Opregti berouw — Fa wi kan si hem?
„Wan ati di broko en masi, o Gado, joe no sa veragti”. — Ps. 51:17.
1. (a) Na soema wi moe verteri wi sondoe foe kisi pardon en foe sainde? (b) Foe sainde wan sondoe na Jehovah kan de toe wan sondoe na a gemeente?
OWROEMAN no de „biechtpapa” (wan priester pe joe de go verteri joe sondoe), di kisi na makti foe pardon ala sondoe di dem memre foe na gemeente kan doe. Jehovah Gado de pardon dem sondoe foe dem soema di habi berouw, en a de doe disi tapoe na gron foe na zoen-ofrandi foe hem Manpikin. Ofoe wan soema sa kisi pardon foe Jehovah, no de kon foe dat ede ofoe a ben verteri hem sondoe na dem owroeman (1 Joh. 1:8, 9; 2:1, 2). Te wan soema gi hemsrefi abra na bigi sondoe, a kan sondoe ooktoe na a gemeente. Disi de so, foe di bigi sondoe kan tjari foeroe sjen nanga moeilijkheid kon tapoe na gemeente, pe na tranga-ede soema de na ini. Dem owroeman di de teki presi foe na gemeente, moe sabi foe dat ede, dati na soema habi opregti berouw, bifo dem gi hem pardon foe na takroe nem di a tjari kon tapoe na gemeente.
2. (a) San wi de leri ini 2 Korinte 2:7 foe na gi di na gemeente kan gi pardon foe sondoe? (b) Foe san na gemeente foe Korinte ben gi na man di ben habi berouw pardon?
2 Dati na gemeente ini bepaalde afersi kan gi pardon ofoe no gi pardon, de kon na krin ini san na apostel Paulus ben taki gi dem Korinte soema foe a teki baka ini dem mindri foe wan man di ben sluit uit, ma di ben habi berouw now. A ben skrifi: „Oen moe gi hem . . . nanga boen-ati . . . pardon, en . . . troostoe hem” (2 Kor. 2:7). Na apostel ben gi na rai foe gi na man disi pardon, bikasi na „strafoe di na moro bigi pisi foe dem brada ben gi hem” ben doro hem marki, foe di a ben tjari hem kon so fara foe habi berouw (2 Kor. 2:6). Foe di na man ben habi berouw en tjari hem libi kon krin baka, foe di a tjari hem kon akroederi nanga dem regtvaardiki marki foe Jehovah, a ben de joisti gi na gemeente foe teki hem baka ini dem mindri. A ben soekoe foe Jehovah pardon hem foe hem sondoe, en now na gemeente ben gi hem pardon toe, no dati dem gi hem ’absolutie’ foe hem sondoe (soboen, gi hem pardon foe na sondoe di a ben doe) ma foe di dem gi hem pardon foe dem moeilijkheid, na sjen nanga na sari di na ogridoe foe hem ben tjari kon tapoe na gemeente.
3. San owroeman moe doe te soema di doe bigi sondoe de taki dati dem ben piri-ai gi demsrefi?
3 Ini son afersi na sondoe libi foe wan soema, te disi kon na krin, kan de wan toemsi sjen wan. Ini wan pisi tem foe someni moen ofoe srefi jari a kan tjari hemsrefi tapoe wan fasi, di srefi ini na grontapoe dem de si hem leki wan sondoe. Bakatem a de go kande na dem owroeman en a de taki dati a no langa pasa kaba a tapoe nanga hem ogridoe en a ben aksi Gado foe gi hem pardon. A habi na prakseri dati a piri-ai gi hemsrefi. Ofoe a de taki kande gi dem owroeman, te dem de tjari bewijsi kon gi hem foe hem sjen libi, dati a ben piri-ai gi hemsrefi en foe datede a no de feni hem fanoodoe foe taki foe na afersi. San dem owroeman moe doe? Dem moe loekoe soortoe jeje jepi na soema habi fanoodoe en ofoe a habi troe troe berouw. Foe doe disi, moro leki wan takimakandra nanga hem de fanoodoe foe kon sabi san de hem troe troe firi, beweegi foe ati nanga fanoodoe. Wan soema di habi troe troe berouw sa waarderi so wan lobi jepi foe na see foe dem owroeman en teki disi nanga sakafasi.
SARI TAPOE WAN GRONTAPOE FASI OFOE OPREGTI BEROUW — SOORTOE WAN FOE DEM TOE?
4. Bigi sari de wan marki foe troe berouw? Verklari disi.
4 Wan soema di doe ogridoe moe habi, dati no de foe taki, firi foe sari, konsiënsi fonfon nanga sabiso foe na sondoe fasi doe foe hem. A de foe dem fasi foe na soema, dati dem firi disi kan kon nanga ofoe sondro watra-ai. Owroeman moe hori na prakseri dati a no ala sari, konsiënsi fonfon ofoe sabiso moesoe de wan bewijsi foe opregti berouw. Na kristen apostel Paulus ben skrifi: „Habi sari ini na frede foe Gado, de tjari berouw kon, di de tjari go na libi en di wan soema no habi foe taki efoe mi ben sabi so, ma na sari foe grontapoe, de tjari dede kon” (2 Kor. 7:10). Owroeman de proberi nanga reti foe kon sabi san de beweegi na soema di doe ogri foe habi sari.
5. San de meki wan soema habi sari tapoe wan grontapoe fasi, en foe sainde disi no de opregti berouw?
5 Sari tapoe wan grontapoe fasi kan kon foe na firi dati wan soema misi san hem ben poti na prakseri en dati hem verwakti no kon troe ofoe na broko-ede, dati a de na teri moro ofoe na lasi foe bepaalde winimarki ofoe moe ondrofeni ini na tem di de kon tranga leri nanga sjen. Disi de wan sari foe dem takroe bakapisi di wan soema no wani foe na ogridoe ofoe foe di na ogridoe kon na krin. Efoe dem firi disi de na wan enkri rede foe sari, aladi te joe loekoe hem a de normaal, dan na soema no habi troe troe speeti, dati a ben doe na sondoe, ma a habi sari dati dem ben poeroe hem bere kon na doro. A no de broko ede troe troe foe na sjen di na sondoe foe hem ben tjari kon tapoe Gado.
6. San de sori dati, na bari kree foe Esau ini na tori foe na blesi di Isaak ben gi Jakob, no ben de opregti berouw?
6 Disi wi kan si boen ini na tori foe Esau. Foe wan njanjan a ben seri hem geboortoe-reti gi Jakob. Di Jakob ben kisi bakatem wan blesi, di na fosi gebore pikin ben moe kisi, Esau ben bari kree foe sari ede. Hem „ben bari . . . boe tranga” en a ben wani tjari hem papa Isaak kon so fara foe kenki hem prakseri tapoe na blesi foe Jakob. Esau no ben habi speeti foe di a no ben waarderi jeje sani en dati ben tjari hem so fara foe veragti hem „geboortoe-reti”. Nono, a ben sari foe di a ben lasi winimarki nanga na doe foe hem. — Gen. 25:29-34; 27:34; Hebr. 12:16, 17.
7, 8. San de sori dati na piki di koonoe Saul ben piki dati a ben doe sondoe no ben de opregti berouw?
7 Ete wan eksempel de, di foe koonoe Saul. Di na profeeti Samuel ben taigi hem, dati a no ben poti prakseri tapoe na komando foe Gado foe kiri dem Amalek-soema, a ben proberi foe krin hemsrefi foe taki nanga krakti dati a ben doe na woortoe foe Jehovah. Sondro foe verstan hem verkeerti Samuel be taki, dati na koonoe ben misi foe doe san Gado ben taki en a ben taki moro fara: „Foe di joe trowe na woortoe foe Jehovah, a de trowe joe toe leki koonoe.” Di Saul ben jere disi, a ben piki: „Mi ben sondoe bikasi mi ben pasa na komando foe Jehovah nanga na woortoe foe joe, foe di mi ben frede na pipel en foe dat ede mi ben jere dem stem. Now dan, gi mi grantangi pardon foe mi sondoe en go nanga mi baka, foe mi kan trowe misrefi na gron na fesi foe Jehovah” (1 Samuel 15:17-25). Na verteri disi, dati hem ben sondoe no ben de troe berouw. Foe sainde?
8 Saul ben feni alatem ete dati hem sondoe no de so bigi, bikasi a ben proberi foe pardon hemsrefi foe di a taki dati a ben frede na pipel. A no ben verteri nanga hem heri ati, dati a ben sondoe na Jehovah. Na frede dati den ben sa trowe hem leki koonoe en ondrofeni publiki sjen, ben meki a kisi dem woortoe disi ini prakseri. Disi joe kan si ini a tranga begi foe Saul, dati Samuel moe drai go baka nanga hem. Fa so? A no ben de wanwan, dati Samuel ben moe drai baka foe jepi foe begi foe na boen foe Saul. Di Samuel ben tan taki, dati a ben sa gwe, Saul ben begi: „Gi mi grani . . . grantangi na fesi foe dem owroeman foe mi pipel en na fesi foe Israël en drai go baka nanga mi” (1 Sam. 15:30). Saul ben de broko hem ede soboen, fa a ben de ini na ai foe trawan. A ben wani kisi grani foe di Samuel ben sa de nanga hem en a no ben wani kisi sjen foe di Samuel no ben sa de nanga hem. Na piki di Saul piki dati a doe sondoe ben de soboen, soso wan taki nanga mofo. A no ben „habi sari ini na frede foe Gado”, foe di a ben sondoe na Jehovah Gado.
9. San na tori foe na bijbel de leri foe Esau nanga Saul foe berouw?
9 Foe san na bijbel de taki foe Esau nanga Saul, wi kan feni wan toe boen prenspari punt, di kan jepi owroeman foe si ofoe wan soema di doe ogri habi berouw. Na fasi fa wan soema de sori, dati hem sari troe troe, kan go makandra nanga watra-ai. Ma ete a de so dati dem sori foe wan soema firi, soleki a ben de nanga dem watra-ai foe Esau, no de ete wan bewijsi foe berouw. Net so a de toe te dem firi disi no de foe si, foe taki dati na soema di lasi pasi no habi berouw. A de go ofoe na soema de sari troe troe foe na ogri di doe en de piki taki hem ben sondoe na Jehovah. A sa meki soema aksi hemsrefi ofoe hem berouw de troe, efoe a tan go doro foe krin hemsrefi en pardon hemsrefi foe hem doe. Na soema no moe wani si na verkeerti fasi foe doe en a moe tegoe foe hem. Aladi pikinso sjen kan de te joe loekoe hem na libisoema fasi, te a doe bigi sondoe, na a fosi presi a no moe broko hem ede foe dem bita bakapisi foe hem ogridoe, ma moro foeroe a moe broko hem ede foe na sjen di a tjari kon tapoe Jehovah Gado nanga na gemeente foe hem pipel. A moe sari opregti, dati a doe ogri na a matifasi foe hem nanga na Moro Heewan.
San de ini troe berouw?
10. Foe sainde na sari foe wan soema, dati a ben tjari sjen kon tapoe Jehovah, moe habi na ini ooktoe speeti foe na ogri di a ben tjari kon tapoe hem brada nanga tra soema?
10 Dati wan soema habi sari foe na sjen di a tjari kon tapoe Jehovah no de aparti ofoe loesoe foe dem firi foe hem foe speeti foe dem ogri di a doe hem brada nanga tra soema. Na apostel Johannes e sori dati lobi gi wi brada de wan bewijsi foe lobi gi Gado en di troe troe joe no kan poeroe poti na wan see (1 Joh. 3:11, 17; 4:7, 8, 11, 12, 20, 21). Ogridoe de alatem, sondro dati joe kan tapoe hem, wan sani di no de tjari boen kon. Efoe ooiti wi fadon go ini wan ofoe tra fasi foe ogridoe, dan nanga reti wi ben sa kan prakseri foe dem punt disi, di wi sa kari now:
11. Te wi fadon ooiti ini na doe foe bigi sondoe, san de dan wan toe sani di wi moe loekoe boen?
11 Foe di wi doe so wan ogri, wi de firi pen na ati te wi de verstan dati wi no ben de leki na lobi en getrouw Gado di wi de dini, ma dati wi waka tapoe wan gridi, bigi-ai fasi, sondro foe hori dem afersi foe trawan na prakseri? (1 Thess. 4:3-6). Wi ben sa kan prakseri dati ogridoe, soleki hoeroedoe, ooiti kan tjari troe troe kolokoe gi trawan? O fara wi ben broko ede foe na tan-boen nanga hoopoe tapoe libi foe dem ini na boen-ati foe Gado? Dem doe foe wi kande no ben habi wantron wantron krakti tapoe trawan, ma wi de habi krakti tapoe dem nanga na eksempel foe wi (Rom. 14:7). Wi de prakseri wisrefi nomo, dati wi de prisiri wisrefi, winsi wi sabi dati wi de gi wan takroe eksempel en wi handri leki wan krakti di de swaki na jeje krakti foe trawan? (Agersi disi nanga Rom. 15:2, 3). Leki fa Jezus taki, dan na pasi di de tjari go na libi de „naw en smara en pikinso sma de di e feni hem” (Matt. 7:14). Wi moe sabi foe wisrefi o meni moeiti a de teki foe tan tapoe na pasi foe retidoe. Wi wani de dan leki wan soema, di de waka na smara pasi en dan trowe ston, di de meki trawan naki foetoe foe fadon ofoe meki na go na fesi foe dem moro moeiliki dan a de? Fa dati ben sa de tra fasi leki wi hemel Tata de! (Jes. 40:11). Soleki na apostel Paulus de taki, wi „no ben leri sabi na Kristus so” (Ef. 4:19-24). Efoe wi lobi Gado nanga hem Manpikin troe troe, en wi de verwondroe foe dem eegi-fasi foe dem, wi no de firi dan bigi sjen nanga sari, te wi de so tra fasi leki dem de doe en wi de meki dem fesi fadon foe na vertrouw di dem ben habi ini wi? Ja, dem soortoe prakseri disi no de akroederi nanga troe troe berouw.
12. San wi de leri foe berouw ini na fasi fa koonoe Manasse ben doe, baka di Gado ben gi hem pardon?
12 Ete wan prenspari pisi foe berouw de foe si ini na tori foe koonoe Manasse foe Juda. Na bijbel de verteri wi foe na sondoe foe hem: „A ben doe foeroe san ben ogri ini na ai foe Jehovah, foe afrontoe hem” (2 Kon. 21:6).Te foe kaba dem ben tjari Manasse go na Babylon ini strafoe leki wan kroetoe foe Jehovah. Drape a ben kisi berouw. Na bijbel de skrifi: „A ben safoe na fesi foe Jehovah hem Gado en a ben tan saka hemsrefi bigi gi na Gado foe hem grantata. En a tan begi na hem, sodati a meki a ben begi hem en jere na begi foe hem foe kisi hem boen-ati en a ben poti hem baka ini hem koonoewroko ini Jeruzalem” (2 Kron. 33:12, 13). Baka dati Manasse doe ala san a ben man foe meki dem fowtoe foe hem kon boen, foe di a poeroe dem afkodree-doe ini hem kondre, en foedi a tjari ofrandi gi Jehovah en gi na pipel tranga foe dini na Moro Heewan (2 Kron. 33:15, 16). Nanga disi wi de kisi na bewijsi, dati foe habi troe troe berouw, a de fanoodoe foe libi na verkeerti fasi foe doe, so toe foe teki na vaste bosroiti en doe moeiti foe doe boen.
13. San ben kan de ini „froktoe . . . di fiti berouw” en foe sainde?
13 Wan soema di habi troe troe berouw, soboen moe kan sori tapoe dem „froktoe . . . di fiti berouw” (Matteus 3:8). Disi habi na hem ini, dati na soema de doe redelijk moeiti foe poti dem afersi kon reti so fara leki dem omstandigheden foe hem de gi hem pasi. Na sori foe berouw foe hem, foe eksempel, no ben sa habi foeroe waarde, efoe a no ben broko hem ede foe pai baka san a ben foefoeroe. Ooktoe efoe a no ben sa teki positief na bosroiti foe ben waka wan joisti fasi, dan a ben sa meki soema aksi demsrefi ofoe hem berouw ben de opregti.
14. Efoe na sondoe foe wan soema de seki tra soema toemsi en de meki soema taki foeroe takroe foe dati na publiki, san de bepaal foe a sa sluit ofoe a no sa sluit uit?
14 Ma fa wi moe loekoe na afersi efoe na sondoe foe wan soema de seki soema toemsi en meki soema taki foeroe takroe foe dati na publiki. Ete wan tron, a de kon ofoe a habi opregti berouw ofoe a no habi berouw de bepaal efoe wan soema moe sluit uit foe na gemeente.
15. Otem owroeman sa go abra foe sluit uit en foe sainde?
15 Te bewijsi foe opregti berouw no de, dan dem owroeman moe loekoe boen, dati dem no meki dem firi foe dem tjari dem. Dem no kan loekoe pasa ogridoe en doe leki dem no de si dem sjen nanga moeilijkheid, di ben kon tapoe na gemeente en di de na bakapisi foe na sondoe foe wan sondari di no habi berouw. Efoe dem ben sa doe disi, dan dati ben sa wroko takroe tapoe na heri gemeente. Son memre foe na gemeente ben sa firi tranga foe teki na fri foe doe sani en no bada moro foe na rai foe Gado: „De leki fri soema, ma tokoe no gebroiki na fri foe joe leki wan pardon foe doe pori sani, ma leki srafoe foe Gado” (1 Petrus 2:16). Boiti dati, na soema di doe ogri, a ben sa prakseri makriki foe sondoe, foe di ini na tem di de kon a ben sa teki moro fri en tjari trawan kon toe ini ogridoe. Na koni koonoe Salomo ben taki: „Foe di na strafoe foe wan takroe wroko no de kon esesi, foe dat ede meki na ati foe dem libisoema-pikin ben poti demsrefi troe troe foe doe ogri” (Pred. 8:11). Efoe dem owroeman de degedege foe na opregti fasi foe na berouw foe wan soema di doe ogri en te troe troe bewijsi de, dati disi sa tjari pori kon, dan dem no moe drai drai foe poti prakseri tapoe na vermane: „Poeroe na ogri man na oen mindri.” — 1 Kor. 5:13.
OGRI DI OWROEMAN NANGA DINARI INI NA DINIWROKO DOE
16. San wan owroeman moe doe efoe a gi hemsrefi abra na bigi sondoe en foe sainde?
16 Foe di owroeman de tjari so wan hebi verantwoortoe ini na kristen gemeente, dan dem fasi foe waka en libi moe de wan boen eksempel. Efoe wan owroeman foe dat ede doe wan bigi sondoe, a de verplekti foe verteri na skin foe owroeman foe dati, aladi kande a habi berouw kaba foe hem fowtoe. Foe sainde? Bikasi hem no boen moro foe tan doe wroko leki wan opziener, foe di a no de wan soema moro di no de sondro fowtoe (1 Tim. 3:2). A no ben sa akroederi nanga na marki foe santafasi foe Gado te man nanga bigi fowtoe na jeje fasi de tan doe wroko leki owroeman. — 1 Petr. 1:15, 16; agersi disi nanga na wet ini Leviticus 21:17-23, pe mansoema foe na oso foe Aaron no ben mag doe priesterwroko efoe dem ben habi wan mankeri na skinfasi.
17. San moe doe efoe wan owroeman feni dati a no de moro langa sondro fowtoe?
17 A no de foe taki, dati owroeman, soleki ala tra memre foe na gemeente, foeroe tron de misi foe sori na prenki foe Jehovah tapoe wan volmaakti fasi. Foe di a de misi foeroe tron, wan owroeman kan kisi na firi, dati a no de miti moro langa dem marki foe bijbel en a de tjari dati kon ondro na prakseri foe dem tra owroeman. Baka te dem loekoe na afersi, pe dem de loekoe ooktoe dem firi foe na konsiënsi foe na heri gemeente, dem tra owroeman ben sa kan kon na a bosroiti, dati dem fowtoe di dem e taki foe hem no de tjari aksi kon ini na prakseri foe trawan efoe na brada boen foe dini leki wan opziener (Loekoe Galaten 2:11-14, pe wi de leesi dati dem ben piri-ai gi Petrus; na fowtoe fasi foe libi disi no ben meki, dati a no ben boen foe tan dini leki wan owroeman). Te na owroeman disi nanga hem heri ati de meene dati hem no de moro langa sondro fowtoe, dan dem tra owroeman sa respeki dem firi foe hem en poeroe hem foe hem verantwoortoe.
18. Soortoe verantwoortoe owroeman habi tapoe kompe-owroeman di gi demsrefi abra na bigi sondoe?
18 Efoe, na a tra see wan troe troe kragi foe wan fowtoe foe wan owroeman kon ofoe efoe, hem verteri foe wan bigi sondoe di a ben doe, dan dem tra owroeman moe teki na heri verantwoortoe tapoe dem foe poeroe hem na a wroko foe wan owroeman en dem moe gi hem na piri-ai di de fanoodoe en dem de poti skotoe gi hem di de verstan wan. En efoe wan fasi di no de sori berouw de meki a de fanoodoe, dan dem moe sluit hem uit.
19. Sa wan dinari ini na diniwroko moe doe te a fadon go ini wan bigi sondoe en foe sainde?
19 Net soleki a de nanga dem owroeman, na so dinari ini na diniwroko, di gi demsrefi abra na bigi sondoe, moe verteri disi na dem owroeman. Soso man di „fri foe kragi”, boen foe doe diniwroko na so fasi (1 Tim. 3:10). Afersi foe ogridoe, pe dinari ini na diniwroko de na ini, de handri tapoe na srefi fasi leki di foe dem owroeman.
20. Soortoe boen kan kon foe wan eksempel foe opregti berouw?
20 Efoe Gado de verwakti foe dem memre foe na kristen gemeente, dati dem de proberi nanga dem heri konsiënsi foe prisiri hem en hori demsrefi krin gi hem diniwroko, dan dem wan, di de owroeman nanga dinari ini na diniwroko, moe de troe troe net so toe ini dem fasi foe waka nanga libi. Dem de nanga moro ondrofeni ini na kristen fasi foe libi en Gado de poti wan moro bigi verantwoortoe tapoe dem, foedi dem moe de eksempel (Agersi disi nanga Lukas 12:48; 1 Petr. 5:2, 3). Winsi dem doe wan bigi fowtoe, dan tog dem opregti berouw, di de foe si foe di dem drai baka gi dem verkeerti fasi foe doe en tjari disi kon na ondro na prakseri foe na skin foe owroeman, de wan eksempel. Nanga disi dem trawan, di fadon ini wan bigi sondoe, kan feni jepi foe sori tapoe na srefi fasi disi, dati dem habi berouw. Na faja foe soifri demsrefi na fesi foe Gado, na ernst, na teki di dem ati de teki faja nanga dem eegi sondoe foe hem, en na moeiti foe meki na ogri kon boen baka, sa jepi alamala foe kisi libi. Boiti dati, na vreede ini na gemeente sa tan — vreede nanga Gado en nanga makandra. — 2 Kor. 7:11.
21. Soortoe krakti opregti berouw kan habi tapoe wi?
21 O prenspari opregti berouw de! Foe di wi de onvolmaakti, dan ala dee wi de misi tapoe wan ofoe tra fasi foe sori na prenki foe Gado tapoe wan volmaakti fasi. Nanga reti wi moe sari foe disi. Ma a no moe habi leki bakapisi, dati wi de pina wi srefi foe ibri pikin fowtoe nanga sani di wi misi foe doe. Ma na a tra see, na verstan dati wi de meki fowtoe ini woortoe nanga doe, moe meki wi de nanga sakafasi en jepi wi foe sori sari-ati te trawan doe sondoe na wi. Te wi aksi moro fara Gado foe gi wi pardon foe wi sondoe, wi kan habi na vertrouw dati a sa teki nanga prisiri dem begi foe wi (Matt. 6:12, 14, 15). Na so fasi wi sa prisiri ini wan krin konsiënsi te wi de proberi foe doe hem wani. Ja, wi sa de troe troe kolokoe ini na sabi, dati Jehovah ben pardon wi sondoe en dati a de si wi leki hem krin foetoeboi, di habi na dem fesi teego libi. — Ps. 32:1, 2; 103:10-13.