Pe joe goedoe de?
„Pe joe goedoe de, na drape joe ati de toe.” — Luk. 12:34.
1. Na moro bigi pisi foe libisoema ben broko dem ede moro foeroe nanga san? (Ps. 49:6-11; 144:12-14; Matt. 6:31, 32).
INI na historia foe libisoema, foeroe soema ben seti dem libi foe kisi grontapoe goedoe — oso, gowtoe, solfroe, diri ston, bigi hipi meti nanga so moro fara! Libisoema ben wroko tranga foe meki dem goedoe kon moro foeroe, ini na hoopoe dati dem pikin nanga gran-pikin foe dem en srefi moro fara bakaten-pikin ben sa njan boen foe dem wroko foe dem. Ma grontapoe goedoe de nanga reti na goedoe di dem foetoeboi foe Gado ini na fosi presi e poti dem prakseri na tapoe?
2. Fa wan kristen soema ben sa de leki „wan soema foe na seti foe sani disi”, efoe a ben poti hem prakseri moro foeroe tapoe grontapoe sani?
2 Efoe wan kristen moro foeroe ben sa feti baka na kisi foe grontapoe sani, a no ben sa de so dati a no sa agri nanga soema di e dini Gado? A ben sa de leki dem soema di na psalmsingiman David e skrifi foe dem — „soema foe na seti foe sani disi, di habi dem prati ini na libi disi . . . en di habi foeroe pikin en di e kibri troe troe gi dem pikin foe dem, san dem sa libi na baka” (Ps. 17:14). Dem sortoe soema disi „foe na seti foe sani disi” no sabi no wan moro hee sani leki na prisiri foe dem eegi lostoe foe dem. Na libi de nomo gi dem, na habi foe wan boen libi, foe kweki wan osofamiri en foe libi goedoe na baka gi pikin. Dem no de prakseri sref-srefi foe na verplekti foe dem di dem habi na Jehovah fesi.
3. San ben de gi David leki na moro prenspari sani? (Ps. 16:5-8).
3 Fa na fasi fa David ben loekoe sani ben de trafasi! A ben taki: „Foe mi see, ini retidoe mi sa si joe fesi; mi bere sa foeroe te mi wiki foe si joe” (Ps. 17:15). Ja, na moro prenspari sorgoe foe hem ben de foe tan regvaardiki, foe a ben kan si Gado fesi, dati wani taki, foe a ben ondrofeni na boen-ati nanga blesi foe Gado leki a ben tanapoe na fesi hem Mekiman. Te a ben sa „wiki”, foe taki hem so, foedi Gado ben sa gi hem na djaranti dati a ben de nanga hem, dan David ben sa prisiri dati Jehovah ben de pe a ben de. Na lobi foe na ati foe na psalmsingiman ben go troe troe na jeje goedoe, di e tan.
4. San e bepaal pe wi goedoe de?
4 Fa a de nanga wi ini na tem disi? Pe na goedoe foe wi de, te wi loekoe na dem fasi, dem wortoe en dem doe foe wi? Disi de dja na grontapoe ofoe ini hemel? Pe wi goedoe de precies, de kon foe na fasi pe wi ati e beweegi wi foe go. Jezus Kristus ben taki: „Pe joe goedoe de, na drape joe ati de toe” (Luk. 12:34). Te wi loekoe en poti ini wi libi san na Pikin foe Gado ben taki moro ete, dan disi sa de wan bigi jepi foe wi poti na lobi foe wi tapoe dem joisti sani.
WAARDERI GRONTAPOE GOEDOE NA A JOISTI FASI
5. (a) Foe sainde Jezus ben weegri foe go moksi hemsrefi ini wan trobi di ben de foe wan famiri-goedoe? (b) Sortoe warskow a ben gi na a tem dati, en foe sainde? (c) Sortoe agersi-tori a ben gi foe poti krakti na tapoe, dati a de wan don sani foe si grontapoe sani leki wan bigi prenspari sani?
5 Te wi loekoe na context foe dem wortoe foe Jezus, dan wi e si dati wan bigi hipi soema ben e arki na Pikin foe Gado. Wan foe dem ben taki: „Leriman, taigi mi brada, dati a prati na famiri-goedoe nanga mi” (Luk. 12:13). Foedi na Wet foe Mozes ben poti dati na fosi-gebore pikin moe kisi toe pisi foe na famiri-goedoe, joe ben kan taki dati no wan enkri reden ben de foe wan trobi (Deut. 21:17). A de krin, dati na man, di ben aksi Jezus foe kon kroetoe mindri hem nanga hem brada, ben wani habi moro foe na goedoe leki san na wet ben taki. Foedi na Pikin foe Gado ben verstan disi, a ben weegri foe go moksi hemsrefi ini na afersi, ma a ben warskow na hipi soema foe no kweki verkeerti lostoe tapoe dem sani di trawan habi. A ben taki: „Loekoe boen nanga ibri sortoe foe gridifasi, bikasi wans wan soema habi pasa marki, hem libi no e komoto foe dem sani di a habi” (Luk. 12:15). Wins wan soema de so goedoe leki a kan, tog a no kan hori hemsrefi foe teego ini libi. Leki ibri tra soema a sa dede en libi na baka ala hem goedoe di a ben tjari kon na makandra. Jezus ben poti krakti moro fara tapoe na punt disi, di a ben gi na agersi-tori disi, di e kon now:
„Na gron foe wan seker goedoeman ben meki foeroe njanjan. Foe datede, a ben go prakseri na hensrefi en taki: ’San mi sa doe, di mi no kan tjari mi njanjan kon makandra na no wan presi now?’ A taki dan: ’Disi mi sa doe: Mi sa broko mi maksien en bow moro bigi wan, en ini dem mi sa poti ala mi karoe nanga aleesi nanga ala mi boen sani; en mi sa taki gi mi sili taki: „Sili, joe ben tjari foeroe boen sani kon makandra foe foeroe jari; teki rostoe, njan, dringi en meki prisiri.”’ Ma Gado ben taigi hem taki: ’Joe lawman, na neti disi ete dem de teki joe sili foe joe. Foe soema dem sani sa de di joe ben tjari konmakandra?’” — Luk. 12:16-20.
6. San na goedoeman ini na agersi-tori foe Jezus no ben verstan en fa Jezus ben tjari na agersi-tori kon ini wi libi?
6 Na goedoeman ini na agersi-tori disi no ben teki na prakseri fa a ben kan gebroiki hem goedoe foe na boen foe trawan. A ben broko hem ede soso nanga hem eegi switi libi en a ben hoopoe foe njan boen foe dem goedoe di a ben tjari kon makandra ini dem jari di ben sa kon bakaten. A ben lasi na prakseri dati heri esi wan kaba ben kan kon na hem libi en a no ben prakseri foe datede foe gebroiki hem goedoe foe bow wan bericht foe toemsi moi wroko na Jehovah Gado. Jezus ben taki hem so: „So a de go nanga wan soema di e tjari goedoe kon makandra gi hemsrefi, ma di no goedoe ini Gado.” — Luk. 12:21.
7. Sortoe wortoe foe na discipel Jakobus e sori, dati kristen soema tapoe na srefi fasi kan fadon go ini wan trapoe leki na goedoeman ini na agersi-tori foe Jezus?
7 A no de so nanga discipel foe Jezus Kristus, dati noiti dem no kan fadon go ini na srefi jejefasi leki di foe na goedoeman ini na agersi-tori. Na kristen discipel Jakobus foe eksempel ben feni hem wan fanowdoe sani foe warskow kompe-bribiman nanga dem wortoe: „We now, oen di e taki: ’Tide ofoe tamara wi sa go na a foto disi en tan wan jari drape, en wi sa doe zaak en meki winst’, aladi oen no sabi san oen libi sa de tamara. Bikasi oen de wan smoko, di e kon wan momenti en dan e panja gwe. Na presi foe dati oen ben sa moe taki: ’Efoe Jehovah wani, wi sa libi en doe disi ofoe dati toe.’ Ma now oen e meki bigi. Na sortoe gafa dati de ogri.” — Jak. 4:13-16.
8. Otem a ben sa de wan asranti sani foe feti baka grontapoe sani ini wan langa pisi tem en foe sainde?
8 A de troe troe na toppunt foe ferberde nanga bigimemre te wan soema taki, dati a habi na vaste prakseri foe meki grontapoe sani kon troe ini wan langa pisi tem, sondro foe sori respeki gi na wani foe Gado ini na afersi disi. Wan soema no kan sabi tapoe no wan fasi san a de foe tamara sa tjari kon. Dem moro boen plan kan fadon, ofoe na dede kan kon wantron wantron, sondro oen ben verwakti. Na libisoema libi no de tan en no de vaste soleki wan smoko en foe datede a no de wan vertrouw fundamenti pe joe kan bow dem verwakti foe joe. Wan soema di e meki bigi foe na fasi fa hem sa doe dem plan foe hem, e sori ooktoe dati a no habi Gado fanowdoe en a no e hori na prakseri dati na blesi foe Gado de fanowdoe foe si winimarki. Soleki na discipel Jakobus ben taki, dan so wan bigimemre fasi de ogri.
9. San wi e leri ini 1 Timoteus 6:9, 10 foe na gevaar foe feti baka goedoe?
9 Wan soema di nanga bigifasi e go doro foe meki dem materialistisch plan foe hem kon troe, aladi a de poti na wan see na wani foe Gado gi hem, e kon ini ernstig jeje gevaar. Na kristen apostel Paulus e warskow: „Dem di ben teki na bosroiti foe kon goedoe, e fadon ini tesi en ini wan trapoe en ini foeroe law en takroe lostoe, di e tjari dem soema go ini pori. Bikasi na lobi foe moni de na roetoe foe ala sortoe ogri sani en son soema ben verdwaal komoto ini bribi, foedi dem poti dem prakseri tapoe na lobi dati en dem boro demsrefi alape nanga foeroe pen.” — 1 Tim. 6:9, 10.
10. (a) San wi moe doe te wi e meki plan foe na tem di e kon, en foe sainde? (b) Wi moe gebroiki grontapoe goedoe soso foe prisiri wi eegi lostoe en san na bijbel e taki foe dati?
10 Na a tra see, efoe wi ati e beweegi wi tapoe na joisti fasi, dan wi no sa lasi na ai o onseker na libi de, en dati wi de afhankelijk foe ala sani foe Jehovah Gado. Nanga na verstan foe disi, dan te wi de meki plan foe na tem di e kon, wi sa loekoe alatem ini begi fa dem plan disi e fiti ini na prakseri foe Jehovah. Disi sa jepi wi, dati grontapoe sani no teki wi abra someni, dati wi e habi moro moro pikinso tem foe bow wan krakti bribi. So wan fasi foe loekoe ini begi dem sani disi, sa jepi wi ooktoe foe si dati wi no moe feti baka na tjari konmakandra foe grontapoe goedoe foe eegi lostoe foe wi, ma dati wi moe gebroiki dem foe na boen foe mofina soema. So wan gebroiki foe moni sondro gridifasi de wan fundamenteel sani foe wan soema de wan troe kristen soema. Na bijbel e taigi wi: „Soema e foefoeroe, no moe foefoeroe moro, ma meki a wroko tranga, foe doe boen wroko nanga hem anoe, sodati a habi wan sani foe gi na dem mofinawan” (Ef. 4:28). „Na fasi foe aanbegi di de ini na ai foe wi Gado en Tata krin en sondro vlaka, de disi: foe sorgoe foe weesi nanga weduwe ini dem benawtoe en foe kibri oensrefi sondro vlaka foe na grontapoe.” — Jak. 1:27.
LOEKOE BOEN, DATI DEM ALADEE SORGOE NO TJARI OEN GO TAPOE WAN SEEPASI
11. Sortoe rai Jezus Kristus ben gi foe na joisti fasi di wi moe habi foe dem aladee sorgoe foe na libi?
11 Aladi foeroe kristen soema kande sa verstan fa a de wan law sani foe tjari goedoe kon makandra soso foe eegi prisiri nanga wini, kande dem no e verstan dati ala dee sorgoe net so makriki kan poeroe dem foe dini Jehovah Gado nanga dem heri ati. Jezus ben poti spesroetoe krakti tapoe dati, di a ben taki nanga hem discipel nanga dem wortoe disi:
„Foe datede mi e taki gi oen: No broko oen ede moro langa nanga oen sili, foe san oen sa njan, ofoe nanga oen skin, foe san oen sa weri. Bikasi na sili de moro warti leki na njanjan en na skin moro leki na krosi. Poti prakseri boen tapoe dem raaf: dem no de sai en dem no e koti njanjan en dem no habi maksien en tog Gado e gi dem njanjan. Omeni moro oen de warti leki dem fowroe? Soema foe oen nanga na broko di a de broko hem ede, kan poti wan el na a libitem foe hem? Efoe foe datede oen no kan doe na moro pikin sani, foe sainde oen de broko-ede dan nanga dem tra sani? Poti prakseri boen fa dem leli e gro; dem no de wroko tranga en dem no e spin; ma mi e taigi oen: Srefi Salomo ini ala hem glori no ben weri so moi leki wan foe dem disi. Efoe Gado na tapoe so wan fasi e weri krosi gi dem bon en wiwiri foe boesi, di tide dem de en tamara dem e trowe go ini onfoe, omeni moro a no sa weri krosi gi oen, oen soema nanga so pikin bribi! Kaba foe datede foe soekoe san oen sa njan en san oen sa dringi en no de moro langa ini srekiati en span; bikasi ala dem sani disi dem naatsi foe grontapoe e feti faja faja na dem baka, ma oen Tata sabi dati oen habi dem sani disi fanowdoe. Ma soekoe alatem hem kownoekondre, en dem sani disi oen sa kisi na tapoe.” — Luk. 12:22-31.
12. Foe sainde a no de redelijk foe broko-ede toemsi foe njanjan en krosi, en meki nanga disi, dati jeje activiteit en kon slap?
12 Spesroetoe ini tem foe economia moeilijkheid ofoe na kon moro diri foe sani, wi e doe boen foe prakseri dem wortoe disi foe Jezus. Wans wi e broko wi ede so en wi e meki wisrefi druk, na situati foe wi no sa kon moro boen nanga disi. Njanjan gi na skin foe wi no kan hori na libi foe wi foe teego en a no kan gi wi na djaranti foe wan boen nem na Jehovah Gado. Wan soema, di foe datede e meki njanjan de wan afersi pe a de broko hem ede someni, dati hem diniwroko gi Gado e go na baka nanga dati, e si na hori foe hem skin na libi moro bigi leki hem libi. A so a de toe nanga wan soema di e broko hem ede toemsi nanga na fanowdoe foe krosi, en nanga dati e meki dati jeje activiteit e kon slap, e si krosi moro warti leki hem skin. Broko joe ede toemsi nanga na kisi foe dem aladee fanowdoe foe na libi, e sori tapoe wan mankeri ini bribi ini na makti foe Gado foe gi hem foetoeboi san de fanowdoe.
13. Foe sainde meki dem sani di Jehovah e doe gi dem raaf nanga dem leli, moe de wan dekati gi wi?
13 Foedi no wan moro boen kotoigi de foe Jehovah leki Na Soema Di E Sorgoe, dan no wan enkri reden de gi no wan soema foe fadon gi so wan mankeri ini bribi. Soleki Jezus ben verteri, dan dem raaf no e broko dem ede pe na tra njanjan foe dem sa komoto, aladi dem leli no e meki demsrefi sorgoe foe na krosi foe dem foe weri. Tog dem raaf dati, foedi dem e soekoe njanjan, e feni nofo foe heri dem libi, aladi dem leli e gro eenvoudig en de nanga moi kloroe, di srefi kownoe Salomo nanga hem moi krosi, no ben kan habi. Ja, Jehovah Gado ben seti ala sani so, dati dem raaf ben kan feni na fanowdoe njanjan en dati dem bon kan de nanga dem moro moi bromki. Wi ben sa kan prakseri foe dat-ede, dati sondro foe a ben sa firi a ben sa libi hem foetoeboi dede nanga angri ofoe e waka lontoe sondro dem fanowdoe krosi? Nono. Troe kristen soema kan habi foe datede na djaranti, dati te dem no gi pasi dati dem sorgoe foe tan na libi no tapoe na diniwroko foe dem gi Gado, Gado sa sorgoe foe dem fundamenteel fanowdoe sani foe libi. Dem sa habi hem srefi moro boen leki grontapoe soema ini dem srefi economia omstandigheden. A de go moro boen gi kristen soema, foedi dem no e fermorsoe dem goedoe nanga dobel, smoko, dringi sopi hebi nanga so moro fara.
WORTOE FOE NA MOFO FOE JEHOVAH DI E HORI NA LIBI
14. Sondro na jepi foe Jehovah, dem Israël soema ben kan tan na libi, en san dem wortoe foe Mozes e tjari kon na krin ini disi?
14 Prakseri toe san Jehovah Gado ben doe gi dem Israël soema ini na sabana. Mozes ben memre dem na dem wortoe disi: „Oen moe prakseri na heri pasi di Jehovah, oen Gado, ben meki oen go ini na sabana dem fotenti jari disi . . . a ben lagi oen . . . en a ben meki oen njan angri en a ben gi oen njanjan nanga na manna, di oen no ben sabi, foe meki oen sabi, dati libisoema no e libi wawan foe brede, ma dati libisoema e libi foe ibri wortoe foe Jehovah mofo” (Deut. 8:2, 3). Ini na sabana di no ben bow nanga oso nanga tra sani, dri miljoen Israël soema no ben kan tan na libi 40 jari langa. Jehovah Gado ben meki dem kon ini wan situatie pe dem ben prakseri, dati dem ben sa dede troe troe foe angri. Dem ben bari tranga gi Mozes nanga Aäron: „Oen ben tjari wi kon ini na sabana disi foe meki na heri gemeente disi dede foe angri” (Ex. 16:3). Dem lsraël soema ben prakseri dati sondro na gewoon middel foe hori dem na libi — brede — dem ben sa dede
15. Foe sainde Jehovah ben gi pasi dati dem Israël soema ben njan angri, en ini sortoe fasi na manna ben de wan wortoe foe na mofo foe Jehovah?
15 Jehovah troe troe ben lagi dem, di a ben tjari dem kon ini wan situatie pe dem no ben habi jepi gi demsrefi. A ben doe disi foe leri dem, dati te na gewoon njanjan no de moro, dem wortoe foe na mofo foe Jehovah kan gi tranga. Na wondroe manna ben de wan sori foe disi, bikasi Jehovah ben gi na komando en na manna ben doe kon. Foedi Jehovah Gado ben hori wan heri naatsi 40 jari na libi ini wan sabana, dan wi kan habi na vertrouw, dati dem wortoe foe na mofo foe Jehovah kan gi wi ooktoe dem fanowdoe sani ini disi tem.
16. San de wan toe foe dem wortoe di Jehovah ben taki, di e sori dati a sa gi hem foetoeboi san de fanowdoe? (Ps. 37:3, 4, 23-26; 145:14-17)
16 Sortoe wortoe Jehovah ben taki, di e sori dati a sa gi hem foetoeboi dem fanowdoe sani? Na psalmsingiman di ben habi Gado geest ben skrifi: „Jehovah no sa trowe hem pipel” (Ps. 94:14). En Jezus Kristus ben taki: „Oen no broko oen ede noiti en oen no taki: ’San wi so njan?’ ofoe: ’San wi sa dringi’ ofoe: ’San wi sa weri’ . . . Bikasi oen hemel Tata sabi dati oen habi ala dem sani disi fanowdoe. Tan soekoe dan fosi na kownoekondre nanga hem retidoe, en ala dem tra sani disi joe sa kisi na tapoe.” — Matt. 6:31-33.
17. Sortoe fasi di joe kan firi nanga anoe dem wortoe foe na mofo foe Jehovah kan teki te a de kon tapoe na tori foe hori na libi foe hem foetoeboi?
17 Ala soema di e soekoe troe troe fosi Gado kownoekondre nanga hem retidoe, foe datede sa ondrofeni na sorgoe foe hem nanga lobifasi. Aladi dem kan de ini omstandigheden di gersi leki hoopoe no de, tog dem wortoe foe na mofo foe Jehovah sa gi dem san de fanowdoe. Soleki na manna ben de wan sani di joe ben kan firi nanga anoe en di ben hori soema ini libi ini na sabana, na so na pramisi foe Jehovah dati a sa gi hem foetoeboi san de fanowdoe, sa de ooktoe ini wan fasi di joe kan firi nanga anoe. Jehovah ben beweegi son tron kompe-bribiman ofoe srefi soema di no e bribi foe jepi hem mofina foetoeboi. Foedi na broko-ede toemsi foe dem aladee fanowdoe foe libi kan habi wan pori-krakti tapoe wi jeje loekoe, wi de doe boen foe hori kibri wan krakti bribi ini Jehovah makti foe sorgoe gi wi. — Hebr. 13:5, 6.
18. (a) Foe sainde wi moe go ondrosoekoe ernstig efoe wi e poti goedoe ini hemel? (b) San wi ben sa kan aksi wisrefi foe bepaal pe precies na troe troe goedoe foe wi de?
18 Na afersi disi foe poti ini hemel goedoe de wan sani di wi no moe teki lekti. Ala blesi ini na tem di e kon en ala verwakti foe libi de komoto foe disi (Loekoe Lukas 12:45-48). Foe datede a boen te ibri soema ondrosoekoe hemsrefi en aksi hemsrefi: Dem kownoekondre afersi e kon troe troe na a fosi presi ini mi libi? Mi e gebroiki mi tem, krakti nanga goedoe tapoe wan fasi di e tjari grani gi Gado nem en di de foe na boen foe tra soema? Mi e verstan dati grontapoe sani no de na moro prenspari sani ini mi libi, ma dati na moro bigi prisiri foe mi e kon foe na dini foe Jehovah? Soso te na troe troe goedoe foe wi de ini hemel, wi kan piki dem aksi disi nanga Ja.