Yesus tron a Mesias

Yohanes ben e preiki: ’Wan sma di bigi moro mi e kon.’ Di Yesus ben abi sowan 30 yari a komoto na Galilea, dan a kon na Yordan-liba pe Yohanes ben e dopu sma. Yesus ben wani taki Yohanes dopu en, ma Yohanes taki: ’A no mi musu dopu yu, ma na yu musu dopu mi.’ Yesus taigi Yohanes: ’Yehovah wani taki yu musu dopu mi.’ Sobun, den go na ini Yordan-liba èn Yohanes dopu Yesus en heri skin na ini watra.

Di Yesus komoto na ini a watra a ben e begi. Na a momenti dati hemel opo èn a santa yeye fu Gado saka kon na en tapu leki wan doifi. Dan Yehovah taki komoto fu hemel: ’Yu na mi Manpikin, a lobiwan di mi feni bun.’

Di a santa yeye fu Yehovah kon na tapu Yesus, a tron a Krestes noso a Mesias. Now a ben o du a wroko di Yehovah seni en fu kon du na grontapu.

Wantewante baka di Yesus dopu, a go na ini a sabana èn a tan drape 40 dei. Di a drai kon baka, a go luku Yohanes. Di Yohanes si Yesus e waka kon, a taki: ’Disi na a Pikin Skapu fu Gado di o puru sondu na grontapu.’ Di Yohanes taki dati, a meki sma sabi taki Yesus na a Mesias. Yu sabi san pasa nanga Yesus di a ben de na ini a sabana? Meki wi go luku.