No abi wan prati na den sondoe foe tra sma
„Mi no ben sidon nanga man di e taki lé, èn na den sma di e kibri san den de mi no e go na inisé.” — PSALM 26:4.
1. Foe san-ede Judas ben kenki na tori foe en brifi gi kompe-kristen?
TINANÉGI hondro jari psa kaba, na discipel Judas ben wani skrifi kompe bribiman foe ’na gemeenschappelek ferloesoe foe den’. Ma a ben feni en fanowdoe foe gi den tranga foe „stré sondro foe weri gi na bribi di ben gi abra na den santawan wan dé èn foe alaten”. Foe san-ede? Foe di séker „goddelowsoesma” ben boro kon na ini a gemeente èn „den [kenki] na no-ferdini-boenfasi foe wi Gado kon na ini wan pardon foe loesoe fasi foe libi”. — Judas 3, 4.
2. San wi moe loekoe sontron na ondro begi, aladi a e waran na ati foe taki foe a ferloesoe foe wi?
2 Fa a de waren wi ati foe taki foe na gemeenschappelek ferloesoe! A e gi bigi satisfaksi foe go denki dipi foe a boskopoe dati, èn wi e prisiri, te nanga foeroe ferwakti wi e loekoe na ala den blesi foe na ferloesóe dati foe kon. Ma tokoe wi e kon tanapoe na fesi na fanowdoe foe go loekoe tra serjoesoe afersi, na presi foe na ferloesoe. Efoe den disi no e poti reti, dan den kan pori a bribi foe wi èn meki dati wi tron sma di e fadon komoto na ini na strélon foe na libi. Na warskow foe Judas kontrari den fowtoe libifasi ben de nanga wan faste bosroiti èn krakti, èn na so kristensma na ini a ten disi ooktoe moe loekoe sontron na ondro begi rai foe na bijbel di de rechtstreeks èn e kon leti tapoe a tori.
Wi égi sondoe
3. Foe san-ede wi abi tranga leri fanowdoe, èn fa wi moesoe teki en?
3 Na psalmsingiman David ben taki: „Na ini sondoe mi mama ben meki mi nanga pen, èn na ini fowtoe mi mama ben kisi mi” (Psalm 51:5). Wi alamala ben gebore leki sondari (Romeini 5:12). Na apostel Johannes ben skrifi: „Efoe wi e taki: ’Wi no abi sondoe’, dan wi e kori wisrefi èn na waarheid no de na ini wi” (1 Johannes 1:8). Leki sondari wawantron wi abi tranga leri fanowdoe foe poti na libifasi foe wi reti. Na tranga leri disi e kon foe Jehovah nanga jepi foe en Wortoe, na bijbel èn en organisaatsi. Na tranga leri foe en e poti wi reti èn e jepi wi ini opregtifasi foe waka na fesi foe en. Na apostel Paulus ben taki: „No wan enkri tranga leri e gersi kande tapoe a momenti srefi taki a de nanga prisiri, ma nanga sari; tokoe a e tjari bakaten gi den di oefen nanga dati wan froktoe foe vréde, foe wi moe taki en reti regtvaardikifasi” (Hebrewsma 12:11). Te wi loekoe na froktoe foe vréde foe na tranga leri disi dan wi moesoe teki en séker nanga tangi.
4. Oten tranga leri kan gi, èn sortoe krakti a kan abi?
4 Tranga leri di komoto foe Jehovah sontron e gi te wi ben bigin net ete nanga wan libifasi di ben sa tjari oen go na a doe foe moro serjoesoe ogri (Galacia 6:1). Tra tron na tranga leri e kon kande efoe wi go moro fara kaba tapoe a fowtoe pasi. Na sortoe tranga leri dati kande sa moe de moro krakti, soleki di na apostel Paulus ben gi tranga na den Korintesma foe opo doe wan sani nanga wan hoeroedoeman na ini a gemeente (1 Korinte 5:1-5). Na ini ala toe geval na tranga leri ben gi sodati na sma di ben doe ogri sa kisi berow, sa drai en libi èn go waka wan leti pasi, farawe foe den sondoe lostoe di ben tjari en go doe ogri. (Teki gersi nanga Tori. 3:19) Dienstknegti foe Jehovah de grantangi gi sowan tranga leri, netleki na sma di ben kisi strafoe na ini na owroe Korinte ben njan boen foe disi èn kande séker ben kon boen baka sodati a ben kan prisiri baka na ini a foeroe-nanga-lobi demakandra nanga na gemeente. — 2 Korinte 2:5-8.
5. San kristen e doe gewoonlek te den gi densrefi abra na wan bigi sondoe?
5 Moro foeroe a de so, dati a moro bigi pisi foe den ben gi densrefi abra na Jehovah, e sabi boenboen na fanowdoe foe waka opregti na a fesi foe Gado. Efoe den fadon go na ini wan serjoesoe sondoe, dan den e drai baka es’esi gi na takroe libifasi, e go taki nanga den owroeman di den ben poti èn den e sori opregti berow (Jakobus 5:13-16). Dati ibri jari pikinso Kotoigi foe Jehovah den e poti na dorosé, e bewijgi taki den no wani si na ogridoe na ai èn wani doe san boen. — Psalm 34:14; 45:7.
Den sondoe foe tra sma
6, 7. Fa son sma di e doe ogri e proberi foe wroko na tapoe trawan?
6 Tokoe sonwan di lobi san boen, soleki fa ai sori, ben meki a ati foe den kori den, bika a gersi taki den no wani abi bita-ati gi san ogri (Psalm 97:10; Amos 5:15). Leki wan bakapisi foe dati meki den e go na ini sondoe libifasi èn no e hori doro foe doe san joisti. Na ini son geval kande den e go ete moro fara èn den e proberi foe tjari trawan kon na ini a sondoe libifasi foe den. O prenspari a de dati wi poti den sortoe kari disi foe go doe san ogri na wan sé! — Teki gersi nanga Odo 1:10-15.
7 Sontron den sma di a de krin no abi bita ati foe san de ogri, e taki so moi dati na ini na ati foe den sma di e arki na den wan angri kan kon foe doe san de ogri. Kande den e kisi dek’ati foe doe hoeroedoe ofoe foe waka baka wan libifasi di e kon krosbé na wan waka nanga libi di Gado no e feni boen. Ofoe kande wan sma e kisi tranga foe kon ini wan situwasi di de wan kefar gi en na jejefasi. Den sma di na a fasi dati e proeberi foe overtoigi trawan, e taki kande dati Jehovah de wan foeroe-nanga-lobi Gado di de nanga sari-ati te wi e sondoe. Sowan feradelek tak-go-tak-kon foe na ati kan doe ogri di e tan (Jeremia 17:9; Judas 4). Wi moesoe ’hori wi foetoe séker farawe foe a pasi foe den’! — Odo 1:15.
Teki prati na a sondoe foe trawan
8. Sortoe aksi wi moe go loekoe?
8 Ma kon oen taki dati wi ferstan dati wan libifasi di poti na wi fesi de fowtoe. Disi wani taki, efoe wi poti en na wan sé, dati automatis wi de fri foe moro frantwortoe na ini na afersi disi? Efoe wi sabi dati den sma di ben tjari sowan fowtoe libifasi kon na fesi e gi densrefi abra na sowan sani, dan san wi moe doe dan?
9. Foe san-ede son sma kande e wégri foe ferteri foe den ogri di trawan ben doe, ma foe san-ede disi de wan serjoesoe tori?
9 Sonwan di sabi foe ogri di trawan e doe, kande abi na firi foe no taki foe en nanga den sma di na a fosi presi de frantwortoe foe hori na gemeente krin. Foe san-ede? Kande den no wani den si den leki sma di tjari a tori kon na doro. Ofoe kande den e tapoe den mofo ini na tori foe wan fowtoe firi foe loyaliteit ofoe den e taki en wawan nanga sma di e pramisi foe hori na tori kibri. Disi de wan sani di wi no kan spotoe nanga en srefsrefi. Foe san-ede? Foe di a kan abi troetroe leki bakapisi dati wan sma e teki prati na den sondoe foe trawan.
10, 11. (a) San na apostel Johannes ben taki foe na teki prati ini na sondoe foe tra sma? (b) San wi ben kan kon aksi wisrefi efoe wi ben kon sabi dati wan memre foe na gemeente ben gi ensrefi na ogridoe?
10 Na apostel Johannes ben sori dati a kan foe teki prati na den sondoe foe wan tra sma. A ben skrifi: „Ibri sma di e poesoe go a fesi èn no e tan na ini a leri foe Kristus no abi Gado . . . Efoe wan sma e kon na joe èn no e tjari a leri disi no teki en noiti na ini joe oso èn no taki en odi toe. Bika a sma di taki en odi, e teki prati na en goddelowsoe wroko” (2 Johannes 9-11). Wan sma di na ini a tori foe „na leri foe Kristus” ben fadon komoto na bribi, no ben sa de wan warti kompe, èn foe di wan loyaal kristen no ben sa gi en odi, a ben sa tan farawe foe de wan sma di e teki prati na ini en goddelowsoefasi.
11 Foe di dati de a libifasi ini na tori foe wan sma di fadon komoto na bribi, meki séker wi no ben sa wani teki prati ooktoe na ini na goddelowsoefasi foe trawan di den hoeroedoe foe den ben tjari kon na wi prakseri. San wi moe doe foe dat’ede efoe wi sabi dati wan memre foe na gemeente ben tron wan foefoeroeman ofoe wan droengoeman? Efoe wi no gi na sma dati tranga foe begi Jehovah foe kisi pardon èn foe go ferteri en sondoe na fesi den owroeman dan wi sa de fri krinkrin? Nono, bikasi wi e tjari wan frantwortoe di wi no kan spotoe nanga en.
Krinfasi nanga a kibri foe sani boen de toemsi prenspari
12. Foe san-ede wi moe broko wi ede nanga na jeje krinfasi foe na gemeente?
12 Ibriwan foe wi moe broko en ede foe na jeje krinfasi foe na gemeente. Disi ben kisi krakti boen di djoe katiboman na ini na di foe siksi jarhondro gewoon teri ben de so fara foe gwe libi Babylon! Na komando di Gado ben gi ben de: „Hari komoto, hari komoto, komoto foe drape, no fasi noti san de doti; komoto foe a mindri foe [Babylon], hori joesrefi krin, oenoe di e tjari den wrokosani foe Jehovah.” — Jesaja 52:11.
13. Fa Judas ben sori dati wi moe broko wi ede fee kibri na pipel foe Jehovah tegen sma di e doe ogri?
13 Wi moe broko wi ede ooktoe foe kibri den dienstknegti foe Jehovah tegen sma di e proeberi foe kori den foe go doe ogri. Den „goddelowsoesma” na ini a ten foe Judas ben proeberi foe kenki ’na no-ferdiniboenfasi foe Gado kon ini wan pardon foe loesoe fasi foe libi’, ma na loyaal discipel dati ben opo doe wan sani foe di a ben warskow kompe-bribiman èn ben kibri den na a fasi dati. A ben memre den na den warskow eksempre di ontrow Israëlsma, den tranga jesi engel nanga tra sma ben gi. Efoe joe lési a brifi foe en, di Gado jeje ben meki a skrifi, dan joe sa si dati loyaal kristen no e fow den anoe abra makandra èn e loekoe te na krinfasi foe na gemeente de ini kefar ofoe te a pipel foe Gado abi kibri fanowdoe tegen hoeroedoesma nanga prakseri di no de krin.
14. Efoe wan sma di doe ogri e wégri foe ferteri en sondoe na fesi foe den owroeman, fa Psalm 26:4 kan jepi wi dan foe teki wan bosroiti san wi moe doe?
14 Ma kon oen taki dati wi ben gi wan sma di doe ogri tranga foe aksi Gado pardon èn foe ferteri en sondoe na den owroeman, ma dati ai tan poti dati a wan tra ten ofoe no e ferstan dati den stap disi de fanowdoe. Dan wi kan libi na afersi gewoon so? Son sma ben sa kan tak-go-tak-kon dati den no wani de ini a tori. Den no wani kande lasi na matifasi foe na sma di doe na ogri. Èn kande den no wani meki sma si den leki sma di e meki a fesi foe den sma fadon di poti fertrow a ini den, foe di den ben ferteri den owroeman foe a tori. Ma disi de wan fowtoefasi foe tak-go-tak-kon. Na psalmsingiman David ben taki: „Mi no ben sidon nanga man foe lé èn na den di e kibri san den de, mi no e go na inisé” (Psalm 26:4). Soboen wi no wani de sma di de ini a tori, wi no wan tjari afoe foe na fowtoe foe den „di e kibri san den de”.
15. Fa Leviticus 5:1 e sori wi tapoe na frantwortoe di wi e tjari baka te wi gi wan sma di ben doe wan sondoe wan redelek pisten foe ferteri den owroeman foe a sondoe foe en?
15 Baka te wi gi na sma di doe na ogri wan redelek pisten foe go na den owroeman nanga a tori foe a ogri di a doe, dan wi e tjari na fesi foe Jehovah na frantwortoe foe no teki prati na en sondoe. Wi moe ferteri den frantwortoe opzieners dati na sma ben ferteri wi foe na bigi ogri di den moe ondrosoekoe. Disi de na ini akroederi nanga Leviticus 5:1 pe tanapoe: „Efoe now wan sili e sondoe foe di a ben jere na ini publiki wan floekoe di ben taki èn a ben de kotoigi ofoe a ben si en ofoe a ben kon sabi en, dan, efoe a no go taki foe en, a moe tjari na frantwortoe foe en sondoe.” A no de foe taki, dati wi no moe opo doe wan sani es’esi te wi e prakseri soso taki ogri ben doe.
16. San de moro prenspari leki loyaliteit na wan mati di e wégri foe ferteri den owroeman di den poti foe na bigi sondoe foe den?
16 A de now na ini a grontapoe ini algemeen so foe tapoe den ogri foe trawan. Foeroe sma e tapoe den mofo efoe a e kon so fara foe ferteri den ogri foe trawan na den sma di moe kon sabi dati. Krakti de fanowdoe di wan kristen persoonlekheid e gi foe ferteri owroeman di den poti foe na bigi sondoe foe wan kompe-bribiman. Ma efoe oen wani abi na boenati foe Jehovah, dan wi no kan tapoe wi ai foe den sondoe foe wan trawan foe na réde foe na matifasi foe wi nanga en. Na matifasi foe wi nanga Gado de moro prenspari leki loyaliteit nanga wan mati di gi ensrefi abra na bigi sondoe èn e wégri foe ferteri den owroeman di den poti.
Wan problema di wi alamala moesoe poti prakseri a tapoe
17. San e sori dati bepaalde jongoeman a mindri wi moe loekoe boen foe no teki prati na a sondoe foe trawan?
17 Na problema foe abi prati na a sondoe foe trawan e sori en srefi sontron na mindri bepaalde jongoewan na oen mindri. Den e tapoe den mofo kande èn e wégri foe ferteri den sma di moe sabi dati te trawan doe sani di ben kan doe a gemeente ogri èn ben sa abi leki bakapisi na atibron foe Jehovah. Na ini den grontapoe sistema foe skoro a de wan gewoon sani foe tapoe joe mofo foe na ogridoe foe trawan. Ma efoe na prakseri disi kon na ini a gemeente, dan foeroe problema kan kon foe dati. Bericht kon srefi na inisé foe jongoesma di na ini wan groepoe e gi densreli abra na ogri, ala di den e pramisi makandra foe hori a tori kibri so dati den owroeman nanga papa nanga mama no sa kon sabi noti foe den sortoe sani dati. Na broko kindi gi na druk foe sma foe joe jari èn na lostoe foe a groepoe teki joe, ben meki den jongoewan disi ben gi den papa nanga mama nanga trawan ini a gemeente foeroe pen na ati te na ogridoe ben kon na krin. Joe moe hori na prakseri dati noti de na kibri di no sa tjari kon na krin, èn a de wan foe den moro prenspari frantwortoe foe wi na fesi foe Jehovah foe jepi foe hori en organisaatsi krin. — Lukas 8:17.
18. San kristen papa nanga mama moe doe efoe pikin foe den e gi densrefi abra na ogridoe?
18 Ala dienstknegti foe Jehovah moesoe loekoe boen foe no abi wan prati na ini den sondoe foe trawan. Son papa nanga mama e proeberi foe taki boen foe na fowtoe waka nanga libi foe den pikin foe den, na ini wan moeiti foe kibri den. Ma te den jongoewan disi e doe fowtoe sani, dan papa nanga mama di de kristen no moe teki na fasi, dati ibri sma de tegen den pikin foe den. Na presi foe dati, papa nanga mama di abi frede foe Gado moe jepi den pikin foe den, efoe den pikin foe den ben doe wan bigi fowtoe, foe teki èn foe kisi, èn foe njan boen foe ibri fanowdoe maatregel foe tranga leri di a Wortoe foe Gado e gi.
19. (a) Kristen trowpaar moe loekoe boen nanga san na ini a tori foe bigi sondoe? (b) San owroeman moe doe ofoe wan foe den ofoe wan dinari ini a diniwroko ben doe wan bigi sondoe?
19 Kristen trow man nanga oema moe loekoe boen ooktoe dati den no pasa den wet foe Gado foe tapoe den bigi sondoe foe makandra. Den moe hori na prakseri na geval foe Ananias nanga Safira di ben meki mofo makandra ma di no ben man foe tapoe na bigi sondoe foe den (Tori foe den Apostel 5:1-11). Owroeman moe opo den ai ooktoe dati den no kibri densrefi ofoe dinari na ini a diniwroko efoe wan foe den ben doe wan bigi sondoe di ben sa kan tjari uitsluiting kon. Den moe waka na baka na gronprakseri di Paulus ben tjari kon na krin di a ben skrifi: „No poti noiti anoe es’esi tapoe wan sma; no abi ooktoe wan prati na den sondoe foe trawan; kibri joe krinfasi”. — 1 Timotéus 5:22.
Na koni foe tan sondro flaka
20. San wi moe doe, na presi foe wi tapoe den bigi sondoe foe trawan ofoe foe abi wan prati na den?
20 Dienstknegti foe Jehovah no moe abi prati na den takroe pasi foe a grontapoe disi ofoe foe waka na den baka. Na apostel Johannes ben skrifi gi Gajus: „Lobiwan, no de wan sma di e waka na baka san de ogri, ma na baka san de boen. A sma di e doe boen, e kon foe Gado. A sma di e doe ogri no ben si Gado” (3 Johannes 11). Fa a de wan boen sani foe na Wortoe foe Gado di no e misi noiti tjari wi èn nanga dati foe doe san de boen! Na presi foe tapoe den bigi sondoe foe trawan ofoe foe abi wan prati na den, wi moe teki foe dat’ede na faste bosroiti foe skijn leki lampoe èn foe de sondro flaka èn sondro fowtoe (Filippi 2:14, 15). Ibri dienstknegti foe Gado abi na frantwortoe foe hori na gemeente krin èn foe tan ensrefi sondro flaka (2 Petrus 3:14). Ma san joe moe doe efoe joe e broko joe ede efoe wan sani san wan sma ben doe, de joisti ofoe no? Joe moe firi joesrefi fri foe taki nanga den owroeman foe dati foe kan kisi bodoi foe na joisti fasi foe doe sani.
21. (a) Fa a lobi foe Kristus gi a gemeente foe en de wan eksempre gi wi? (b) Wi moe doe sortoe frantwortoe na ini tori foe na fowtoe waka nanga libi di trawan gi densrefi abra na en?
21 A lobi foe wi gi Jehovah organisaatsi moe de leki wan spikri foe na lobi di Jezus Kristus abi gi en jeje bruid, na gemeente. A „ben lobi na gemeente èn ben gi ensrefi abra foe santa en, foe krin en nanga na wasi nanga watra nanga jepi foe a wortoe, sodati a ben sa kan pristeri na gemeente na ini en moifasi, sondro flaka ofoe ploi ofoe sowan sortoe sani ma dati a ben sa de santa èn sondro doti” (Efese 5:25-27). Na sofasi toe na lobi foe wi gi Jehovah organisaatsi moe tjari oenoe go sofara foe doe ala san kan foe hori en krin. Noiti wi moe doe wan sani di no e gi grani na Gado ofoe foe loekoe psa na fowtoe libi nanga waka foe trawan. Meki wi gi moro foeroe sma di e doe ogri tranga foe poti na waka nanga libi foe den leti èn go aksi na jepi foe den owroeman. Efoe den no doe disi na ini wan redelek pisten, meki wi doe dan wi frantwortoe foe ferteri den opziener di den ben poti. Na sofasi wi no sa abi wan prati na den sondoe foe trawan èn tan farawe foe sma di e teki prati na a sondoe foe trawan èn tjari afoe foe na frantwortoe foe na fowtoe waka nanga libi foe den.
22. (a) San wi moe doe foe kisi ferloesoe? (b) Sortoe aksi wi moe loekoe moro fara?
22 Na gemeenschappelek ferloesoe foe wi de wan goedoe di joe no kan teki gersi nanga noti. Efoe wi wani kisi na ferloesoe disi, dan wi moe tan waka na ini soifri retifasi na fesi foe Jehovah. Meki foe dat’ede wi jepi makandra, sondro foe abi oiti prati na a sondoe foe trawan. Jehovah na wan lobifasi ben sorgoe foe wan organisatoris regeling foe jepi wi na ini den moeiti foe wi, èn den owroeman di den ben poti e doe ini disi wan prenspari rol. Ma fa den e waka na baka Jehovah èn en Manpikin, na Toemsi boen Herder? Sortoe jepi owroeman kan gi wi na tapoe na pasi foe libi? Den aksi disi wi sa go piki na ini na tra artikel di e kon.
Joe kan memre disi ete?
◻ Fa joe moesoe si tranga leri?
◻ Joe moe gi tranga na wan kompe-bribiman foe doe san, te a ben ferteri joe, dati a ben doe wan bigi sondoe?
◻ San joe moe doe efoe joe sabi dati wan sma di doe ogri no ben man ferteri en sondoe na den owroeman di den ben poti?
◻ Fa wi kan tan farawe foe abi wan prati na a sondoe foe tra sma, ofoe wi de now owroeman, trowpatna ofoe pikin?
[Prenki na tapoe bladzijde 7]
Na apostel Johannes ben warskow foe no abi wan prati na den sondoe foe trawan