Sori dati joe de getrouw
„San . . . dem e aksi foe wan tiriman, de, dati dem feni ibriwan getrouw.” — 1 Kor. 4:2
1. Foe sainde den foetoeboi foe Gado moe doe foeroe moeiti foe jepi tra soema?
ALA soema di e dini Jehovah Gado leki loyale foetoeboi foe Jezus Kristus, habi wan diri goedoe (Loekoe 2 Korinte 4:1-7). Dem habi wan toemsi prenspari sabi, di kan tjari libi gi dem soema di e go libi akroederi nanga dati (Joh. 17:3). A no de foe taki, dati dem moe doe foeroe moeiti foe jepi tra soema ini jeje fasi. Ooktoe den moe de klari foe jepi dem soema di de mofina nanga sani foe skin. Na gi foe sani foe na skin e go makandra nanga na gi foe sani na jeje fasi. Disi doe kon foedi njanjan, krosi nanga oso de fanowdoe foe kan libi, en sondro libi wan soema no kan prijse Jehovah Gado. — Ps. 30:9; 88:10-12.
2. Foe doe san, Jezus discipel moe de klari, te wi loekoe na vermane ini Lukas 12:33, 34?
2 Jezus Kristus ben gi hem discipel na dekati: „Seri ala sani di joe habi en gi presenti foe sari-ati. Meki gi joesrefi monisaka di no e broko, wan goedoe ini hemel di no e kaba, pe foefoeroeman no kan kon en pe woron no kan pori dem. Bikasi pe joe goedoe, na drape joe ati sa de toe” (Luk. 12:33, 34). Soboen, foe na see foe dem, dem ben moe de klari foe gebroiki dem tem nanga goedoe foe a boen foe trawan. A de krin, dati Jezus no ben wani taki, dati hem discipel ben moe kon póti foe vertrouw baka dati tapoe na lobi-ati foe trawan. Dem discipel disi ben moe de wel klari foe poti dem goedoe na wan see foe jepi soema di ben de ini troe troe skin en jeje nowtoe.
3, 4. (a) Sortoe vermane Timoteus ben moe gi na kristen soema di ben goedoe? (b) Sortoe fasi dem no ben moe teki te dem ben arki na vermane disi?
3 Na geest foe na rai foe Jezus e kon boen na fesi nanga san na apostel Paulus ben komanderi Timoteus foe taigi goedoe kristen soema. Wi e leesi: „Verteri dem di goedoe ini na seti foe sani disi, foe no habi bigi-memre en no poti dem hoopoe tapoe onseker goedoe, ma tapoe Gado, di e gi wi ala sani foeroe foe wi njan boen foe dem; foe doe boen, de goedoe ini toemsi boen wroko, lobi foe prati en gi sani, en poti gi demsrefi ini na tem di e kon wan toemsi moi fundamenti leki wan goedoe, foe dem graboe steefi na troe troe libi” (1 Tim. 6:17-19). San na vermane disi wani taki?
4 Kristen soema di ben goedoe, no ben moe si dem srefi moro hee leki tra soema foe dem goedoe foe dem ede. Ooktoe dem no ben moe poti dem vertrouw ini goedoe. Foedi soema kan foefoeroe goedoe, ofoe dem goedoe kan lasi ofoe pori, dem de wan boen swaki fundamenti pe wan soema ben sa moe poti hem hoopoe. Efoe wi ben moe libi sondro dem boen-ati seti, di Hem ben poti na grontapoe foe hori na libi, dan no wan soema no ben sa kan hori hemsrefi na libi (Tori foe dem Apostel 14:16, 17; 17:25). Fa a ben sa de wan law sani te wi ben sa poti na Mekiman na wan see en bow wi libi lontoe grontapoe sani!
5. Fa wi moe gebroiki dem sani di wi habi en foe sainde? (Luk. 16:1-18).
5 Foedi Jehovah de na Mekiman, dan a de na Eeginari foe ala sani. A de foe datede joisti nomo, dati wi aanbegi hem en gebroiki ala dem sani di wi habi tapoe wan fasi di e prisiri hem (Ps. 95:3-6). Disi wani taki dati wi moe gebroiki dem sani disi ini jeje en skin fasi foe jepi trawan. Kristen soema di ben habi goedoe ben kisi na tranga foe meki dem toemsi boen wroko foe dem de net so foeroe leki dem goedoe en na so fasi dem e bow wan bericht. Te dem ben gebroiki dem sani di dem ben habi foe lekti na nowtoe foe trawan, dem ben sa poti goedoe ini hemel. Te joe loekoe hem boen, dan a de so, dati ala kristen soema di e gi hemsrefi ini na dini foe Gado, te dem de tan jepi na jeje en skin fasi dem mofina-wan, dem e poti goedoe ini hemel, di sa tjari bigi winst gi dem ini na fasi foe boen paiman foe Jehovah Gado.
6. Foe sainde wi moe loekoe boen, dati wi no meki no wan sani poeroe wi foe poti goedoe ini hemel?
6 Tra fasi leki fa a de nanga grontapoe goedoe, di soema kan foefoeroe, ofoe krosi di woron kan njan pori, wi kan taki dati wan bericht foe toemsi boen wroko na Gado no kan pori. Foe datede, solanga wi e libi, wi moe doe troe troe moeiti foe sorgoe, dati grontapoe goedoe, aladee sorgoe ofoe prisiri, no e tapoe wi foe bow wan toemsi moi bericht na Jehovah Gado. Spesroetoe te wi loekoe na onseker libitem foe wi, dan a de tranga fanowdoe, dati wi no meki sani poeroe wi foe na moro prenspari marki — foe tan foetoeboi foe Jehovah Gado di a de feni boen en loyaal discipel foe na Meester Jezus Kristus. Fa a ben sa de wan sari sani, efoe wan soema dede onverwakti, sondro foe a ben meki boen gebroiki foe dem okasi foe hem foe poti goedoe ini hemel!
7. San kan jepi wi foe poti wi prakseri tapoe na kibri foe goedoe ini hemel?
7 A de foe datede toemsi prenspari dati wi poti wi ati tapoe na meki kon moro foeroe foe dem goedoe foe wi ini hemel. Disi sa jepi wi foe eksempel foe teki tem foe go prakseri nanga waarderi foe dem sani di Jehovah Gado nanga Jezus Kristus ben doe foe na boen foe wi. Wi habi foe taki Jehovah Gado tangi foe noti moro leki wi libi (Openb. 4:11). Wans a de so, dati someni foe na libisoema-famiri no de sori tangi, ete na Moro Heewan e gi pasi dati ala soema njan boen foe hem boen-ati seti foe hori na libi (Matt. 5:45). Ja, leki wan sori foe hem lobi di pasa ala sani, Jehovah Gado no ben kibri hem moro lobi manpikin, Jezus Kristus foe no dede wan sjen dede na wan postoe. Disi ben meki a de mogelijk foe kon fri foe sondoe nanga dede foe te foe kaba tron foe teego Gado volmaakti pikin (Rom. 5:8; 8:32). En Jezus Kristus ben sori hem bigi lobi foe gi nanga hem fri wani hem libi foe na boen foe wi (1 Joh. 2:2). Na lobi di ben sori gi wi, no moe troesoe wi foe gebroiki ibri okasi foe sori dati wi de tangi en jepi tra soema na jeje en skin fasi?
GEBROIKI NA TEM BOEN
8. San ben kan sori, dati wan soema e gebroiki toemsi foeroe tem ini na feti baka prisiri?
8 Na lobi di wi habi gi Jehovah en Jezus Kristus moe troesoe wi troe troe foe meki wan boen gebroiki foe na tem foe wi. Wi e gebroiki na tem foe wi boen efoe prisiri e kon so prenspari, dati nanga disi na prakseri e kon leki wi no kan tan sondro dem prisiri disi? Kwet-kweti! Wi no moe lasi na prakseri dati foeroe miljoen soema hondro hondro jari ben libi sondro radio, televisie, kino, oto, sport-wega, bigi prisiri-waka nanga so moro fara. A no de foe datede wan redelijk en verstan sani foe meki dem sortoe sani disi kon tapoe na tweede presi ini wi libi? Efoe wan soema foe datede e si, dati a de gi moro tem na a feti baka prisiri, dan foe feti baka afersi di habi foe doe wantron wantron nanga na troe aanbegi, a no ben kan de so dan, dati a ben kisi „lobi foe prisiri”? (2 Tim. 3:4). En a no de ini gevaar, dati a no sa meki froktoe kwet-kweti ini na prijse foe na nem foe Gado? — Luk. 8:14.
9, 10. (a) Te wi loekoe na eksempel foe Jezus Kristus, san de dan wan balans loekoe tapoe gosontoe ontspanning? (b) San Jezus ben wani taki, di a ben taki: „Mi njanjan de, dati mi doe na wani foe hem di ben seni mi kon en dati mi tjari hem wroko na wan kaba”?
9 A no de foe taki, dati nanga reti, foetoeboi foe Jehovah di e dini hem faja faja kan prisiri demsrefi ini difrenti sortoe foe gosontoe ontspanning ofoe prisiri-tem. Srefi Jezus Kristus ben teki dem kari foe go njan na soema oso en na fesa en hemsrefi ben doe wan sani gi na prisiri foe wan trow-oso, di a ben meki tapoe wan wondroe fasi watra ben tron toemsi boen wien (Luk. 5:29; 7:36; 14:1; 19:5, 6; Joh. 2:1-11). Ma Jezus no ben meki prisiri, pe joe kan kari toe njanjan en dringi, de na moro prenspari sani ini hem libi. A ben taki wan tron gi hem discipel: „Mi njanjan de, dati mi doe na wani foe hem di ben seni mi kon en dati mi tjari hem wroko kon na wan kaba” (Joh. 4:34). Wi toe e feni wi moro bigi prisiri ini na doe foe na wani foe Gado?
10 Di Jezus ben taki dem wortoe disi di de dja na tapoesee, a ben weri en a ben habi angri. Ma foedi wan okasi ben kon foe gi kotoigi, a ben gi hemsrefi abra ini disi so foeroe, dati hem eegi foeka ben kon tapoe na tweede presi. Na prisiri nanga na satis-faksi di a ben kisi foedi a ben doe Gado wani, ben de leki njanjan gi hem. Wi ben sa wani sref-srefi, dati disi ben kan de so ooktoe nanga wi. Foe datede meki wi moe hori prisiri na a presi pe dem moe de, sodati dem no sa tapoe wi foe kisi na moro bigi kolokoe, di sa kon gi wi, te wi e jepi tra soema na jeje en skin fasi.
11. Kristen soema habi na reti foe gebroiki tem soso foe dem eegi prisiri, en sortoe gronprakseri wi kan feni ini Jesaja 58:13, 14?
11 Foe no meki dati wi gebroiki wi tem tapoe wan gridifasi, wi moe hori na prakseri, dati tem srefi, de wan presenti foe Jehovah, di wi moe gebroiki leki fa hem wani. Wi no habi na reti foe gebroiki tem soso gi wi eegi prisiri. Disi wi de si boen nanga na sani di Jehovah Gado ben verwakti foe dem Israël soema na a saba-dee. A ben taki nanga mofo foe hem profeeti Jesaja: „Efoe, foe poti prakseri tapoe na sabbat, joe hori joe foetoe foe doe san joe habi prisiri na ini tapoe mi santa dee, en joe kari troe troe na sabbat wan switi prisiri, wan santa dee foe Jehovah, wan dee di moe kisi grani, en joe sa gi hem grani na presi foe joe waka baka joe eegi pasi, na presi foe feni na sani di joe habi prisiri na ini, en foe taki wan wortoe — dan te dati de so, joe sa feni joe switi prisiri ini Jehovah” (Jes. 58:13, 14). Boiti dati dem Israël soema tapoe na dee dati no ben doe wroko, soboen dem ben moe si na sabbat leki wan dee, di ben de spesroetoe gi Jehovah. A no ben de wan dee, pe dem ben kan feti soso baka dem eegi prisiri, ma a ben de wan tem foe habi troe troe prisiri ini na doe foe Gado wani en foe poti jeje sani tapoe na fosi presi. Akroederi nanga na geest foe na sabbatwet, troe kristen soema moe broko dem ede foe gebroiki ibri dee tapoe so wan fasi, dati Jehovah Gado kisi grani nanga dati.
DE KLARI GI NA KON-BAKA FOE NA MEESTER
12. (a) Sortoe tra reden wi habi, soleki Lukas 12:35-40 e sori foe de faja faja ini Jehovah wroko? (b) Ini sortoe fasi wi moe proberi foe de ibri dee en foe sainde?
12 Ete wan reden de foe sainde foetoeboi foe na Meester Jezus Kristus no moe doe Jehovah wroko safri safri. Krakti e poti tapoe disi ini na agersitori, di na Manpikin foe Gado ben taki: „Hori oen bere taitai en oen lampoe nanga faja, en oen de leki soema di e wakti tapoe dem meester, te a drai komoto foe wan trow-oso, foe kan opo doro wanwantron gi hem, efoe a kon en naki doro. Kolokoe dem srafoe de, di dem meester e feni dem na ai te a kon! Foe troe, mi taki gi oen: Hem sa tai hem mindri en meki dem didon na tafra en hem sa waka pasa en dini dem. En te a kon ini na di foe toe ofoe srefi ini na di foe dri pisi tem foe neti en a feni dem na so wan fasi, kolokoe dem de! Ma sabi disi, dati efoe na masra foe na oso ben sabi tapoe sortoe joeroe na foefoeroeman ben sa kon, a ben sa tan alatem na ai en a no ben sa meki dem broko hem oso. Oen hori oensrefi klari toe, bikasi Soemapikin de kon tapoe wan joeroe, di kande oen no ben denki” (Luk. 12:35-40). Soleki wi no sabi otem libi ben sa kan kon na wan kaba, na so wi no sabi precies otem Jezus Kristus sa kon foe tjari na strafoe kon, aladi wi sabi wel dati na sani disi e kon krosibee. Disi wani taki, dati wi moe de klari, leki soema di e wakti tapoe na kon-baka foe na Meester foe wi.
13. (a) San den srafoe ini na agersi-tori foe Jezus ben doe di dem Meester no ben de? (b) Fa na Meester e pai dem srafoe foe hem di e wakti?
13 Ini na agersi-tori dem srafoe e doe disi troe troe. Dem langa krosi foe dem no de anga loesoe-loesoe, ma dem hari dem pasa mindri dem foetoe en dem troesoe dem poti ondro dem leer-boeba. Tapoe na fasi disi dati dem tai dem mindri, dem e tan doe dem wroko, aladi den lampoe foe dem e gi na fanowdoe leti. Aladi na tem foe wakti e go doro te na a di foe toe pisitem foe na neti (so wan 9 joeroe neti te go miti mindri-neti) en srefi te na a di foe dri pisitem foe na neti (mindri-neti te go miti so wan 3 joeroe mamantem) dem getrouw srafoe e tan doe wroko en de na ai. Te na meester te foe kaba kon en si na faja foe dem foetoeboi foe hem, a de pai dem boen tapoe wan toemsi ongewoon fasi. A de meki dem didon na tafra en a de bigin foe dini dem. A no de handri nanga dem leki srafoe, ma leki loyaal mati. Fa disi de wan moi paiman, di dem kisi, foedi dem tan wroko gi hem te dipi ini na neti e wakti na kon-baka foe na meester foe dem.
14. Sortoe aksi wi kan aksi te wi loekoe dem foeroe jari di pasa sensi Jezus ben taki dem wortoe di ben skrifi ini Lukas 12:35-40?
14 Tina-neegi hondro jari pasa kaba, sensi Jezus Kristus ben taki na agersi-tori disi. Dem foetoeboi foe hem ben wakti soboen boen langa tapoe na kon-baka foe hem foe tjari na strafoe kon tapoe wan ogri grontapoe. Gi foeroe soema agersi kande leki na di foe toe pisitem foe na neti pasa kaba en wi de boen fara kaba ini na di foe dri pisitem foe na neti. Ma son wan foe wi e kon weri? Ofoe wi tai wi mindri tranga ete foe na doe foe wroko? Wi de meki na leti foe wi skijn nanga wan toemsi moi waka en libi en nanga na gi foe kotoigi faja faja, aladi wi e tan poti oli ini wi, foedi wi e saka ondro na wroko foe Gado jeje? — Matt. 5:14-16; loekoe Zacharia 4:2-6.
15. Te Jezus kon baka foe gi strafoe, na sortoe bewijsi a sa loekoe dan ondro dem wan di e taki dati dem de discipel foe hem?
15 Sortoe bewijsi na Meester foe wi sa soekoe te a kon baka foe gi strafoe? A sa loekoe efoe dem soema di taki dati dem de hem foetoeboi, de disi ooktoe troe troe. Dem ben de getrouw ini na gi jesi na a komando: „Meki discipel foe libisoema foe ala naatsi en doopoe dem ini na nem foe na Tata en foe na Pikin en foe na santa jeje, en leri dem foe hori ala sani di mi ben komanderi oen”? (Matt. 28:19, 20). Dem habi wan toemsi moi bericht foe wroko, di ben sori dati dem ben broko-ede toemsi gi dem „moro pikinwan” foe Kristus brada? Te dem ben si dem brada disi foe Kristus ini nowtoe, dem ben gi dem wan di ben dreewatra wan sani foe dringi, dem ben teki dem switi ini dem oso leki vreemde soema, dem ben weri boen krosi gi dem wan di no ben habi boen krosi, dem ben jepi en troostoe dem wan di ben siki en dem ben go loekoe dem wan di ben de ini strafoe-oso sondro dem ben doe ogri? (Matt. 25:35-40) Dem ben de na ai na jeje fasi, sondro vlaka foe dem sjen wroko foe na skin? — Matt. 7:21-23; Luk. 21:34-36; 2 Petr. 3:14.
16. Foe sainde wi moe prakseri ernstig foe san wi e doe foe bow wan bericht foe toemsi boen wroko na Gado?
16 Wi alamala moe prakseri ernstig foe na positie di wi e teki now na fesi foe Gado nanga Kristus. Na tem, di wi habi foe bow wan toemsi boen bericht, no de sondro marki. Wins omeni jari wi habi now, ófoe dede ófoe na kon-baka foe wi Meester sa fadon kon tapoe wi. Efoe wi no e broko-ede nanga wi kristen frantwortoe, dan wan foe dem toe sani disi kan kon na wi tapoe leki wan foefoeroeman, sondro dati wi ben de klari foe dati. Foe datede, meki wi doe moeiti foe libi leki a de na laatste dee foe wi, sondro dati wi gi pasi dati eegi lostoe ofoe prisiri e tapoe wi foe dini Jehovah Gado nanga wi Meester Jezus Kristus getrouw. Te wi doe so fasi, dan wi no sa speiti noiti foe na fasi fa wi ben gebroiki wi tem, wi krakti en wi grontapoe goedoe. Wi no so habi noti foe frede, te wi sa tanapoe na fesi na kroetoe-stoeroe foe Kristus, te a sa hori kroetoe gi hem Tata (2 Kor. 5:10). Meki wi sori dan, dati wi de soema di habi goedoe ini hemel pasa marki.