’Waka tapoe wan fasi di fiti Jehovah’
„Wi no tapoe foe begi gi oenoe en foe aksi, dati oenoe kon foeroe nanga joisti sabi foe hem wani ini ala koni nanga jeje makti foe si sani, foe joe kan waka tapoe wan fasi di fiti Jehovah.” — Kol. 1:9, 10.
1. (a) Ini soortoe moi matifasi nanga Jehovah wi kan prisiri wisrefi? (b) Fa na fasi foe wi de nanga dem komando foe hem foe datede? (Ps. 119:47, 48).
JEHOVAH de na moro boen mati di wan soema ben kan habi. Na famiri-edeman Abraham „ben poti bribi ini Jehovah en (disi) a ben kisi leki retidoe”, en dem ben kari hem „Jehovah mati” (Jak. 2:23). Fa disi ben de wan moi matifasi! Ma a de na wani foe Jehovah, dati ala libisoema di habi so wan bribi, moe waka leki hem mati ini hem nem. A no de foe taki, ibri soema di wani prisiri Gado en di wani tanapoe ini wan matifasi nanga hem, moe poti prakseri tapoe dem woortoe di na Bijeenbrenger ben verklari hondro hondro jari pasa kaba: „Frede na troe Gado en hori hem komando. Bikasi disi de na heri verplekti foe na libisoema.” — Pred. 12:13.
2. San de fanowdoe foe „waka tapoe wan fasi di fiti Jehovah”?
2 Efoe wan soema wani de na mati foe Gado, hori hem komando, en waka ini hem nem, dan joisti sabi de fanowdoe. Nanga reti na kristen apostel Paulus ben taki gi dem kompe-bribiman ini Kolosse: „Wi . . . no ben tapoe foe begi gi joe en foe aksi dati oenoe kon foeroe nanga joisti sabi foe hem wani ini ala koni nanga jeje makti foe si sani, foe oenoe kan waka tapoe wan fasi di fiti Jehovah, foe prisiri hem dorodoro, aladi oenoe e tan tjari froktoe ini ibri boen wroko en oenoe e tan gro ini na joisti sabi foe Gado.” — Kol. 1:9, 10.
VERSTAN A FRANTWOORTOE FOE WI
3. Fa wi moe libi efoe wi wani foe waka tapoe wan fasi di fiti Jehovah nem?
3 Wi no kan habi matifasi nanga wan tra soema efoe wi e meki dem verstan hem tapoe wan ofoe tra fasi tapoe wan verkeerti fasi. Efoe wi wani Jehovah de wi mati, dan wi moe verstan foe datede, dati waka tapoe wan fasi di fiti hem nem, habi na ini hem dati wi moe libi akroederi ala sani di na nem wani taki. Disi wani taki dati wi studeri na Bijbel ernstig en alatem. Moro ete, wi moe poti ini wi libi ala sani di tanapoe na ini. Te soema e si wi, dan dem e si wi makandra nanga wi Gado; en leki Kotoigi foe Jehovah a de prenspari dati wi teki presi foe Gado tapoe wan fasi di fiti, foedi wi o libi akroederi hem Woortoe.
4. Soortoe frantwoortoe Jehovah Kotoigi habi ini na teki presi foe na nem foe Gado?
4 Kotoigi foe Jehovah e verstan ooktoe, dati waka tapoe wan fasi di fiti hem nem, wani taki ibri pisi foe dem libi. Dem habi wan frantwoortoe foe teki presi foe Gado nem na fesi foe libisoema tapoe wan fasi di fiti. Seker dem no de leki dem memre foe na kristenheid foe disi tem, di e weegri foe gebroiki na nem foe Jehovah foedi dem e frede dati wan soema sa naki foetoe na dati. Jehovah wani dati hem nem moe meki bekenti na a heri grontapoe (Ex. 9:16). En a de troe troe wan grani foe verteri dem soema dati Jehovah de na Moro Heewan.
5. Soortoe fasi wan kristen e sori gi politiek afersi en foe sainde?
5 Ma na verplekti foe wan kristen wani taki moro leki soso foe taki foe na nem. Jehovah, wi moro diri Mati, de na bigi Koonoe foe na heri universum. Hem nem habi foe doe nanga hem koonoekondre en Jezus Kristus habi leki Messias Rigeriman wan prati na a rigeri dati foe Gado. Foe datede, meki dem soema di e waka tapoe wan fasi di fiti Jehovah nem, moe jepi seker na koonoekondre dati. Dem no habi kwet-kweti prati ini dem politiek afersi foe na grontapoe disi. Na a tra see, dem de ini na srefi positsi leki Jezus Kristus, di ben taki: „Mi koonoekondre no de foe disi grontapoe.” — Joh. 11:36.
6. Fa dem soema di e waka tapoe wan waarti fasi ini na nem foe Jehovah e prakseri foe sondoe?
6 Na grontapoe srefi foeroe nanga onregvaardiki fasi. Foe datede meki dem soema, di leki Gado mati wani waka ini Jehovah nem tapoe wan fasi di fiti, moe lon komoto foe na grontapoe disi nanga ala na ogri na ini hem. Dem e prakseri na a srefi fasi foe sondoe leki Jehovah, di „de reti ini ala hem pasi en loyaal ini ala hem wroko” (Ps. 145:17). Kristen soema sabi dati dem ben sa tjari sjen kon tapoe na nem foe Jehovah efoe dem ben sa foefoeroe, doe soetadoe ofoe pasa Gado wet tapoe wan tra fasi. Dati seker wi no wani! Wi wani moro foeroe dati wi fasi foe libi en waka moe de wan grani gi Gado, soleki na apostel Petrus ben skrifi: „Tan hori wan boen fasi foe libi en waka na mindri dem naatsi, foe dem kan gi Gado glori tapoe hem dee te a de kon loekoe sani, ini dem sani di dem e taki ogri foe joe leki ogrisoema, nanga dem boen wroko, di dem de ai-kotoigi.” — 1 Petr. 2:12; Rom. 2:21-24.
„SOEMA DI E WAKA BAKA GADO”
7. Fa a kan foe waka baka Gado?
7 Na mati foe wan soema kan habi wan ogri ofoe boen krakti tapoe hem, foedi wan soema e wani waka dem pasi foe hem mati. We, dem soema di leki Gado mati e waka tapoe wan fasi di fiti ini Jehovah nem, kan de seker dati na matifasi nanga Gado alatem sa habi wan boen krakti tapoe dem. Foe proberi foe waka baka Jehovah, de toemsi boen. Na apostel Paulus ben gi na tranga: „Waka baka Gado leki lobi pikin” (Ef. 5:1). Wan soema, aladi a de onvolmaakti, kan waka baka Gado te a teki na tiri di komoto foe Jehovah Woortoe, en te a saka hemsrefi ondro na krakti foe Gado santa jeje ofoe wroko-krakti.
8. San kristen soema moe kweki? En fa?
8 Kristen kotoigi foe Jehovah wani kweki en sori seker dem froktoe foe Gado santa jeje — lobi, prisiri, vreede, pasensi, switifasi, boenfasi, bribi, safrifasi nanga dwengi hemsrefi (Gal. 5:22, 23). Te dem dienstknegti foe Gado e sori dem froktoe disi, dan tra soema sa kisi tranga foe prakseri dem fasi disi te dem kisi foe jere foe Jehovah Gado. Disi wani taki, dati troe kristen soema moe sori dem froktoe foe Gado alape en pe tra soema de. Soboen a de boen te wan dienstknegti foe Gado e aksi hemsrefi: mi e doe disi na oso, na wroko, na skoro, te mi e rij oto, en habi prisiritem, nanga so moro fara? Disi de fanowdoe te wi wani waka tapoe wan waarti fasi ini Jehovah nem. En wi moe sori dem froktoe foe na jeje seker ooktoe gi wi brada nanga sisa ini na bribi. Dan wi kan prisiri wisrefi dati wi de wan pisi foe Jehovah pipel. — Ps. 144:15.
9. Soortoe rol begi e pree ini disi?
9 Efoe wi aksi Jehovah tranga foe hem santa jeje en begi hem foe jepi wi ini na kweki en sori foe dem froktoe foe hem ini wi libi, dan a sa kon troe (Luk. 11:13; Rom. 5:5). Meki wi loekoe sjatoe bepaalde winimarki foe dem froktoe disi foe na jeje. A de krin dati no wawan dem habi wan boen krakti tapoe dem soema di e sori dem fasi disi, ma dem habi krakti toe tapoe kompe-aanbegiman foe Jehovah nanga tra soema.
10. (a) O prenspari lobi de na mindri kristen soema? Verklari disi. (b) San de dem fasi foe lobi soleki 1 Korinte 13:4-8 e sori?
10 Lobi de na fosi wan foe dem froktoe disi di Paulus e kari. „Gado na lobi” na apostel Johannes ben skrifi (1 Joh. 4:8). Wan soema di frede Gado en di e sori lobi, e waka ini disi baka Jehovah. Boiti dati Jezus Kristus ben taki: „Nanga disi ala soema sa sabi dati oenoe de mi discipel, efoe oenoe habi lobi gi makandra” (Joh. 13:35). Na lobi mindri kristen soema e hari leki fositem na prakseri foe libisoema. Te Tertullianus e skrifi san grontapoe soema e taki foe fositem kristen soema a ben taki: „’Loekoe’ dem e taki ’fa dem lobi makandra . . . en fa dem de klari foe dede gi makandra’” (Kol. 3:14). En dati a no wan froewondroe sani! Lobi habi pasensi en switfasi. A no de meki bigi, a no de kisi heememre, a no de tjari hemsrefi tapoe wan fasi di no fiti, a no de soekoe hem eegi afersi, a no de kisi atibron, a no de memre ogri foe trawan, a no de prisiri nanga kroektoedoe. A de prisiri moro nanga na waarheid en a de verdrage, bribi, hoopoe en hori pasensi nanga ala sani. Troe troe „na lobi no sa fadon nooiti”. — 1 Kor. 13:4-8.
11. San na prisiri en foe sainde wi moe de nanga prisiri?
11 Prisiri, ete wan froktoe foe Gado jeje, de leki fa dem e taki „habi wan moro dipi roetoe leki breeti en en a de skijn moro go na dorosee leki blijtifasi”. Na switi, prisiri fesi foe wan Koonoekondre-preekiman ben meki na fesi foe foeroe arkiman kon loekoe moro boen. En wan boen reden no de, foe de nanga prisiri te wi de waka tapoe wan fasi di fiti na nem foe Jehovah? Ja, seker, bikasi wi e verteri na „glori boen njoensoe foe na kolokoe Gado” (1 Tim. 1:11). Boiti dati, wi habi prisiri sani na wi fesi, wi habi wan boen hoopoe tapoe blesi di e kon te wi tan waka tapoe wan waarti fasi ini na nem foe Jehovah. Prakseri na dem sani disi te joe tanapoe fesi problema foe na libi. Proberi foe sori prisiri na mindri foe joe kompe-kristen, bikasi Gado e verwakti foe soema di gi demsrefi na hem, dati dem „dini Jehovah nanga prisiri-babari en nanga prisiri na ati”. — Deut. 28:46, 47.
12. Soortoe winimarki vreede e tjari kon gi kristen soema?
12 Vreede, ete wan foe dem froktoe foe na jeje, de wan foe dem fasi foe Jehovah di e kon krin na fesi. Hem de „na Gado foe vreede” (Hebr. 13:20). Troe kristen soema „e wroko foe habi vreede nanga ala soema” (Hebr. 12:14). Disi foe eksempel ben kon na krin ini na resolutie di Jehovah Kotoigi ben teki ini 1958 tapoe dem internationale „Gado wani” congres. Drape ben tanapoe disi: „DAT wi, foe taki na agersi fasi, ben broko wi feti-owroe meki ploegoe en wi lansri kon tron grasinefi, en dati, ala di wi komoto foe foeroe naatsi, no sa opo feti-owroe tapoe makandra, foe di wi de kristen brada nanga memre foe na wan enkri famiri foe Gado; ooktoe wi no sa leri moro foe feti nanga makandra, ma wi sa waka ini brada lobi, ini vreede nanga wanfasi ini Gado pasi.” Jehovah pipel ben libi akroederi na resolutie disi en nanga na vreede di de na dem mindri, e hari soema di lobi vreede kon na a troe kristendom (Jak. 2:2-4). Boiti dati, „Jehovah e blesi hem pipel nanga vreede” (Ps. 29:11). Dem no e broko ede foe noti, ma nanga begi dem e aksi nanga sakafasi sani. Na bakapisi de dati „na vreede foe Gado, di pasa ala soema prakseri, e kibri dem ati nanga jeje koni nanga jepi foe Kristus Jezus” — Fil. 4:6, 7.
13. San pasensi wani taki en na soortoe fasi a de tjari boen kon?
13 Pasensi, ete wan froktoe foe na jeje, no wani taki soso foe „verdrage sani langa”. Pasensi wani taki toe dati wan soema no e kisi ati-bron esesi en nanga pasensi e verdrage tergi nanga kroektoedoe, aladi wan soema e weegri foe no hoopoe dati kenki sa kon ini wan broeja mati-fasi. Jehovah „no e kisi atibron esesi” ofoe joe kan taki hem tra fasi dati a habi pasensi (Exodus 34:6). Na pasensi foe Gado e gi soema na okasi foe hebi berouw en foe lon komoto foe na pori (2 Petr. 3:8-18). Aladi Gado e sori pasensi, a de tjari „wan pipel foe hem nem” kon makandra en nanga jepi foe dem a de gi hemsrefi glori tapoe na heri grontapoe (Tori foe dem Apostel 15:14; Rom. 9:22-24). Jehovah nem-pipel e proberi foe „sori pasensi gi ala soema” (1 Thess. 5:14). Disi no de jepi dem wawan foe meki boen matifasi de mindri kompe-bribiman, ma a de jepi kristen soema ooktoe foe jepi tra soema nanga pasensi foe leri sabi Jehovah, foe dem toe sa doe hem wani en kisi teego libi (1 Tim. 4:16; Hebr. 6:11-15). Foe waka tapoe so wan fasi di de waarti gi Jehovah, Gado pipel boiti dati habi na satisfaksi, dati dem e prisiri hem now, nanga teego blesi na dem fesi.
14. San na switifasi en soortoe krakti a habi?
14 Switifasi de ooktoe wan foe dem froktoe foe na jeje. Switifasi wani taki, dati wan soema habi foeroe belangstelling foe na tan-boen foe trawan. Jehovah srefi de nanga switifasi gi dem wan di no e sori tangi en dem ogriwan, foedi a de gi dem tranga foe habi berouw (Luk. 6:35, Luther; Rom. 2:4, Willibrordvertaling). Kristen soema leki „soema di e waka baka Gado” moe weri switifasi leki wan krosi (Ef. 5:1; Kol. 3:12, Luther). Dem e teki na rai foe na bijbel di taki: „Sori switifasi gi makandra, nanga safoe sari-ati, gi makandra pardon, soleki Gado e gi oenoe fri pardon nanga jepi foe Kristus” (Ef. 4:32). Switifasi e meki switifasi kon, en a habi wan krakti foe hari sani kon. A de tjari soboen winimarki kon gi na soema di e sori switifasi, na soema di e kisi switifasi nanga na soema di e firi gi na pipel foe Gado, foedi a de si, dati switifasi de na mindri dem.
15. Tapoe soortoe sani boenfasi e sori en fa joe kan meki a gro?
15 Boenfasi, ete wan froktoe foe na jeje, e sori tapoe toemsi boen moreel fasi ofoe deugd. „Boen nanga opregti Jehovah de” (Ps. 25:8). Leki wan jepi foe meki boenfasi gro, kristen soema e doe boen foe aksi Gado ini begi: „Leri mi na boenfasi, na verstanfasi nanga na sabi srefi, bikasi ini joe komando mi ben poti bribi” (Ps. 119:66). Wi de meki boenfasi gro ooktoe te wi jere dem komando foe Gado. A de gi satisfaksi foe sabi, dati wan soema e waka baka Jehovah te ai sori boenfasi gi kompe-bribiman nanga ala tra soema. So wan boenfasi kande kan hari wan soema kon na a kristendom. — Gal. 6:10.
16. (a) San na bribi? (b) Soortoe krakti a kan habi tapoe trawan te wi sori na froktoe disi foe na jeje?
16 Bribi, na di foe seebi froktoe foe na jeje di kari dja, de toemsi prenspari gi dem soema di wani „waka tapoe wan fasi di fiti Jehovah”. Sondro na fasi disi a no kan foe de ini wan matifasi nanga Jehovah en foe prisiri Gado (Hebr. 11:6). „Bribi de na seker verwakti foe sani di wan soema e hoopoe, na krin sori foe troe sani di no de foe si” (Hebr. 11:1). A no de wan hoopoe di no habi gron, ma wan verwakti di habi wan boen fundamenti. So a de gi sma di e gebroiki dem verstan, dati dem mekisani, soleki son, moenkenki nanga dem stari, foe eksempel de na bewijsi dati Gado, na Mekiman, de (Rom. 1:20-23; Hebr. 11:3). Te wan soema e sori bribi ini Jehovah, a de gi wan toemsi moi eksempel na kompe-bribiman. Na bribi foe dem kan kon moro tranga te dem si hem bribi ini Jehovah sondro foe hori wan sani na baka. En nanga so wan tranga bribi, ooktoe soema di no e bribi ben kan kon so fara foe poti vertrouw ini Jehovah Gado.
17. San na safrifasi, en san de na bakapisi te soema di e waka baka Jehovah e sori na fasi disi?
17 Safrifasi, ete wan tra froktoe foe na jeje, wi ben kan taki a de safoefasi, boen-ati-fasi, stoeroe tapoe krakti. Jezus Kristus ben taki: „Mi de safri en sakafasi ini ati” (Matt. 11:29). Jehovah, di ben seti sani dati wi kan kon na hem nanga jepi foe Kristus, de safri foe ati, no sondro sari-ati en no nanga ogri-ati. Dem soema di foe datede e proberi foe waka ini Gado nem tapoe wan waarti fasi, no habi foe frede foe go na hem ini begi (Hebr. 4:16; 1 Joh. 4:17, 18). Leki soema di e waka baka Jehovah nanga hem Manpikin, kristen soema e handri nanga ala soema nanga safrifasi en disi de troe troe boen. Na so na „tiri nanga safri geest” foe wan kristen oema kan meki dati dem wini hem trow-patna di no e bribi gi na troe bribi (1 Petr. 3:1-4). Moro fara, safri-fasi ooktoe e meki wan switi matifasi kon mindri soema, srefi te moeilijkheid kon, bikasi „wan safri piki e drai atibron gwe”. — Spr. 15:1.
18. San na dwengi joesrefi, en soortoe krakti a kan habi?
18 Dwengi joesrefi, na laatste froktoe foe na geest, wani taki toe dati wan soema hori ondro hem makti hemsrefi, hem woortoe nanga hem doe. „Jehovah ben tan dwengi hemsrefi” te leki na joisti momenti ben kon gi hem foe ben strafoe dem Babylon soema di ben pori Jeruzalem (Jes. 42:14, 15). Leki „soema di e waka baka Gado” kristen soema e proberi foe dwengi demsrefi ini ala sani en dem begi Jehovah nanga ala vertrouw foe jepi dem ini na kweki foe na fasi disi (1 Kor. 9:25). Dwengi hemsrefi de wan blesi gi na soema di e sori na fasi disi en ooktoe gi dem soema di e hori matifasi nanga hem. Net so leki dem tra froktoe foe na jeje, na so na fasi disi kan hari soema kon na a kristendom.
SAN GADO E AKSI
19. Omeni Jehovah e aksi foe wi?
19 Dem soema di nem e rostoe tapoe dem, kan prisiri Gado te dem e soekoe hem jepi ini na kweki foe dem froktoe foe na jeje. Te wi soekoe troe troe na tiri foe Jehovah en wi verstan boen na frantwoortoe foe wi na hem, dan a sa tranga wi troe troe foe waka hem pasi. Paulus ben taki: „Gi ala sani mi habi na tranga foe hem di e gi mi krakti” (Fil. 4:13). Ini hem lobi boen-ati-fasi Jehovah e jepi wi foeroe en a de aksi pikinso foe wi. „A ben verteri wi, o, grontapoe libisoema, san boen”, Micha ben skrifi. „San Jehovah e aksi baka foe joe, dan foe doe retidoe, en foe lobi boenfasi en foe waka safri nanga joe Gado?” — Micha 6:8.
20. Foe sainde wi kan de seker foe na jepi nanga kibri foe Jehovah?
20 Te wi doe retidoe, lobi boenfasi en waka safri nanga Jehovah, dan hem no sa libi wi sondro foe kibri wi ini na feejanti grontapoe disi. Nono, bikasi wi kan de seker, dati efoe wi tan waka tapoe wan fasi di fiti Jehovah Gado, a sa kibri wi leki hem pipel en tjari wi go boen ini hem pramisi njoen seti. Na profeeti Samuel ben verklari ini na pisi tori disi: „Jehovah no sa libi hem pipel foe hem bigi nem ede, bikasi Jehovah ben teki hem tapoe hem foe meki oenoe de hem pipel.” — 1 Sam. 12:22.
21. Soortoe okasi na dem fesi dem soema habi di e waka now tapoe wan fasi di fiti Jehovah nem?
21 Te wi e teki wi frantwoortoe na fesi foe Gado ernstig en troe troe e waka tapoe wan waarti fasi ini Jehovah nem, dan a sa de nanga wi leki wi mati. Ja, efoe wi e go doro foe kisi sabi foe hem Woortoe di santa jeje ben skrifi en poti na sabi dati ini wi libi, dan Jehovah no sa libi wi. Leki hem Kotoigi wi ben verklari dati wi sa „waka ini na nem foe Jehovah, wi Gado” (Micha 4:5). Meki wi libi akroederi na bosroiti dati. Te wi doe dati, wi sa habi na moi okasi na wi fesi foe waka foe teego tapoe wan fasi di fiti Jehovah.