Wan brifi fu a Tiri Skin

Gi den wan di lobi Yehovah Gado nanga en Wortu Bijbel:

Yesus ben taki: „Unu o sabi san tru èn dati o meki unu kon fri” (Yohanes 8:32). Prakseri fa yu ben firi di yu leisi den tru tori na ini Bijbel fu a fosi leisi! A e gi prisiri fu sabi taki wi kan kon sabi san tru na ini a grontapu disi pe furu sma gwenti lei.​—2 Timoteyus 3:1.

Yehovah Gado wani taki wi musu kon sabi san tru. Èn fu di wi lobi tra sma, meki wi wani fruteri den den tru tori dati. Ma dati a no a wan-enkri sani di wi musu du fu kan dini Gado. Wi musu du muiti tu fu libi leki Kresten di abi furu lespeki gi den gronprakseri fu Yehovah. Yesus ben taki san na wan prenspari fasi fa wi kan sori Gado taki wi lobi en. A ben taki: „Efu unu e gi yesi na den komando fu mi, dan mi o tan lobi unu, neleki fa mi Tata tan lobi mi, fu di mi e gi yesi na den komando fu en.”​—Yohanes 15:10.

Yesus lobi en Papa trutru èn a e du ala san en Papa e aksi en fu du. Efu wi e libi soleki fa Yesus ben e libi, dan Yehovah o lobi wi èn wi o de koloku trutru. A o de soleki fa Yesus taki: „Efu unu sabi den sani disi, dan koloku fu unu te unu e du den.”​—Yohanes 13:17.

Wi howpu taki a buku disi yepi yu fu kon sabi fa yu kan libi soleki fa den tru tori fu Bijbel e taki èn fa yu kan tron wan mati fu Gado. Wi e begi taki a lobi di yu abi gi Gado kon moro tranga dei fu dei èn taki Gado tan lobi yu so taki yu kan kisi têgo libi.​—Yudas 21.