’Piri-ai de na pasi foe libi’
„Na komando de wan lampoe, en wan leti na wet de, en dem piri-ai foe tranga leri de na pasi foe libi.” — Spr. 6:23.
1. Nanga soortoe kondisi foe na libisoema-famiri, meki na aksi de kon, fa wi kan kisi en hori na fesi foe Jehovah wan presi di de sondro vlaka?
LEKI onvolmaakti soema wi de meki foeroe tron fowtoe ini dem woortoe, den fasi nanga doe foe wi. Na apostel Johannes ben skrifi gi kompe-kristen: „Efoe wi de taki: ’Wi no habi sondoe’, dan wi de kori wisrefi en na waarheid no de na wi ini” (1 Joh. 1:8). Na kristen apostel Jakobus de piki: „Wi alamala de naki foetoe foe fadon foeroe tron. Efoe wan soema no de naki foetoe foe fadon ini woortoe, hem de wan volmaakti man, di man toe foe dwingi hem heri skin” (Jak. 3:2). Fa wi kan kisi en heri wan toemsi boen presi na fesi foe Gado?
2. (a) San wan soema moe doe foe Jehovah kan si hem leki wan krin soema? (1 Kon. 8:46-50; Jes. 1:16-18; 55:6, 7; Kol. 1:13, 14; Openb. 7:14). (b) Fa dem piri-ai di habi dem gron ini bijbel de jepi wi foe tan hori wan presi sondro vlaka na a fesi foe na Almakti-wan? (Spr. 3:12; Openb. 3:19)
2 Wi habi pardon fanoodoe foe wi sondoe. Foe disi a de fanoodoe, dati wi verteri na a Moro Heewan dem sondoe foe wi, en sori troe troe berouw ofoe troe troe sari en tapoe na gron foe na zoenofrandi foe Jezus begi foe kisi pardon. „Efoe wi verteri wi sondoe”, na bijbel de taki, „dan a de getrouw en regvaardiki foe pardon wi sondoe en foe krin wi foe ala onregvaardiki fasi” (1 Joh. 1:9). Piri-ai di habi dem gron ini na Woortoe foe Gado nanga ini dem gronprakseri di de na ini, kan sori wi na ini soortoe fasi wi de doe sondoe en kan jepi wi foe dat ede foe doe den fanoodoe sani foe kisi na pardon foe Gado en teki nanga dati wan presi sondro vlaka na fesi foe hem. Dem soortoe piri-ai disi kan jepi wi ooktoe foe drifi komoto foe tra bigi sondoe.
3. San kan tjari wi kon so fara, dati wi de piri-ai gi wisrefi en fa wi de doe dati? (Spr. 1:20-25)
3 Te wi de leesi na bijbel ofoe rai di habi dem gron ini bijbel, ofoe te wi de jere fa dem de taki foe na woortoe foe Gado tapoe dem gemeente-konmakandra, dan wi ben sa kan kon na wi verstan dati wi ben sondoe tapoe wan bepaalde fasi. Opregti wi sa firi sari foe dem fowtoe foe wi, begi foe kisi pardon en aksi Jehovah foe jepi wi nanga hem jeje foe go moro na fesi ini na tjari foe wi libi kon akroederi nanga na wani foe hem. Soboen, te wi de teki na rai foe na bijbel tapoe so wan fasi na ati en poti hen na ini wi libi, dan wi de piri-ai gi wisrefi.
TE WI ATI NO DE KOROSTOE
4. (a) Foe sainde wan soema no de firi hemsrefi waarti foe go na Jehovah ini begi? (b) San wan soema moe doe di de ini sari na jeje fasi en fa dati kan jepi hem?
4 Ooktoe a kan pasa, dati wan soema, foe di a fadon ini ogridoe ofoe foe hem sondoe eegifasi ede, no de firi hemsrefi waarti foe go na Gado ini begi. Na sari foe hem na jeje fasi kan habi krakti tapoe hem tan-boen na skin fasi. Disi kan pasa srefi, ala di na soema no wani si ogri na ai en wani doe opregti san boen. Te wan soema feni taki a de ini so wan kondisi, san a moe doe? Na discipel Jakobus de piki: „Meki a kari dem owroeman foe na gemeente en meki dem begi gi hem” (Jak. 5:14). Te na soema di nanga sari de jere na tranga begi foe na ati foe wan owroeman gi hem, dan a kan kisi tranga foe go krosibee na Jehovah ini begi. Boiti dati a kan kisi na jepi foe kon na a joisti soortoe foe prakseri leki: „Efoe trawan habi na vertrouw, dati Jehovah sa jere begi di dem seni go na hem foe mi ede, dan mi no kan habi na vertrouw dati a sa jere mi begi toe?”
5. (a) Foe sainde piri-ai no habi foe gi na wan soema di habi sari foe sondoe di kande a ben doe? (b) San dem owroeman kan doe foe jepi so wan soema di habi berouw?
5 So wan soema di habi berouw no habi fanoodoe foe wan tra soema piri-ai gi hem foe meki a verstan na ogri foe na sondoe foe hem. Hem eegi ati piri-ai gi hem kaba en kroetoe hem (1 Joh. 3:19-22; agersi 2 Sam. 24:10; Psalm 32:3-5). Kande dem owroeman sa moe memre na soema, di kon swaki na jeje fasi, na a sari-ati foe Jehovah en foe di a de klari foe jere begi (Neh. 9:17; Matt. 7:7-11). Sani moe seti foe jepi na soema na jeje fasi, wan sani di kan teki wiki ofoe srefi moen foe doe hem tapoe wan fasi pe na soema de kisi moro nanga moro foe kon na fesi. Wan soema di de ini so wan nootoe, no moe loekoe na jepi di de kon foe dem owroeman leki wan soso sani.
FA FOE DOE NANGA FASI DI NO DE GOSONTOE
6. Soortoe fasi di no de gosontoe ben sa kan gro kon ini wan gemeente, en san dem owroeman moe loekoe?
6 Tem de, en dati no de foe taki, dati owroeman moesoe piri-ai gi soema ofoe gi na gemeente foe bepaalde fasi nanga doe. Fasi di no de gosontoe ben sa kan gro. Sonwan kande ben libi „na lobi, di dem ben habi fosi”, en dati meki dem no de broko ede nanga dem verantwoortoe foe dem na jeje fasi (Openb. 2:4; 3:15-18). Kande grontapoe fasi de boro kon ini dem prisiri demakandra foe dem (1 Petr. 4:3). Sonwan foe dem kande de teki prati ini ogri konkroe ofoe kande na trafasi no de dwingi dem tongo (Ef. 4:29, 31; 5:3, 4). Papa nanga mama kande toemsi slak ini na kweki foe dem pikin (Ef. 6:4). Kande sonwan no de hori marki ini na dringi foe tranga dringi ofoe dem de teki fri foe doe sani nanga soema foe na tra seks (Ef. 5:18-20; agersi 1 Tim. 5:1, 2). Efoe dem soortoe fasi disi de ini na gemeente, dan a ben sa boen te dem owroeman taki makandra san moe doe precies foe jepi aparti soema nanga dem brada leki wan groepoe.
7. San de wan fasi fa owroeman kan gi dem brada foe dem piri-ai na dem oso?
7 Nanga wan soema di habi bigi jeje problema, kande wi ben sa kan leesi kapitel ini na bijbel di de fiti ofoe artikel di habi dem gron ini na bijbel ofoe taki nanga hem wawan. Te dem de go loekoe, dati na soema di habi jepi fanoodoe, de verstan san dem tekst di dem loekoe wani taki en fa dem habi te make nanga hem afersi, dan dem owroeman sa poti hem reti ofoe piri-ai gi hem. Foeroe tron wan ofoe toe owroeman sa kan doe disi ini na vertrouw fasi foe wan soema oso. — Agersi disi nanga Tori foe dem Apostel 20:18-20, 31.
8. Fa bijbel-lezing di de go foe sani di de pasa ini na gemeente, en di no boen, kan de leki wan piri-ai gi dem arkiman?
8 Na a tra see dem owroeman kan feni hem wan verstan sani foe hori lezing foe na bijbel, pe dem de taki foe sani di de pasa ini na gemeente di no boen (2 Tim. 4:2; Tit. 1:10-14). Dem krin en krakti bijbel takimakandra sa gi dem arkiman tranga foe ondrosoekoe demsrefi en tjari dem fanoodoe kenki kon ini dem libi (Agersi disi na Jakobus 1:22-25). Efoe dem si dati dem tekst di de loekoe habi krakti tapoe dem libi, dan dem de kisi piri-ai. — Agersi disi nanga 1 Korinte 14:24, 25, pe dem de taki foe wan soema di no de na bribi en di de kisi piri-ai foe dem sani di a de jere tapoe wan gemeente-konmakandra.
AFERSI FOE BIGI OGRIDOE, DI DE AKSI WAN PIRI-AI
9. (a) Soortoe sondoe kan tjari wan bigi sjen kon tapoe na gemeente? (b) Foe sainde wan soema di ben doe wan tron nomo wan bigi sondoe, tokoe kan de ini wan doti kondisi ini na ai foe Jehovah?
9 Net soleki ini dem fosi hondro jari foe wi teri, dan doopoe kristen ini disi tem ooktoe de doe bigi sondoe, di de tjari sjen kon tapoe na gemeente. (Loekoe dem eksempel foe dem fowtoe doe disi ini 1 Korinte 5:11; Galaten 5:19-21 nanga 1 Timoteus 1:9, 10). Kande soso wan tron nomo dem meki wan bigi fowtoe ofoe dem de tan waka wan sondoe fasi foe libi wan heri pisi tem. Wan soema di de doe wan bigi sondoe, winsi na soso wan tron a ben gi hemsrefi abra na dati, a de tan doti ini na ai foe Gado, te leki a drai go na Gado nanga foeroe berouw en proberi foe kisi na pardon foe Gado.
10. Soortoe verantwoortoe owroeman habi tapoe soema di ben doe bigi sondoe?
10 Soortoe verantwoortoe dem owroeman habi tapoe dem soema di ben fadon go ini bigi sondoe? Ala moeiti moe doe foe jepi dem soema disi na jeje fasi en foe jepi dem foe kisi berouw efoe dem no doro na punt disi ete. Dem owroeman sa loekoe fini fini en ondro begi fa disi kan doe.
11. Foe sainde wan soema di ben habi berouw, habi fanoodoe foe gi hem moro piri-ai?
11 Son tron a kan pasa dati na soema di fadon ini sondoe, habi sari ini na frede foe Gado en a de sori dati a habi na vaste bosroiti foe doe san boen. Dem woortoe foe hem de sori, dati a de verstan o takroe hem sondoe ben de. Soboen a no de fanoodoe foe overtoigi hem foe na takroe foe na speciaal sondoe disi foe tjari hem kon so fara foe habi berouw. Ma a no de verstan kande so boen, dati tra sondoe ben de di tjari hem foe misi bigi. Na soema kan fadon go ini wan pori fasi foe prakseri sani. Kande a no ben broko ede foe san a ben leesi en sortoe fasi a ben habi prisiri-tem. Foe di a gi pasi foe kon ondro na krakti foe na grontapoe, a ben doengroe na fasi fa a de si sani, sodati a ben habi moeiti foe si boen nanga ogri (Hebr. 5:11, 14). Foe dat ede a habi troe troe piri-ai fanoodoe en a kan teki foeroe tem foe dem owroeman foe jepi hem foe si san a wani taki foe troe troe wan kristen. Kande dem moe sori hem krin fa a ben poti alatem bijbel vermane na wan see. Kande dem moe meki a verstan dati a no de prenspari wawan foe habi berouw foe dem bigi sondoe, ma ooktoe foe dem moro pikin sondoe di sa tjari joe go so fara.
12. San ben kan meki owroeman kon so fara foe piri-ai gi wan memre foe na gemeente na publiki?
12 Foe na gemeente kan habi wan gosontoe frede foe no fadon go ini net so wan sondoe fasi foe libi, dem owroeman kan bosroiti foe hori wan bijbel takimakandra gi na gemeente, pe dem sa taki foe na problema foe na soema di ben doe ogri. Ala di dem no sa kari hem nem, hemsrefi sa sabi dati dem de piri-ai gi hem na fesi foe ala soema di de drape. Ooktoe dem soema di sabi na sani disi, sa sabi disi (1 Tim. 5:20). Foe kan sabi ofoe na ogridoe foe wan soema de aksi foe gi so wan soema wan publiki piri-ai, owroeman sa loekoe ofoe nanga disi troe troe dem de dini na boen foe na gemeente nanga di foe na soema di ben doe ogri en habi berouw. Dem sa loekoe ooktoe soortoe skotoe dem moe poti gi na soema di kisi piri-ai.
HORI NA FASI LEKI DE INI WAN OSO-FAMIRI
13. Fa owroeman ini na fasi fa dem de handri na soema di lasi pasi, sa meki na de foe na gemeente leki wan oso-famiri tjari dem?
13 Te owroeman de piri-ai gi soema di lasi pasi, dem moe hori na prakseri dati na gemeente de leki wan oso-famiri, ’wan gemeenschap foe brada’ (1 Petr. 5:9). Wi moe behandel dem memre foe na gemeente nanga switifasi, soleki wi de behandel soema foe wi oso-famiri nanga switifasi en respeki (1 Tim. 5:1, 2). Boen papa nanga mama de handri nanga dem sondoe foe dem pikin no leki wan kroetoebakra ini wan kroetoe, di soso wani sabi san pasa troe troe en dan kroetoe na soema. Dem de proberi foe jepi tranga-ede pikin foe kon na dem verstan, sodati ini na tem di de kon dem kan tjari demsrefi tapoe wan fasi di de tjari grani en no sjen gi na oso-famiri.
14. Fa boen papa nanga mama ben sa handri afersi di habi te make nanga ogridoe foe dem pikin foe dem?
14 Foeroe tron papa nanga mama sa taki nanga wan pikin di ben kon ini moeilijkheid, dem wawan en no gi dem man- ofoe oemapikin sjen na fesi foe na heri oso-famiri. Efoe dem de feni hem fanoodoe, dan dem sa meki ala dem tra pikin kon sabi san ben pasa, sodati na tranga leri di ben gi na a tranga jesi pikin, de leki wan warskow gi dem. Papa nanga mama kan verdrage wan heri pisi tem nanga pasensi dem sondoe foe wan bigi man- ofoe oemapikin. Te moeiti di ben doe alatem foe gi tranga leri, ma kenki no ben kon ini wan takroe kondisi, dem kan tanapoe na tapoe dati na bigi man- ofoe oemapikin libi na oso gwe. (Agersi disi nanga san Israël papa nanga mama ben doe akroederi nanga na komando foe Deuteronomium 21:18-21). Dem de doe disi kande toe, foe di dem wan kibri dem moro jongoe pikin foe dem foe wan pori fasi.
15. Soortoe marki owroeman moe poti fosi na dem fesi, te dem habi foe doe nanga sondari en otem wawan dem sa go abra foe sluit wan soema uit?
15 Aladi owroeman de moro foeroe leki brada dan leki papa nanga mama nanga dem wan ini na gemeente, dem srefi ooktoe sa doe fosi ala moeiti di dem kan foe jepi dem wan di lasi pasi foe kisi berouw. Disi kan teki tem, sodati wan piri-ai di fiti kan gi. Srefi Jezus Kristus ben taki foe na oema Izebel ini na gemeente Thyatira: „Mi ben gi hem tem foe habi berouw, ma a no wan sori berouw foe hem hoeroedoe” (Openbaring 2:21). Te wa soema, soleki nanga na oema Izebel, no de wani foe habi berouw, dan dem owroeman sa go abra foe sluit uit en poeroe komoto foe na gemeente na „soerdeki” di de pori sani. — 1 Kor. 5:6, 7.
16. San na wan toe sani di owroeman moe doe foe gi na soema di lasi pasi soemeni jepi leki dem kan?
16 Te owroeman kan jepi soema di lasi pasi troe troe, dan dem moe loekoe afersi ini na leti foe na heri Woortoe foe Gado, en no gebroiki wawan pisi foe tekst pe spesroetoe sondoe de kari. Te joe no loekoe hem fini a kan gersi, dati wan bepaalde afersi foe ogridoe gersi wan di wi ben handri kaba. Dem omstandigheid, dem fasi nanga beweegi foe ati kan de difrenti foe na soema, di wi habi now foe doe nanga hem. Ala sani moe loekoe ini na leti foe na bijbel, foe sabi seker san de dini dem afersi foe na gemeente nanga na soema di lasi pasi moro boen. Soortoe piri-ai foe bijbel de gi toe, disi moe miti alatem na fanoodoe foe na soema di lasi pasi. Baka te dem owroeman di ben handri na problema sabi soifri san ben pasa en san ben meki na soema doe na sondoe, dem sa teki tem foe go prakseri en ini begi loekoe san na bijbel de taki, bifo dem sa miti leki wan groepoe foe taki san moe doe. Na so fasi dem sa de ini wan moro boen kondisi foe gi wan boen piri-ai nanga dem fanoodoe jepi.
17. San wi leki memre foe na gemeente, sa wani teki leki na vaste bosroiti foe doe en soortoe paiman disi de gi?
17 Na gi foe piri-ai nanga jepi foe na bijbel de foe troe prenspari foe jepi ala soema ini na kristen gemeente foe waka wan fasi di de tjari dem go na teego libi. Meki wi tan poti ai tapoe dem piri-ai di wi de feni ini na bijbel en foe kaka foetoe gi tesi foe tjari wi go ini wan fasi foe libi di de tjari sjen kon tapoe na Moro Hee Gado nanga na gemeente foe hem pipel. Te wi de doe disi, dan wi kan de seker foe na blesi foe Jehovah ini disi tem nanga na paiman foe teego libi ini na regvaardiki njoen seti foe sani foe hem. — Joh. 17:3.