Wan tu sani fu yepi a Skoro-opziener

NA INI ibri gemeente, wan owruman e poti leki opziener fu a Theokrasia Diniwroko-skoro. Efu na yu kisi a frantwortu disi, dan yu musu de nanga faya gi a skoro èn yu musu wani srefisrefi taki ibri studenti e go na fesi. Na so fasi yu sa du furu fu meki trawan kisi wini fu a skoro na a presi pe yu de.

Wan prenspari sani fu a wroko fu yu na fu teki fesi ibri wiki te a Theokrasia Diniwroko-skoro e hori. Hori na prakseri taki aladi studenti de drape di abi wan prati na a skoro, toku tra sma de drape tu. Teki fesi tapu a skoro na so wan fasi taki a heri gemeente e yere sani di den kan gebroiki bun èn di e gi den deki-ati. Den sani disi musu abi fu du nanga awinsi wán fu den marki di wi wani doro nanga a skoro disi, èn den skrifi na tapu bladzijde 5 te nanga 8 fu a buku disi.

Pruberi fu sabi fa a e go nanga ala den studenti di abi wan prati tapu a skoro, awansi den musu leisi, awansi na wan demonstrâsi den o hori, noso na wan lezing den o hori. Yepi den fu si taki a no soso wan prati den e kon hori tapu a skoro, ma na wan okasi di den abi fu go na fesi na ini a dini di den e dini Yehovah. A no de fu taki, dati a de tumusi prenspari taki den studenti srefi musu du muiti, efu den wani go na fesi trutru. Ma a de prenspari tu taki yu e sori den na wan switi fasi dati yu wani yepi den. A de prenspari tu taki yu yepi den fu frustan o warti den penti de na san den musu wroko, èn sori den fa den kan gebroiki a rai di yu e gi den. Fu man du dati, dan yu musu arki ibri lezing bun, so taki yu kan gi den bun rai.

Sorgu taki a skoro e bigin biten, èn taki a e kaba biten. Gi wan bun eksempre, fu di yu e sorgu taki yu no e pasa a ten di yu kisi fu gi den studenti rai. Efu wan studenti e pasa a ten, dan yu noso wan brada di e yepi yu, musu meki a studenti kon sabi disi. A studenti musu kaba a sani di a e taki, èn baka dati a musu waka gowe fu a podium. Efu wan fu den brada di no abi wan prati leki studenti, e pasa a ten, dan sorgu dati yu e taki moro syatu, èn dan baka a konmakandra yu kan taki nanga a brada di pasa a ten.

Te yu de na a konmakandra, dan na yu musu teki fesi tapu a skoro. Efu sontron yu no de na a konmakandra, dan wan tra owruman musu du dati. Ma a skin fu owruman musu taki na fesi suma na a brada disi di sa teki presi gi yu te yu no man. Leki skoro-opziener yu musu meki den schema, skrifi den papira gi den studenti èn prati den papira disi, noso sreka sani fu wan tra sma hori wan lezing efu wan fu den studenti no man du dati. Efu yu abi yepi fanowdu nanga den sani disi, dan wan dinari ini a diniwroko kan yepi yu. Ma na a skin fu owruman musu teki a bosroiti suma na a dinari disi di sa yepi yu.

Studenti di kan de tapu a skoro. Gi ala preikiman deki-ati fu gi den nen gi a skoro. Trawan di ala ten de na den konmakandra kan kon tapu a skoro tu, ma den musu sori taki den e agri nanga den leri fu Bijbel èn den musu libi soleki fa Kresten gronprakseri e leri wi. Te wan sma e aksi yu efu a kan kon tapu a skoro, dan prèise en na wan switi fasi gi dati. Efu a sma dati no de wan preikiman ete, dan yu leki skoro-opziener musu sori en san a musu du fu kan de tapu a skoro. A ben o moro bun efu yu e sori en disi te a sma di e studeri nanga en de drape tu (noso efu en papa noso en mama de na bribi, dan wan fu den kan de drape tu). Wan sma di wani kon tapu a skoro, musu hori ensrefi na den srefi markitiki leki wan sma di wani tron wan preikiman. Den markitiki disi de fu feni na tapu bladzijde 99 te go miti 102 fu a buku Georganiseerd om onze bediening te volbrengen. Skrifi ala den nen fu den nyun sma di e kon tapu a skoro.

Fa yu kan gebroiki den penti fu gi rai. Den penti fu san den studenti sa kisi rai, skrifi na ini a buku fu a studenti srefi, namku na tapu bladzijde 79 te go miti 81. Ibri penti fu san den studenti sa kisi rai, abi wan kloru. Sobun, te wan studenti musu leisi, dan yu kan gi en wan fu den penti, bigin nanga 1 te go miti 17, fu a wroko na dati. Te wan sma musu hori wan lezing neleki wan demonstrâsi, dan yu kan meki a wroko na iniwan penti, boiti den penti 7, 52, nanga 53. Te wan brada musu hori wan lezing, dan a kan wroko na iniwan fu den penti tu, boiti den penti 7, 18, nanga 30.

Te wan studenti kisi wan penti na san a musu wroko, dan a skoro-opziener noso a brada di e yepi en, musu poti wan marki nanga wan pen na a faki na ini a buku fu a studenti pe skrifi „A dei di yu kisi en”. Baka te a studenti hori a prati fu en, dan yu musu aksi en te yu nanga en wawan de, efu a ben pruberi a sani di skrifi na a kaba fu a les. Efu a ben du dati, dan yu noso a brada di e yepi yu, musu poti wan marki na ini a faki di meki spesrutu gi dati na ini a buku. Efu yu feni taki a musu wroko ete na a srefi penti, dan yu no abi fu skrifi noti moro na ini a buku. Disi wani taki dati yu no abi fu skrifi noti ete na a presi pe skrifi „A dei di yu kaba”. Yu musu skrifi a dei drape soso te a studenti wroko bun na a penti, fu sori taki a kan go moro fara fu wroko na wan tra penti. Moro fara, na tapu bladzijde 82 yu e feni difrenti fasi fa yu kan pristeri a bun nyunsu. Na a kruktu-anusei fu a bladzijde disi na ini a buku fu a studenti, yu kan skrifi a dei di wan sisa hori wan lezing. Yu kan skrifi a dei na a nomru di e kruderi nanga wan fu den fasi di a sisa teki fu pristeri a bun nyunsu. Na tapu bladzijde 79 te go miti 81 èn sosrefi na tapu bladzijde 82, nofo presi de fu skrifi sani tu leisi, so taki wan studenti kan wroko tu leisi na a srefi penti. Den studenti musu tyari den buku nanga den te den abi wan prati na a skoro.

Meki a studenti wroko na wán penti nomo te yu gi en wan prati na a skoro. Furu tron, a moro bun fu meki a studenti wroko wan-fru-wan na den penti, dati wani taki a e bigin na les wán, baka dati les tu, èn na so a e go moro fara. Ma efu a de krin taki wan studenti bun kefalek, dan yu kan gi en deki-ati fu ensrefi studeri wan tu les go moro fara èn fu du den sani di a e leri. Baka dati yu kan meki a wroko na den penti di yu denki taki den sa yepi en fu tron wan moro bun takiman nanga wan moro bun leriman.

Srefi efu wan studenti de furu yari kaba tapu a skoro, toku a kan kisi furu wini te a e studeri ibri les èn te a e du den sani di skrifi na ini den les dati. Efu wan tu studenti abi spesrutu yepi fanowdu, dan yu kan suku wan tu les fu yepi den nanga dati. Disi wani taki, dati yu no abi fu bigin fosi nanga les wán, baka dati les tu, èn dan go so moro fara.

Te yu e gi rai. Te yu e gi rai, dan meki bun gebroiki fu eksempre nanga gronprakseri di skrifi na ini Bijbel. Den studenti musu firi taki a rai di den e kisi èn a fasi fa den e kisi a rai, e komoto fu den hei gronprakseri na ini Gado en Wortu.

Hori na prakseri taki yu „e wroko makandra” nanga den brada nanga sisa fu yu (2 Kor. 1:24). Neleki den, dan yusrefi musu tan du muiti fu tron wan moro bun takiman nanga leriman. Studeri a buku Kisi wini fu a Theokrasia Diniwroko-skoro, gebroiki den rai di yu e kisi na ini a buku, èn gi trawan wan bun eksempre so taki den kan du a srefi sani tu.

Te yu e du dati, dan meki muiti fu yepi den studenti so taki den kan tron sma di e leisi bun, di e taki bun, èn di e gi bun leri. Fu man doro dati, dan meki muiti fu yepi den studenti te den abi yepi fanowdu, so taki den e frustan san na den difrenti fasi fu taki, fu san ede den fasi disi de prenspari, èn fa densrefi kan teki den fasi disi abra. A buku disi meki na so wan fasi taki a kan yepi yu fu du dati. Ma furu tron yu sa musu du moro leki fu leisi den wortu nomo na ini a buku. Sori den studenti san den wortu wani taki èn fa den kan gebroiki dati.

Efu wan studenti wroko bun na wan les, dan prèise en. Taki syatu san meki a ben du en bun, noso fu san ede a sani di a du de so prenspari. Efu a ben o moro bun gi a studenti fu poti moro prakseri na wan spesrutu afersi, dan sorgu taki a e frustan fu san ede a musu du disi. Taigi en fa a kan du dati. No draidrai fu taigi en san a kan du, ma na a srefi ten, du dati na wan switi fasi.

Yu musu frustan taki a de wan muilek sani gi furu sma fu opo tanapu fu taki na fesi wan grupu fu sma. Efu wan sma firi taki a no ben du en bun, dan a kan aksi ensrefi efu a musu go doro nanga a sani disi. Teki na eksempre fu Yesus, di no ben masi wan „kenpeiri di broko” noso di no ben kiri wan „faya di e suku fu dede” (Mat. 12:20). Prakseri a fasi fa a studenti e firi na a momenti dati. Te yu e gi rai, dan luku tu efu na paspas a studenti bigin nanga a waarheid, noso efu a de wan preikiman di abi furu ondrofeni kaba. Efu yu e prèise sma nanga yu heri ati èn na wan switi fasi, dan dati kan gi den krakti fu tan du ala san den man.

Taki na wan lespeki fasi nanga ala studenti. Romesma 12:10 e taigi wi: „Teki fesi te unu e gi makandra grani.” Dati na wan rai di fiti trutru gi a brada di musu gi rai tapu a Theokrasia Diniwroko-skoro! Efu a studenti owru moro yu, dan meki ala muiti fu fiti a rai di gi na ini 1 Timoteyus 5:1, 2. Ma awinsi o owru wan sma de, te yu e sori en na wan switi fasi taki a musu du sani tra fasi, dan furu tron a sa wani teki a rai dati moro bun.​—Odo 25:11.

Te yu e gi wan studenti rai, dan meki a si san na a marki fu a skoro. A skoro no de fu leri studenti soso fu wroko bun na den penti so taki a skoro-opziener kan prèise den, èn taki a taigi den fu go moro fara fu wroko na wan tra penti. A marki fu a skoro no de fu meki wan sma tron wan takiman nanga wan leriman di trawan feni so kefalek bun (Odo 25:27). A sani di wi wani trutru na fu leri taki na so wan fasi taki wi kan prèise Yehovah èn yepi trawan fu kon sabi en, èn fu leri fa den kan lobi en. A leri di wi e kisi na a skoro, na fu meki wi du wi wroko bun, namku a wroko di wi kisi soleki fa dati skrifi na Mateyus 24:14 nanga 28:19, 20. Bakaten, dan dopu brada di go na fesi èn di tron bun leriman, kan kisi a kari fu sorgu gi „na ipi fu Gado” leki takiman nanga leriman.​—1 Petr. 5:2, 3.

Gi den studenti a rai fu leisi a les na san den musu wroko, èn meki den bigin du dati so esi leki den man, kande srefi wan tu dei baka di den kisi a les na san den musu wroko. Gi den a deki-ati fu gebroiki den sani di den e leri te den e sreka densrefi gi a prati di den sa abi tapu a skoro. Meki den gebroiki disi te den e taki nanga tra sma ibri dei, te den e gi komentaar tapu den konmakandra, èn te den de na ini a preikiwroko.

Meki a papira pe skrifi sortu lezing den studenti musu hori. Dri wiki na fesi, noso moro langa na fesi srefi efu a kan, yu musu gi den studenti a papira pe skrifi sortu lezing den sa musu hori tapu a skoro.

Wan tu lezing abi fu du nanga leri di musu gi na a gemeente. Gi den prati disi na owruman èn efu a kan, dan a ben o moro bun fu gi dati na den owruman di sa du en bun, èn na dinari ini a diniwroko di de bun leriman.

Efu yu wani kon sabi sortu lezing yu musu gi brada èn sortuwan yu musu gi sisa, dan luku den rai di de na ini a schema gi a skoro. Efu yu no abi so furu brada, ma yu abi furu sisa di kan gi lezing, dan sorgu taki yu e gi den brada nofo okasi fu hori tra lezing tu èn no gi den soso a prati fu leisi wan pisi fu a Bijbel.

Hori na prakseri fa a situwâsi fu den sma de, bifo yu e gi den wan prati. Yu denki taki a de fanowdu fu gi wan owruman noso wan dinari ini a diniwroko wan prati tapu a skoro na a srefi neti te a abi wan prati kaba na a Diniwroko Konmakandra? Noso yu denki taki a de fanowdu fu gi en wan prati tapu a skoro na ini a srefi wiki te a musu hori wan publikitaki kande na ini a gemeente? Kande a yongu pikin fu wan sisa abi wan prati na a skoro wan neti. Yu feni taki a de fanowdu fu gi a sisa disi wan prati tu tapu a srefi neti dati, aladi a sisa sa musu yepi en yongu pikin kande fu meki a lezing fu en? Luku a tori tu di yu e gi wan studenti, spesrutu efu na wan yonguwan noso wan bijbelstudenti di no dopu ete. Aksi yusrefi efu a tori fu san a musu taki, trutru fiti gi en. Luku sosrefi efu a lezing e fiti na a penti na san a studenti musu wroko.

Te wan sisa musu hori wan lezing di de leki wan demonstrâsi tapu a skoro, dan furu tron na ensrefi e luku fa a o pristeri a bun nyunsu, soleki fa dati skrifi na tapu bladzijde 78 nanga 82. Yu musu gi a sisa wan sma di a kan taki nanga en, ma a sisa kan teki ete wan sma tu. Efu wan studenti e aksi yu efu wan spesrutu sma kan yepi en fu di a feni taki a sma dati sa fiti bun na a fasi fa a wani pristeri a bun nyunsu, dan yu sa musu man gi so wan studenti san a e aksi fu yu.

Tra klas. Efu moro leki 50 studenti de tapu a skoro, dan kande yu kan luku efu yu kan hori tra klas tu, so taki moro studenti kan abi wan prati. Efu a de fanowdu gi yu gemeente, dan ala den prati gi den studenti kan hori na ini den tra klas disi, noso soso den lasti tu prati fu a skoro kan hori drape.

Ibriwan fu den tra klas sa musu fu abi wan brada di e gi bun rai tu, efu a kan, dan a ben o moro bun efu dati na wan owruman. Ma efu a de fanowdu, dan wan bun dinari ini a diniwroko kan du dati tu. A skin fu owruman musu taki suma sa de den owruman di e hori den tra klas èn suma na den dinari ini a diniwroko di o teki presi gi den, efu den no de. Yu leki skoro-opziener sa musu wroko skinskin makandra nanga den tra brada di e teki fesi na ini den tra klas, so taki unu sa man yepi den studenti te den musu hori wan tra lezing, awansi na sortu fu den klas a musu hori en lezing.

Leri leisi-skoro. Kande a skin fu owruman e firi taki a de fanowdu taki furu sma na ini a gemeente musu leri leisi bun na ini a tongo di wi e taki na ini a gemeente. Efu na so a de, dan yu kan seti sani so taki makandra nanga a Theokrasia Diniwroko-skoro, yu kan hori wan tra skoro tu fu leri sma leisi. Den sani di sma sa leri tapu a skoro disi, na fu bigin leri leisi efu den no man leisi srefisrefi. Ma efu den man leisi kaba, dan den kan leri fu leisi moro bun.

So wan Leri leisi-skoro no abi fu hori tapu a srefi ten di den lezing e hori tapu a Theokrasia Diniwroko-skoro. Fu man yepi den sma bun di de tapu a Leri leisi-skoro, dan kande yu sa abi moro ten fanowdu leki a ten di den kan kisi tapu a Theokrasia Diniwroko-skoro srefi. Den owruman na ini a gemeente kan teki a bosroiti san na den sani di de fanowdu èn o ten wan Leri leisi-skoro musu hori. Efu a de fanowdu, dan den kan seti sani taki wan leriman e gi leri na wan heri grupu fu sma, noso a kan gi leri na wán sma nomo.

Wan bun leriman de fanowdu. Efu a kan, dan wan brada musu kisi a wroko disi, èn a brada musu man leisi bun èn a musu sabi a tongo fu wi bun tu. Efu so wan brada no de, dan den owruman kan aksi wan sisa fu du disi, ma a sisa musu de wan bun eksempre tu na ini a gemeente. Te a sisa e gi leri tapu a Leri leisi-skoro, dan a sa musu tapu en ede nanga wan angisa noso nanga wan tra sani di fiti.​—1 Kor. 11:3-10; 1 Tim. 2:11, 12.

A buku Du Muiti fu Leisi èn fu Skrifi de fu kisi na ini furu tongo. A buku meki fu leri sma leisi di no man leisi srefisrefi. Yu kan gebroiki tra sani tu fu gi sma leri tapu a skoro, ma dati sa anga fu o bun den wan di e kon tapu a skoro, sabi leisi. Te den studenti go na fesi moi kaba, dan yu musu gi den deki-ati fu teki prati na a Theokrasia Diniwroko-skoro di e hori ibri wiki.

Leki na opziener fu a Theokrasia Diniwroko-skoro, yu kan du furu fu meki a gemeente feni winimarki. Sreka yusrefi bun, èn soleki fa a skrifi na Romesma 12:6-8, dan si a wroko di yu kisi leki wan bigi gudu di komoto fu Gado.