A Theokrasia Diniwroko-skoro fu 2015 e yepi wi fu tron moro bun leriman
1 A psalm skrifiman David ben taki: „Meki den sani di mi e taki nanga mi mofo nanga den sani di mi e prakseri dipi na ini mi ati kon de sani di yu feni bun. Yehovah, yu na mi Stonbergi. Yu na mi Frulusuman” (Ps. 19:14). Wisrefi wani taki Yehovah e prisiri nanga den sani di wi e taki fu di wi e warderi a grani di wi abi fu taki fu den tru leri fu Bijbel na ini a gemeente èn na ini a preikiwroko. Yehovah e gebroiki a Theokrasia Diniwroko-skoro fu leri wi fa wi musu du wi diniwroko bun. Wi e kisi a leri disi ibri wiki na ini moro leki 111.000 gemeente na heri grontapu. A skoro disi yepi furu brada nanga sisa na heri grontapu fu tron bun preikiman fu a bun nyunsu, di man gi sma leri nanga overtoigi, na wan koni fasi èn nanga deki-ati.—Tori 19:8; Kol. 4:6.
2 A schema fu 2015 sa taki fu tori di puru fu a brochure di nen San Gado Wortu e leri wi? (igw), a „Wortubuku” di de na ini a Nyun-Grontapuvertaling (bladzijde 2468), èn sosrefi tori di teki puru fu A Waktitoren nanga tra buku soleki „Preiki finifini” fu Gado Kownukondre (bt) èn Teki na eksempre fu sma di ben abi bribi (ia). Boiti dati, wi kenki a ten di wi musu gebroiki fu hori den edepenti fu Bijbel nanga lezing nr. 1. Na ini den paragraaf di e kon now, wi sa taki fu den kenki disi èn wi sa taki fa den difrenti pisi fu a skoro musu hori.
3 Edepenti fu Bijbel: Den brada di musu hori a pisi disi o abi tu miniti fu taki fu wán moi penti di den brada nanga sisa kan gebroiki èn di teki puru fu na alawiki leisipisi fu Bijbel. Efu wi e sreka bun, dan wi o man fruteri a gemeente wan bun sani na ini a ten di wi kisi. Baka dati, a gemeente sa abi siksi miniti fu gi wan piki fu 30 sekonde noso moro syatu. Den musu taki fu wan moi penti di den feni na ini na alawiki leisipisi fu Bijbel. Efu wi wani gi wan piki fu 30 sekonde, dan wi musu sreka wisrefi bun èn wi musu dwengi wisrefi fu no taki tumusi langa. Disi na wan bun oefening gi wi. Na so trawan o kisi na okasi tu fu fruteri san den leri fu a leisipisi fu Bijbel.
4 Lezing nr. 1: A ten di wan brada kisi fu leisi wan pisi fu Bijbel, kon moro syatu. A no mag pasa dri miniti èn a no o leisi so furu moro leki fosi. Den wan di kisi a lezing disi musu oefen en difrenti leisi. Den musu leisi en nanga wan tranga sten gi densrefi, den musu luku bun fa den e leisi den wortu èn den musu leisi grati so taki den arkiman kan frustan a boskopu di den e leisi. Ala den anbegiman fu Yehovah musu meki muiti fu leisi bun, fu di leisi na wan prenspari pisi fu na anbegi fu wi. Wi breiti taki furu fu den pikin-nengre na ini a gemeente sabi leisi bun! Èn wi e prèise den papa nanga mama taki den e yepi den pikin na wan lobi-ati fasi fu tron bun leisiman.
5 Lezing nr. 2: Wan sisa sa hori a lezing disi na ini feifi miniti. A musu taki fu a thema di a kisi. Te a thema abi fu du nanga wan tori na ini a brochure San Gado Wortu e leri wi? noso a „Wortubuku” di de na ini a Nyun-Grontapuvertaling, dan a sisa musu hori a lezing leki fa sani e waka trutru na ini a preikiwroko. Te a lezing teki puru fu A Waktitoren noso wan tra buku èn a e taki fu wan sma na ini Bijbel, dan a studenti musu studeri den sani na ini a pisi dati fu A Waktitoren noso buku. A musu gebroiki den yoisti Bijbeltekst èn a musu sori krin san wi kan leri fu a sma dati. A kan gebroiki tra tekst tu di abi fu du nanga a thema. A skoro-opziener sa gi en wan yepiman.
6 Lezing nr. 3: Disi sa de wan lezing fu feifi miniti. Na wan brada noso wan sisa o hori en. Te wan sisa kisi a lezing disi, dan a musu hori en soleki fa a skrifi na lezing nr. 2. Efu wan brada kisi wan lezing di teki puru fu A Waktitoren noso wan tra buku dan a musu hori a lezing gi den arkiman. A studenti musu taki fu a thema di a kisi, a musu gebroiki wan tu yoisti tekst, èn a musu sori den arkiman san den kan leri fu a sma di kari na ini Bijbel.
7 Wan nyun sani na ini lezing nr. 3 di brada musu hori: Te a lezing teki puru fu a brochure San Gado Wortu e leri wi? noso a „Wortubuku” di de na ini a Nyun-Grontapuvertaling, dan a brada musu hori en neleki a e hori en Osofamiri Anbegi noso a musu du neleki a de na ini a preikiwroko. Nofo tron a skoro-opziener o gi en wan yepiman èn taigi en efu a musu hori en leki na wan Osofamiri Anbegi noso efu na preikiwroko a de. A yepiman musu de wan memre fu na osofamiri fu a studenti, noso wan brada na ini a gemeente. A brada kan gebroiki tra tekst di e horibaka gi a thema. Wanwan leisi wan owruman kan kisi a grani fu hori a lezing disi. Na owruman kan teki en eigi yepiman èn a kan bosroiti efu a o hori en neleki a e hori en Osofamiri Anbegi, noso a o du neleki a de na ini a preikiwroko. A no de fu taki dati a o gi a gemeente deki-ati te den e si fa den owruman e gi leri na wan sma fu den osofamiri noso wan tra brada.
Te wi e gebroiki den rai, dan wi o man go na fesi
8 Rai: Baka ibri lezing fu den studenti, a skoro-opziener sa gebroiki tu miniti fu prèise a studenti èn fu gi en bun rai di teki puru fu a buku Kisi wini fu a Theokrasia Diniwroko-skoro. Te a skoro-opziener o kari a studenti kon fu hori a lezing, dan a no o taki na sortu penti a studenti musu wroko. Baka ibri lezing, a skoro-opziener musu prèise a studenti, a musu taki na sortu penti a studenti ben e wroko, a musu sori krin fu san ede a studenti ben du dati bun, noso a musu sori na wan lobi-ati fasi fu san ede a ben o bun te a studenti ben o poti moro prakseri na a penti dati.
9 A lijst nanga den penti di den studenti musu hori na prakseri te den abi wan lezing, de na tapu bladzijde 79 te go miti 81 fu a studenti en Diniwroko-skoro-buku. Baka te a studenti hori a lezing, dan a skoro-opziener o skrifi wan tu sani na ini a buku fu a studenti. A no musu aksi a studenti na fesi trawan efu a ben oefen a penti pe a ben musu wroko na tapu, ma a musu du en te a e taki en wawan nanga a studenti. Baka a konmakandra noso na wan tra ten, a skoro-opziener kan prèise a studenti gi den bun sani di a du èn gi en rai di kan yepi en moro fara. Te a skoro-opziener e poti prakseri na ibri studenti di de na a skoro, dan dati o yepi a studenti fu gro.—1 Tim. 4:15.
10 Efu wan studenti e pasa a ten di a kisi, dan a skoro-opziener noso wan tra brada di e yepi en, musu meki a studenti sabi taki a ten pasa, ma a musu du disi na wan switi fasi. A kan gebroiki wan bel, noso a kan naki safri na tapu wan sani. Te a studenti yere dati, dan a musu kaba a zin di a e taki èn a musu waka gowe fu a podium.—Luku a Diniwroko-skoro-buku, blz. 282, par. 4.
11 Ala sma di doro den markitiki, e kisi a deki-ati fu poti den nen na a Theokrasia Diniwroko-skoro. (Luku a Diniwroko-skoro-buku, blz. 282, par. 6.) A leri di a pipel fu Yehovah e kisi na a skoro disi, meki taki den man preiki a bun nyunsu fu a Kownukondre èn gi leri nanga overtoigi, na wan warti fasi, èn nanga lobi. A no de fu taki dati Yehovah e prisiri taki ala den wan di e kisi leri fu en, e prèise en!—Ps. 148:12, 13; Yes. 50:4.