Te sma du hati sani nanga wi​—Te wi feni taki ’trawan du wan hati sani nanga wi’

YU KAN frustan fa a ben hati Linda di a sisa du so wan sani nanga en? A sari taki den sani di trawan du hati a firi fu son sma so te taki den no e go na den konmakandra moro èn den tapu fu preiki. So wan sani miti yu tu?

Wan sma man „prati wi fu a lobi fu Gado”?

A tru taki wi kan feni en muilek fu gi wan brada noso sisa pardon te a du wan hati sani nanga wi. Wi sabi taki Kresten musu lobi makandra (Yohanes 13:34, 35). Efu wan brada noso sisa du wan hati sani nanga wi, dan wi kan sari èn a kan hati wi so te taki wi e firi brokosaka.​—Psalm 55:12.

Bijbel e taki dati son leisi Kresten kan feni taki trawan „du wan hati sani” nanga den (Kolosesma 3:13). Ma te so wan sani miti wisrefi, dan a kan muilek fu lusu a problema. Wan sani de di kan yepi wi? Luku dri sani na ini Bijbel di kan yepi wi:

Wi Papa na hemel e si ala sani. Yehovah e si ala sani di e pasa. A e si srefi te trawan e du ogri nanga wi èn a e si fa dati e hati wi (Hebrewsma 4:13). Boiti dati, Yehovah e firi gi wi te wi e sari (Yesaya 63:9). Noiti a e meki „banawtu, pina”, noso iniwan tra sani, srefi wan tra futuboi fu en, „prati wi fu a lobi fu Gado” (Romesma 8:35, 38, 39). A sani disi e gi wi a deki-ati fu du a srefi. Iya, wi no musu meki noti noso nowan sma kon na mindri wi nanga Yehovah.

Fu gi pardon no wani taki dati wi feni en bun taki trawan du wi wan ogri. Te wi gi wan sma pardon, dan dati no wani taki dati wi e si na ogri di a du leki wan pikin sani noso taki wi e tapu wi ai gi en. No frigiti taki Yehovah noiti no e feni en bun te sma e sondu. Ma a e gi pardon te sma abi berow trutru (Psalm 103:12, 13; Habakuk 1:13). Te Yehovah e gi wi deki-ati fu gi trawan pardon, dan a e aksi wi fu teki na eksempre fu en. A no e ’hori trawan na ati fu têgo’.​—Psalm 103:9; Mateyus 6:14.

A bun gi wi te wi no e hori trawan na ati. Fu san ede? Denki a tori disi: Kon meki wi taki dati yu piki wan ston di e wegi wan tu pontu. Yu e langa yu anu aladi yu e hori a ston. A no ben o muilek fu hori a ston wan syatu pisi ten sondro fu saka yu anu. Ma san ben o pasa efu yu pruberi fu du disi wan heri pisi ten? O langa yu ben o man hori en? Wan tu miniti? Wan yuru? Noso moro langa? A no de fu taki dati yu anu ben o kon weri. Toku a ston no kon moro hebi. Ma o moro yu e hori en, o moro yu e firi leki a e kon hebi. Na so a de tu te wi e hori sma na ati. O moro wi e hori wan sma na ati, awinsi na fu wan pikin sani, o moro muilek wi e meki en gi wisrefi. Fu dati ede Yehovah e gi wi a deki-ati fu no hori sma na ati. Iya, a bun gi wi te wi no e hori sma na ati.​—Odo 11:17.

„A ben de neleki Yehovah srefi ben e taki nanga mi”

San yepi Linda fu no hori a sisa na ati? Wan fu den sani di a du na taki a denki dipi fu Bijbeltekst di e sori fu san ede wi musu gi trawan pardon (Psalm 130:3, 4). A naki Linda ati di a kon frustan taki te wi e gi trawan pardon, dan Yehovah o gi wi pardon tu (Efeisesma 4:32–5:2). A e taki fa a sani dati ben abi krakti na en tapu: „A ben de neleki Yehovah srefi ben e taki nanga mi.”

Bakaten Linda no hori a sisa na ati moro. A gi en pardon nanga en heri ati èn now a sisa dati na wan bun mati fu en. Te nanga now Linda e dini Yehovah ete. Yu kan de seiker taki Yehovah wani yepi yu fu du a srefi tu.