Jehovah de gi wan „volmaakti paiman”
„Meki Jehovah blesi joe fasi foe waka nanga libi, en meki a de so dati joe kisi wan volmaakti paiman foe Jehovah, na Gado foe Israël, di joe kon soekoe ondro hem free wan kibripresi.” — Ruth 2:12.
1-3. (a) San na takimakandra mindri Naomi nanga Ruth de sori foe na kommunicatie ini wan oso-famiri? (b) Soortoe froewondroe sani ben kon na fesi di Ruth ben verteri Naomi foe na piki foe aleesi foe na dee dati, en na tiri foe soema soboen e kon na krin?
„MEKI a de so dati joe kisi wan volmaakti paiman foe Jehovah”. Na owroe Boaz ben taki dati gi na Moabiet oema Ruth. Nanga hem heri ati a ben winsi disi gi na troe troe boen oema disi, di ben soekoe kibri ondro na free foe Israël Gado (Ruth 2:12). Ma na winsi disi ben sa kon troe? En efoe ja, fa dan? Kow go loekoe pikinso.
2 Ini wan lobi osofamiri owroe soema habi belangstelling gi dem sani di jongoe sma e doe. Dem ala de loekoe okasi foe kenki prakseri en verteri makandra foe dem sani di ben pasa na dee dati. Disi ben de ooktoe so, ini na mofina oso ini Bethlehem, pe Naomi nanga Ruth ini dem neti joeroe ben de ini wan switi takimakandra. Arki!
3 „Pe joe ben piki aleesi tide en pe joe ben wroko?” Naomi e aksi disi foedi Ruth ben tjari someni aleesi nanga njanjan kon na oso. Wan soema ben poti spesroetoe prakseri tapoe na Moabiet oema. „Meki a de so dati na soema di poti prakseri tapoe joe kisi wan blesi”, na moro owroe oema e taki. Ma ala toe wan froewondroe sani e wakti dem, di sa gi dem tranga. „Na nem foe na man pe mi ben wroko tide, na Boaz”, Ruth e piki. Dati moi! Na tiri foe Gado de kon troe troe na krin. „Meki Jehovah, di no de frigiti hem lobi boenatifasi gi dem libiwan nanga dedewan, blesi hem” Naomi e bari tranga. „Na man de wan famiri foe wi. Hem de wan foe wi loesoeman.” — Ruth 2:19, 20.
4. Fa joe sa verteri foe wan loesoeman ini Israël ini owroetem?
4 Fa dati e meki dem skin kon opo! Dem oema disi sabi dati wan loesoeman (Djoe tongo goël) de wan famiri (wan brada ofoe wan tra mansoema ini na famiri) nanga na reti foe loesoe ofoe bai baka ofoe bai kon fri na soema, na goedoe ofoe na famiri-goedoe foe na moro krosbee famiri. Foe eksempel a kan bai wan famiri-goedoe bifo a kon na publiki wowojo en hori hem na so fasi ini na famiri. Tan prakseri disi pikinso! A kon toevallig so dati Ruth kon tapoe na gron foe Boaz, en hem de wan loesoeman, wan man foe Elimelech famiri.
5. Soortoe eksempel Ruth e gi — tra fasi leki Jakob oemapikin Dina — tapoe na tori foe demakandra nanga trawan?
5 Boiti dati Boaz wani dati Ruth tan krosbee foe dem jongoe wroko-oema foe hem te leki dem koti ala aleesi. Naomi e feni disi boen nanga dem woortoe: „A moro boen, mi oemapikin, dati joe go nanga hem jongoe oema na dorosee, foe soema no moeiliki joe tapoe wan tra gron.” Na Moabiet oema e tan toe te dri moen langa tapoe na gron foe Boaz foe piki aleesi te leki na koti aleesi nanga tarwe (wan soortoe karoe) kon na wan kaba. Tra fasi leki na oemapikin foe Jakob Dina, di ben soekoe demakandra nanga Kanaän wendje en tjari ongolokoe kon na hem tapoe nanga tapoe hem famiri, Ruth e tan libi na hem manmama, aladi a de loekoe ooktoe tapoe hem eegi demakandra nanga trawan. Wan moi eksempel! — Ruth 2:22, 23; Gen. 34:1-31; 1 Kor. 15:33.
SAKAFASI INI WROKO
6. Fa Naomi sori dati sondro gridi a winsi na boen gi Ruth?
6 Dem wiki e pasa en na kotiwroko e kon na wan kaba. Naomi e aksi Ruth: „Mi oemapikin, mi no moe soekoe wan rostoepresi gi joe, foe a go joe boen?” (Ruth 3:1). Na owroe weduwe no e proberi foe hori na jongoe Moabiet oema gi hemsrefi, ma a wani dati Ruth sa feni na vreede, ala sani ini oso, rostoe foe firi nanga sekerfasi, di a sa kisi ini na oso foe wan boen nanga lobi masra. Ma Naomi e broko ede toe foe na nem foe masra Elimelech moe tan ini Israël (Deut. 25:7). Ini na pisi tori disi a de sori wan spesroetoe plan en hem sakafasi pikinwefi de klari nanga hem heri ati foe wroko nanga hem makandra. Ruth e wasi hemsrefi foe datede, wrifi hem skin nanga oli, weri hem djakti ofoe tapoeseekrosi en ai go na pasi foe na boen wroko di a moe doe.
7. Fa Boaz e doe foe wai aleesi?
7 Ini na pisi tem dati, Boaz — wan goedoe man, ma wan tranga wrokoman toe — ben gebroiki na neti-winti foe wai aleesi tapoe na gron pe dem e fon aleesi. Nanga na fon, dem aleesi-ai e loesoe foe na boeba en dem aleesi-tiki kon tron piki tiki. Now, te dem e wai, dan ala disi dem de iti nanga wan bigi skopoe ini na winti. Na winti e wai na boeba gwe en dem pikin tiki e fadon na wan see en dem aleesi-ai e fadon na gron. Disi na wan prisiri tem, foe datede baka na wroko disi wan switi njanjan e kon. Boaz e njan en dringi en hem ati e prisiri, aladi no wan bewijsi de dati a njan en dringi pasa marki (Ps. 104:15). Baka dati a de kanti didon „na see na aleesi-ipi” en a no de teki langa ofoe a de fadon ini wan dipi sribi ondro na stari-hemel. — Ruth 3:1-7.
8. Fa Ruth e doe tapoe na gron pe dem e fon aleesi nanga Boaz, en a habi hoeroedoe prakseri?
8 Ala sani de tiri, te leki wan soema di doengroe lontoe e waka safri safri kon sondro foe wan soema si hem. A de wan oemasoema, di e opo na sribi-krosi na a foetoesee foe na Boaz di e sribi en go didon drape nanga ala hem krosi di a weri. Mindri-neti Boaz e bigin beefi, ai boigi hemsrefi go na fesi en a de toemsi froewondroe foe si na hem foetoesee dati wan oemasoema didon drape! Foedi a no kan si ini na doengroe soema na hem, a de aksi: „Soema na joe?” en ai jere na piki: „Mi na Ruth, joe oemafoetoeboi.” Ma esesi a de taki toe: „En joe moe panja na lanki foe joe krosi tapoe joe oemafoetoeboi, bikasi joe de wan loesoeman” (Lev. 25:25). Aladi di Boaz e froewondroe, tog a no e sjen en ooktoe hem ati no bron. Ooktoe na Moabiet oema no de drape foe hoeroedoe ede. Nanga dem agersi doe disi en nanga hem woortoe a ben doe san Naomi ben taigi hem. Ruth ben tjari kon na a prakseri foe na owroe man foe Juda san hem verplekti de leki loesoeman, wan krosbee famiri foe hem masra Machlon nanga hem papa Elimelech di dede. Naomi ben sabi seker dati na gewaagde sani disi ben sa waka boen, en na jongoe oema ben habi na vertrouw dati Boaz ben sa doe nanga hem tapoe wan krin fasi (Ruth 3:4, 6-9). Ma fa a sa doe?
9. (a) Fa Ruth ben sori hem lobi boen-ati ini na „fosi okasi” nanga na „laatste okasi” di Boaz ben kari? (b) Ruth ben de wan troe troe boen oema foe goedoe, bree moi wiwiri nanga diri krosi ede, efoe foe san dan?
9 Boaz e blesi en prijse na sakafasi nanga loyaal Moabiet oema nanga dem woortoe: „Meki a de so dati Jehovah blesi joe, mi oemapikin. Joe ben sori joe lobi boen-ati ini na laatste okasi moro boen leki ini na fosi okasi, foe no waka baka dem jongoe man, kande pòti ofoe goedoe.” Na a fosi presi Ruth ben sori loyale lobi gi Naomi. Na presi dati na Moabiet oema ben soekoe foe de makandra nanga jongoe man, di de foe trow, a ben de nòw klari foe trow nanga wan moro owroe man foe opo, gi hem dede masra Machlon nanga hem masramama, na owroe weduwe foe Elimelech, wan nem. Ma fa Boaz e prakseri foe dati? Te ai meki hem korostoe, ai taki: „Now dan, mi oemapikin, no frede. Ala san joe taki, mi sa doe gi joe, bikasi ibri soema ini na doro foe mi pipel sabi dati joe de wan troe troe boen oema.” Ruth no ben bari na publiki hem boen fasi, en a no ben de so dati a ben kisi na froewondroe nanga goedoe, bree moi wiwiri nanga diri krosi. Dati dem ben si hem leki wan troe troe boen oema, ben kon moro foeroe foe hem frede gi Jehovah, hem boen wroko, hem tiri, safri geest, hem loyale lobi nanga faja foe wroko. Soortoe oema di e frede Gado ini na tem disi, no ben sa wani habi so wan moi barinem? — Ruth 3:10, 11; Loekoe Spreuken 31:28-31; 1 Timoteus 2:9, 10; 1 Petr. 3:3, 4.
10. Foe sainde Ruth no e tron wantron wantron na wefi foe Boaz?
10 Boaz sa teki wantron wantron Ruth leki oema? Nono, bikasi wan moro krosibee mansoema famiri foe Elimelech nanga Machlon de. „Ma efoe a no habi lostoe foe loesoe joe, dan mi sa loesoe joe troe troe, misrefi”, Boaz e gi na djaranti nanga wan sweri, „so troe Jehovah e libi.” Boaz sa poti prakseri tapoe na afersi na mamantem. — Ruth 3:13.
11. San e meki Boaz gi Ruth siksi marki aleesi?
11 Foedi a lati kaba, Boaz e meki Ruth tan te froekoe mamantem. Ma, no wan hoeroedoe e pasa, en dem e opo tanapoe te a doengroe ete, kande foe no gi okasi foe ala soortoe takitaki di no habi gron moe kon. Bifo na Moabiet oema gwe, Boaz e foeroe hem neki-doekoe nanga siksi marki aleesi, kande foe sori dati leki fa baka siksi wrokodee wan rostoedee e kon, na rostoedee foe na jongoeoema de krosbee foe kon, foedi a sa loekoe dati a kisi wan „rostoepresi”, wan oso nanga wan masra (Ruth 1:9; 3:1). A no de foe taki dati na Boaz di lobi gi soema sani no wani dati Ruth drai go na Naomi nanga leegi anoe.
12. Foe sainde Naomi e aksi: „Soema na joe, mi oemapikin?”
12 Te na Moabiet oema kon na oso, Naomi e bari tranga: „Soema na joe, mi oemapikin?” Kande a no man si ini na doengroe na soema di e kon na inisee, ma na aksi disi kan habi foe doe toe nanga na njoen fasi di Ruth ben kon nanga hem loesoeman. Te Naomi kon sabi san ben pasa esrede neti, dan a habi na vertrouw dati Boaz sa hori hem woortoe en sa doe esesi wan sani. „Tan wakti pi, mi oemapikin, te leki joe kon sabi fa na afersi sa go”, a de taki nanga tranga gi na jongoe oema, aladi ai taki moro fara nanga hem oemasoema koni en inzicht. „Bikasi na man no sa habi rostoe, efoe a no tjari na afersi kon tide na wan kaba.” — Ruth 3:12-18.
13. Fa wi kan njan boen te wi loekoe na bribi foe Naomi nanga Ruth?
13 Te dem toe mofina weduwe e wakti na tem ini dem mofina oso, wi e doe boen foe loekoe na bribi foe dem. Wisrefi habi, leki Naomi, vertrouw ini wi kompe-bribiman, di de getrouw? En wi e libi wisrefi gi Jehovah, soleki Ruth, ini wan tem foe moeilijkheid, ini na seker bribi dati hem fasi foe seti sani de na moro boen wan? (Ps. 37:3-5; 138:8). Prakseri pikinso Ruth. A no sabi na mansoema famiri di habi na fosi reti ini na afersi kwetkweti; a no sabi noti foe hem fasi en tokoe a de klari foe hori na wet foe Jehovah tapoe na swagritrow (Leviraatstrow). A moe de troe troe seker dati Gado sa sorgoe dati ala sani sa waka boen. Wi habi, te wi agersi wisrefi nanga disi, na vertrouw dati Jehovah „de meki ala hem wroko wroko makandra foe na boen foe dem di lobi Gado”? — Rom. 8:28; 1 Petr. 5:6, 7.
BOAZ E TEKI WAN BOSROITI
14, 15. (a) Soema de na loesoeman di de moro krosbee famiri leki Boaz? (b) Kande san Naomi moe doe foe hem poti-fasi ede, en san na moro krosibee famiri ofoe Boaz moe doe datede?
14 Na leti foe wan njoen dee e opo tapoe Bethlehem. Soema e kon tapoe dem strati foe Bethlehem, wenkriman e poti dem sani foe seri, pikin groepoe soema e taki tapoe na opo plen fesi na fotodoro nanga makandra en gronman e libi na foto foe go wroko tapoe dem gron didon lontoe na foto. En dja na a fotodoro Boaz sidon. Hem ai e ondrosoekoe dem fesi foe ala dem soema di e pasa. Wantron wantron a de bari tranga: „Kon na wan see tog, go sidon dja, so-nanga-so” (Ruth 4:1). We, na man disi di hem nem no kari dja moro fara, no de no wan tra soema leki na loesoeman di de moro krosibee famiri na Elimelech leki Boaz. Kande a ben de srefi wan troe troe brada foe Elimelech di dede.
15 Na fotodoro de na presi pe kontrak foe doe zaak e skrifi poti tapoe papira en pe owroeman e taki reti. En foedi Boaz de foe teki na presi foe Naomi nanga Ruth ini na afersi foe na loesoe nanga na swagri-trow, a de tjari kon drape na a doro 10 owroeman foe Bethlehem makandra (Deut. 16:18; 22:15; 25:7, 8). Dan Boaz e taki gi na moro krosbee famiri di de na loesoeman: „Na pisi gron, di de foe wi brada (ofoe famiri) Elimelech, Naomi moe seri”, kande foedi a kon pôti (Ruth 4:3). Efoe wan Israël soema, foedi a kon pôti moe seri na doti di de foe na famiri, na loesoeman habi na reti foe loesoe hem foe pai wan prijs foe dem jari di libi ete te leki na jubeljari kon, pe a famiri-goedoe e go baka na soema di ben habi hem na a bigin (Lev. 25:23-25). Na presi foe proberi foe waka na fesi foe na moro krosbee famiri en bai na doti na kibri fasi, na opregti Boaz e taki krin na publiki fa sani de. Efoe na moro krosbee famiri wani loesoe na pisi doti, prima; noso Boaz sa doe dati.
16, 17. Efoe na famiri di nem no kari dja wani bai na gron foe Naomi, san a moe doe dan toe? Fa ai doe te a jere dati?
16 „Mi sa loesoe hem”, na moro krosbee famiri e taki. Kande a prisiri foe kisi na doti en tapoe so wan fasi meki hem goedoe kon moro bigi. Ma wan onferwakti sani e wakti hem, bikasi Boaz e taki moro fara: „Tapoe na dee dati joe bai na doti poeroe na Naomi anoe, dan joe moe bai hem toe foe Ruth, na Moabiet oema, na oema foe na man di dede (Elimelech manpikin Machlon), foe meki na nem foe na dede man opo kon baka tapoe hem famiri-goedoe” (Ruth 4:4, 5). Efoe na famiri disi wani na gron, dan a de verplekti foe trow nanga Ruth en kisi wan pikin gi hem famiri — wan manpikin di sa kisi na pisi gron dati.
17 Ma disi na wan heri tra afersi. „Ma mi no kan loesoe hem” na krosbee famiri di hem nem no kari dja e taki, bikasi „mi frede dati mi sa ruineer mi eegi famiri-goedoe. Loesoe hem gi joesrefi nanga mi reti foe loesoe hem, bikasi mi no kan loesoe hem” (Ruth 4:6). Fa na famiri disi ben sa „ruineer hem eegi famiri-goedoe” a no e taki. Ma a ben sa gi moni foe na gron en meki na waarde foe hem eegi gron kon moro pikinso. En moro fara, na manpikin foe Ruth ben sa kisi na gron, na presi foe dem manpikin di na krosbee famiri ben habi kaba. Dati ben de wan sani gi na gridi So-nanga-so! Foe datede a de taki: „Bai hem joesrefi, Boaz.”
18, 19. Foe doe soortoe sani na moro krosbee famiri disi de libi hem reti foe loesoe ini na afersi disi, en san Boaz e doe foe datede?
18 Boiti dati na famiri di nem no kari e doe leki fa a gwenti tapoe na tori foe na reti foe loesoe en kenki de. Ai poeroe wan foe hem slipper en ai gi hem na Boaz. Foedi ai doe disi pe kotoigi e si, a de libi na reti foe hem foe loesoe ini na afersi disi. Dati dem no e kari hem nem, kon kande foe hem gridi fasi. Now Boaz kisi na reti foe loesoe. — Ruth 4:7, 8; Deut. 25:7-10.
19 Sondro drai drai Boaz e bai ala sani Naomi san ben de foe Elimelech nanga hem manpikin Chiljon nanga Machlon. Ooktoe a de bai Ruth „leki oema foe meki na nem foe na dede man (Machlon) opo kon tapoe na famiri-goedoe”, foe na nem foe hem „no moe koti poeroe na mindri foe hem brada nanga foe na doro foe hem presi”. Ja, na nem foe Machlon, en foe datede di foe hem papa Elimelech, sa tan libi ini na prakseri foe na pipel nanga dem owroeman di sa konmakandra ini na tem di e kon ini na doro foe Bethlehem. „Oenoe de tide kotoigi”, Boaz e taki. Foe taki dati a de so, na heri pipel nanga ala owroeman en bari: „Kotoigi”. — Ruth 4:9-11.
JEHOVAH E GI RUTH „WAN VOLMAAKTI PAIMAN”
20. San dem kotoigi e winsi dati Jehovah sa doe nanga na oema di kon ini na oso foe Boaz, en na soema dem de gi na grani foe na manpikin di ben sa gebore komoto foe Ruth ini na tem di e kon?
20 Na wan sani di e seki joe ati te joe e jere dem kotoigi e taki moro fara: „Jehovah moe meki na oema di e kon ini joe oso, moe de leki Rachel nanga Lea, di ala toe ben bow na oso foe Israël (bikasi dem bakaten-pikin foe dem ben kon foeroe); en joe bewijsi joe waarde ini Efratha en meki gi joesrefi wan bigi nem ini Bethlehem. En meki joe oso de leki na oso foe Perez (wan oso di ben habi foeroe soema), di Tamar ben meki gi Juda, nanga na famiri di Jehovah sa gi joe foe na jongoe oema disi” (Ruth 4:11, 12). Ja, dem kotoigi dati e gi Jehovah kaba na grani foe na manpikin di o kon foe Ruth, na loyale Moabiet oema.
21, 22. Foe sainde dem buurvrouw e taki: „Wan manpikin gebore gi Naomi”?
21 En na so Boaz e teki Ruth leki oema en a go didon na hem. Jehovah e meki a kisi bere en ai meki wan manpikin. Fa bigi prisiri de! Dem oema foe Bethlehem e taki gi na granmama Naomi di habi bigi prisiri: „Blesi foe Jehovah, di no meki a mankeri joe tide na wan loesoeman; meki a nem foe hem meki bekenti ini Israël. En hem meki joe sili kon boen baka en wan soema di e gi tranga na joe owroe jari, bikasi joe pikinwefi, di lobi joe, di habi moro waarde leki seebi (eegi) pikin, ben meki hem gebore.” Na kolokoe Naomi hori na pikin na hem borsoe en a tron hem kwekimama. — Ruth 4:13-16.
22 „Wan manpikin gebore gi Naomi”, dem buurvrouw e taki. Dem e si na manpikin leki na manpikin foe Elimelech nanga hem weduwe. En foe sainde a no moe de so dan toe? Akroederi nanga na swagri-trow Ruth ben tron na oema foe Boaz foe na boen foe na owroe Naomi. Boaz nanga Ruth ben doe wan boen diniwroko gi Jehovah en a de wan moi sani foe si dati dem oema ini na birti e kari na pikin Obed, san wani taki „foetoeboi” ofoe „wansoema di e dini”. Na jongoe pikin de na wettige erfgenaam foe na oso foe Elimelech ini Juda. — Ruth 4:17.
23. Fa Boaz doe wan sani ini na blessi di a ben winsi gi Ruth?
23 Someni moen pasa sensi Boaz ben taigi Ruth: „Meki Jehovah pai joe fasi foe waka nanga libi, en meki a de so dati joe kisi wan volmaakti paiman” (Ruth 2:12). Foedi a tron na papa now foe Obed, Boaz doe wan sani na a blesi di a ben winsi na a Moabiet oema. Tapoe wan boen dee Obed sa habi wan manpikin nanga na nem Isaï, di de na papa foe David, na di foe toe koonoe foe Israël — (Obed, wan bakatenpikin foe Juda, di komoto foe Perez, Hezron, Ram, Amminadab, Nahesson, Salmon en Boaz). - Ruth 4:18-22.
24. (a) Na soortoe fasi na tiri foe Gado de foe si ini na drama di wi si djonsro? (b) San ben de foe datede na ’volmaakti’ paiman di Jehovah ben gi Ruth?
24 Na drama disi di pasa troe troe de gi wi bewijsi foe na tiri foe Gado ini na piki foe soema foe hori na moro prenspari libisoema famiri-lin na libi, di sa doro na a Messias, Jezus Kristus. Israël oema di ben trow nanga man foe na lo foe Juda, ben habi kande na lostoe foe kan doe wan sani ini na grontapoe famiri-lin foe na Messias (Gen. 49:10). Ma dati wan Moabiet oema ben kisi so wan grani, de tjari kon na krin na gronprakseri, dati „a no de kon foe na wan di e winsi, no foe na wan di e waka tranga, ma foe Gado, di habi sari-ati” (Rom. 9:16). Ruth ben teki Jehovah leki na Gado foe hem en ini hem bigi sari-ati a ben gi hem „wan volmaakti paiman” foe gi na sakafasi oema dati na okasi foe tron wan schakel ini na famiri-lin foe na Messias. — Matt. 1:3-6, 16; Luk. 3:23, 31-33.
25. (. . .)?
25 Na „volmaakti paiman” di Gado ben gi na a loyale Ruth, moe tjari soema di e gebroiki dem verstan so fara foe go na hem ini bribi sondro foe hori wan sani na baka, ini na vertrouw dati Jehovah de en dati „a de na soema di e pai dem soema di e soekoe hem ernstig” (Hebr. 11:6). Ja, na boekoe Ruth e sori Jehovah leki wan Gado foe lobi, di e opo doe sani foe na boen foe dem soema di e dini hem wawan. Boiti dati, disi e sori dati na prakseri foe Jehovah nooiti kan fadon. Wi moe habi na srefi geest leki di David ben sori di a ben taki: „Wi wani opo wi sten foe wan prisiri-babari foe wi jepi ede, en ini na nem foe wi Gado wi sa opo wi fraga. Meki a de so dati Jehovah meki ala joe begi kon troe. Now mi sabi troe troe dati Jehovah e jepi troe troe hem salfoewan. A de piki hem komoto foe hem santa hemel nanga dem makti jepi wroko foe hem reti-anoe.” — Ps. 20:5, 6.