Kibri joesrefi leki wan pisi foe Gado organisâsi
„A nen foe Jehovah na wan tranga toren. Na dja a regtfardikiwan e lon go na ini èn e kisi kibri.” — ODO 18:10.
1. Soleki fa Jesus ben begi, dan na ini sortoe moeilek situwâsi kresten de?
SJATOE bifo Jesus dede, a ben begi en hemel Tata foe a boen foe den bakaman foe en. A ben broko en ede nanga den na wan lobi-ati fasi, di a ben taki: „Mi gi den a wortoe foe joe, ma grontapoe no ben wani si den na ai, bika den no de wan pisi foe grontapoe, neleki fa mi no de wan pisi foe grontapoe. Mi e begi joe, foe no teki den poeroe na grontapoe, ma foe loekoe den foe a godelowsoewan ede” (Johanes 17:14, 15). Jesus ben sabi taki grontapoe ben sa de wan kefalek ogri presi gi kresten. Grontapoe ben sa sori taki den no wani si den na ai foe di grontapoe ben sa lei gi den èn ben sa froefolgoe den (Mateus 5:11, 12; 10:16, 17). Grontapoe ben sa de so srefi wan fonten foe kroektoedoe. — 2 Timoteus 4:10; 1 Johanes 2:15, 16.
2. Pe kresten kan feni wan presi foe kibri na jejefasi?
2 A grontapoe di no ben sa wani si den kresten na ai, ben de a grontapoe foe den sma di drifi komoto na Gado èn di de na ondro a makti foe Satan (1 Johanes 5:19). A grontapoe disi bigi srefisrefi moro a kresten gemeente, èn Satan srefi abi krinkrin moro makti leki iniwan libisma. Foe dati ede, a si di grontapoe no wani si kresten na ai, na wan troetroe kefar. Pe den bakaman foe Jesus kan feni kibri na jejefasi? Wan froeklari na ini The Watchtower foe 1 december 1922, ben gi a piki: „Wi de now na ini na ogri dei. A feti e feti na mindri Satan organisâsi nanga Gado organisâsi. A de wan kefalek hebi feti.” Na ini a feti disi, Gado organisâsi na wan presi foe feni kibri na jejefasi. A wortoe „organisâsi” no skrifi na ini bijbel, èn na ini a pisi ten foe den jari 1920 te go miti 1929, dan den wortoe „Gado organisâsi” ben de njoen wortoe. San na a organisâsi disi dan? Èn fa wi kan feni kibri na ini na organisâsi disi?
Na organisâsi foe Jehovah
3, 4. (a) Soleki fa wan wortoeboekoe nanga The Watchtower e taki, dan san na wan organisâsi? (b) Na sortoe fasi wi kan kari na internationaal matifasi foe Jehovah Kotoigi wan organisâsi?
3 Wan organisâsi na „wan skin di orga” soleki fa a Concise Oxford Dictionary e taki. Nanga dati na prakseri, wi e froestan taki foe di den apostel ben orga den fosi jarihondro kresten na ini gemeente na ondro a tiri foe a tiri skin na Jerusalem, dan a de joisti foe kari a „brada libimakandra” dati wan organisâsi (1 Petrus 2:17). Na ini a ten disi, Jehovah Kotoigi abi wan srefi sortoe organisâsi stroektoeroe. A wánfasi foe a fosi jarihondro skin ben kon tranga nanga jepi foe „presenti na ini libisma”, soleki „skapoeman nanga leriman”. Sonwan foe den sma disi ben rèis foe a wan gemeente go na a tra gemeente, ala di trawan ben de owroeman ini wan gemeente (Efeisesma 4:8, 11, 12; Tori foe den Apostel 20:28). Den srefi sortoe „presenti” e tranga a wánfasi foe Jehovah Kotoigi na ini a ten disi.
4 The Watchtower foe 1 november 1922 ben taki foe a wortoe „organisâsi”: „Wan organisâsi na wan libimakandra foe sma di wani doro wan spesroetoe marki.” The Watchtower ben tjari kon na krin moro fara taki te wi e kari Jehovah Kotoigi wan organisâsi, dan dati no e meki den tron „wan sekte soleki fa sma e gebroiki a wortoe disi, ma a wani taki nomo dati den Bijbel Ondrosoekoeman [Jehovah Kotoigi] e meki moeiti foe doe san Gado abi na prakseri èn foe doe en neleki fa Masra e doe ala sani na wan orde fasi” (1 Korentesma 14:33). Na apostel Paulus ben sori taki den kresten na ini den dei foe en ben handri na wan orde fasi toe. A ben teki den salfoe kresten gersi nanga wan libisma skin di abi foeroe pisi, pe ibri pisi e doe san a kisi foe doe so taki a skin kan wroko na wan joisti fasi (1 Korentesma 12:12-26). Dati na wan toemoesi moi agersifasi foe wan organisâsi! Foe san ede den ben orga kresten? Foe doe „san Gado abi na prakseri”, foe doe a wani foe Jehovah.
5. San na Gado organisâsi di wi kan si nanga ai?
5 Bijbel ben taki na fesi taki troe kresten ben o de na ini wánfasi na ini a ten disi, taki den tjari den kon makandra na ini wan „kondre”, leki wán „nâsi”, pe den ben sa „skèin leki tjariman foe leti na ini grontapoe” (Jesaja 66:8; Filipisma 2:15). Now na „nâsi” disi di Gado orga abi moro leki feifi nanga afoe miljoen sma (Jesaja 60:8-10, 22). Ma dati a no ala ete foe Gado organisâsi. Den engel de ini a tori toe.
6. Foe taki en moro fini, soema nanga soema de wan pisi foe Gado organisâsi?
6 Foeroe sortoe engel de di e wroko makandra nanga den libisma foetoeboi foe Gado (Genesis 28:12; Danièl 10:12-14; 12:1; Hebrewsma 1:13, 14; Openbaring 14:14-16). Foe dati ede a fiti taki The Watchtower foe 15 mei 1925 ben taki: „Ala santa engel na wan pisi foe Gado organisâsi.” Na tapoe foe dati, a ben taki: „Masra Jesus Krestes de na edeman foe Gado organisâsi èn a abi ala tirimakti” (Mateus 28:18). Foe dati ede, foe taki en moro fini, ala den wan di de na ini hemel èn di de na grontapoe èn di e wroko makandra foe doe Gado wani, de wan pisi foe Gado organisâsi. (Loekoe a boksoe.) Dati na wan kefalek moi grani foe de wan pisi foe na organisâsi disi! Èn a de wan prisiri sani srefisrefi foe loekoe go na a ten te ala libi kriatoeroe na ini hemel èn na grontapoe sa orga foe prèise Jehovah Gado na ini wánfasi! (Openbaring 5:13, 14) Ma san na a kibri di Gado organisâsi e gi na ini a ten disi?
Kisi kibri na ini Gado organisâsi — Fa?
7. Fa Gado organisâsi e kibri wi?
7 Gado organisâsi kan jepi wi foe kibri wi teige Satan nanga den triki foe en (Efeisesma 6:11). Satan e kwinsi, e froefolgoe, èn e tesi den anbegiman foe Jehovah nanga soso wán sani na prakseri: foe hari den poeroe foe ’a pasi di den moesoe waka’. (Jesaja 48:17; teki gersi Mateus 4:1-11.) Wi no sa man wai pasi krinkrin gi a feti di Satan wani feti wi na ini a seti foe sani disi. Ma wi krosibei matifasi nanga Gado nanga en organisâsi e tranga wi èn e kibri wi èn na so fasi a e jepi wi foe tan tapoe „a pasi”. Leki wan bakapisi foe dati, wi no e lasi a howpoe foe wi.
8. Fa Jehovah organisâsi di wi kan si nanga ai e jepi den foetoeboi foe en na grontapoe?
8 Fa na organisâsi foe Gado e gi a kibri disi? Na a fosi presi, wi abi a jepi di noiti e misi foe den jeje foetoeboi foe Jehovah. Di Jesus ben de na ondro hebi kwinsi, dan a ben kisi jepi foe wan engel (Lukas 22:43). Di Petrus ben de ini kefar foe dede, dan wan engel ben froeloesoe en na wan wondroe fasi (Tori foe den Apostel 12:6-11). Ala di den sortoe wondroe dati no de na ini a ten disi, tokoe Jehovah pipel kisi a pramisi taki den sa kisi jepi foe den engel na ini a preikiwroko foe den (Openbaring 14:6, 7). Foeroetron den abi krakti di e pasa san de normaal te den e kisi foe doe nanga moeilek situwâsi (2 Korentesma 4:7). Boiti dati, den sabi taki „na engel foe Jehovah e seti ensrefi lontoe den wan di e frede en, èn a e froeloesoe den”. — Psalm 34:7.
9, 10. Fa wi kan taki dati „a nen foe Jehovah na wan tranga toren”, èn fa a gronprakseri disi fiti gi a heri organisâsi foe Gado?
9 Jehovah organisâsi di wi kan si nanga ai, de wan kibri toe. Fa? Na Odo 18:10 wi e leisi: „A nen foe Jehovah na wan tranga toren. Na dja a regtfardikiwan e lon go na ini èn e kisi kibri.” Disi no wani taki dati te wi e kari a nen foe Gado nomo ibri tron baka, dan dati sa gi wi kibri. Na presi foe dati, efoe wi e soekoe kibri na ini a nen foe Gado, dan dati e sori taki wi e poti wi froetrow na ini Jehovah srefi (Psalm 20:1; 122:4). Dati wani taki dati wi moesoe horibaka gi en soevereiniteit, hori den wet nanga gronprakseri foe en hei, èn bribi den pramisi foe en (Psalm 8:1-9; Jesaja 50:10; Hebrewsma 11:6). Dati wani taki so srefi foe dini Jehovah wawan. Soso den sma di e anbegi Jehovah na a fasi disi kan taki makandra nanga a psalm singiman: „Na ini [Jehovah] wi ati e prisiri; bika na ini en santa nen wi poti wi froetrow.” — Psalm 33:21; 124:8.
10 Now ala sma na ini Gado organisâsi di wi kan si nanga ai, e taki makandra nanga Mika: „Wi, foe wi sei, sa waka na ini a nen foe Jehovah, wi Gado, te ten di no skotoe, ija foe têgo” (Mika 4:5). A disiten organisâsi de lontoe „na Israèl foe Gado”, di den e kari na ini bijbel „wan pipel foe en nen” (Galasiasma 6:16; Tori foe den Apostel 15:14; Jesaja 43:6, 7; 1 Petrus 2:17). Foe dati ede, foe de wan pisi foe Jehovah organisâsi wani taki foe de wan pisi foe wan pipel di e soekoe èn e kisi kibri na ini Gado nen.
11. Na tapoe sortoe spesroetoe fasi Jehovah organisâsi e gi kibri na den wan di de wan pisi foe en?
11 Boiti dati, Gado organisâsi di wi kan si nanga ai de wan libimakandra di abi bribi, wan demakandra foe kompe bribiman di e jepi makandra èn e gi makandra deki-ati (Odo 13:20; Romesma 1:12). A de wan presi pe kresten skapoeman e sorgoe gi den skapoe, e gi deki-ati na den sikiwan nanga den wan di lasi-ati, èn e proeberi foe meki den wan di fadon, kon boen baka (Jesaja 32:1, 2; 1 Petrus 5:2-4). „A getrow èn koni srafoe” e gi „njanjan na a reti ten” nanga jepi foe na organisâsi (Mateus 24:45). A „srafoe” dati e gi den moro boen jeje sani — soifri sabi di gron tapoe bijbel èn di kan gi wan sma têgo libi (Johanes 17:3). Nanga jepi foe a tiri foe a „srafoe”, kresten e kisi jepi foe tan hori densrefi na hei moreel markitiki èn foe de „koni leki sneki èn tokoe sondro fowtoe leki doifi” na ini den kefalek ogri situwâsi di de lontoe den (Mateus 10:16). Èn den e kisi jepi ala ten foe abi „foeroe foe doe na ini a wroko foe Masra”, èn dati kaba de wan tranga kibri. — 1 Korentesma 15:58.
Soema na wan pisi foe Gado organisâsi?
12. Soema na wan pisi foe Gado en hemel organisâsi?
12 Foe di a kibri disi de gi den wan di de wan pisi foe Gado organisâsi, dan soema na den sma di de na ini na organisâsi? Foe a hemel organisâsi, wi sabi seiker san na a piki tapoe na aksi disi. Satan nanga den engel foe en no de moro na ini hemel. Na a tra sei, den getrow engel de drape ete „na ini gran kroetoe”. Na apostel Johanes ben si taki na ini den lasti dei „a Pikin Skapoe”, den Keroebim („den fo libi kriatoeroe”), nanga „foeroe engel” ben sa de heri krosibei na a kownoestoeroe foe Gado. Den 24 owroeman — di e prenki den salfoe kresten di de kaba na ini a hemel glori foe den — ben sa de nanga den toe (Hebrewsma 12:22, 23; Openbaring 5:6, 11; 12:7-12). A de krin taki den alamala na pisi foe Gado organisâsi. Ma na mindri libisma na afersi no de so krin foe si.
13. Fa Jesus ben sori soema na den wan di de wan pisi foe Gado organisâsi èn soema na den wan di no de wan pisi foe Gado organisâsi?
13 Jesus ben taki foe son sma di ben o taki dati den e waka baka en: „Foeroe sma sa taigi mi na a dei dati: ’Masra, Masra, a no na ini joe nen wi ben taki profeititori, èn a no na ini joe nen wi ben poeroe ogri jeje na sma tapoe, èn a no na ini joe nen wi ben doe foeroe krakti wroko?’ Èn tokoe mi sa taigi den na poebliki: Mi no ben sabi oenoe noiti! Oen komoto na mi fesi, oen wrokoman foe kroektoedoe” (Mateus 7:22, 23). Efoe wan sma na wan wrokoman foe kroektoedoe, dan seiker a no de wan pisi foe Gado organisâsi awansi san a e taki èn awansi pe a e go foe anbegi. Jesus ben sori toe fa foe kon sabi wan sma di de wan pisi foe Gado organisâsi. A ben taki: „A no ala sma di e taigi mi: ’Masra, Masra’, sa go na ini a kownoekondre foe hemel, ma na a sma di e doe a wani foe mi Tata, di de na hemel.” — Mateus 7:21.
14. Sortoe sani foe a wani foe Gado de wan plekti gi den wan di de wan pisi foe Gado organisâsi?
14 Foe dati ede, foe de wan pisi foe Gado organisâsi — di a „kownoekondre foe hemel” na a prenspari pisi foe en — dan wan sma moesoe doe a wani foe Gado. San na a wani foe en? Paulus ben sori wan toemoesi prenspari pisi foe dati di a ben taki: „[Gado] wani taki ala sortoe sma moesoe kisi froeloesoe èn kon kisi wan soifri sabi foe waarheid” (1 Timoteus 2:4). Efoe troetroe wan sma e soekoe foe kisi soifri sabi foe bijbel foe fiti dati na ini en libi èn foe prati dati na „ala sortoe sma”, dan a e doe a wani foe Gado (Mateus 28:19, 20; Romesma 10:13-15). A de a wani foe Gado toe taki den skapoe foe Jehovah moesoe kisi njanjan èn den moesoe kisi sorgoe (Johanes 21:15-17). Kresten konmakandra e prei wan prenspari ròl ini a sani disi. Wan sma di fri foe fisiti den sortoe konmakandra disi, ma tokoe no e doe dati, no e sori nofo warderi gi a presi foe en na ini Gado organisâsi. — Hebrewsma 10:23-25.
Matifasi nanga grontapoe
15. Sortoe warskow Jakobus ben gi den gemeente na ini a ten foe en?
15 So wan 30 jari baka di Jesus dede, dan Jakobus na afoe brada foe en, ben sori tapoe wan toe sani di kan tjari a presi di wan sma abi na ini Gado organisâsi kon ini kefar. A ben skrifi: „Oen soeta-oema, oenoe no sabi taki matifasi nanga grontapoe na feantifasi nanga Gado? Foe dati ede, a sma di wani foe de wan mati foe grontapoe, e meki ensrefi tron wan feanti foe Gado” (Jakobus 4:4). Wan feanti foe Gado no de wan pisi foe Gado organisâsi kwetikweti. Ma san na matifasi nanga grontapoe? A ben tjari kon na krin taki a abi difrenti fasi, soleki a kweki di wan sma e kweki takroe demakandra èn a abi di wan sma abi takroe demakandra. Moro fara, Jakobus ben poti prakseri na tapoe wan spesroetoe sani — wan fowtoe denki di e meki wan sma tjari ensrefi na wan fasi di no fiti.
16. San ben de moro ini a tori di Jakobus ben warskow taki matifasi nanga grontapoe na feantifasi nanga Gado?
16 Na Jakobus 4:1-3 wi e leisi: „Foe sortoe fonten orlokoe e komoto èn foe sortoe fonten feti e komoto di de na mindri oenoe? Den no e komoto foe a fonten disi, namkoe foe den lostoe foe a skin foe oenoe, di e feti nanga den memre foe oenoe? Oenoe e angri, ma tokoe oenoe no abi. Oenoe e tan kiri èn abi bigi-ai, èn tokoe oenoe no man kisi. Oenoe e tan strei èn e feti orlokoe. Oenoe no abi, bika oenoe no e aksi. Oenoe e aksi, èn tokoe oenoe no e kisi, bika oenoe e aksi nanga wan takroe prakseri, so taki oenoe kan gebroiki en gi den tranga lostoe di oenoe abi na skinfasi.” Baka di Jakobus ben skrifi den wortoe disi, dan a ben warskow gi a matifasi nanga grontapoe.
17. Na sortoe fasi „orlokoe” nanga „feti” ben de na ini a fosi jarihondro kresten gemeente?
17 Foeroe jarihondro baka di Jakobus dede, falsi kresten ben feti orlokoe èn ben kiri makandra troetroe. Ma Jakobus ben skrifi den fosi jarihondro memre foe „na Israèl foe Gado”, di ben o tron hemel ’priester nanga kownoe’ (Openbaring 20:6). Den no ben kiri makandra na ini troetroe feti. So boen, foe san ede Jakobus ben taki foe den sortoe sani disi na mindri kresten? We, na apostel Johanes ben kari iniwan sma di no ben e wani si en brada na ai, wan kiriman. Èn Paulus ben taki foe a fasi fa sma de, taki den ben o toeka nanga makandra èn a ben taki foe feantifasi na ini a gemeente, èn den sani dati a ben kari „feti” nanga „strei” (Titus 3:9; 2 Timoteus 2:14; 1 Johanes 3:15-17). A de krin taki na disi Jakobus ben abi na prakseri — te joe loekoe en boen, a lobi di den no ben lobi den kompe kresten. Kresten srefi ben handri nanga makandra neleki fa sma na grontapoe e handri nanga makandra foeroetron.
18. San kan meki taki kresten no e sori lobi gi densrefi èn e doe sani sondro lobi?
18 Foe san ede den sortoe sani disi ben e pasa na ini den kresten gemeente? Foe di sma ben abi fowtoe denki, soleki bigi-ai èn ’den eigi lostoe foe a skin’. Bigifasi, djaroesoe, nanga tranga lostoe foe kisi grani, kan broko a lobi-ati kresten matifasi na ini a gemeente toe (Jakobus 3:6, 14). Den sortoe denki disi e meki wan sma tron wan mati foe grontapoe, èn foe dati ede so wan sma e tron wan feanti foe Gado. No wan sma di e kweki den sortoe denki disi kan froewakti taki a sa tan wan pisi foe Gado organisâsi.
19. (a) Soema abi a moro bigi fowtoe te wan kresten e si taki fowtoe denki e opo kon na ini en ati? (b) Fa wan kresten kan wini fowtoe denki?
19 Soema wi kan gi a fowtoe efoe wi e si taki fowtoe denki e meki roetoe kon na ini wi ati? Satan? Gi wan pisi, ija. En na „a tiriman foe a makti foe a loktoe” foe a grontapoe disi, pe den sortoe denki disi de na ala sei (Efeisesma 2:1, 2; Titus 2:12). Ma foeroetron, a roetoe foe fowtoe denki de na ini wi eigi onvolmaakti skin. Baka di Jakobus ben warskow kresten gi a matifasi nanga grontapoe, a ben skrifi: „Oenoe e denki taki na foe soso a tekst e taki: ’A jeje di kon libi na ini wi e tan abi a tranga lostoe foe firi djaroesoe’?” (Jakobus 4:5) Wi alamala gebore nanga a tranga lostoe foe go doe san fowtoe (Genesis 8:21; Romesma 7:18-20). Ma wi kan feti a tranga lostoe dati efoe wi e erken den swakifasi foe wi èn e froetrow tapoe Jehovah foe jepi wi wini den swakifasi disi. Jakobus e taki: „A no-froedini boen-ati di [Gado] e gi, moro bigi [leki a tranga lostoe di wi abi foe abi bigi-ai]” (Jakobus 4:6). Tangi foe a jepi foe Gado santa jeje èn a jepi foe getrow kresten brada, èn a paiman foe Jesus froeloesoe-ofrandi, meki den swakifasi foe a skin no ben wini den getrow kresten (Romesma 7:24, 25). Den feni kibri na ini Gado organisâsi, èn den na mati foe Gado, no foe grontapoe.
20. Foe sortoe bigi blesi den wan di de wan pisi foe Gado organisâsi e njan boen?
20 Bijbel e pramisi: „Jehovah srefi troetroe sa gi en pipel krakti. Jehovah srefi sa blesi en pipel nanga vrede” (Psalm 29:11). Efoe troetroe wi de wan pisi foe a disiten „nâsi” foe Jehovah, en organisâsi di wi kan si nanga ai, dan wi sa kisi a krakti toe di a e gi èn wi sa njan boen foe a vrede di a e blesi en pipel nanga dati. A troe, a grontapoe foe Satan bigi krinkrin moro Jehovah organisâsi di wi kan si nanga ai, èn Satan tranga krinkrin moro wi. Ma Jehovah na a Almaktiwan. No wan sma noso sani kan wini a wroko krakti foe en. Den makti engel foe en toe de na ini wánfasi nanga wi te wi e dini Gado. So boen, ala di sma no wani si wi na ai, tokoe wi kan tanapoe kánkan. Neleki Jesus, wi kan wini grontapoe. — Johanes 16:33; 1 Johanes 4:4.
Joe kan tjari disi kon na krin?
◻ San na Gado organisâsi di wi kan si nanga ai?
◻ Fa Gado organisâsi e gi kibri?
◻ Soema de wan pisi foe Gado organisâsi?
◻ Fa wi kan sorgoe taki wi no tron mati foe grontapoe?
[Faki na tapoe bladzijde 9]
San na Gado organisâsi?
Na ini den poeblikâsi foe Jehovah Kotoigi, den wortoe „Gado organisâsi” gebroiki na dri fasi.
1 Jehovah en hemel organisâsi di wi no kan si nanga ai, pe getrow jeje kriatoeroe de na ini. Na ini bijbel den e kari en a „Jerusalem foe tapoesei”. — Galasiasma 4:26.
2 Jehovah en libisma organisâsi di wi kan si nanga ai. Na ini a ten disi na organisâsi disi abi a salfoe fikapisi makandra nanga a bigi ipi na ini.
3 Jehovah en universeel organisâsi. Na ini a ten disi, dati na Jehovah en hemel organisâsi makandra nanga den salfoe manpikin na grontapoe di A teki, èn di abi wan jeje howpoe. Baka ten, dan volmaakti libisma na grontapoe sa de na ini na organisâsi disi toe.
[Prenki na tapoe bladzijde 10]
A moro switi jeje njanjan e kon foe Jehovah en organisâsi