Yehovah ben meki Simson kon tranga

Furu Israelsma go dini falsi gado baka èn dati meki Yehovah libi den Filisteasma fu basi a kondre. Ma wan tu Israelsma ben de di ben lobi Yehovah. Wan fu den na Manowa. En nanga en frow no ben abi pikin. Wan dei Yehovah seni wan engel go na a frow fu Manowa. Na engel taigi en: ’Yu o kisi wan boi. A o frulusu Israel fu den Filisteasma. A o de wan Nasireisma.’ Yu sabi suma na wan Nasireisma? Den ben de sma di ben e du spesrutu wroko gi Yehovah. Wan Nasireisma no ben mag koti en ede-wiwiri.

Baka wan pisi ten, Manowa en boi gebore èn a kari en Simson. Di Simson kon bigi, Yehovah ben meki taki a tron wan tranga man. A ben man kiri wan lew nanga en soso anu. Wan leisi, Simson wawan kiri 30 Filistea man. Den Filisteasma ben e teige en èn dati meki den ben e suku fu kiri en. Wan leisi di Simson ben e sribi na Gasa, den Filisteasma go wakti en na a portu fu a foto so taki den ben kan kiri en te mamanten. Ma mindrineti, Simson opo, a go na a portu fu a foto, dan a hari a doro puru. A syow a doro na tapu en skowru go te na a ede fu wan bergi krosibei fu Hebron.

Bakaten den Filisteasma go na Simson vriendin, Delaila, dan den taigi en: ’Wi o pai yu dusundusun pisi solfru efu yu kon sabi fu san ede Simson tranga so. Wi wani kisi en go poti na strafu-oso.’ Delaila ben wani a moni, èn dati meki a taki dati a o du san den aksi en. Na a bigin, Simson no ben wani taigi en fa a du kon taki a tranga so. Ma Delaila tan weri en ede, teleki a taigi en. Simson taki: ’Noiti wan sma koti mi ede-wiwiri, fu di mi na wan Nasireisma. Efu den koti mi ede-wiwiri, mi o lasi mi krakti.’ Yu no feni taki Simson meki wan bigi fowtu di a taigi Delaila a sani dati?

Wantewante Delaila go taigi den Filisteasma: ’Mi sabi fu san ede a tranga so!’ A meki Simson fadon na sribi na tapu en bowtu, dan a meki wan man koti en wiwiri. Delaila bari: ’Simson, den Filisteasma dya!’ Di Simson wiki, a si taki a ben lasi en krakti. Den Filisteasma grabu en, den breni en, dan den poti en na ini strafu-oso.

Wan dei dusundusun Filisteasma kon makandra na ini a tempel fu a gado fu den di nen Dagon. Den ben e bari: ’A gado fu wi meki wi kisi Simson! Un tyari Simson kon dyaso, meki wi lafu pikinso!’ Den meki Simson tanapu na mindri tu pilari, dan den meki spotu nanga en. Ne Simson begi: ’Ke Yehovah, gi mi krakti wán leisi ete.’ A ten dati a wiwiri fu Simson ben kon langa baka. A pusu den pilari fu a tempel nanga ala en krakti. A heri tempel fadon broko, kiri ala den sma. Simson srefi dede.