Jezus libi nanga diniwroko

A dopoe foe Jezus

SOWAN siksi moen baka di Johannes ben bigin nanga prékiwroko, Jezus di de now dritenti jari e go na a Jordaan, pe Johannes de. Foe san-ede? Foe go loekoe en foe respeki ede? Na sabi Jezus wani sabi nomo fa ai go nanga a wroko foe Johannes? Nono, Jezus wani foe Johannes dopoe en.

Wantewante Johannes e wégri. „Joe moe dopoe mi, èn joe e kon na mi?” Johannes sabi taki en neef de wan spesroetoe Manpikin foe Gado. Johannes foe prisiri ede ben djompo opo na ini en mama bere di Maria, di ben de nanga bere foe Jezus, ben kon loekoe en! Elisabeth, na mama foe Johannes ben ferteri en séker foe dati. Èn a ben sa ferteri en ooktoe foe na engel di ben kon meki na gebortoe foe Jezus bekenti èn foe den engel di na ini na neti foe en gebortoe ben sori ensrefi na den herder.

Soboen Jezus no de wan freemde sma gi Johannes. Èn Johannes sabi dati a dopoe foe en no ben de gi Jezus. A dopoe di a e dopoe sma de gi sma di abi berow foe den sondoe, ma Jezus de sondro sondoe. Ma aladi Johannes e tan wégri, Jezus e hori doro foe taki: „Meki a de a lési disi so, bika na sofasi a fiti oenoe foe doe ala sani di de regtvaardiki.”

Foe san-ede a de wan joisti sani dati Jezus teki dopoe? Foe di a dopoe foe Jezus de wan symbool, no foe berow foe sondoe, ma foe di ai pristeri ensrefi foe doe a wani foe en Tata. Jezus ben de wun temreman, ma now a ten doro gi en foe bigin nanga na diniwroko foe san Gado ben seni en kon na grontapoe. Joe prakseri dati Johannes ben ferwakti wan ongewoon sani di a ben dopoe Jezus?

We, bakaten Johannes e ferteri: „Na Sma di ben seni mi foe dopoe na ini watra, En ben taigi mi: ’Na tapoe a sma di joe e si a jeje e saka kon sidon èn tan tapoe en, na en na a sma di e dopoe na ini santa jeje.’” Johannes ben ferwakti soboen dati a jeje foe Gado ben sa kon tapoe wan sma di a ben dopoe. Foe dat’ede meki kande a no ben ferwondroe toemsi, di aladi Jezus ben opo komoto foe a watra, ’a jeje foe Gado leki wan doifi ben kon tapoe en.’

Ma moro e psa ete na a dopoe foe Jezus. Den hemel e opo densrefi gi Jezus èn wan sten e taki: „Disi na mi Manpikin, na lobiwan, di mi ben feni boen.” A sten foe soema dati ben de? Jezus égi sten? Nono! A ben de a sten foe Gado. A de krin dati Jezus de a Manpikin foe Gado èn no Gado srefi, soleki son sma e taki. Mattéus 3:13-17; Lukas 3:21-23; 1:34-36, 44; 2:10-14; Johannes 1:32-34; Hebrewsma 10:5-9.

◆ Foe san-ede meki Jezus no ben de wan freemde sma gi Johannes?

◆ Foe san-ede Jezus ben teki dopoe, aladi a no ben doe sondoe?

◆ Foe san-ede Johannes kande no ben ferwondroe di a jeje foe Gado ben kon a tapoe Jezus, efoe wi e prakseri san a ben sabi foe Jezus?