Poti bribi ini Jehovah victori organisatie
„Frede Jehovah wawan, en joe moe dini hen ini waarheid nanga joe heri ati; bikasi loekoe, sortoe bigi sani a ben doe gi joe.” — 1 Samuèl 12:24.
1. (a) Oten en fa Gado grontapoe organisatie di wi kan si ben kon na fesi ini 1513 bifo G.T.? (b) Foe sainde den ben kari hen theocratisch?
GADO grontapoe organisatie di wi kan si, ben kon na fesi, di den 12 lo foe na Djoe pipel ben orga leki wan naatsi nanga wan theocratisch rigeri na den tapoe ini na jari 1513 bifo wi teri. Na Verloesoeman foe na pipel dati foe katibo ini na owroe Egypte, di ben tjari dede kon, ben de na Wan di ben teki na bosroiti foe na rigeri disi. A ben de ooktoe na soema di ben opo hen. A ben de Gado en ini na rigeri dati a abi na moro hé makti. Na foe na reden disi, den de kari hen theocratisch, en na rigeriman foe hen den ben kari nanga na nen Theocraat. Foe ala borgoe foe hen den de aksi — en disi e pasa nanga reti — dati den aanbegi hen, den Tiriman nanga Rigeriman, leki den Gado. Disi ben pasa tapoe na gron foe den fosi toe foe den tin komando di ben meki bekenti na a bergi Sinaï ini Arabia gi na Israël naatsi.
2. Foe sainde na naatsi disi ben de na a ten dati na grontapoe wan organisatie di no ben abi hen speri?
2 Di na Theocratisch Rigeriman foe den ben tjari den 40 jari baka dati go ini na Pramisi Kondre, na theocratische rigeri ben tan tapoe den. Den hé-priester ben teki na presi foe Gado alaten, aladi ini moeiliki ten kroetoebakra ben opo kon foe teki presi leki rigeriman foe na Theocraat di no ben de foe si. Na so fasi na naatsi disi ben de wan theocratisch naatsi di ben de foe si. No wan tra presi tapoe grontapoe so wan sani ben de!
3, 4. (a) Foe sainde na Israëlitisch organisatie ben tan theocratisch, srefi baka na opo foe wan grontapoe kownoekondre? (b) Fa Samuël ben taki foe na tan na theocratisch organisatie?
3 Nanga victori na theocratie dati di ben de leki wan eksempel ben go na fesi, wans den afkodré rigeri di ben lontoe den ben doe dorodoro moeiti foe pori den. Srefi a ben tan, baka di sensi na jari 1117 bifo G.T. den ben poti libisoema kownoe tapoe na naatsi Israël. Fa disi ben kan? Foedi na libisoema kownoe ben de soso leki na soema di ben teki presi gi na troe troe Rigeriman, na hemel Theocraat. Jehovah no ben komoto libi hen reti tiri leki wan bakapisi foe wan ofoe tra democratisch actie foe na pipel. Democratische verkiezingen no ben hori, foedi Gado ben handri akroederi na reti foe hen foe poti wan kownoe di den e si tapoe na naatsi, di a ben fri leki wan goedoe foe hen. Disi e kon na krin foe den wortoe foe Samuël, di ben de na a ten dati kroetoebakra ini Israël:
4 „Jehovah no sa libi hen pipel foe hen bigi nen ede, foedi Jehovah ben teki hen tapoe hen foe meki joe de hen pipel . . . Frede soso Jehovah, en joe moe dini hen ini waarheid nanga joe heri ati; bikasi loekoe, sortoe bigisani a ben doe gi joe. Ma efoe joe doe san ben ogri, a sa figi joe poeroe, joe nanga joe (libisoema) kownoe.” — 1 Sam. 12:22-25.
5, 6. (a) Foe sainde den wortoe foe Samuël de wan dekati gi troe kristen ini disi ten? (b) Sortoe toe warskow eksempel wi abi ini owroeten ini Israël, di kan meki Jehovah libi en pipel di a orga? (c) Fa a psalmsingiman ben tjari den firi kon ondro wortoe foe na fikapisi ini katibo, di ben wani srefi srefi dati wan theocratisch organisatie ben sa kon baka?
5 Fa disi de ini disi ten wan prakseri di e gi dekati gi ala den soema, di „Jehovah ben teki hen na tapoe hen foe meki (den) de hen pipel”! Efoe wi tan dini hen nanga wi heri ati ini waarheid, a no sa libi wi noiti. Wi abi wan warskow eksempel di kan kibri wi foe de ontrouw na hen. Pe? Ini na tori foe den tin lo foe Israël mindri den kownoe, di densrefi ben teki poti èn di ben doe ogri sani. Jehovah ben libi den nanga den kownoe di ben de foe si. Disi ben wani taki wan nationale ongolokoe gi den. Leki katiboman den ben tjari den go na a kondre foe na grontapoemakti Assyria, en na tin-lo-kownoekondre noiti moro ben opo baka. So wan srefi ongolokoe ben miti na kownoekondre foe den toe tra lo foe Israël. Na kownoe foe den foe na kownoe famiri foe David ben sidon ini na mamafoto Jeruzalem tapoe san ben kari „Jehovah troon” (1 Kron. 29:23). Baka di a grontapoe-makti Babylon ben pori Jeruzalem ini 607 bifo G.T., den ben tjari den djoe go na Babylonia. Akroederi na bosroiti foe na Bigi Theocraat, Jehovah, na gebortoekondre foe den di Gado ben gi den, na kondre Juda, ben didon 70 jari langa foe soso. Na theocratisch organisatie di ben de foe si no ben de moro. Wan getrouw fika-pisi ben angri srefi srefi dati so wan theocratisch organisatie ben kon baka. A psalm-singiman ben tjari den firi kon so ondro wortoe:
6 „Foe taki foe joe sé, o Jehovah, joe sa tan te ten di no abi kaba, en na memre na joe sa de foe pikin foe pikin. Joesrefi sa opo tanapoe, joe sa sori sari-ati gi Sion, bikasi a de na ten foe sori boen-ati gi hen, bikasi na vaste ten kon kaba. Bikasi joe knegti ben feni wan prisiri ini hen ston en tapoe hen doti den ben gi den boen-ati. En den naatsi sa frede na nen foe Jehovah, en ala den kownoe foe grontapoe joe glori. Bikasi Jehovah sa bow Sion troe troe; a moe kon ini hen glori. A sa gi jesi na a begi foe den di no abi no wan soema en a no sa veragti na begi foe den.” — Psalm 102:12-17.
7. (a) Fa Jehovah ben sori dati a no ben veragti den firi foe na berouwvol fika-pisi gi na theocratische organisatie? (b) Fa Jehovah ben sori hen theocratische organisatie tapoe na fikapisi di a ben tjari kon baka?
7 A de sori troe troe tapoe warderi gi Jehovah organisatie te srefi wan berouwvol soema foe taki hen so, e feni srefi wan prisiri ini hen „ston” en e poti hen boen-ati tapoe na „doti” foe hen. Jehovah no ben veragti so wan warderi foe na sé foe katiboman ini Babylon. Na a kaba foe na 70-jari pori foe Sion, Jeruzalem, a pai den foe na fasi disi foe den foe meki den kon fri. A ben tjari den go baka ini den gebortoe kondre foe aanbegi drape baka theocratisch en ini soifrifasi. A ben de tan den Theocratisch Kownoe, aladi na Jeruzalem di ben bow baka no ben de wan boen vertegenenwoordiger foe hen. Ma den salfoe priester di a ben verkisi, ben bigin doe na theocratisch dienst ini na tempel foe aanbegi di ben bow baka. Disi ben pasa, aladi den heiden grontapoe-makti leki fa Jehovah ben bosroiti, ben abi makti tapoe den. Solanga, nanga jepi foe na seti dati, Jehovah ben sori hen theocratisch rigeri tapoe hen pipel di a ben verkisi. A no ben libi den.
8. (a) Soema ben de na moro prenspari fesiman foe theocratische organisatie en fa? (b) Ma fa a ben gersi dati theocratische organisatie tapoe grontapoe ben kisi wan lasi foe teego?
8 Den wan di ben abi lobi gi na theocratische organisatie, ben loekoe foe a kon en foe a sori hen srefi tapoe wan glorifasi na a ten foe na kon foe na pramisi „Siri foe David”, da foe taki na Messias di ben taki na fesi (Rom. 1:3). Na Messias disi, di na Theocratische Rigeriman Jehovah, ben seni, ben kon ini na persoon foe Jezus Kristus. No wan soema ini na heri universum ben lobi theocratische organisatie moro leki hen. Foe datede nanga dekati a ben préki „na kownoekondre foe hemel”, „na kownoekondre foe Gado” alape ini na kondre foe na Israël di ben drai baka na den kondre (Matt. 4:17; Mark. 1:14, 15). Foe na hori di a ben hori vaste na a theocratische organisatie, meki den ben kiri hen tapoe na paschadé foe na jari 33 G.T. leki martelaar. Nanga na dede foe hen, den ben tapoe na sten, di ben préki getrouw na boen njoensoe foe Gado Kownoekondre. Ini den pisi foe dri dé a ben gersi leki na theocratische organisatie ben kisi wan teego lasi. Bikasi loekoe! Na moro prenspari vertegenwoordiger foe hen ben didon kowroe en sondro bewégi ini na grebi.
TEEGO VICTORI GI NA THEOCRATIE
9. Fa Jehovah organisatie ben kisi wini, en na soema disi ben meki bekenti foe a fosi tron?
9 Ma na bigi organisator foe theocratische organisatie noiti soema kan wini hen. Na theocratische organisatie na ini hemel di no de foe si ben tan loyaal na hen en ben wakti te leki Jehovah srefi ben sa doe na fosi stap foe krin hensrefi foe fowtoe. A ben doe na stap disi tapoe na di foe dri dé foe na ofrandi dede foe hen Pikin ini Jeruzalem. Disi ben tjari victori gi hen theocratische organisatie, bikasi a ben doe na moro bigi wondroe foe hen nanga na wiki komoto na dede foe na moro prenspari fesiman foe theocratische organisatie, hen loyaal Pikin, Jezus Kristus. Den santa gadri ini hemel ben prisiri makandra nanga Jehovah. Tapoe na srefi dé dati ooktoe den wan di ben de na grontapoe en lobi theocratische organisatie, ben kisi na okasi foe prisiri ini na victori foe na Bigi Theocraat, di hen égi Pikin ben sori hensrefi na den leki wan soema di ben opo baka na dede.
10. Fa na moro bigi kenki ben sa kon tapoe na tori foe religie te leki na ten dati?
10 Now na moro bigi kenki ben sa kon tapoe na tori foe religie. Ondro den gridi fesiman foe kerki na naatsi Israël ben trowe theocratische organisatie. Nanga reti foe datede Jehovah ben trowe na zichtbare organisatie dati en a ben meki wan kaba kon na a djoe tiri. Ma a no ben trowe na pikin fikapisi foe aparti Israël soema di ben poti bribi dorodoro ini Jezus en di ben waka na hen baka leki na Messias, „na Siri foe David”. A ben poti den abra go ini wan njoen zichtbare organisatie. Disi ben pasa tapoe na dé foe pinksteren, na di foe 50 dé foe sensi Kristus wini dede. Jehovah ben gebroiki na Pikin disi di ben opobaka foe dede foe kanti santa jeje tapoe discipel di ben wakti ini Jeruzalem. Na presenti disi foe na santa jeje, di Joël 2:28, 29 ben taki foe hen na fesi, no ben gi na a naatsi Israël di ben njan pinksterfesa, ma a ben gi na den discipel foe Jezus di ben wakti. Disi ben sori tapoe wan bigi kenki tapoe na tori foe religie. Nanga disi joe ben kan sabi na njoen, zichtbare theocratische organisatie.
11. Fa na njoen theocratische organisatie foe Jehovah tapoe wan victori fasi ben tan go doro na fesi?
11 Officieel wan stampoe ben poti tapoe na kenki tapoe na tori foe religie, di dritenti-na-sébi jari na baka, Jeruzalem ben kisi pori foe den Romein soema en den djoe priester ben poeroe foe teego ini na diniwroko foe Jehovah. Disi ben de wan marki dati Jehovah ben trowe na djoe theocratische organisatie na grontapoe en wan njoen kristen bedeling, ofoe foe taki hen tra fasi wan njoen kristen tiri, ben bigin (Ef. 1:10; Statenvertaling). Hen njoen theocratische organisatie tan go tapoe wan victori fasi na fesi, aladi na Romein Kownoekondre ben doe ala sortoe ogri-ati moeiti foe poeroe hen krin krin na pasi nanga jepi foe vervolgoe.
12. San na Watch Tower foe 1 december 1894 ben taki foe na fasi fa na fosi-eeuw kristen gemeente ben orga, sodati na evangelie ben sa kan préki ini na kristen bedeling disi?
12 Na Watch Tower (Wachttoren) foe 1 december 1894 ben taki foe na kenki disi foe na djoe organisatie go na a kristen organisatie ini den dé foe Jezus Kristus nanga hen apostel, tapoe bladzijde 384, ini paragraaf 2, foe na tori foe na kotiwroko foe djoe bribiman ini den dé foe den apostel: „Ma soleki na orga foe na wroko foe na njoen Evangelie-bedeling, no de wan pisi foe na kotiwroko foe na owroe djoe bedeling, na so toe na kotiwroko foe disi ten ofoe na kotiwroko foe na Evangelie-bedeling de aparti foe na wroko foe na njoen Millennium-bedeling, di e kon now krosibé.”
13. Fa na theocratisch fasi foe den discipel ben kon na fesi ini san den apostel ben taki ini na Sanhedrin-kroetoe ini Jeruzalem?
13 Na „orga” foe na „kerki” gemeente leki wan pipel di kisi salfoe foe nanga jepi foe na geest ben tan go doro na fesi foe sensi Pinksteren, di ben de na bigin foe na kristen bedeling ofoe kristen tiri. Leki wan jeje Israël a ben tjari kon ini wan njoen verbontoe nanga Gado. Na theocratische fasi foe na gemeente dati foe Kristus discipel ben kon na fesi ini den piki di den ben gi na a kerki kroetoe foe Jeruzalem, di na kroetoe dati ben aksi foe den, dati den no moe taki moro langa foe na Pikin foe Gado di ben opobaka na dede. Na a kroetoe dati ben abi na fowtoe foe na trowe foe na broedoe foe Jezus. Nanga dekati den apostel ben taki: „Kroetoe gi oensrefi ofoe a de reti ini Gado ai foe gi jesi na oenoe moro leki na Gado. Ma foe wi sé, wi no kan tapoe foe taki foe den sani di wi ben si en jere.” „Wi moe arki Gado leki Rigeriman moro leki libisoema. Na Gado foe wi fositen tata ben wiki Jezus na dede, di oenoe ben kiri en anga hen na wan oedoe. Hen Gado ben poti hé na hen reti-anoe sé leki na Moro Prenspari Gevolmachtigde en Jepiman, foe gi lsraël na okasi foe kisi berouw nanga pardon foe sondoe. En wi de kotoigi foe den afersi disi, soleki na santa jeje, di Gado ben gi na den di e gi jesi na Hen leki Rigeriman.” — Tori foe den Apostel 4:19, 20; 5:29-32.
14. (a) Fa den fosi-eeuw kristen ben sori wan bribi di e wini grontapoe en nanga sortoe winimarki? (b) San ben gro kon, ini den gemeente, aladi warskow ben gi nanga santa jeje, ma na theocratische organisatie ben gwe foe alaten?
14 Joe ben kan kon sabi den fosi-eeuw kristen dati nanga na bribi di e wini grontapoe. Den no ben sjen foe teki pina ondro na nen foe kristen ofoe messias-soema, bikasi na geest foe glori, ja a geest foe Gado, ben de tapoe den (1 Petr. 4:14; Tori foe den Apostel 11:26). Na getrouw prékiwroko foe den en na dopoe foe den foe njoen discipel ben meki njoen gemeente djompo kon na doro inisé soleki na dorosé foe na bigi Romein Kownoekondre. Ma ete a ben de so, dati den ben de wan zichtbare organisatie, di ala den memre foe hen ben aanbegi na Bigi Theocraat, Jehovah. Bakaten wan fadon komoto na bribi ofoe kerki oproeroe ben kon, aladi Jezus Kristus nanga hen discipel di ben skrifi ondro na krakti foe santa jeje ben warskow foe dati. Fa disi ben kan? Foedi na „soema foe kroektoedoe”, na „pikin foe pori” di den ben taki foe hen a fesi, ben poti hemsrefi leki wan gado ini na kerki organisatie di ben fadon komoto na bribi. Hen no ben erken no wan tra gado, srefi no na troe Theocraat Jehovah (2 Thess. 2:3-12; Matt. 13:24-43). Moro leki 15 eeuw na fadon komoto foe bribi disi ben de basi, aladi opregti hervormers ben doe moeiti foe loesoe densrefi foe na makti foe na „soema disi foe kroektoedoe di meki hensrefi wan gado. Den ben kiri na theocratische organisatie now foe alaten? Leki fa na Wortoe foe Gado sori, dan disi no sa kan pasa noiti.
NA DISITEN THEOCRATISCHE ORGANISATIE
15. Foe sainde den ben bigin foe meki ini juli 1879 wan tijdschrift kon na doro, di ben sori dati den ben poti den vertrouw tapoe Jehovah?
15 Na a mindri foe na 19de eeuw, dan na „soema foe kroektoedoe”-klasse ben opo foeroe kerki organisatie ini na kristenheid. Den sekte disi ben gi densrefi foeroe sortoe nen foe sabi den. Na ini na moeiti foe kisi kristen balans nanga wan gosontoe inzicht meki wan pikin gemeente foe opregti bijbelondrosoekoeman ben poeroe densrefi poti aparti foe ala kerki organisatie foe na kristenheid. Den ben drai baka gi na sekte kerki-leri foe hen en den waka baka na eksempel foe den fosi-eeuw Berea-soema, di ben ondrosoekoe aladé den Boekoe foe kisi na bribi foe den apostel (Tori foe den Apostel 17:10, 11). Na gemeente disi di ben gi hen srefi dorodoro abra na Gado, ben span hensrefi krakti foe feti gi na verloesoe-paiman foe Jezus Kristus nanga hen pramisi „de noja” ini Gado Kownoekondre. Ini juli 1879 wan bigin ben meki nanga na kon na doro foe wan tijdschrift, di ben poti vertrow tapoe Jehovah foe kisi jepi.
16. Leki fa na Watch Tower foe februari 1884 ben taki, dan foe sortoe organisatie na onsektarische gemeente disi ben taki den de wan pisi foe hen?
16 Na gemeente disi di wi kari dja na fesi, ben proberi opregti foe de warti leki Jehovah zichtbare organisatie en wrokosani. Foe datede meki a hori hensrefi fri foe meki mati nanga den sektarische organisatie foe na kristenheid, en so toe foe den politiek organisatie foe na grontapoe disi. Na kristen gemeente dati ben skrifi foe dati ini na nomroe foe februari 1884 foe hen officieel tijdschrift Watch Tower (Wachttoren) en a taki:
”Njoen lésiman ini ala pisi foe na kondre e aksi alaten: Nanga sortoe nen oenoe e kari oensrefi? Oen de oorspronkelijk ’Baptisten’? Oen de ’zendingsbaptisten’? Oenoe de ’universalisten’? Oen de ’Adventisten’? Oen de oorspronkelijk ’Methodisten’? en so moro fara. Wi ben proberi difrenti tron foe meki kon na krin na positie foe wi en wi e proberi foe doe disi baka ini wan toe wortoe.
„Wi no de no wan pisi foe no wan enkri grontapoe organisatie; soboen efoe joe ben sa kari na heri lijst foe nen foe sekte dan na ala den nen wi sa piki NO. Wi e heri soso na a hemel organisatie — ’di nen skrifi ini hemel’ (Hebr. 12:23; Luk. 10:20). Ala santawan di e libi now ofoe di ben libi ini den eeuw di pasa, de wan pisi foe wi kerki-organisatie; den de alamala Wàn Kerki en Masra no e erken no wan trawan. Ibri grontapoe organisatie di e tapoe pikinso na wanfasi disi foe den santawan, de foe datede kontrari den leri foe den Boekoe en na wani foe Masra — ’dati den kan de WAN’ (Joh. 17:11).”
17. (a) Sortoe sani na Bigi Babylon ben doe wantron wantron baka na kaba foe den ten foe den heiden nanga na organisatie foe den troe dienstknegti foe Gado di no de wan pisi foe na grontapoe? (b) San e sori dati na Bigi Babylon no ben kiri na theocratische organisatie foe na ten dati?
17 Na kon krosibé foe na kaba foe den ten foe den heiden ben meki a de moro tranga fanowdoe gi na dopoe gemeente disi foe Kristus foetoeboi foe hori densrefi krin krin aparti foe grontapoe organisatie en so toe foe na kristenheid. „Komoto foe na Bigi Babylon!” (Openb. 18:4). Na kaba foe den ten foe den heiden ben kon na a joisti ten soleki na verwakti ben de en na fosi Grontapoefeti ben marki hen (Luk. 21:24). Na bigi Babylon ben si wan moi kans. Na kristenheid nanga hen „soema foe kroektoedoe”-klasse leki na wrokosani di a de gebroiki, ben man foe tjari na organisatie foe Gado troe foetoeboi, di no de foe disi grontapoe, go ini strafoe-oso nanga katibo. Na préki foe na boen njoensoe foe na kownoekondre di ben opo ini anoe foe Kristus ben kisi kwinsi te leki a ben tron wan sani di e taki safri. A gersi leki wan kaba ben kon no a kownoekondre-préki-organisatie. Ma disi ben de so? Na bigi Babylon ben abi wan wini di ben tan? Na howpoe foe na opobaka foe na troe theocratische organisatie ben gwe foe alaten? Moro leki toe miljoen theocratisch kristen ini ala pisi foe na grontapoe sa piki na aksi disi ini moro leki 190 tongo nanga NONO! En nanga reti den de doe disi, bikasi na matifasi foe den nanga Jehovah no ben sa kan de efoe na zichtbare theocratische organisatie no ben kon njoen na libi baka en ben de nanga moro krakti nanga tranga leki sortoe ten na fesi.
18. (a) Nanga sortoe spesroetoe doel na organisatie foe jeje Israël soema, na fika-pisi, ben kon fri foe na Bigi Babylon, soleki densrefi ben kon si? (b) Sortoe organisatorische nen den ben teki ini 1931 en foe sainde?
18 Ini 1919, di na kristenheid foe baka na feti ben taki dati den teki na Volkenbond leki na politiek nen foe na kownoekondre foe Gado tapoe grontapoe, na fika-pisi foe jeje Israël soema di ben orga njoen baka ben wégri foe teki na Volkenbond disi di libisoema ben meki foe teki presi foe Gado kownoekondre. Den ben taki dati den ben teki na troe troe wan, na njoen gebore kownoekondre foe Gado ini anoe foe Kristus. Moromoro den ben verstan dati na wan enkri doel foe sainde den ben kon fri foe na Bigi Babylon ben de, dati den ben sa de kotoigi, no wawan kotoigi foe Jezus Kristus di ben poti njoen tapoe a troon, ma kotoigi leki fa Jesaja 43:10, 12 e taki hen. Ini 1931 a boekoe Vindication (Kon reti) ben kon na doro. Kommentaar ben gi ini na boekoe disi tapoe na profétitori foe Ezechiël, pe Gado e taki moro 60 tron, dati libisoema en den natie en srefi hen égi dienstknegti sa sabi „dati mi na Jehovah”. Na a srefi ten foe na njoen boekoe dati, den ben teki wan organisatorische nen di ben fiti. Jesaja 43:10 ben gi den a nen disi: Jehovah Kotoigi!
19. (a) Sortoe tiri den ben wan abi ini den grontapoe organisatie en fa den ben bigin foe bow sani? (b) San den ben si leki na moro prenspari stré-aksi gi hemel nanga grontapoe en oten?
19 Wi moe bribi dati na troe Gado ben sa warderi en blesi na loyaal fasi dati foe den? San Jehovah no ben kan doe, spesroetoe te den ben libi akroederi na nen dati foe de troe troe Hen kotoigi! Den ben wani dati a organisatie foe den foe doe na wroko foe gi kotoigi, ben moe abi leki marki Theocratie, dati wani taki, wan Rigeri foe Gado. Ini toe artikel foe na tori „Organisatie”, di ben kon ini den nomroe foe The Watchtower (Na Wachttoren) foe 1 nanga 15 juni 1938, den ben taki na publiki dati den wani dati. Den ben handri akroederi nanga dati foe bow sani ini den gemeente foe den tapoe theocratisch fasi. Mindri foe na Tweede Grontapoefeti en dati ben de tapoe na moro bigi congres foe Jehovah Kotoigi di ben hori te leki na jari dati, ben meki moro fara bekenti na kon reti foe na universele rigerimakti foe Jehovah de na moro prenspari stré-aksi gi hemel nanga grontapoe.
20. (a) Fa sani ben poesoe den ini na Tweede Grontapoefeti foe pasa na moro takroe vervolgoe, en san dati ben tjari kon dati den ben komoto ini na stré leki winiman? (b) San ben de fanowdoe foe ben teki prati ini na wini dati en soema ben bewijsi dati den abi dati?
20 Na lostoe foe teki makandra prati nanga Jezus Kristus ini na kon reti foe Jehovah universele soevereiniteit, ben de wan spesroetoe tranga troesoe krakti ini na libi foe Jehovah Kotoigi. A ben tranga den foe pasa den moro takroe vervolgoe di ben miti Jehovah Kotoigi oiti ini na ten foe a Tweede Grontapoefeti. Jehovah zichtbare organisatie komoto ini na stré baka soboen leki winiman foe na kon reti foe Jehovah. San ben de fanowdoe gi dopoe soema di ben gi densrefi abra foe teki prati ini na wini dati? Bribi ini na organisatie foe Jehovah. Na fika-pisi foe jeje Israël soema nanga den theocratische mati foe den, na „bigi ipi” foe Kristus „tra skapoe” ben abi so wan victori bribi? Ja!
21. Foe sainde Jehovah Kotoigi ben hori na bribi ini Jehovah theocratische organisatie ini den dri-tenti-na-fo jari di pasa sensi na Tweede Grontapoefeti?
21 Sensi na kaba foe na Tweede Bigi oorlog dati, pe bijna ben komoto na pasi zichtbare organisatie foe Jehovah, so wan dri-tenti-na-fo moeiliki jari ben pasa. Tog Kotoigi nanga tranga lobi ben hori vaste na a bribi foe den ini Jehovah organisatie. Den sabi sortoe wan foe ala den organisatie di de na grontapoe, di na Almakti Gado ben gebroiki foe gi na moro bigi kotoigi foe hen nen nanga kownoekondre ini na heri kristen historia. — Matt. 24:14.
22, 23. (a) San o de na moro bigi kenki ini religie ini na heri libisoema historia? (b) San wi sa doe leki wan bewijsi dati wi bribi, dati Jehovah no sa libi hen pipel en fa a sa pai na fasi disi?
22 Now wi, leki Kotoigi, tanapoe fesi wan ten di e kon di sa meki wi si na moro bigi kenki foe religie ini na libisoema historia. Ja, wan kenki di sa de moro froewondroe leki di foe 33 G.T. ini na ten foe den apostel. Na wrokosani di Didibri ben gebroiki foe vervolgoe religie, na kristenheid, Jehovah Gado nanga Jezus Kristus sa trowe krin krin en sa fadon broko. Nono, moro leki dati, na kerki mama foe na kristenheid, Na Bigi Babylon, na heri grontapoe kownoekondre foe falsi religie, sa fadon broko. Na a tra sé, Jehovah Kotoigi di den vervolgoe sa kisi grani na fesi foe a heri hemel nanga grontapoe, leki wan bigi publiki bewijsi, dati Gado ben teki den en feni den boen. Den fositen politiekmati foe na Bigi Babylon di ben boboi hen, sa stré te den weri nanga den Kotoigi foe Jehovah disi di ben kisi reti. Den sa lasi na stré tegen na Theocratie!
23 Foe datede, fa na fasi foe wi moe de now? Wan reden de gi wi foe lasi wi bribi ini Jehovah zichtbare organisatie, foedi moeilijkheid e kon moro foeroe ini disi grontapoe? Den di e bribi dati Jehovah no sa libi hen getrouw kotoigi, e piki: „Kwetkwet”! Leki wan bewijsi foe so wan bribi, den sa hori nanga na organisatie disi en wroko makandra nanga hen sondro foe meki den anoe saka. Na bribi foe wi di no kan seki, sa kisi na paiman foe victori en na kroon foe libi!