FAKI 19A
Liba di e tyari blesi fu Yehovah
Meki wi go luku wan tu Bijbeltekst di e agersi den blesi fu Yehovah nanga den wortu „liba” nanga „watra”. Den tekst disi o gi wi deki-ati, fu di den e sori fa Yehovah e blesi wi.
YOÈL 3:18 Na ini a profeititori disi wan liba e lon komoto fu a tempel. A watra fu a liba disi e lon go na „a lagipresi pe den akasia-bon e gro”. A e tyari watra go na a drei presi disi. Sobun, neleki Esekièl, Yoèl si wan liba di e tyari libi kon na presi pe noti ben gro. A liba di den si e komoto na a oso noso a tempel fu Yehovah.
SAKARIA 14:8 A profeiti Sakaria e si taki „watra di e gi libi” e lon komoto na a foto Yerusalem. Afu fu a watra e lon go na a Dede Se di de na owstusei èn afu fu en e lon go na a Mindrikondre Se di de na west-sei. Yerusalem ben de „a foto fu a bigi Kownu” Yehovah Gado (Mat. 5:35). A foto di Sakaria taki fu en e memre wi fa Yehovah o tiri heri grontapu na ini a ten di e kon. Langa ten kaba wi e frustan taki a profeititori disi e sori taki Yehovah o blesi tu grupu sma na ini a paradijs. Dati na den sma di o pasa a bigi banawtu nanga den sma di o kisi wan opobaka.
OPENBARING 22:1, 2 Na ini wan fisyun na apostel Yohanes e si wan liba di de leki a wan di Esekièl si. A liba disi no e komoto fu a tempel, ma fu a kownusturu fu Yehovah. Neleki a fisyun di Sakaria kisi, a fisyun fu Yohanes e taki fu den blesi di sma o kisi te Krestes o tiri dusun yari.
Wan pikin difrenti de na mindri den blesi di a tiri fu Yehovah o tyari kon èn den blesi fu a liba di Esekièl ben si na ini a fisyun. Ma ala den blesi disi e kon fu Yehovah èn a e blesi ala sma di e gi yesi na en.
PSALM 46:4 A tekst disi e taki fu na anbegi fu Yehovah èn a tiri fu en. A e taki fu wan liba di e meki „a foto fu Gado” prisiri. A foto disi e prenki a Kownukondre nanga a tiri fu en. A tekst e taki tu fu „a gran tabernakel fu a Moro Heiwan”, dati na a tru anbegi.
Den tekst disi e pramisi wi taki Yehovah o blesi libisma di e gi yesi na en. A o blesi den na tu fasi. Wi o kisi wini fu têgo fu (1) a tiri fu en èn (2) fu a tru anbegi. Dati meki wi musu tan meki muiti fu feni „a watra di e gi libi” di e kon fu Yehovah nanga en Manpikin. A watra disi na den sani di Yehovah seti so taki wi kan libi fu têgo.—Yer. 2:13; Yoh. 4:10.