. 3:18-21.
YU PREIKIWROKO RAPORTU
23 Ma san wi musu skrifi na tapu a raportu? Na tapu a Preikiwroko raportu di na organisâsi meki, yu kan si san yu musu skrifi. Den sani di e kon now, kan yepi yu na ini a pisi tori disi.
24 Na ini a faki di nen „Sani di yu prati (sosrefi sani fu a website fu wi)” yu musu skrifi omeni buku, felem noso tra sani yu prati gi sma di no de dopu Kotoigi. Efu yu seni wan fu den sani fu a website fu wi gi wan sma soleki felem, pdf, noso tra sani fu arki, dan yu musu teri dati tu. Baka dati yu e kisi wan faki pe yu kan skrifi omeni leisi yu sori sma wan fu den felem fu a website fu wi.
25 Fu kan skrifi omeni „Gobaka” yu ben meki, dan yu musu teri omeni leisi yu ben go baka na wan sma di no de wan dopu Kotoigi èn di ben wani sabi moro. Yu kan teri wan sma leki wan gobaka te yu e miti a sma baka na oso, te yu e skrifi wan brifi gi a sma, te yu e bel en, èn te yu e seni wan sms noso e-mail gi en. Yu kan teri en leki wan gobaka tu te yu e tyari buku gi a sma, awinsi yu no miti en na oso. Ibri leisi te yu e hori wan Bijbelstudie, yu kan teri dati leki wan gobaka. Wan papa noso mama kan teri wán gobaka nomo ibri wiki te a hori na Osofamiri Anbegi nanga pikin fu en di no dopu ete.
26 Furu tron wi e studeri nanga wan sma ibri wiki, ma toku wi e teri dati leki wán studie ibri mun. Preikiman musu skrifi omeni difrenti Bijbelstudie den hori na ini a mun. Yu kan teri wan Bijbelstudie te yu e studeri nanga wan sma di no de wan dopu Kotoigi. Te wan brada fu a Diniwroko Komte aksi yu fu studeri nanga wan brada noso sisa di no e preiki moro, dan yu kan teri wan Bijbelstudie tu. Te yu e studeri nanga wan sma di dopu kaba èn di no kaba nanga a buku Yu kan de koloku fu têgo!, dan yu kan teri wan Bijbelstudie tu.
27 A prenspari taki yu skrifi soifri omeni yuru yu wroko na ini a preikiwroko na ini a faki „Yuru”. Moro furu disi na a ten di yu e gebroiki fu preiki gi sma di no de dopu Kotoigi. Yu kan teri a yuru te yu e du na oso-fu-oso preikiwroko, te yu e du stratiwroko, te yu e tyari gobaka, èn te yu e hori Bijbelstudie. Te yu e preiki na tra okasi èn na presi pe furu sma de, dan yu kan teri en leki preikiwroko yuru tu. Efu tu preikiman e wroko makandra, den ala tu kan teri a yuru. Ma te den e tyari gobaka noso e hori Bijbelstudie, dan wán fu den nomo o teri a gobaka noso a Bijbelstudie. A papa nanga a mama di e hori na Osofamiri Anbegi nanga den pikin kan teri a ten dati, ma den no musu teri pasa wán yuru ibri wiki. Den brada di e hori publikitaki kan teri a ten di den e gebroiki fu hori a lezing. Wan sma di e vertaal wan publikitaki kan teri a ten tu. Wi e du tra prenspari sani tu, soleki sreka wisrefi gi a preikiwroko, go na den preikiwroko konmakandra, du boskopu, nanga tra sani. Ma wi no e teri den yuru di wi e gebroiki fu du den sani disi.
28 Ibri preikiman musu arki en konsensi èn a musu du san Bijbel e leri te a o luku omeni yuru a o teri gi a preikiwroko. Son preikiman e preiki na ini kontren pe furu sma e tan, ma trawan e preiki pe furu sma no e tan èn den musu gebroiki furu ten fu doro den sma. Nowan kontren de a srefi èn a no ala preikiman e si den preikiwroko na a srefi fasi. Dati meki den brada nanga sisa na ini den gemeente na heri grontapu musu gebroiki den eigi konsensi fu bosroiti fa den o teri den preikiwroko yuru. Den brada fu a Tiri Skin no e dwengi trawan fu du sani leki den èn nowan tra sma no abi a reti tu fu krutu wan trawan na ini a tori disi.—Mat. 6:1; 7:1; 1 Tim. 1:5.
29 Te wi e skrifi na tapu wi preikiwroko raportu omeni yuru wi wroko, dan wi no musu skrifi den afu yuru noso den miniti. Disi no de so gi den preikiman di no man du so furu moro fu di den kon owru, fu di den no man komoto na oso, fu di den de na wan presi pe owrusma e tan di siki, noso efu wan tra sani de di e meki taki den no man go na ini a preikiwroko. So wan preikiman kan skrifi 15 miniti, 30 miniti, 45 miniti èn so moro fara tapu en preikiwroko raportu. Awinsi a wroko 15 miniti nomo na ini a mun, toku a musu skrifi dati. Den brada o teri en leki wan Kownukondre preikiman a mun dati. A seti disi de tu gi preikiman di no man du so furu fu wan syatu pisi ten. Kande den no man go na ini a preikiwroko wan tu mun fu di den siki, noso fu di den kisi wan mankeri. Ma a seti disi de soso gi den wan di no man du furu kwetikweti na ini a preikiwroko. A Diniwroko Komte o bosroiti efu wan preikiman kan gebroiki a seti disi.
DEN GEMEENTE PREIKIMAN KARTA
30 Den brada e skrifi den sani di skrifi na tapu yu preikiwroko raportu na tapu a Gemeente preikiman karta fu yu. Den karta na fu a gemeente pe yu de. Efu yu o froisi go na wan tra gemeente, dan yu musu taigi den owruman fu yu. A sekretarsi fu a gemeente pe yu ben de o seni a karta fu yu go na a nyun gemeente. Na so fasi den owruman fu a nyun gemeente o sabi moro bun fa den kan yepi yu fu tan go na fesi. Efu a de so taki yu no man go na a gemeente fu yu fu wan pisi ten di no langa moro dri mun, dan grantangi tan seni yu preikiwroko raportu go na a gemeente fu yu.
FU SAN EDE WI E SKRIFI SAN WI DU NA INI A PREIKIWROKO?
31 A e pasa son leisi taki yu frigiti fu meki yu preikiwroko raportu? Ten na ten, wi alamala abi sma fanowdu di e memre wi fu du wan sani. Ma efu wi leri fu si a sani disi na wan yoisti fasi èn efu wi e frustan fu san ede a prenspari fu meki wi raportu, dan a o moro makriki gi wi fu memre taki wi musu du dati.
32 Son sma e aksi: „Ma efu Yehovah sabi san mi e du na ini a preikiwroko, dan fu san ede mi musu meki wan preikiwroko raportu?” A tru taki Yehovah sabi san wi e du èn a sabi efu wi e du a preikiwroko nanga wi heri ati noso efu wi kan du moro. Ma no frigiti taki Yehovah ben meki sma skrifi omeni dei Noa ben de na ini na ark èn omeni yari den Israelsma ben tan waka lontu na ini a sabana. Gado sorgu taki sma skrifi omeni sma ben gi yesi na en èn omeni ben trangayesi en. Gado ben sorgu tu taki sma skrifi fa en pipel teki a kondre Kanan abra safrisafri èn san ala den reti-ati krutuman fu Israel ben du. Iya, a meki sma skrifi finifini fu den sani di den futuboi fu en ben du. Na en srefi ben meki sma skrifi fu ala den sani di pasa èn na a fasi dati a sori wi taki a prenspari gi en taki sma e skrifi finifini fa sani waka.
33 Sani di pasa na ini owruten èn di skrifi na ini Bijbel e sori taki Yehovah en pipel ben skrifi soifri fa sani ben waka. Furu tron den Bijbel tori disi no ben o abi so furu krakti na wi tapu efu son nomru no ben kari. Prakseri den eksempre disi: Genesis 46:27; Eksodes 12:37; Krutuman 7:7; 2 Kownu 19:35; 2 Kroniki 14:9-13; Yohanes 6:10; 21:11; Tori fu den apostel 2:41; 19:19.
34 A no de fu taki dati den raportu fu wi no e sori ala san wi e du na ini na anbegi fu Yehovah. Toku den raportu disi de fanowdu na ini Yehovah organisâsi. Di den apostel ben drai kon baka fu a preikiwroko, dan den fruteri Yesus „ala san den du èn san den ben leri sma” (Mark. 6:30). Son leisi den raportu kan sori taki wi musu poti moro prakseri na wan spesrutu pisi fu wi diniwroko. Kande den nomru e sori taki na ini son sani a wroko go na fesi, ma taki na tra kontren a go na baka. Fu eksempre, den raportu kan sori taki a nomru fu preikiman no e gro so esi moro. Kande den preikiman abi deki-ati fanowdu noso kande problema de di musu lusu. Den brada di abi a frantwortu fu luku den raportu disi o du muiti fu lusu iniwan problema di e meki taki wan sma noso a gemeente no e go na fesi.
35 Den raportu disi e yepi na organisâsi fu sabi na ini sortu kontren moro preikiman de fanowdu. Sortu gemeente abi bun bakapisi na ini a kontren fu den? Sortu gemeente abi wan kontren pe a wroko no e gro so esi? Sortu buku de fanowdu fu yepi sma fu kon frustan den tru leri fu Bijbel? Den raportu e yepi na organisâsi fu sabi na fesi omeni buku o de fanowdu gi a preikiwroko na den difrenti pisi fu grontapu èn fu sorgu taki den gemeente kan kisi den sani disi biten.
36 Te wi e yere fa a wroko e go, dan dati e gi wi deki-ati. Wi no e prisiri te wi e yere fa den brada nanga sisa fu wi e preiki a bun nyunsu na ala sei fu grontapu? Te wi e kon sabi fa a wroko e go na fesi, dan dati e yepi wi fu si fa na organisâsi fu Yehovah e gro. Den ondrofenitori fu difrenti brada nanga sisa e prisiri wi ati, èn den e meki taki wi de fayafaya fu du moro na ini a preikiwroko (Tori 15:3). Sobun, a prenspari taki wi e meki wi preikiwroko raportu. Disi e sori taki wi e broko wi ede nanga den brada nanga sisa fu wi, awinsi pe den de. A kan gersi wan pikin sani, ma na a fasi disi wi e sori taki wi e saka wisrefi na ondro a seti disi fu Yehovah organisâsi.—Luk. 16:10; Hebr. 13:17.
SAN YU WANI DU MORO NA INI A DINIWROKO?
37 Wi no musu luku san trawan man du na ini a preikiwroko, ma wi musu du san wi man (Gal. 5:26; 6:4). A situwâsi fu ibriwan sma de tra fasi. Na a tra sei, wi kan kisi furu wini te wi e luku san wi kan du moro na ini a diniwroko. Disi o yepi wi fu si efu wi e go na fesi. Te wi e du den sani di wi ben wani du, dan disi o meki wi firi bun.
38 Na ini a ten disi wi e tyari den sma kon na wán di Yehovah o kibri na a ten fu „a bigi banawtu”. A de krin taki Yehovah e meki a wroko disi go na fesi. Wi e libi na ini a ten pe a profeititori fu Yesaya e kon tru: „A pikin grupu o tron wan grupu fu dusun èn a pikin pipel o tron wan makti pipel. Mi, Yehovah, o meki disi pasa esi-esi te a ten doro” (Openb. 7:9, 14; Yes. 60:22). Na wan bigi grani fu de preikiman fu a bun nyunsu na ini den lasti dei disi!—Mat. 24:14.