Fa fu hori Wi Kresten libi nanga a preikiwroko konmakandra

Den tori na ini a dokumenti disi

1. Den rai na ini a dokumenti disi o yepi ibriwan sma di abi wan prati na a Wi Kresten libi nanga a preikiwroko konmakandra. Den musu luku den rai di abi fu du nanga a prati fu den, fosi den sreka a pisi di den musu hori. Den rai disi de fu feni na ini a Kresten libi nanga preikiwroko Studie-buku, èn na ini a dokumenti disi. Ala preikiman musu kisi a deki-ati fu hori den toewijzing fu studenti. Tra sma di abi demakandra fayafaya nanga a gemeente kan teki prati tu efu den e bribi den leri fu Bijbel èn den e libi soleki fa Bijbel e leri. A opziener fu a Kresten libi nanga a preikiwroko konmakandra musu taki fu den marki di wan sma musu doro fu man skrifi en nen na a skoro, nanga ibriwan sma di no de wan preikiman ete èn di wani du dati. A musu meki a sma sabi efu a kan hori lezing. A musu du dati makandra nanga a sma di e studeri nanga a studenti (noso nanga a papa noso mama di de ini waarheid). Na den srefi marki disi wan sma musu doro fu man tron wan preikiman di no dopu ete.—od kap. 8 par. 8.

BIGINWORTU

2. Wán miniti. Ibri wiki, baka a fosi singi nanga begi, a fesiman fu a Kresten libi nanga a preikiwroko konmakandra o wiki wi lostu gi a programa. A fesiman musu poti prakseri moro furu na den pisi di a gemeente abi fanowdu.

GUDU NA INI GADO WORTU

3. Lezing: Tin miniti. A thema nanga wan schema fu tu noso dri penti fu a lezing disi o de na ini a Wi Kresten libi nanga a preikiwroko Studie-buku. Wan owruman noso wan dinari di doro den marki o hori a lezing disi. Te wi o leisi wan nyun Bijbel buku na ini a wiki, dan wi o sori wan felem di abi fu du nanga a Bijbel buku dati. A takiman kan sori san a felem abi fu du nanga a thema fu en. Ma a no musu frigiti fu taki fu den tra penti di kari na ini a studie-buku. Sosrefi, efu nofo ten de, a musu gebroiki den prenki bun. Den meki spesrutu fu horibaka gi a tori di a musu taki fu en. Efu a wani a kan go suku moro sani na ini den tra buku nanga tijdschrift fu wi, solanga den e horibaka gi den penti na ini a schema.

4. Diki moro dipi: Tin miniti. Disi na wan aksi-nanga-piki takimakandra. Yu no musu bigin nanga biginwortu noso tapu nanga kabawortu. Na wan owruman noso wan dinari di doro den marki musu hori en. A musu poti ala den tu aksi gi den arkiman. A kan luku tu efu a de fanowdu fu leisi den tekst. Den sma di o gi piki no musu pasa 30 sekonde.

5. Leisi Bijbel: Fo miniti. Wan man sma musu hori a pisi disi. A studenti musu leisi a pisi di a kisi fu leisi, sondro fu taki wan sani na a bigin noso na a kaba. A fesiman fu a konmakandra sa luku spesrutu efu a studenti e leisi soifri, na wan fasi di sma man frustan, efu a e leisi grati, efu a e poti krakti tapu den yoisti wortu, efu a e leisi nanga firi, efu a e stop eife na a kaba fu wan zin noso na wan komma, noso efu a e leisi soleki fa a gwenti taki. Son leisi den studenti no abi fu leisi furu vers, ma tra leisi den musu leisi moro langa pisi. Fu dati ede na opziener fu a Kresten libi nanga a preikiwroko konmakandra musu luku san ben o fiti gi a studenti fosi a gi en a toewijzing.

DU MUITI FU TRON WAN MORO BUN PREIKIMAN

6. Tinafeifi miniti. A pisi disi fu a konmakandra e gi ala sma na okasi fu oefen gi a diniwroko èn fu leri sabi fa fu preiki èn fa fu gi leri moro bun. Te a de fanowdu, dan owruman kan kisi wan fu den prati fu den studenti tu na a pisi disi fu a konmakandra. Ibri studenti musu wroko na den penti di de ini a Gi leri-brochure noso a Meki disipel-brochure di de fu si na sei den prati na ini a Kresten libi nanga preikiwroko Studie-buku. Son leisi a schema o abi wan pisi pe wan takimakandra musu hori. Te dati de so, dan na wan owruman noso wan dinari ini a diniwroko di doro den marki musu hori a pisi disi.—Luku paragraaf 15 fu sabi fa yu musu hori wan takimakandra.

7. Bigin wan takimakandra: Wan mansma noso wan umasma kan hori a prati disi. Efu a studenti na wan mansma, dan na wan mansma musu de a yepiman, efu a studenti na wan umasma, dan na wan umasma musu de a yepiman. Ma efu wan mansma nanga wan umasma o hori a pisi disi, dan den musu de famiri fu makandra. A studenti nanga a yepiman kan sidon noso tanapu.—Efu yu wani sabi moro fu den sani di abi fu du nanga a fasi fa yu musu hori a prati disi, dan luku paragraaf 12 nanga 13.

8. Gobaka: Wan mansma noso wan umasma kan hori a prati disi. A studenti nanga a yepiman musu de tu mansma noso tu umasma (km 5/97 p. 2). A studenti nanga a yepiman kan sidon noso tanapu. A studenti musu sori san yu kan taki fu go doro nanga a fosi takimandra.—Efu yu wani sabi moro fu den sani di abi fu du nanga a fasi fa yu musu hori a prati disi, dan luku paragraaf 12 nanga 13.

9. Meki disipel: Wan mansma noso wan umasma kan hori a prati disi. A studenti nanga a yepiman musu de tu mansma noso tu umasma (km 5/97 p. 2). A studenti nanga a yepiman kan sidon noso tanapu. A pisi disi musu sori wan pisi fu wan Bijbelstudie di ben e hori kaba. A no de fanowdu fu taki odi noso taki fu san wi leri, boiti efu a studenti musu wroko spesrutu tapu wan fu den penti dati. A no de fanowdu tu fu leisi ala den paragraaf fu a pisi di yu kisi, aladi yu kan du dati.

10. Taki fu a bribi fu yu: Te a prati disi de wan lezing, dan na wan mansma musu hori en. Ma te a de wan demonstrâsi dan wan man noso wan umasma kan hori en. Efu a studenti na wan mansma, dan na wan mansma musu de a yepiman, efu a studenti na wan umasma, dan na wan umasma musu de a yepiman. Ma efu wan mansma nanga wan umasma o hori a pisi disi, dan den musu de famiri fu makandra. A studenti musu gebroiki den sani di de ini na verwijzing fu gi piki tapu na aksi fu a thema. A studenti kan bosroiti fu taki noso fu no taki sortu publikâsi a gebroiki fu hori a prati fu en.

11. Lezing: Wan mansma musu hori a pisi disi èn a musu hori en leki wan lezing gi a gemeente. Te wan penti fu a lezing teki puru fu „Tra prenspari sani 1” fu na Meki disipel-brochure, dan a studenti musu sori fa yu kan gebroiki den tekst na ini a preikiwroko. Fu eksempre, a studenti kan sori o ten yu kan gebroiki a tekst, san a tekst wani taki èn fa fu taki nanga wan sma fu a tekst. Te wan penti fu a lezing teki puru fu wan fu den les fu na Meki disipel-brochure, dan a studenti musu poti prakseri na fa wi kan gebroiki a penti dati na ini a preikiwroko. A studenti kan taki fu den penti na ini „tra prenspari sani 1” noso taki fu tra moi sani fu a les, efu dati de fanowdu.

12. Tori: Den sani di de fu feni na ini a paragraaf disi nanga den trawan abi fu du nanga a pisi „bigin wan takimakandra” nanga „gobaka”. Efu a no skrifi tra fasi, dan a marki fu a studenti na fu prati wan tru leri fu Bijbel di o hari a sma prakseri, so taki a kan wani sabi moro èn yu kan go doro nanga a takimakandra wan tra leisi. A studenti kan gebroiki wan tori di o gi piki tapu wan sani di furu sma e broko den ede nanga en na ini a kontren dati. A kan bosroiti efu a o gi a sma wan buku noso sori en wan felem na ini a Teaching Toolbox. Na presi fu taki fu wan sani di den hori na ede, den studenti kan oefen bun so taki den kan hori bun takimakandra. Sani soleki, fu sori taki den e broko den ede nanga a sma èn fu taki soleki fa den gwenti.

13. Difrenti fasi fa fu preiki a bun nyunsu: A studenti musu du soleki fa den sori en na ini a konmakandra buku, ma a musu hori a situwâsi na ini a kontren na prakseri. Fu eksempre:

(1) Oso fu oso: A pisi disi abi fu du nanga preiki oso fu oso—awinsi wi e miti a sma, wi e bel en, wi e skrifi wan brifi gi en—noso wi e go doro nanga a takimakandra nanga wan sma di wi ben miti na a oso fu oso preikiwroko.
(2) Okasi preiki: Na a pisi disi a studenti musu gebroiki na okasi di a kisi fu taki nanga wan sma fu preiki gi en. A kan taki a o prati wan Bijbel leri nanga wan sma na wrokope, na skoro, na ini en birti, na ini wan bus, noso na iniwan presi pe a o go ini na aladei libi.
(3) Preiki pe furu sma de: Na prati disi a studenti kan preiki nanga wan preikiwroko wagi, taki nanga sma na bisnis kontren, na strati wroko, na presi pe sma e go koiri, na presi pe den e poti wagi noso iniwan tra presi pe a kan miti sma.

14. Fa fu gebroiki den felem, buku nanga tijdschrift: Na ini son situwâsi, a studenti kan bosroiti fu gebroiki wan felem, wan buku noso tijdschrift. Efu a studenti musu gebroiki wan felem, noso ensrefi bosroiti fu gebroiki wan, dan a musu sori èn taki fu a felem ma a no musu prei en.

WI KRESTEN LIBI

15. Baka wan singi, a pisi disi fu a konmakandra di o teki 15 miniti o abi wán noso tu pisi di o yepi den arkiman fu fiti den sani di den leri na ini Gado Wortu. Efu wi no taki tra fasi, dan na wan owruman noso wan dinari di abi ondrofeni kan hori den pisi disi. Ma na soso owruman musu hori a pisi di nen „Sani di a gemeente abi fanowdu”. Te wan prati ini a pisi disi de wan takimakandra, dan a takiman kan poti den aksi di de fu feni ini a pisi dati. A musu taki syatu fu a biginwortu, so taki nofo ten de fu taki fu den moro prenspari sani èn gi den arkiman na okasi fu gi piki. Efu a musu interview wan sma na a pisi dati, dan a ben o moro bun efu a sma go tapu a podium fu piki den aksi, efu a kan.

16. Gemeente Bijbelstudie: Dritenti miniti. Wan owruman di abi ondrofeni musu hori a pisi disi. (Efu wan gemeente no abi nofo owruman, dan efu a de fanowdu, den kan gebroiki dinari ini a diniwroko di doro den marki.) Na a skin fu owruman e bosroiti suma doro den marki fu hori a Gemeente Bijbelstudie. Den brada di mag hori a Gemeente Bijbelstudie musu hori en na so wan fasi taki a studie e kaba biten, den musu man poti prakseri na den moro prenspari tekst, èn den musu man yepi ala sma fu si o warti den sani de di wi leri. Den wan di doro den marki fu hori a pisi disi, o feni wini te den e luku den rai di abi fu nanga fa fu hori aksi nanga piki takimakandra (w23.04 p. 24, faki). Efu ala den prenspari sani fu a studie fu a wiki dati kon na fesi kaba, dan a no de fanowdu fu hari a studie go nanga langa awinsi yu no doro den 30 miniti. Efu a kan, dan ibri wiki wan tra brada musu hori a studie èn wan tra brada musu de leisiman. Efu a fesiman fu a Kresten libi nanga a preikiwroko konmakandra e bosroiti taki a studie musu hori moro syatu, dan a fesiman sa bosroiti fa a o syatu a studie. A kan bosroiti fu no leisi sonwan fu den paragraaf.

WAN TU LASTI SANI

17. Dri miniti. A fesiman fu a Kresten libi nanga a preikiwroko konmakandra o taki syatu fu den moi sani di wi leri na a konmakandra disi. A musu taki tu san wi o luku tra wiki. Efu nofo ten de, a kan taki suma na den studenti di abi wan toewijzing tra wiki. Boiti efu wi taki tra fasi, dan den sani di musu meki bekènti musu leisi tu na a momenti disi, sosrefi tra brifi di un musu leisi gi a gemeente. Na a fesiman musu leisi den sani disi. Den sani di wi gwenti meki bekènti, soleki den preikiwroko konmakandra nanga schema fu krin a zaal, no musu meki bekènti tapu a podium, ma den musu poti na a bord pe sani e meki bekènti gi a gemeente. Efu nofo ten no de fu meki wan tu sani bekènti noso fu leisi brifi na a kaba fu a konmakandra, dan a fesiman kan puru ten fu den tra pisi noso a kan aksi den tra brada di abi wan prati na a pisi „Wi Kresten libi” fu syatu den prati fu den. (Luku paragraaf 16 nanga 19.) A konmakandra o tapu nanga singi èn nanga begi.

PRÈISE A SMA ÈN GI EN RAI

18. Baka ibriwan fu den prati fu den studenti, a fesiman fu a Kresten libi nanga a preikiwroko konmakandra o abi pikinmoro 1 miniti fu prèise a studenti èn a o gebroiki den rai di a studenti musu wroko. Te a fesiman o kari a studenti kon fu hori a pisi fu en, dan a no o taki na sortu penti a studenti musu wroko. Ma te a studenti hori a pisi fu en kaba èn a fesiman prèise en gi den bun sani di a du, dan a kan taki na sortu penti a studenti ben musu wroko. A musu taki fu san ede a studenti ben du dati bun, noso a kan sori na wan switi fasi fu san ede a ben o bun te a studenti ben o poti moro prakseri na a penti dati. A fesiman kan taki fu tra sani tu di abi fu du nanga a toewijzing efu a denki taki a o tyari wini kon gi a studenti èn gi den arkiman. A kan gebroiki a Meki disipel-brochure, a Gi leri-brochure noso a buku Kisi wini fu a Theokrasia Diniwroko-skoro fu gi a studenti tra rai. A kan du dati te en wawan de nanga a studenti noso na wan tra ten. A kan abi fu du nanga a penti di a studenti ben musu wroko na tapu noso nanga wan tra penti—Luku paragraaf 19, 24, nanga 25 fu kon sabi den frantwortu fu a fesiman fu a Kresten libi nanga a preikiwroko konmakandra èn fu a brada di e yepi en fu gi rai.

TEN

19. Nowan sma musu pasa a ten di a kisi fu hori en lezing, èn te a fesiman fu a Kresten libi nanga a preikiwroko konmakandra e gi rai, dan a musu hori ensrefi na a ten tu. Aladi a Studie-buku e sori krin omeni miniti ibri prati musu hori, toku efu yu taki fu ala den penti na ini a lezing kaba èn ten tan abra ete, dan yu no abi fu go taki fu tra sani soso fu furu a ten. Efu wan brada noso sisa pasa a ten, dan a Fesiman fu a Kresten libi nanga a preikiwroko konmakandra noso a brada di e yepi fu gi rai, musu gi en rai te a de nanga en wawan. (Luku paragraaf 24 nanga 25.) A heri konmakandra, makandra nanga den singi nanga den begi musu hori na ini 1 yuru nanga 45 miniti.

TE A KRING-OPZIENER E FISITI A GEMEENTE

20. Te a kring-opziener e fisiti a gemeente, dan un musu hori a konmakandra soleki fa a skrifi na ini a Kresten libi nanga preikiwroko Studie-buku, ma un musu du disi tu: A Gemeente Bijbelstudie na a pisi „Wi Kresten libi” no o hori, ma a kring-opziener o hori wan dienst-lezing fu 30 miniti. Fosi a dienst-lezing fu a kring-opziener, a fesiman fu a Kresten libi nanga a preikiwroko konmakandra o taki syatu san wi leri a wiki dati, a o taki san wi o leri tra wiki, a o meki sani bekènti di de fanowdu èn a o leisi den brifi di musu leisi. Baka dati a o kari a kring-opziener kon tapu a podium. Baka a dienst-lezing, a kring-opziener o tapu a konmakandra nanga wan singi di ensrefi kan suku. A kan aksi wan tra brada fu tapu nanga begi. A gemeente no o hori wan tra klas na ini a wiki fu a kring-opziener. Efu wan grupu seti na ini a gemeente, dan den mag tan hori den konmakandra fu den srefi te a kring-opziener e fisiti a gemeente dati. Ma a grupu musu kon makandra nanga a gemeente te a kring-opziener o hori a dienst-lezing fu en.

A WIKI TE UNU ABI KRING KONMAKANDRA NOSO KONGRES

21. Na ini a wiki fu wan kring konmakandra noso wan kongres, den gemeente konmakandra no e hori. Den brada musu memre a gemeente fu luku den sani di wi ben o du na den konmakandra te den e hori na Osofamiri Anbegi noso te den e studeri nanga densrefi.

A WIKI TE UNU ABI A MEMREFESA

22. Te a Memrefesa o hori na wan mindriwiki dei, dan unu no o hori a Wi Kresten libi nanga a preikiwroko konmakandra a wiki dati.

NA OPZIENER FU A KRESTEN LIBI NANGA A PREIKIWROKO KONMAKANDRA

23. Na a skin fu owruman musu bosroiti sortu owruman sa de na opziener fu a Kresten libi nanga a preikiwroko konmakandra. Na en abi a frantwortu fu sorgu taki a konmakandra disi orga bun èn taki a e hori soleki fa den rai disi taki. A musu man wroko bun nanga a brada di e yepi en fu gi rai. So langa a Kresten libi nanga preikiwroko Studie-buku de fu kisi, dan wantewante na opziener fu a Kresten libi nanga a preikiwroko konmakandra sa bosroiti suma sa abi wan prati na ala den difrenti pisi fu a mindriwiki konmakandra na ini den tu mun dati. Disi wani taki dati na en o taki suma sa hori den prati di studenti no e hori, suma sa de fesiman fu a mindriwiki konmakandra èn sosrefi suma sa hori den prati fu den studenti. (Luku paragraaf 3-16 nanga 24.) Te a musu bosroiti sortu studenti a o gi wan prati, dan a musu hori a yari nanga na ondrofeni di a sma abi na prakseri. A musu luku sosrefi efu a studenti man taki krin fu a tori dati. A musu du densrefi sani disi te a musu bosroiti suma o hori den tra prati fu a komakandra. Ala den wan di abi wan prati musu kisi a prati fu den dri wiki na fesi, no moro lati. Un musu gebroiki a Wi Kresten libi nanga a preikiwroko konmakandra—A pisi di yu musu hori (S-89) papira, te unu o gi den studenti den prati fu den. Na opziener fu a Kresten libi nanga a preikiwroko konmakandra musu sorgu taki wan kopi fu a schema fu a heri konmakandra de tapu a bord pe a gemeente e meki sani bekènti. A skin fu owruman kan poti wan tra owruman noso wan dinari fu horibaka gi en. Ma toku, na soso den owruman musu bosroiti suma sa hori den prati di no de gi den studenti.

FESIMAN FU A KRESTEN LIBI NANGA A PREIKIWROKO KONMAKANDRA

24. Ibri wiki wán tra owruman sa de fesiman fu a Kresten libi nanga a preikiwroko konmakandra. (Efu wan gemeente no abi nofo owruman, dan efu a de fanowdu, den kan gebroiki dinari ini a diniwroko di doro den marki.) Na en musu sreka den biginwortu nanga den lasti sani fu a konmakandra. Na en o kari ala den sma di abi wan prati kon na fesi. Efu wan tu owruman nomo de, dan ensrefi kan hori tra pisi fu a konmakandra, spesrutu den pisi pe un musu sori wan felem sondro taki un musu taki fu en. Den sani di a e taki na mindri den difrenti pisi fu a konmakandra musu syatu. A skin fu owruman sa bosroiti sortuwan fu den owruman doro den marki fu man tyari a frantwortu disi. Den owruman di doro den marki sa kisi a frantwortu disi ten na ten. Na ini son gemeente a kan taki na opziener fu a Kresten libi nanga a preikiwroko konmakandra o de fesiman moro furu leisi leki den tra owruman di doro den marki. Efu wan owruman doro den marki fu hori a Gemeente Bijbelstudie, dan nofo tron a doro den marki tu fu de fesiman fu a konmakandra. Ma grantangi hori na prakseri taki na owruman di de fesiman musu gi lobi-ati rai, deki-ati nanga yepi na den studenti di kisi wan prati. A abi a frantwortu sosrefi fu sorgu taki a konmakandra kaba biten. (Luku paragraaf 17 nanga 19.) Efu a fesiman wani èn efu nofo presi de tapu a podium, dan ete wan staander nanga mikrofon kan poti na tapu a podium so taki a kan kari a brada di o hori en prati na a kateder tapu a podium. A fesiman kan bosroiti tu fu tan sidon na wan tafra tapu a podium na a pisi pe a studenti musu leisi wan pisi fu Bijbel èn na den pisi „Du muiti fu tron wan moro bun preikiman”. Na so fasi a no e lasi ten.

A BRADA DI E YEPI FU GI RAI

25. Efu a kan, a ben o moro bun fu gi a frantwortu disi na wan owruman di abi furu ondrofeni leki takiman. A brada disi abi a frantwortu fu gi rai efu dati de fanowdu na owruman, noso dinari ini a diniwroko te a de nanga den wawan. A kan gi den rai fu den prati di den ben abi, soleki den prati di den hori na a Wi Kresten libi nanga a preikiwroko konmakandra, wan publikitaki, kande den ben musu leisi noso hori a Waktitoren-studie noso a Gemeente Bijbelstudie. (Luku paragraaf 19.) Efu wan tu owruman di de bun takiman nanga leriman de na ini a gemeente, dan ibri yari wan tra owruman di abi ondrofeni kan kisi a frantwortu fu yepi a fesiman. A no de fanowdu taki a brada di e yepi e gi rai na a kaba fu ibriwan fu den prati di wan owruman noso dinari ini a diniwroko e hori.

TRA KLAS

26. Efu furu studenti de, dan a gemeente kan seti tra klas gi den prati fu den studenti. Efu a kan, dan ibriwan fu den tra klas musu abi wan bun raiman, èn a ben o moro bun efu a de wan owruman. Efu a de fanowdu, dan wan dinari ini a diniwroko di doro den markitiki kan du dati tu. A skin fu owruman musu bosroiti suma sa kisi a frantwortu disi èn efu ibri leisi wan tra brada sa kisi a frantwortu. A raiman musu du sani soleki fa a skrifi na ini paragraaf 18. Efu wan tra klas de, dan un musu aksi den studenti fu go na den klas, na a kaba fu a pisi di nen „Diki moro dipi”. Den musu kon baka na ini a zaal te a pisi kaba di nen „Du muiti fu tron wan moro bun preikiman”.

FELEM

27. Wi o gebroiki spesrutu felem na a konmakandra disi. Den felem disi sa de fu si na ini a JW Library® app èn yu o man luku den tapu difrenti sani soleki computer, cel nanga tablet.

S-38-SR 11/23