Ini wanfasi nanga na Mekiman foe na universele organisaatsi
„Loekoe! O boen èn o switi a de te brada e libi makandra ini wanfasi!” — PSALM 133:1.
1, 2. (a) Sortoe sani di e hendri ben sori ensrefi sowan siksi doesoen jari pasa kaba? (b) Fa bijbel e kari a sma disi di fadon komoto foe bribi, èn fa a ben proberi foe de speri foe na Moro Héwan?
NA MEKIMAN foe na universele organisaatsi wani taki na organisaatsi disi tan krin, regtvaardiki èn wan. Ma sjatoe baka na bigin foe a de foe libisma sowan siksi doesoen jari pasa kaba wan sani di de wan hendri ben sori ensrefi na ini hemel nanga gronapoe. Disi ben pasa di wan gensman di hé moro leki libisma ben drai en baka gi na organisaatsi foe na Mekiman èn ben meki en égi onafhankelek organisaatsi.
2 Foe di na sma disi di ben fadon komoto na ini bribi ben opo ensrefi tége en Mekiman, meki na bijbel e kari en Satan, san wani taki „Gensman”. En de na basigensman foe Jehovah, na Tiriman di de nanga reti Tiriman foe na universum (Job 1:6, 7). Na ini en moeiti foe kisi nen foe de leki na moro Héwan foe di a ben sa abi en égi organisaatsi, meki na gensman no ben sa frede foe doe ala moeiti foe opo èn stré leki orgaman èn gado. Foe dat’ede meki Satan sori ensrefi na wan moifasi. Na fasi foe Satan ben de moi foe si na ini na famirilin nanga toemsi moi grontapoe positsi di „na kownoe foe Babylon ben e teki, di nanga leti den ben kari na „wan di e skijn” èn „Lucifer” (Jes. 14:4, 12-14; Belgische Professorenbijbel, voetnoot). Te nanga na dé foe tide Satan de „na gado foe na seti foe sani disi”, ma soso foe di Jehovah gi en pasi. — 2 Kor. 4:4.
3. (a) Na tapoe sortoe pisi foe Jehovah organisaatsi na gensman disi ben poti en fosi aanval go? (b) Sortoe sani pasa di meki dati Satan ben tron na tiriman foe den ogri-jeje?
3 Kande foe njan na organisaatsi foe Jehovah na ondro meki Satan opo en fosi aanval na tapoe na moro lagi pisi foe en, Adam, na edeman di den poti foe na libismafamiri (Gen. 3:1-24; Ps. 8:3-5; Rom. 5:12). Bakaten foeroe engel ben trangajesi, ben libi na „positsi foe den di den ben abi na a bigin” ofoe den joisti tanpresi na ini hemel èn ben teki na skin foe libisma foe ben trow nanga moi, ma onvolmaakti oema èn foe ben libi nanga den (Jud. 6). Den basra bakapikin foe den, di ben de kefarlek bigi èn tranga, den ben kari Nefilim. A wortoe disi, di leki fa sma e prakseri, wani taki „sma di e fara”, ben de tapoe en presi foe di a ben de krin dati den ben e fara sma na wan ogri fasi. Na a ten foe na Froedoe den trangajesi engel ben libi na skin foe libisma a baka èn drai go na a jeje kondre (Gen. 6:1-7:23). Foe di den prati densrefi poeroe foe na organisaatsi foe Jehovah, den ben meki densrefi tron ogri jeje, dan Satan Didibri ben de a tiriman foe den. — Deut. 32:17; Ps. 106:37; Matt. 12:24; Luk. 11:15-19.
4. San den sma di ben pasa na Froedoe ben doe, ma San Satan ben proeberi foe doe èn na sortoe sma?
4 Na so fasi Satan ben opo na pisi foe en organisaatsi di no de foe si di hé moro leki libisma èn di ben abi jeje mekisani na ini. . .. Den sma di ben tan na libi pasa na Froedoe. Noach nanga en osofamiri ben tan a ini wanfasi nanga Jehovah hemel organisaatsi di no de foe si (Gen. 6:9; 8:18-21). Ma Satan ben proeberi foe broko na wanfasi foe den bakapikin foe na getrow Noach. San ben de a marki foe Satan di a ben poti na en fesi? We na godlowsoe organisaatsi foe en nanga wan pisi di joe kan si ben bigin bradi ensrefi!
5. Fa The Watch Tower foe 1 mei 1921 ben tjari a prakseri kon na fesi dati Satan abi wan organisaatsi?
5 A ben teki wan pisten bifo den internationaal Bijbelondrosoekoeman ben kon si dati Satan ben abi wan organisaatsi. Ma ini The Watch Tower foe 1 mei 1921 ben tanapoe: „Foe di a no ben de tevréde nanga san a ben abi kaba meki Satan e pori den memre disi foe na hemel legre èn e tjari den so fara foe pori na libismafamiri èn foe foeroe na grontapoe nanga ogri. A ben orga wan sistema di no de foe si nanga libisma ai, èn wan sistema na grontapoe di libisma kan si, èn a ben proeberi foe doe a srefi leki na plan foe Gado di ben tjari kon na krin.”
6. San The Watch Tower foe 1 december 1922, e taki foe na marki foe Satan?
6 Na ondro na edeprakseri na „Marki foe Satan” na ini The Watch Tower foe 1 december 1922 den ben taki krin: „Wi e libi now na ini den ogri dé. Na stré a mindri Satan organisaatsi nanga Gado organisaatsi de srefsrefi. A de wan stré di no e loesoe pasa nowan sma. Satan e proeberi foe pori na moreel foe na organisaatsi foe Masra, èn efoe a ben kan foe broko den memre foe na osofamiri foe den manpikin saka te na gron. Foe doro a marki disi, a e gebroiki ibri ogri plan di a kan prakseri.”
7, 8. (a) Na sortoe fasi a ben de wan jepi dati den ben kon si den toe féanti organisaatsi? (b) Soleki na Watch Tower foe 1 maart 1925 ben sori, dan san ben de tége na agersi „manpikin”?
7 Foe di den ben kon si den toe féanti organisaatsi, meki den ben kisi wan moro krin loekoe ini foeroe bijbelleri nanga profétitori. Na so foe eksempre den ben kon kisi pas wan boen ferstan foe Openbaring kapiter 12 di na ini The Watch Tower foe 1 maart 1925 artikel ben kon „Na gebortoe foe wan naatsi”. Na thema foe a tekst (Openb. 12:5, King James Version) foe na artikel dati ben taki: „Èn a ben meki wan manpikin di ben sa tiri den naatsi nanga wan isri tiki: èn a pikin foe en ben teki go na Gado. èn na en troon.”
8 Ma tapoe bladzijde 67 nanga 68 ben tanapoe:
„San ben de na ini ala den jarhondro di pasa na pisi toe na plan foe Gado di ben kon moro na fesi?. . . Na opo foe na kownoekondre foe san Jezus ben leri wi foe begi foe en. Dati ben wani taki na gebortoe toe wan naatsi di sa tiri èn blesi ala famiri foe na grontapoe . . .. San ben de alaten baka na féanti makti di ben hori den sma foe na ini don a ini a tori toe na glori njoen naatsi nanga blesi di a sa gi den? . . . Satan Didibri nanga en organisaatsi . . .. Na troetroe stré de di foe Gado nanga Didibri, pe a kownoekondre foe regtvaardikifasi e poeroe na kownoekondre foe godlowsoefasi nanga doengroe èn na ini a presi foe dati e opo na kownoekondre foe waarheid. . . baka 1918 na organisaatsi foe Didibri, na sistema foe moni, foe politiek èn foe kerki, moro spesroetoe na lasti wan, ben trowe na fesi foe ala sma Masra nanga en kownoekondre. Ma wantron-wantron Gado ben sori en atibron tége den naatsi. Foe sensi na ten dati na stré ben stré na grontapoe. Fesi foe dati na stré ben stré na ini hemel.”
9. San ben de soleki den ferklari na ini 1925 na „oema” foe Openbaring kapiter 12?
9 A ten dati den ben prakseri no nanga reti, dati na ini Jesaja 66:7 èn na ini Openbaring 12:5 na gebortoe foe na srefi „manpikin” (KJ) ben taki a fesi. Foe dat’ede na Watch Tower di kari dja a tapsé ben taki ooktoe:
„Na ’oema’ gersi taki a e agersi krin na pisi dati foe Sion, na organisaatsi foe Gado, di e meki na njoen tiri ofoe naatsi di sa tiri den naatsi nanga pipel foe grontapoe nanga wan isri tiki nanga regtvaardikfasi. . .. (Gal. 4:26). Sion ofoe Jeruzalem, na organisaatsi foe Gado, de nanga tra wortoe na mama di e meki na njoen naatsi ofoe den tiriman, Den salfoewan na grontapoe de wan pisi foe ’na oema’, èn e teki presi foe den sékerséker. Na oema ’di weri na son leki en krosi’ abi foe doe nanga Sion na ini hemel èn den wan di den ben feni boen na grontapoe foe na organisaatsi foe Gado na a ten di Masra e kon na en tempel. . . Now di a de na ini en tempel èn e weri na tempelklasse nanga en langa krosi foe regtvaardikifasi, meki wi kan taki dati en organisaatsi di e meki na njoen naatsi, kan kari ooktoe Sion, di e skijn leki na son.”
10. San pasa nanga na pisi foe Satan organisaatsi di wi no kan si, èn sortoe feti na organisaatsi disi di ben kon lagi e feti now?
10 Na „draak”, di wi sabi now leki Satan Didibri srefi, no ben man foe njan na „manpikin”, na Messiaans kownoekondre di ben kon gebore na ini hemel na ini 1914, na a kaba foe den ten foe den heiden (Luk. 21:24, SV). Na a ten foe na oorlog di ben kon baka dati na ini hemel, dan na pisi foe Satan organisaatsi di no kan si nanga ai ben iti go na a kontren foe na grontapoe foe no drai go baka noiti moro na hemel èn den sa abi wan krakti drape foe prati sani. Na organisaatsi disi di saka go na ondro e hari go na baka na pisi foe a universele organisaatsi foe Jehovah di wi kan si nanga ai èn e feti sondro pardon „tége den wan di tan abra foe en siri, di e hori den gebod foe Gado èn di abi a wroko di de na ini na gi kotoigi foe Jezus”. — Openbaring 12:17.
Dienst di bondroe kon na wan
11. (a) Tapoe soema wi kan gebroiki den wortoe foe Paulus now di e go foe na „Jeruzalem di de na tapsé”? (b) San David ben taki foe na grontapoe Jeruzalem pe Jehovah oso foe anbegi de?
11 Na agersi „oema” foe Gado den e teki gersi nanga na foto Jeruzalem di den ben verkisi èn di nanga wan poëmatongo den e kari Sion. Foe dat’ede den wortoe foe Paulus di abi foe doe nanga a fri „Jeruzalem di de na tapsé”, kan gebroiki now na tapoe „den wan di tan abra foe en siri”, tége soema na „draak”, Satan Didibri, ’e feti te now ete’ (Gal. 4:26). Na grontapoe Jeruzalem ben bow boen na ini den dé foe David èn ben fiti stéfi kon na wan. David ben taki foe dat’ede ooktoe: „Mi ben prisiri di den ben taigi mi taki: ’Meki wi go na a oso foe Jehovah.’ Den foetoe foe oenoe ben sori taki den ben de na inisé foe joe doro, o Jeruzalem. Jeruzalem de wan presi di ben bow leki wan foto di ben tjari kon na wan ini wanfasi, te den lo ben opo go, den lo foe Jah, leki den fermane foe Israël, foe tjari tangi gi na nen foe Jehovah.” — Ps. 112:1-4.
12. (a) Tapoe sortoe wanfasi wi kan gebroiki den wortoe foe Psalm 122:1-4 now? (b) Sortoe verband de a mindri a wanfasi foe den lo foe Israël nanga Jeruzalem nanga na santa tabernakel?
12 Fa disi de wan toemsi moi Prenki foe wanfasi di e tjari kon na fesi dja èn di de na ini Jehovah universele organisaatsi! Na wanfasi ben kon spesroetoe na krin na ini na ten foe nationaal fesa, pe den twarfoe lo foe Israël ben anbegi Jehovah ini wanfasi na ini na santa tabernakel na ini Jeruzalem. Èn na a ten foe na tiri foe a herder-kownoe David den lo no ben bondroe kon na wan soso nanga banti foe skinfasi, ma moro foeroe foe na orga anbegi foe na Gado foe den. Ija, Jeruzalem ben de na mama foe orga anbegi di Jehovah ben feni boen na ondro na wan priesterschap, di ben teki komoto foe na lo foe Levi èn na geslagti foe na fosi granpriester foe Israël, Aäron, a moro bigi brada foe na proféti Mozes. Boiti foe dati ala twarfoe lo ben teki poti na ini na wan Wetsferbontoe, di ben poti den aparti foe ala naatsi di ben e anbegi ogri jeje.
13. San David ben taki foe na wanfasi na ini san den Israëlsma foe owroeten e prisiri densrefi?
13 Fa den sani disi ben de alamala sani foe tjari sani kon na wan! Den ben hori na pipel foe Gado na wan leki wan nationaal organisaatsi, san ben de ini a belang foe na tan boen foe den èn ben tjari blesi kon gi den. David ben tjari en na a fasi disi kon na ondro wortoe: „Loekoe! O boen èn o switi a de te brada e libi makandra na ini wanfasi! A de leki na boen oli na tapoe na ede di e lon go tapoe a barba, a barba foe Aäron, di e lon a tapoe na borki foe en krosi. A de leki a dow foe Hermon di e saka na tapoe den bergi foe Sion, bika foe drape Jehovah e seni en blesi go, ija, foe libi te ten di no abi marki.” — Ps. 133:1-3.
14. (a) Na mindri foe soema a srefi wanfasi disi de foe feni leki na naatsi Israël foe owroeten? (b) Pe den jeje Israëlsma de ini na visioen èn sortoe „singi” den e singi nanga wan mofo?
14 Na nationaal wanfasi di e meki den dipi firi disi kon na fesi na ini wortoe de ooktoe foe feni now. Na soema? Na a „Israël foe Gado”, den jeje Israëlsma di alamala abi na wan mama, tapoe soema Paulus ben poti na prakseri a tapoe nanga den wortoe: „Ma na Jeruzalem di de na tapsé, de fri, èn dati na wi mama” (Gal. 6:16; 4:26). A no e tjari den pikin foe en di wiki nanga jepi foe jeje go ini katibo na a Wetferbontoe. Aladi na „Israël foe Gado” di ben agersi leki a de foe twarfoe lo, tokoe ala 144.000 memre foe en e kisi wan ségelmarki nanga na srefi „ségel foe na libi Gado” èn den alamala den e agersi leki den tanapoe tapoe na wan hemel „bergi Sion” (Openb. 7:1-8; 14:1-4) Fa den de wán koor, aladi nanga wan sten den e singi „na singi foe Mozes, na srafoe foe Gado èn a singi foe na Lam”, Jezus Kristus! (Openb. 15:3, 4; Joh. 1:29, 36), Na „singi” dati e plisi Gado èn e ferteri a fesi foe wini di sa kon!
15. (a) Den e orga den 144.000 gi sortoe sani, boiti foe singi? (b) Fa na wortoe wawan kaba organisaatsi e sori tapoe wanfasi?
15 Den 144.000 nanga na tiriman foe na koor foe den, „na Lam”, den no e orga foe soso foe meki hemel kon foeroe nanga a singi foe den. Den e meki wan kownoekondre organisaatsi, di na ini a ten foe doesoen jari sa tiri foe poti reti Jehovah universele soevereiniteit leki wan blesi gi na heri libismafamiri di e gi biesi (Openb. 20:4-6). Na wortoe „organisaatsi”, wan antoniem foe „desorganisaatsi”, abi foe doe nanga wan seti ofoe ordening foe sani, pe ibri pisi e kisi en joisti presi èn en wroko, sodati ala pisi e wroko makandra foe doro a wan gemeenschappelek bakapisi. Soboen organisaatsi e meki wanfasi, wroko makandra, boen orde nanga harmonie kon — no trobi-trobi.
16. Soleki fa Efese 4:8, 11-16 e taki, dan sortoe marki den ben poti a den fesi moro leki 1900 jari psa kaba èn san ben kon a mindri Jehovah Kotoigi?
16 Nanga na marki foe kon so fara foe abi kristen wanfasi, meki moro leki tinanégi hondro jari pasa kaba „prisenti ini sma” ben gi na ini na vorm foe apostel, proféti, evangeliumprékiman, herder nanga leriman. Di na ini 1879 na tijdschrift The Watch Tower na fositron ben tjari kon a doro, Gado ooktoe ben gi jeje „herder nanga leriman”. Jehovah Kotoigi ben kan kisi na disiten wanfasi na ini na bribi èn ini na soifri sabi foe na Manpikin foe Gado nanga jepi foe na seti disi (Ef. 4:8, 11-16). Fa wi de nanga tangi na ati taki Jehovah ben doe disi baka ala den jarhondro foe kerki broeja nanga desorganisaatsi na a heri grontapoe lontoe.
17. Fa wi sabi dati Gado ben abi moro leki na wanfasi foe den salfoe kristen na ini prakseri, èn san Jezus ini a tori disi ben taki a fesi?
17 A de krin dati Gado abi moro leki na wanfasi foe salfoe kristen na ini prakseri bika „a ben abi na prakseri, na a kaba foe den faste ten foe abi wan tiri, namkoe foe tjari ala sani kon makandra baka na ini Kristus, den sani di de na ini hemel èn den sani di de na tapoe grontapoe” (Ef. 1:9, 10). Na ini a pis tori disi Jezus ben taki a fesi: „Mi abi tra skapoe ete, di no de foe na koi disi; den dati ooktoe mi sa tjari, èn den sa arki na mi sten. èn den sa de wán ipi, wán herder.” — Joh. 10:16.
18. (a) Soema de a mindri ’den sani di de a grontapoe’, di ben moe tjari kon makandra? (b) Fa spesroetoe prakseri ben poti na den „tra skapoe” na ini 1935?
18 Den „tra skapoe” disi de foe ’den sani di moe tjari kon makandra na grontapoe’. Foe dat’ede, na ondro na krakti foe a jeje foe Gado, sowan 21 jari baka di Jezus ben go tiri na ini 1914, foe a fosi tron spesroetoe prakseri ben poti na den „tra skapoe”. Na tapoe wan foe den congres foe Jehovah Kotoigi di ben hori na ini Washington, na president foe na Wachttorengenootschap ben leg uit dati na „bigi ipi” ben de foe sma foe „tra skapoe” di te foe kaba ben sa tjari kon makandra nanga jepi foe na Toemsi Boen Herder, Jezus Kristus (Openb. 7:9-17). Na tapoe na congres dati di ben wani taki foeroe, Jezus ben tjari tra skapoe kon makandra? Ija, bika 840 sma di ben go na 8 congres ben kon ferstan na a ten dati dati na toemsi Boen Herder ben tjari den kon makandra èn ben meki den dopoe den leki wan symbool foe na gi di den gi densrefi abra na Jehovah Gado.
19. O bigi na „bigi ipi” ben kon de te nanga now? (b) Foe di na „bigi ipi” ben go tai densrefi nanga na organisaatsi foe Jehovah di joe kan si, dan nanga soema a ben kon a ini wanfasi, èn san de na faste bosroiti foe den?
19 Dati ben de soso na bigin foe na tjari konmakandra foe na „bigi ipi” „tra skapoe”, di a nomroe foe den de kaba moro leki 2.800.000. Foe di den go tai densrefi nanga na pisi foe Jehovah organisaatsi di joe kan si — dati wani taki nanga na fikapisi foe na „pikin ipi” na ini na „koi disi” foe na Toemsi Boen Herder — meki den ben kon na ini wanfasi nanga na Gran Mekiman foe na universele organisaatsi. Den teki na faste bosroiti foe kibri na wanfasi dati te foe tégo, bika so langa den e howpoe foe libi tapoe na paradijs grontapoe di na Moro Hé Herder. Jehovah ben sorgoe gi den. — Luk. 12:32; 23:43.
20. Te na salfoe fikapisi nanga na „bigi ipi” moe prakseri san na Moro Bigi Herder ben doe foe sensi 1914, dan den e kisi na firi foe doe san?
20 Te na salfoe fikapisi nanga a „bigi ipi” di e gro kon moro foeroe go prakseri san na Moro Hé Herder ben doe alamala foe sensi na kaba foe den ten foe den heiden na ini 1914 tapoe universele schaal, dan wan dipi firi foe grantangi e boewégi den foe singi makandra na toemsi moi Hallelujahpsalm: „Prijse Jah! Prijse Gado ini den santa presi. Prijse en ini na loktoe foe en tranga. Prijse en foe en makti wroko. Prijse en akroederi na foeroe foe en granfasi. Prijse en nanga toetoebabari. Prijse en nanga snaarinstrument èn nanga harp. Prijse en nanga anoedron èn nanga reidansi. Prijse en nanga snaar èn nanga schalmei. Prijse en nanga cimbaal di e piki moi. Prijse en nanga cimbaal di e naki boen. Ala san abi bro moe prijse Jah. Prijse Jah!” — Psalm 150:1-6.
21. (a) Oten „ala san abi bro” sa prijse Jehovah? (b) Nanga soema èn nanga sortoe marki ala memre foe na universele organisaatsi sa wroko makandra dan?
21 Djonsro na ini „na feti foe na bigi dé foe Gado na Almaktiwan” dan den disiten hemel nanga grontapoe sa pori èn den „njoen hemel nanga wan njoen grontapoe” sa poti stéfi sondro foe den seki (2 Petr. 3:7-13; Openb. 16:14, 16). Dan foe troe „ala sani san abi bro” èn di sa tan na tapoe na grontapoe di sa kon krin, sa prijse Jah, na Gran Mekiman foe na universele otganisaatsi foe regtvaardikifasi. Ala memre foe na organisaatsi dati na ini hemel nanga grontapoe nanga prisiri sa prijse Jehovah èn sa wroko loyaal èn nanga wan foeroe-nanga-lobifasi nanga en meki en universele soevereiniteit kon poti reti foe tégo èn foe meki en moro hé nen kon santa. Fa disi e taki a fesi foe wan glori wanfasi!
San joe ben sa piki?
◻ Sortoe sani di ben pasa ben meki dati Satan ben tron na tiriman foe den ogri-jeje?
◻ Na sortoe fasi a ben de wan jepi dati den ben kon si toe bigi organisaatsi?
◻ Wi kan gebroiki Psalm 122:1-4 ini a ten disi tapoe sortoe wanfasi?
◻ Foe san-ede wi kan taki dati Jehovah ben abi moro na ini prakseri leki na wanfasi foe Jezus salfoe bakaman?
◻ Oten „ala san abi bro” sa prijse Jehovah Gado?
[Prenki na tapoe bladzijde 9]
Den memre foe Jehovah pipel ben de alaten na ini wanfasi nanga makandra èn nanga na Mekiman foe na universele organisaatsi