Tan tanapoe vaste ini na bribi
„Tan nanga ai, tanapoe vaste ini bribi.” — 1 Korinte 16:13.
1. (a) Sortoe boskopoe ben komoto kon na doro foe na „Victori bribi”-congres? (b) Sortoe bribi Jezus ben wani soema moe habi?
VICTORI bribi e gro kon moro foeroe ini grontapoe! Dati de na boskopoe di ben gi tapoe dem internationaal „Victori bribi”-congres foe Jehovah kotoigi di ben hori na jari di pasa na a zomer ini na Noordsee foe grontapoe en baka dati te go miti na bigin foe na jari disi ini foeroe kondre ini na Zuidsee foe na evenaar en di doesoen doesoen soema ben go na dem. Gi Jehovah kotoigi bribi no de soso wan sani di na mofo moe taki. Moro foeroe a moe de na libi en actief en a moe go makandra nanga wroko. Ini hem bergi-preeki Jezus ben skrifi foe dem froktoe foe bribi na a fasi disi: „Meki joe leti skijn gi dem soema, foe dem kan si dem toemsi boen wroko foe oen en gi oen Tata, di de ini hemel, glori.” En tapoe na laatste, prenspari neti dati a ben de nanga dem kompe foe hem makandra, a ben taki gi dem: „Nanga disi mi Tata e kisi bigi nem, efoe oen tan meki foeroe froktoe en oen sori dati oen de mi discipel.” — Matt. 5:16; Joh. 15:8.
2. San e sori dati Jehovah Kotoigi „habi” bribi?
2 A de troe dati ini dem moeiliki tem disi „a no ala soema habi bribi” (2 Thess. 3:2). Ma dem kristen kotoigi foe Jehovah habi hem wel. Na bribi foe wi di de na libi e gi wi tranga foe meki na publiki na „boen njoensoe” te wi de doe diniwroko ini na preekiwroko. Fa wan bigi kotoigi ben gi tapoe na di foe dri dee foe na internationaal congres ini na pisi tori disi. Na a srefi bribi disi e gi wi na krakti srefi ini na moro moeiliki tem foe tan gi kotoigi en foe tan tanapoe vaste wans bita tesi nanga vervolgoe e kon. A de jepi wi srefi foe prisiri wisrefi ini tem foe tesi, foedi wi e verwakti tranga na openbaring foe Jezus Kristus ini Kownoekondre-glori. — 1 Petr. 4:12, 13.
3. (a) Foe sainde wi kan taki dati na bribi foe wi de wan troe troe sani? (b) Foe doe san bribi moe troesoe owroewan soleki njoenwan?
3 Na bribi foe wi de wan troe sani. A habi wan krakti fundamenti tapoe Jezus Kristus, na Edeman foe na kristen gemeente, pe dem memre e doe diniwroko ini wanfasi nanga hem. Na apostel Paulus e gi na vermane na dem: „Go doro foe di joe ben teki Kristus Jezus, na Masra, foe waka ini wanfasi nanga hem, habi joe roetoe en bow ini hem en meki vaste ini na bribi, soleki dem ben leri joe, habi pasa marki bribi ini taki tangi” (Kol. 2:6, 7). En soleki owroeman ini na waarheid e tan waka ini na victori bribi disi, na so wi de begi, dati dem njoen wan ooktoe, makandra nanga dem wan di doopoe njoen, sa kon vaste ini bribi en habi hem srefi pasa marki. Bribi e troesoe wi foe „meki bekenti na publiki foe kisi libi” foe verteri trawan na boen njoensoe. — Rom. 10:10.
4. (a) Fa bribi habi foe doe nanga na fasi foe waka nanga libi? (b) San ben meki dem taki: „Na libi en waka foe oen de na moro boen preeki”?
4 Na bribi disi e troesoe kristen soema ooktoe foe sori wan toemsi boen waka nanga libi, san e wroko boen tapoe na diri nem foe wi Gado Jehovah (1 Petr. 2:12). Ini na „Victori bribi”-congres, di ben hori ini Montreal (Canada), na koranti La Presse foe 8 juli ben taki na sani di fiti foe Jehovah Kotoigi:
„Dem abi spesroetoe moreel waarden tapoe dem eegi libi, bikasi dem e meki dem waarden foe na osofamiri go na fesi en dem de tegen broko-trow nanga na poeroe foe bere. Dem e poti foeroe prakseri tapoe na leri foe dem pikin foe dini Gado.”
Tapoe den congres disi joe ben kan si ooktoe krin wan toemsi boen waka nanga libi di ben habi dem fundamenti tapoe na waarderi foe dem waarden disi. Tapoe na congres foe Jehovah Kotoigi, di ben hori ini München, joe ben kan jere wan hee-leriman foe Rusland, di ben wroko leki korantiman, taki: „Na fasi foe waka nanga libi foe oen de na moro boen preeki.” En ini na srefi foto disi, na Münchner Merkur foe 25 juli 1978 ben taki:
„Ini na Bondsrepubliek dem de dem moro eerlijk nanga moro punctueel soema di e pai belasting. Na gi di dem e gi jesi na a wet e kon na krin ini na fasi fa dem e rij en nanga dem boekoe di e sori na kren ofoe saka foe ogridoe . . . dem e gi jesi na dem soema di habi makti (papa nanga mama, skoromeester nanga leriman, na rigeri) . . . Dem e sori tapoe na bijbel leki na fundamenti foe ala dem doe foe dem . . . Ma no wan soema moe prakseri dati Jehovah kotoigi de soema di e dren na heri dee ofoe di de falsi santa soema. Ini wan bigi krin-wroko dem ben man foe krin ala sidonpresi ini na (Olympisch) stadion ini wan pisi tem foe dri joeroe. Na presi pe dem e libi ini tenti ben de leki dem ben leki hem nanga tongo. Dem de realist soema di man foe kaka foetoe nanga dem fri wani gi ibri situatie — foedi na bijbel e aksi disi foe dem.”
5. Fa Matteus 5:16 kon troe tapoe Jehovah Kotoigi di ben de tapoe congres?
5 Tapoe na heri grontapoe joe kan jere soema e taki dem srefi sani disi. Ini na koranti foe 17 augustus 1978 foe na koranti Corriere della Sera foe Milaan (Italiakondre) ben sori srefi tapoe wan tegenstelling.
„Wan organisaatsi di e wroko so volmaakti e jepi dem, dati ala tra organisaatsi e djaroesoe tapoe dem . . . San wi kan taki moro foe dem kotoigi foe Jehovah disi? Dem ben sori dati dem de sma di abi maniri nanga respeki, na so wan fasi srefi dati na waka en libi foe dem bijna de leki wan strafoe foe na grofoefasi, di bepaalde groepoe katholiek soema e sori.”
Jezus no ben taki: „Na dem froktoe foe dem, joe sa sabi dem”? — Matt. 7:16.
6. Fa dem kotoigi ini dem moen di pasa ben de wan eksempel foe troe kristendom di ala soema kan si?
6 Na toemsi boen waka nanga libi foe dem Kotoigi ini dem bigi groepoe soema tapoe dem congres disi, ben meki grontapoe poti prakseri tapoe dem. Ini dem dri kondre di wi kari dja na tapoesee ben de Canada ala nanga ala 140 doesoen ben kon makandra na Montreal, Winnepeg, Vancouver nanga Edmonton, ini Doisrikondre 108 doesoen na München nanga Düsseldorf en ini Italia 111 doesoen ini Milaan nanga Rome. Tapoe ala dem 68 internationaal congres di ben kaba ini na tem foe september 1978, ala nanga ala wan miljoen 700 doesoen soema ben de. Da kristen eegifasi foe dem dienstknegti disi foe Jehovah tapoe heri grontapoe ben kon na fesi tapoe so wan fasi, dati nanga disi dem ben tron wan eksempel foe troe kristendom di ala soema kan si.
WAN TEM FOE TANAPOE VASTE
7. Foe sainde meki tesi tapoe wi bribi ini na tem di e kon sa kon moro bigi?
7 Na wan sani di tan so, dati dem tesi tapoe na bribi foe wi ini dem dee di de na wi fesi sa kon moro bigi. En foe sainde? Foedi Didibri „hiti trowe go na grontapoe” sensi na geboortoe foe „na kownoekondre foe wi Gado nanga na makti foe hem Kristus ini 1914. A sabi dati a abi wan „sjatoe pisi tem” soso. Foe datede meki na atibron foe hem tapoe Jehovah dienstknegti tapoe grontapoe e kon moro foeroe, dem dienstknegti tapoe grontapoe, di „hori dem komando foe Gado nanga na wroko di dem habi foe gi kotoigi foe Jezus” leki na makti kownoe, di poti tapoe na kroon en di sreka hemsrefi foe poti foe teego na soevereiniteit foe Gado reti (Opb. 12:9-12, 17). Na bigi feejantiman e tjari moeilijkheid nanga spanning kon ini grontapoe, spesroetoe nanga na prakseri foe meki go moro safri ofoe tapoe „na wroko disi . . . di de foe na gi kotoigi”. Leki kotoigi foe Gado nanga Kristus wi habi wan troe troe stree foe stree — tegen feejanti di wi no kan si en di habi na prakseri foe pori wi bribi.
8. Fa wi kan tanapoe now vaste ini wi bribi?
8 A no de now na tem foe sidon loekoe ofoe no broko-ede. Na apostel e vermane wi: „Tanapoe vaste . . . tegen dem ogri triki foe Didibri . . . Teki foe datede na heri feti foe Gado foe oen kan tanapoe vaste. Teki moro foeroe na skild foe bribi, disi oen kan kili nanga hem ala dem faja-peeri foe na ogriwan.” (Efese 6:11-16). Dem tesi foe Didibri ibri momenti kan kon en foe difrenti presi. San de wan toe foe dem tikri disi?
NA WIPI FOE HOEROEDOE
9. (a) Sortoe pori krakti Didibri ben gebroiki ini na heri historia? (b) Sortoe rai Judas ben gi foe datede na kristen soema?
9 Foe sensi na bigin foe na libisoema historia, Didibri ben gebroiki hoeroedoe leki wan wrokosani foe pori libisoema (Gen. 6:2-5; 18:20; Num. 25:1-3). Porifasi ini na seks libi ben de boen foeroe ini na froekoe kristen tem en a ben de wan gevaar gi na soifri fasi foe na gemeente. Foe dat meki na afoe brada foe Jezus, Judas, di ben wani skrifi hem kristen brada wan brifi foe gi dem dekati en di ben sa go foe na redding foe dem alamala ben feni hem fanowdoe na presi foe dati, foe gi dem dekati „foe feti foe na bribi, disi dem ben gi abra wantron na dem santawan”. Ogri soema, di ben habi wan jajo libi, ben foefoeroe pasi kon ini na gemeente. Dem ben de leki dem engel, di ben sondoe bifo na sondoe-vroedoe, leki dem veragti soema foe Sodom nanga Gomorra en leki dem Israël soema, di dem hoeroedoe oemapikin foe Moab nanga Midian ben pori. Dem ben vlaka na skin en dem ben gi na pipel foe Gado abra na dem krakti foe meti-fasi. Foe datede Judas ben gi kristen soema nanga wan krin geest na rai: „Ma oenoe, oen lobiwan foe mi, soekoe foe kon moro tranga en vaste na ini da toemsi santa bribi foe oen, nanga begi na ini santa jeje! Hori en kibri oensrefi na ini na lobi foe Gado, en poti oen vertrouw na da sari-ati foe wi Masra, Jezus Kristus, disi sa gi oen da libi foe teego.” — Judas 3-7, 19-21.
10, 11. (a) Foe sainde na vermane foe Efese 5:3-5 de so prenspari? (b) Sortoe warskow wi moe teki na prakseri tapoe na tori foe na oema Isebel en foe sainde?
10 Soso te wi „feti gi na bribi sondro foe weri” tapoe so wan fasi, wi kan verwakti foe na grontapoe „dotifasi” no vlaka wi (Ef. 5:3-5). Ini hem boskopoe gi na gemeente Thyatira, Jezus „na pikin foe Gado” e taki: „Mi sabi dem wroko foe joe, nanga na lobi foe joe, en fa joe dini mi, en na bribi foe joe, nanga na hori-doro foe joe, en fa baka-tem joe ben doe moro leki fositem. Ma son sani foe joe no boen na mi foe taki, joe meki na oema Isebel, disi e taki hem de wan profeeti, leri trawan, seti trapoe gi dem knegti foe mi, meki dem doe hoeroedoe, njan dem kroektoe gado ofrandi. Mi ben gi hem tem, foe habi berouw, ma a no wani habi berouw foe hem hoeroedoe.” — Openb. 2:19-21.
11 Na afkodree Isebel bifo na tem foe Kristus, na oema foe na kownoe Achab foe Israël, ben habi wan takroe barinem foe na hoeroedoe foe hem. Di hem manpikin Joram, ben aksi na salfoe kownoe Jehu ofoe vreede ben de nanga na oso foe Achab, a ben piki: „Fa vreede ben sa kan de solanga dem hoeroedoe foe joe mama Isebel nanga hem foeroe towfroe-wroko de ete?” En baka di Jehu ben poeroe Joram nanga Ahazia (foe Juda) na pasi, a ben go abra foe tjari kroetoe kon tapoe Isebel, so toe tapoe dem 70 manpikin foe Achab nanga ala dem trawan di ben tan abra foe hem oso, makandra nanga ala soema di ben de e dini ini na hoeroe-doe Baäl-bribi (2 Kon. 9:22-10:28). Meki wi poti ini disi tem prakseri tapoe na eksempel disi di de wan warskow, sodati wi no sa libi na pasi foe retidoe foe fadon go ini „dem dipi sani foe Satan”. — Op. 2:24.
LON KOMOTO FOE NA „FETI BAKA GOEDOE”
12. San de „na lobi foe moni” en foe sainde wi moe komoto na hem pasi?
12 Moro sortoe foe druk de ete, di Didibri e gebroiki tegen dem getrouw foetoeboi foe Jehovah en dem alamala habi leki marki foe drai wi poeroe foe na Kownoekondre foe Gado nanga hem retidoe (Matt. 6:33). Na apostel Paulus e warskow foe na krakti di „na lobi foe moni” kan habi foe poeroe wan soema foe na bribi. Na „lobi” disi kan wani taki foeroe sani, no wawan na moni srefi, ma ala grontapoe goedoe, prisiri, nanga ala tra sani di wan soema kan kon na ini en di nanga moni joe kan bai hem. Na „lobi disi foe moni” kan teki foeroe foe wi tem en kan meki na ala dee libi de wan moeiliki wan gi na kristen bribi, kan pori hem. Leki wan bakapisi foe disi wan soema kan „gi hemsrefi alape foeroe skin-ati”. — 1 Tim. 6:10.
13. Fa jongoe soema nanga owroe soema nanga boen winimarki kan feti na boen feti foe na bribi?
13 Na apostel Paulus ben gi na jongoe Timoteus na rai, na presi foe feti baka goedoe, a poti hem prakseri tapoe na libi tapoe wan jeje marki di e tjari winimarki: „Ma joe, o soema foe Gado, kibri joe srefi foe sosani. Ma soekoe foe kisi na geregtigheid nanga na troe gadolibi, nanga na bribi nanga na lobi nanga na hori-doro nanga na safri-ati-fasi. Feti na boen feti foe na bribi, soekoe foe kisi na libi foe teego disi Gado ben kari joe toe foe hem, en disi joe bekenti da boen bekenti kaba na fesi foe someni kotoigi” (1 Tim. 6:11, 12). Oen jongoewan ini disi tem, nanga vertrouw tapoe Jehovah, „oen kan feti na boen feti foe na bribi ooktoe”. En ooktoe oenoe, owroewan, sa kan foe doe disi toe.
14. (a) Tapoe sortoe toe fasi wi moe feti foe „na feti foe na bribi”? (b) Fa Hebreer 13:4-6 e sori dati disi de so?
14 A de wan aparti sani dati na bijbel e gi wi rai foe feti na feti disi foe na bribi, tapoe na tori foe hoeroedoe en na lobi foe moni. Ini ala toe sani, wi sa man kaka foetoe gi dem kori foe Didibri boen, te wi habi wan tranga bribi en hori wisrefi krakti na wi bribi. Paulus e gi wi ini Hebreer 13:4-6 tapoe na srefi fasi rai: Na trowlibi foe man nanga oema ala soema moe loekoe nanga respeki, en na trowbedi sondro vlaka, bikasi Gado sa strafoe dem hoeroedoeman nanga dem soetadoeman. Meki na fasi foe libi foe oen de fri foe na lobi foe moni, en de tevreede nanga dem sani di oen habi. Bikasi hem ben taki: ’Mi no sa libi joe, noso verzuim joe.’ Sodati wi kan habi dekati en wi kan taki: ’Jehovah de wi jepiman, san wan libisoema sa man doe mi?’” Nanga vertrouw ini na jepi foe Jehovah, meki wi teki na vaste bosroiti foe feti na feti foe na bribi te leki na kaba foe na ogri seti foe sani.
KAKA FOETOE GI WAN TJALANSI
15, 16. (a) Sortoe krakti dem congres ben gi? (b) Sortoe dekati wi moe kisi foe Galaten 6:9, 10, spesroetoe te wi loekoe na nomroe foe soema di ben de tapoe na Memrefesa ini na jari di pasa?
15 Ini na opowaka foe na pipel foe Gado, dem internationaal „victori bribi”-congres foe Jehovah Kotoigi ben de leki wan mijlpaal. Dem ben gi na fanowdoe krakti. Na jari di pasa ben de wan tem foe fiti oen srefi en foe kenki sani. Foeroe foe wi ben hoopoe dati na a tem disi na ogri seti foe sani ben sa doro hem kaba. Seker, te nanga now wi si na moro bigi kenki ini na tiri foe Jehovah Kotoigi, ma na „ogri seti foe sani” no kon na wan kaba ete. Jehovah seker habi wan wroko ete gi wi foe doe. „Meki foe datede wi no tapoe foe doe boen, bikasi na a reti tem wi sa koti, efoe wi no weri. Meki foe datede, solanga na tem boen ete, doe boen gi ala soema, ma spesroetoe na dem wan di habi na srefi bribi leki wi.” — Gal. 6:9, 10.
16 Dem gemeente owroeman, edeman foe osofamiri nanga trawan e tan doe moeiti „foe doe boen na dem di habi na srefi bribi leki wi”, en dem boen froktoe foe disi de krin foe si ini na banti foe lobi di e tai so krakti na pipel foe Jehovah tapoe na heri grontapoe. Nanga disi dem habi na marki leki discipel foe Jezus (Joh. 13:34, 35). Na bigi wanfasi disi ini bribi, na wan sani di joe no kan marki nanga wan bericht. Ma te wi loekoe dem moro leki 5 miljoen soema di ben de tapoe na Avondmaal tapoe 23 maart 1978, dan disi e sori wi, dati miljoen miljoen soema di no gi dem srefi ete abra na Jehovah, habi foeroe belangstelling foe de makandra nanga na pipel foe Gado. Meki ala dem soema disi kisi na jepi foe de winiman nanga na bribi foe dem.
17. Fa Hagai 2:7 nanga Zacharia 8:23 e go te now ete ini vervulling?
17 Dati dem njoen soema disi, dem „sani foe ala naatsi di joe sa wani foe habi”, e kon na ini, wi kan si nanga dem 18.754 soema di ben doopoe tapoe dem „victori bribi”-congres di wi ben hori te nanga na tem dati na artikel disi ben skrifi (Hag. 2:7). Ooktoe te joe loekoe na tabel tapoe bladzijde 20 te nanga 23 ini na bakra tongo Wachttoren foe 1 april 1979, dati ini dem 12 moen di kon na wan kaba ini augustus 1978, dati tapoe heri grontapoe 95.052 njoen Kotoigi ben doopoe. Wi e prisiri dati dem diri soema disi „foe ala tongo foe dem naatsi” e moksi dem srefi nanga na salfoe fika pisi ini Jehovah diniwroko, „dem e taki: ’Wi wani go nanga joe, bikasi wi ben jere, dati Gado de nanga joe’”. — Zach. 8:23.
18. (a) Fa na moro bigi pisi e tan sori bribi? (b) Sortoe warskow foe bijbel de tranga fanowdoe, soleki na tabel e sori? (Loekoe na bakra tongoe Wachttoren bladzijde 20 te nanga 23).
18 Na tabel disi e sori ete wan sani toe: dati son foe dem doopoe dienstknegti foe Gado ben go doe hem safri safri. Na moro bigi pisi e tan sori wan victori bribi. Ini difrenti kondre moro foeroe soema go ini na pionierwroko en baka leki wan heemarki, moro leki toe miljoen soema ben teki prati na a velddienst. Tokoe wan boen pisi foe dem ben fadon ondro na druk foe Didibri nanga na seti foe sani foe hem tapoe dem. Grontapoe hoeroedoe, na waka baka prisiri nanga na korifasi foe goedoe en a no tan na ai foe na tranga fanowdoe foe na tem ben meki soema fadon aladi krin bijbel warskow ben gi foe dem trapoe disi (Luk. 17:26-30; 1 Joh. 2:15-17). Troe troe, disi de na tem foe ala tem, pe a de fanowdoe moro leki ala tra tem „foe tan nanga ai en tan vaste ini bribi”. — 1 Korinte 16:13.