Doe ala sani nanga wan boen konsiënsi
„Kolokoe na soema di no de hari wan kroetoe kon na hem tapoe nanga dem sani di hem de feni boen”. — Romeini 14:22.
1. Foe sainde wi moe de voorzigti foe gi trawan rai ini tori foe eegi afersi?
A NO de wan makriki sani foe teki joisti bosroiti ini ala afersi di wi habi foe doe nanga dem ini na libi. Na afoe brada foe Jezus, Jakobus, ben taki dati wi „alamala de naki foetoe foe fadon foeroe tron”. Disi ben de wan reden, so a ben taki, foe sainde „foeroe foe oenoe . . . no moe de leriman, mi brada, foe di wi sabi dati wi sa kisi wan moro hebi kroetoe” (Jak. 3:1, 2). Efoe foeroe tron wi de gi trawan rai, dan wi de meki na frantwoortoe foe wi foe dem bakapisi kon moro bigi.
2. Foe sainde ala rai di gi na trawan moe habi dem gron troe troe ini na bijbel?
2 Efoe na rai foe wi di wi de gi trawan habi leki gron soso na eegi konsiënsi ofoe eegi prakseri foe wi, dan wi sa kori dem foe troe. Winsi wi de proberi foe gi rai di de akroederi nanga na bijbel, dan wi moe de seker dati wi de si sani tapoe na joisti fasi en no dati wi de denki dati a moe de so ofoe wi de tjari wi eegi prakseri kon na fesi. Te wan soema teki rai foe wan soema en poti dati ini hem libi en na rai ben habi leki gron na konsiënsi ofoe prakseri foe wan trawan, dan a no sa habi foeroe winimarki gi hem. A kan tjari srefi foeroe ogri kon. Foe sainde? Foe di a no de wroko nanga san hen eegi konsiënsi de sori hem. Bikasi „ala sani di no de kon foe bribi, de sondoe”. — Rom. 14:23.
3. San de fanoodoe te wan soema de teki wan eegi bosroiti?
3 Foe wan soema habi bribi ini wan afersi pe a moe teki wan eegi bosroiti, a moe kisi joisti sabi nanga bewijsi foe troe tori (Hebr. 11:1). „Dati na sili ben sa de sondro sabi, no boen, en hem di de waka esi nanga hem foetoe, de sondoe” (Spr. 19:2). Efoe a no habi joisti sabi foe na wani foe Gado, a ben sa kan kon so fara, dati esesi a poti hemsrefi ini wan takroe fasi foe libi.
4. Efoe wan soema de feni hem moeiliki foe teki wan bosroiti, san a kan doe dan foe kisi jepi?
4 Son kristen habi troe troe swaki ini na bribi foe dem, foeroe tron foe di dem no habi joisti sabi ini wan bepaald problema ofoe ini wan bepaalde afersi foe na libi. Jakobus de verteri dati wan kristen kan kisi na koni di de fanoodoe foe pasa soortoe moeiliki situatie te a begi Gado foe na koni dati (Jak. 1:2, 5). Foe a kan kisi wan piki foe Gado, a moe loekoe na bijbel toe. Foe sainde disi sa jepi? Foe di kristen soema habi demsrefi libisoema problema leki dem foetoeboi foe Gado ini dem hondro hondro jari di ben pasa. Te wi de loekoe na bijbel, dan wi sa si fa getrouw man, pe joe habi na ini dem apostel nanga dem mati foe dem, ben gi rai en ben handri dem problema disi. Dem omstandigheden de kenki, ma no wan problema no de, di na bijbel no de gi na joisti gronprakseri. Foe poti na gronprakseri ini wi libi, sabi nanga na konsiënsi de fanoodoe.
NA WET „DI SKRIFI INI ATI”
5. Foe sainde na apostel Paulus ben skrifi na gemeente Rome foe na tori foe na konsiënsi?
5 Foe na tori disi foe na konsiënsi, Paulus ben taki ini Romeini kapitel 14. Ini na gemeente ini Rome, dem brada ben agri nanga makandra foe dem gronleri foe na bijbel en foe na fasi fa na preekiwroko ben moe doe (Rom. 1:8). Ma dem no ben agri nanga makandra, spesroetoe tapoe eegi afersi. Disi ben doe kon moro foeroe foe dem bakapisi nanga kweki foe dem difrenti memre foe na gemeente. Dem difrenti disi ben de moro foeroe ini na bigi prati di ben de mindri djoe nanga heiden, bifo dem ben teki na kristendom.
6, 7. (a) Soortoe „swakifasi ini na bribi” son wan ben habi ini na gemeente? (b) San ben de na moro prenspari prakseri foe na Wet en soortoe kenki ben kon nanga na kon foe na Messias?
6 Paulus de skrifi: „Teki na soema di habi swakifasi ini hem bribi” (Rom. 14:1). Dem swakifasi disi no ben de swakifasi ini na bribi ini Gado na Tata nanga Jezus Kristus, di de tjari libi kon. Dem alamala ben moesoe habi na bribi disi. (Wan Amerkan Translation de taki: „Handri soema di de toemsi soifri ini dem bribi leki brada”.) Dem swakifasi disi ben de punt, pe bepaalde kristen no ben tanapoe steevi, foe di dem punt disi no ben de so krin ini na tori foe na fri di wan kristen habi. Foe eksempel, dem djoe hondro hondro jari dem ben de ondro na Wet (Rom. 13:9; 2 Kor. 3:6), di ben tapoe dem foe njan bepaalde soortoe njanjan di „no ben krin” en di ben komanderi dem foe hori spesroetoe dee (Lev. 11:46, 47; Deut. 5:12-14). Gado ben gi na Wet disi foe tapoe dem djoe, te leki na Messias ben sa kon, dati dem ben sa moksi kon de wan nanga dem naatsi nanga dem afkodree-doe (Gal. 3:23-25). Dan „na volmaakti wet, di de foe na fri” ben sa kon ini hem presi — „wan wet ini na inisee foe dem”, en di skrifi ini dem ati (Jak. 1:25; Jer. 31:33). Na njoen wet disi de kon krin ini dem kristen Griki Skrifi.
7 Nanga na ofrandi foe hem eegi libi, na Messias, Jezus Kristus, ben fri dem djoe di ben teki hem troe troe. Dem heiden toe ben kan kon fri foe na fositem katibo ini afkodree. Ala kristen soema — djoe nanga heiden — ben teki now na srefi presi na fesi foe Gado (Ef. 2:14-16). Ma ete a ben moeiliki gi son wan foe dem djoe kristen, di dem fositem gwenti nanga doe ben sidon dipi na ini dem, foe kenki. Ini son sani „a ben stotoe dem konsiënsi”.
8. Soortoe firi son wan ini na gemeente ben habi gi dem soema di ben habi ’swakifasi’ ini dem bribi, en fa dem ben moe handri nanga dem?
8 Na apostel Paulus de verteri na joisti fasi foe dem sortoe sani disi te a de go moro fara en a de taigi na gemeente foe na teki foe dem wan di habi wan swaki konsiënsi foe no teki „bosroiti, di habi foe doe nanga inisee aksi di de sori dati wan soema de degedege”. („No kroetoe na prakseri foe dem”, An American Translation; „no foe bigin wan feti nanga dem prakseri foe dem”, Luthervertaling.) So wan soema wi ben moesoe teki nanga wi heri ati leki wan troe troe brada, wan mede-erfgenaam foe Kristus, aladi hem prakseri nanga konsiënsi ben de tra fasi, kande srefi „toemsi soifri”. Na son wan na lostoe ben de foe stree nanga trawan tapoe na prakseri foe dem ofoe na fasi fa dem de si wan sani, di ben komoto inisee foe hem, foe he ati. Disi ben fowtoe, foe di a no ben sa tjari boen kon gi dem partij di de ini na tori nanga na gemeente, di ben kan teki partij en kon de ini wan prati fasi.
TOE EKSEMPEL DI DE GI KRAKTI NA A GRONPRAKSERI
9. Soortoe aksi ben kon na fesi tapoe na njan foe meti?
9 Paulus de gi na eksempel foe na njan foe meti. Ini dem dee dati a ben de so, dati dem meti di ben slagti ofoe na meti di ben de seri tapoe dem wowojo, foeroe tron ben gi leki ofrandi na afkodree-gado, en ooktoe foe santa na meti gi dem soema di ben de aanbegiman. Disi, a no de foe taki, no ben habi krakti tapoe na meti srefi. Wan afkodree-gado no ben de wan sani. Ma dem soema di no ben de steevi ini na fasi foe si na sani joisti, ben habi konsiënsi-fonfon te dem ben de njan na meti, foe di dem ben frede dati na meti ben habi foe doe nanga heiden kerki gwenti kande (1 Kor. 8:4-7). Na apostel de vermane foe dat ede:
„Na wan habi bribi foe njan ala sani (ala sani di de njanjan, pe meti di ben seri tapoe wowojo ben de na ini toe), ma na soema di de swaki, de njan groentoe nanga gron njanjan (sodati, sondro foe a ben sabi, ben sa njan meti, di a ben si leki „no krin” foe di a ben handri tapoe wan heiden fasi)”. — Rom. 14:12.
10. Wi no moe poti reti na fasi fa soema de si sani tra fasi leki na moro bigi pisi foe na gemeente foe kisi „na srefi geest nanga srefi fasi foe prakseri sani”?
10 San ben moe doe? Na fasi fa na man disi ben de si sani, foe di a ben njan soso groentoe en gron njanjan, no ben moe poti reti fosi, bifo a ben kan kisi respeki leki wan troe troe kristen? Son wan ben sa kan poti prakseri tapoe na gronprakseri, dati „alamala moe agri nanga makandra ini taki en dati prati no moe de na oen mindri, ma dati alamala moe de wan makandra ini na srefi geest en ini na srefi prakseri” (1 Kor. 1:10). Ma na wanfasi disi no ben de wanfasi ini prakseri ofoe fasi foe si sani, di ben de eegi afersi ofoe foe na konsiënsi; a ben de foe waka wanfasi baka Kristus, no baka libisoema. — 1 Kor. 1:11-13.
11. Fa soema ini na gemeente ben si makandra tapoe na afersi foe konsiënsi?
11 Son djoe kristen, di ben de si na afersi krin, so toe na moro bigi pisi foe dem heiden memre foe na gemeente, di no ben gwenti dem wetti foe Mozes, ben firi foe loekoe nanga veragti tapoe ala dem soema di ben de toemsi soifri. Dem ben si dem leki law, tranga-ede en fanatiek soema, aladi di dem soema di ben de toemsi soifri ini den konsiënsi ben de kroetoe trawan, foe di, leki fa dem ben prakseri dem trawan ben doe fowtoe ini Gado ai foe di dem pasa dem skotoe foe na fri foe dem. Foe dati meki na apostel de piri-ai gi ala toe groepoe:
„No meki na wan di de njan loekoe tapoe na wan di no de njan, en meki na wan di no de njan no kroetoe na wan di de njan, bikasi Gado ben teki hem. Soema na joe foe kroetoe na foetoeboi foe wan tra soema? A de fadon ofoe a de tanapoe na hem masra fesi. A sa man tan tanapoe, bikasi Jehovah kan hori hem tanapoe”. — Rom. 14:3, 4.
12. Foe sainde wi moe teki tra kristen, di kande habi wan prakseri foe eegi afersi di kenki nanga na prakseri foe wi?
12 Efoe Jehovah teki wan soema, foe di a ontvange hem en gi hem hem geest, aladi kande a habi wan toe sani di hem konsiënsi de tapoe hem ofoe a habi prakseri di gersi dati hem verstan sjato ofoe dati hem verstan de moro bradi leki di foe trawan, soema na wi dan foe feni fowtoe? Wi alamala moe gi frantwoortoe na wi Masra. Wi habi nofo problema, fowtoe nanga sani di wi de misi foe doe, foe wi hori wisrefi nanga dem afersi foe trawan. Wan soema no kan go bemoei nanga na fasi fa wan foetoeboi ofoe wrokoman foe wan trawan de dini na trawan — en disi de so, moro ete gi wa foetoeboi foe Gado. Gado de na Kroetoe-bakra foe hem foetoeboi. Ja, „a sa tan . . . tanapoe” nanga jepi foe Jehovah.
13. Fa a de troe dati Gado hori hem foetoeboi tanapoe?
13 Paulus no de meene dja, dati Jehovah sa jepi hem foetoeboi ini ala sani di dem de doe, seker a no sa jepi dem ini fasi foe libi di no boen. Ma srefi efoe wan kristen habi wan spesroetoe fasi fa a de si sani di trawan ben sa kan kroetoe en di dem de si srefi leki wan fasi foe hem di no de meki hem boen, dan Gado no sa kroetoe hem ogri, ma a sa prisiri dati a de doe sani nanga hem heri konsiënsi. Efoe Gado feni hem boen, a sa tjari na konsiënsi foe hem foetoeboi kon so fara foe kisi wan lepi loekoe tapoe sani te na reti tem doro. Na wan enkri kristen no moe teki na reti foe poti hem konsiënsi gi wan trawan. Efoe a doe disi wel, dan kande a tjari na trawan ini moeilijkheid ofoe kande a de doe ogri na a bribi foe hem. Leki wan bakapisi foe dati a ben sa kon srefi ondro „wan moro hebi kroetoe” ofoe wan seker pisi foe kroetoe, soleki Jakobus de taki. — Jak. 3:1.
14-16. Verteri san dem woortoe foe Paulus ini Romeini 14:5, 6 wani taki?
14 Na apostel de gi ete wan eksempel:
„Na wan de kroetoe na wan dee moro bigi leki na trawan; na trawan de kroetoe dati na wan dee de na srefi leki ala trawan; ibriwan moe bribi troe troe ini hem eegi geest. Na soema di de hori na dee, moe hori hem gi Jehovah. En na soema di de njan, moe njan gi Jehovah, bikasi a de tjari tangi gi Gado; en soema no de njan no de njan gi Jehovah, en tokoe a de tjari tangi gi Gado.” — Rom. 14:5, 6.
15 Wan djoe di ben teki Kristus, ma di ini na tem di pasa jari langa ben gi jesi na a wet foe na sabbat, ben sa habi konsiënsi-fonfon foe doe soortoe hebi wroko tapoe wan djoe sabbat-dee, efoe a de bori, temrewroko, ofoe na waka foe wan langa pasi. Srefi efoe a ben de wroko foe na gemeente, wan sani di dem tra memre foe na gemeente de verwakti, dati a doe disi gi ofoe makandra nanga dem, a ben sa kan libi na wroko tapoe na dee dati foe hem konsiënsi ede. Tapoe ibri tra dee a ben sa doe hem nanga ala prisiri, ma na dee dati a de hori spesroetoe gi Jehovah, dati wani taki, a de prakseri dati a de doe na wani foe Jehovah foe di a de hori na dee dati spesroetoe santa. En efoe a ben njan, dan a ben taki Gado tangi dati a ben kan de troe troe krin en aparti foe afkodree aanbegi, bikasi Gado ben taki krin ini na wet foe Mozes fa a de si dem soortoe afersi dati. (Loekoe fa Daniël, di ben de na a tem dati ondro na wet, ben prakseri [Dan. 1:8]). Na doe foe hem nanga hem heri konsiënsi no ben ati no wan soema ini na gemeente, en a no ben de doe verkeerti sani. Jehovah no ben de si hem leki a no krin. Jehovah ben waarderi hem, dati nanga san hem ben verstan en nanga wan krin konsiënsi ben gi jesi, sondro foe poti na ofrandi foe Kristus na wan see.
16 Na moro bigi pisi foe kristen soema na a tra see ben de si ala dee leki na srefi en leki dem ben de foe Jehovah — alamala leki santa — en no wan leki spesroetoe santa. Dem ben njan meti nanga wan krin konsiënsi, aladi di dem ben sabi dati, efoe a ben gi leki ofrandi na fesi na wan afkodree-gado, disi no ben kenki na meti srefi, foe di afkodree-gado no ben habi makti. Dem ben taki Gado tangi dati na njanjan di a ben gi dem, dem ben kan njan en dem ben de grantangi foe na fri di a ben gi nanga jepi foe Kristus.
17. Foe sainde ibriwan ben moe bribi troe troe ini hem eegi geest?
17 Ma ibriwan soema ben moe bribi troe troe ini hem eegi geest. Efoe wan kristen soema nanga hem heri konsiënsi no ben kan verstan boen ini hem eegi geest na fasi fa wan trawan de si sani, dan a no ben sa doe hem boen, ma efoe joe loekoe hem boen, a ben sa doe hem ogri te contrari hem konsiënsi a ben sa teki na fasi dati foe si sani. En no wan foe dem toe no moe kroetoe na trawan, stree nanga hem, kroetoe hem ofoe loekoe nanga veragti tapoe hem (Jak. 4:11, 12). No wan foe dem toe no ben moe proberi foe meki na trawan teki na fasi fa a de si sani. Efoe tokoe wan soema doe dati, dan so wan soema ben sa proberi foe tiri tapoe na bribi foe na trawan.
18. Owroeman nanga trawan kan doe wan sani foe jepi wan soema kisi wan moro soifri loekoe tapoe wan eegi afersi? Efoe a de so, san dan?
18 Disi no wani taki dati wi no kan taki foe afersi foe na konsiënsi en dati wi no kan ondrosoekoe hem foe kon sabi fa na bijbel de si sani. Bewijsi kan tjari kon na fesi foe na fasi fa na bijbel de si wan tori. Ma krakeri, nanga stree ofoe dwengi, dati wan trawan si hem net so leki wi, moe poti na wan see. Owroeman nanga trawan di lepi, kan jepi dem wan di de swaki ofoe dem wan di dem gi wan verkeerti prakseri tapoe dem punt dati. Ma moro fara leki dati, dem no habi na reti foe go. Na soema moe handri nanga san hem konsiënsi de feni de boen na Gado fesi.
GRONPRAKSERI FOE BOSROITI TAPOE KONTREN, PE JOE DE NA DEGEDEGE
19. Fa wi kan hari wan lien san joe kan libi en san joe no kan libi na a konsiënsi foe wa soema?
19 Aladi na apostel de gebroiki dja soso dem toe eksempel disi, a de poti na gronprakseri gi ala tra afersi, di habi foe doe nanga na konsiënsi. Now ini na tem disi foeroe omstandigheid de, pe aparti, spesroetoe bijbel komando no de. Wi de kari disi son tron „grijs vlak”. Dem vlak disi de tapoe kontren foe wroko, kisi datra jepi, njanjan, krosi nanga tra sani. Na bijbel de gi wi gronprakseri, di wi kan meki tjari wi tapoe ala dem kontren disi. San tanapoe blaka tapoe weti ini na bijbel, wi alamala moe waka na hem baka. Foe eksempel, a bijbel de taki foe krosi nanga fa wi de tan na dorosee, „a moe sorgoe boen, sondro pranpran, nanga gosontoe verstan”, netjes en krin dem moe de (1 Tim. 2:9; 2 Kor. 7:1). Wi moe habi respeki foe dem firi foe wi brada en foe na gemeente nanga na boen nem foe hem ini na gemeenschap. Ma san joe lobi, kloroe, nanga tra sani, kan kenki foeroe nanga san wan tra soema firi foe lobi.
20. San wan soema moe doe di habi foe doe nanga wan problema, di na loesoe foe hem no de so krin gi hem?
20 Dem wan di habi te make nanga dem „grijs vlak” disi, moe go na a bijbel nanga boekoe di de jepi wi foe verstan na bijbel. Efoe a no de seker ete foe wan bosroiti, a kan go soekoe rai na owroeman ofoe trawan, di kan jepi hem foe si san na bijbel de taki, ma a no moe meki trawan teki wan bosroiti gi hem. Dem no de hem konsiënsi. Meki hemsrefi wegi dem sani, teki hem eegi bosroiti en handri nanga hem konsiënsi nanga na bosroiti di a teki. Nanga dem tem di sa pasa, kande a de go si dem sani ini wan tra leti, ma a moe weegri foe doe wan sani di a de ini degedege, sodati a no sa kroetoe hemsrefi. — Rom. 14:23.
21. Efoe wi habi wan aparti prakseri, disi wani taki dan, dati wi no moe kenki hem nooiti, ofoe san dan?
21 Ala kristen soema sa moe feti alatem foe go na fesi ini na si foe sani krin en dem sa moe doe moeiti foe kon moro krosibee foe na volmaakti eksempel foe Jehovah Gado nanga Kristus. Te dem sa doe so, dem sa kisi wan moro soifri konsiënsi. Alatem dem moe doe ala sani so, dati dem hori wan boen konsiënsi, aladi dem moe gi dem kristen brada foe dem na srefi fri.