FAKI 14A
Sani di wi e leri fu a tempel di Esekièl si
Gado seti a tru anbegi baka èn a kibri en
A tempel de na tapu „wan bun hei bergi” (1). Wi e poti a tru anbegi na a fosi presi na ini wi libi?
A skotu (2), di ben de lontu a bigi pisi gron lontu a tempel (3) èn di ben abi a tempel na mindrisei e memre wi taki wi no musu meki noti pori na anbegi fu wi. Efu wi no mag moksi a tru anbegi nanga son sani di wi gwenti du ala dei, dan a no de fu taki dati wi no kan moksi a tru anbegi nanga sani di no bun srefisrefi. Dati na sani soleki hurudu.—Esek. 42:20.
Wi o kisi blesi fu têgo
Watra e dropu komoto na a santapresi fu a tempel. A watra disi e tron wan bigi liba, a e meki sani kon na libi èn a e meki sani gro (4). Na ini kapitel 19 fu a buku disi wi o leri moro fu den blesi disi.
Ala sma abi den srefi wet
Den portu fu a bigi tempel-dyari (5) nanga den portu fu a pikin tempel-dyari (9) e memre wi taki Yehovah abi wet di e sori ala sma di wani anbegi en fa den musu tyari densrefi. Luku taki den portu fu a bigi tempel-dyari nanga den portu fu a pikin tempel-dyari bigi a srefi. A sani disi fiti fu di Yehovah abi den srefi wet gi ala den anbegiman fu en, awinsi sortu frantwortu noso grani den abi.
Wi e nyan na a tafra fu Yehovah
Den nyanyan-kamra (8) e memre wi taki na ini owruten sma ben kan nyan sonwan fu den ofrandi di den ben tyari go na a tempel. Na wan agersifasi den ben nyan makandra nanga Yehovah. Sani de tra fasi na ini na agersi tempel pe Kresten e anbegi Gado na ini a ten disi, fu di „wan srakti-ofrandi” tyari fu ala ten (Hebr. 10:12). Ma toku wi e tyari ofrandi nanga wi mofo.—Hebr. 13:15.
Gado gi wi wan dyaranti
Kande yu e bruya pikinso te yu e leisi ala den sani di marki finifini na ini a fisyun. Ma a sani disi e leri wi wan prenspari sani: Den e gi wi a dyaranti taki Yehovah o seti a tru anbegi baka, soifri soleki fa a ben taki. Aladi Esekièl no si nowan libisma na ini a fisyun disi, toku a skrifi a seryusu rai di Yehovah ben abi gi den priester, den edeman nanga a pipel. Ala den anbegiman fu Gado musu hori densrefi na den wet fu en.