A famiri foe Jehovah na heri grontapoe e njan boen foe wan warti wánfasi
„Loekoe! O boen èn o switi a de te brada e libi makandra na ini wánfasi!” — PSALM 133:1.
1. San na a situwâsi foe foeroe osofamiri na ini a ten disi?
NA OSOFAMIRI de na ini wan moeilek situwâsi na ini a ten disi. Na ini foeroe osofamiri, den trowbanti de foe broko. Brokotrow e tron wan gwenti moro nanga moro, èn foeroe pikin foe den trowpaar di broko trow e ondrofeni foeroe sari. Miljoenmiljoen osofamiri no de kolokoe èn den no abi wánfasi. Ma wán osofamiri de di sabi san na troetroe prisiri èn troetroe wánfasi. A de na universeel osofamiri foe Jehovah Gado. Na ini na osofamiri dati, foeroe tindoesoen engel di sma no man si nanga den ai, e doe den wroko foe den di den kisi akroederi a wani foe Gado (Psalm 103:20, 21). Ma wan osofamiri de na grontapoe, di e njan boen foe so wan wánfasi?
2, 3. (a) Soema de wan pisi now foe na universeel osofamiri foe Gado, èn nanga san wi ben sa kan teki gersi ala Kotoigi foe Jehovah na ini a ten disi? (b) Foe sortoe aksi wi sa taki makandra?
2 Na apostel Paulus ben skrifi: „Mi e boigi mi kindi gi a Tata, foe soema ibri famiri na hemel nanga na grontapoe kisi en nen” (Efeisesma 3:14, 15). Ibri famirilin na grontapoe kisi en nen foe Gado, bikasi en na a Mekiman. Ala di no wan libisma osofamiri de na hemel, tokoe na wan agersi fasi, Gado trow nanga a hemel organisâsi foe en, èn Jesus sa abi wan trowmisi na jejefasi bondroe kon na wán nanga en na ini hemel (Jesaja 54:5; Lukas 20:34, 35; 1 Korentesma 15:50; 2 Korentesma 11:2). Den getrow salfoewan na grontapoe de now wan pisi foe na universeel osofamiri foe Gado, èn den „tra skapoe” foe Jesus di abi wan howpoe foe tan na grontapoe, sa tron memre foe dati (Johanes 10:16; Romesma 8:14-17; De Wachttoren foe 15 januari 1996, bladzijde 31). Ma ala Jehovah Kotoigi na ini a ten disi wi kan teki gersi nanga wan osofamiri na heri grontapoe di de na ini wánfasi.
3 Joe de wan pisi foe a toemoesi moi osofamiri foe den foetoeboi foe Gado na heri grontapoe? Efoe a de so, dan joe e njan boen foe wan foe den moro bigi blesi di wan sma ben kan abi. Miljoenmiljoen sma sa erken taki na osofamiri foe Jehovah na heri grontapoe — na organisâsi foe en di de foe si — de wan watrapresi foe vrede nanga wánfasi na ini wan grontapoe sabana pe strei nanga pratifasi de. San wi ben sa kan taki foe a wánfasi foe na osofamiri foe Jehovah na heri grontapoe? Èn sortoe sani e meki so wan wánfasi de?
O boen èn o switi!
4. Fa joe ben sa taki nanga joe eigi wortoe, san Psalm 133 e taki foe a wánfasi na mindri brada?
4 A psalm singiman David ben abi wan troetroe warderi gi a wánfasi na mindri brada. Dati ben poesoe en srefi foe singi foe en! Proeberi foe si en nanga en harp di a ben e singi: „Loekoe! O boen èn o switi a de te brada e libi makandra na ini wánfasi! A de leki a boen oli na tapoe na ede, di e lon saka na a barba, a barba foe Aron, di e lon saka na a borki foe en krosi. A de leki a dow foe Hermon, di e saka kon na tapoe den bergi foe Sion. Bikasi drape Jehovah ben gi a komando taki a blesi moesoe de, Ija, libi te ten di no abi skotoe.” — Psalm 133:1-3.
5. Tapoe a gron foe Psalm 133:1, 2, sortoe agersi wi kan meki na mindri den Israèlsma nanga den foetoeboi foe Gado na ini a ten disi?
5 Den wortoe dati ben fiti a wánfasi na mindri brada di Gado pipel foe owroeten, den Israèlsma, ben abi. Te den ben de na Jerusalem gi den dri fesa di den ben abi ibri jari, dan den ben tan nanga makandra na ini wánfasi. Ala di den ben kon foe difrenti lo, tokoe den ben de wán osofamiri. A ben abi wan boen krakti na den tapoe te den ben de makandra, leki oli di e gi kowroe-ati èn di abi wan switi smeri. Te na oli disi ben kanti na tapoe na ede foe Aron, dan a ben lon go na en barba èn go na a borki foe en krosi. Na ini a kefal foe den Israèlsma, a ben abi wan boen krakti na den tapoe, di ben pasa go na a heri pipel di ben kon makandra. Den ben loesoe den kesekese foe den, èn wánfasi ben kon de. Wan srefi sortoe wánfasi de na mindri a pipel foe Jehovah na heri grontapoe na ini a ten disi. A abi di den abi demakandra doronomo, abi wan boen krakti na jejefasi na tapoe den memre foe en. Ibri kesekese noso problema e loesoe te den e gebroiki a rai foe a Wortoe foe Gado ini den libi (Mateus 5:23, 24; 18:15-17). A pipel foe Jehovah abi foeroe warderi gi a deki-ati di den e gi makandra, di de a bakapisi foe a wánfasi di de na mindri den brada.
6, 7. Fa a wánfasi foe Israèl ben de leki a dow foe Bergi Hermon, èn pe wi kan feni a blesi foe Gado na ini a ten disi?
6 Fa a tan di Israèl ben tan na ini wánfasi, ben toe de leki a dow foe a Bergi Hermon? We, foe di a moro hei penti foe a bergi disi, hei moro 2800 meter moro leki se, meki na ede foe en tapoe nanga snew pikinmoro a heri jari. Na ede foe Hermon di tapoe nanga snew e kondenseer a dampoe di de te neti, èn na so fasi a e gi bogobogo dow di e hori den prani boen na ini a langa dreiten. Kowroe loktoe di e wai kon foe a kontren foe a Hermon, kan tjari den dampoe disi go te na a zuidsei foe a kontren foe Jerusalem pe den e kondenseer kon tron dow. So boen, a psalm singiman ben taki na a joisti fasi foe ’a dow foe Hermon di e saka kon na tapoe a Bergi Sion’. Disi na wan heri moi sani foe memre wi foe a switi krakti di e meki wánfasi de na mindri a osofamiri foe anbegiman foe Jehovah!
7 Bifo a kresten gemeente ben seti, Sion noso Jerusalem, ben de a moro prenspari presi foe a troe anbegi. Dati meki, na drape Gado ben gi a komando blesi moesoe de. Foe di a Fonten foe ala blesi ben tan na wan agersi fasi na a santa presi na Jerusalem, meki blesi ben sa kon foe drape. Bikasi a troe anbegi no de foe feni wawan na wan bepaalde presi, meki a blesi, a lobi, nanga a wánfasi foe den foetoeboi foe Gado kan de foe feni na heri grontapoe na ini a ten disi (Johanes 13:34, 35). San na wan toe sani di e meki a wánfasi disi de?
Sani di e meki wánfasi de
8. San wi e leri foe wánfasi, na Johanes 17:20, 21?
8 A wánfasi foe den anbegiman foe Jehovah, abi en gron na tapoe a gi di den e gi jesi na a Wortoe foe Gado di den ben e froestan heri boen, èn so srefi den leri foe Jesus Krestes. Foe di Jehovah ben seni en Manpikin go na grontapoe foe gi kotoigi foe a waarheid èn foe dede wan ofrandi dede, meki a pasi ben opo foe seti kresten gemeente di de ini wánfasi (Johanes 3:16; 18:37). A ben de krin taki troetroe wánfasi ben moesoe de na mindri den memre foe a gemeente, di Jesus ben begi: „No gi den disi wawan mi e aksi, ma so srefi gi den wan di e poti bribi na ini mi nanga jepi foe a wortoe foe den, so taki den alamala kan de wán, neleki fa joe, Tata, de na na ini wánfasi nanga mi èn mi de na ini wánfasi nanga joe, so taki den kan de so srefi na ini wánfasi nanga wi, so taki grontapoe kan bribi taki joe ben seni mi kon” (Johanes 17:20, 21). Den bakaman foe Jesus troetroe ben kisi wan wánfasi di de a srefi leki a wánfasi di de na mindri Gado nanga en Manpikin. Disi ben kon de so bikasi den ben gi jesi na Gado en Wortoe èn na den leri foe Jesus. A srefi fasi foe denki de prenspari foe meki wánfasi de na ini na osofamiri foe Jehovah na heri grontapoe na ini a ten disi.
9. Sortoe ròl a santa jeje e prei na ini a wánfasi foe a pipel foe Jehovah?
9 Wan tra sani di e meki wánfasi de na a pipel foe Jehovah, na taki wi abi a santa jeje noso a wroko krakti foe Gado. A e meki taki wi man froestan a waarheid foe Jehovah en Wortoe di tjari kon na krin èn foe dini en na so wan fasi na ini wánfasi (Johanes 16:12, 13). A jeje e jepi wi foe no doe den wroko foe a skin di e broko wánfasi, soleki strei, djaroesoefasi, atibron nanga feti. Na presi foe dati, a jeje foe Gado e meki wi man kweki froktoe foe lobi, prisiri, vrede, langa pasensi, switifasi, boen-ati, bribi, safri-ati, nanga dwengi joesrefi, di de froktoe di e tjari wánfasi. — Galasiasma 5:19-23.
10. (a) Sortoe agersi wi kan meki na mindri a lobi di de na ini wan osofamiri di abi wánfasi èn a lobi di de foe si na mindri den sma di gi densrefi ini a dini foe Jehovah? (b) Fa wán memre foe a Tiri Skin ben taki foe den firi foe en di a abi te a e miti nanga den jeje brada foe en?
10 Den memre foe wan osofamiri di abi wánfasi, lobi makandra èn e prisiri foe de nanga makandra. Na a srefi fasi, den wan na ini na osofamiri foe den anbegiman foe Jehovah di de ini wánfasi, lobi en, en Manpikin, èn den kompe bribiman (Markus 12:30; Johanes 21:15-17; 1 Johanes 4:21). Neleki wan troetroe osofamiri e njan boen foe a njan di den e njan nanga makandra, na so den wan di gi densrefi ini a dini foe Gado, e prisiri foe de na den kresten konmakandra, den bigi konmakandra, nanga den kongres foe teki winimarki foe toemoesi boen demakandra èn heri boen jeje njanjan (Mateus 24:45-47; Hebrewsma 10:24, 25). Wan leisi wan memre foe a Tiri Skin foe Jehovah Kotoigi ben taki: „Gi mi, a kon di mi e kon makandra nanga den brada, na wan foe den moro bigi prisiri na ini a libi èn wan fonten foe kisi deki-ati. Mi lobi foe de wan foe den fosiwan na a Kownoekondre zaal, èn foe gowe leki wan foe den lastiwan, efoe a kan. Mi e firi wan prisiri na inisei te mi e taki nanga a pipel foe Gado. Te mi de nanga den, dan mi no abi broko ede te mi de nanga mi famiri.” Na so joe e firi toe? — Psalm 27:4.
11. Foe sortoe wroko den Kotoigi foe Jehovah spesroetoe e feni kolokoe, èn san na den bakapisi te wi e meki a diniwroko foe Gado de a moro prenspari sani na ini wi libi?
11 Wan osofamiri di abi wánfasi e feni kolokoe te den e doe sani makandra. Na a srefi fasi, den anbegiman foe Jehovah en osofamiri e feni prisiri te den e doe a Kownoekondre-preikiwroko nanga a wroko foe meki disipel, nanga makandra na ini wánfasi(Mateus 24:14; 28:19, 20). Te wi abi wan prati na dati doronomo, dan dati e hari wi go moro krosibei foe tra Kotoigi foe Jehovah. Te wi e meki a diniwroko foe Gado de a moro prenspari sani na ini wi libi èn wi e horibaka gi ala den aktiviteit foe en pipel, dan dati e jepi toe foe meki wi firi taki wi de wan osofamiri.
Theokrasia seti de prenspari
12. San na den eigifasi foe wan osofamiri di kolokoe èn di abi wánfasi, èn sortoe seti ben jepi foe meki wánfasi de ini den fosi jarihondro kresten gemeente?
12 Wan osofamiri di abi wan tranga fesiman, ma di de nanga lobi èn di abi ordefasi, pikinmoro seiker sa abi wánfasi èn sa de kolokoe (Efeisesma 5:22, 33; 6:1). Jehovah na wan Gado di abi ordefasi na wan vredefasi, èn ala den sma di de na ini en osofamiri e si en leki „a Moro Heiwan” (Danièl 7:18, 22, 25, 27; 1 Korentesma 14:33). Den e erken toe taki a poti en Manpikin, Jesus Krestes, na erfgenaam foe ala sani na wroko, èn a gi en ala tirimakti na hemel èn na grontapoe (Mateus 28:18; Hebrewsma 1:1, 2). Nanga Krestes leki na Edeman foe a kresten gemeente, a kresten gemeente de wan organisâsi di abi ordefasi nanga wánfasi (Efeisesma 5:23). Foe tiri den aktiviteit foe den fosi jarihondro gemeente, wan tiri skin ben de di meki foe den apostel nanga tra „owroeman” di lepi na jejefasi. Ibri gemeente aparti ben abi opziener noso owroeman di ben poti na wroko, nanga dinari ini a diniwroko (Tori foe den Apostel 15:6; Filipisma 1:1). Te den ben gi jesi na den wan di ben teki fesi, dan dati ben tjari wánfasi kon. — Hebrewsma 13:17.
13. Fa Jehovah e hari sma, èn sortoe bakapisi disi abi?
13 Ma ala den seti disi wani taki dati a wánfasi foe den anbegiman foe Jehovah, de foe di tranga fesiman de di no abi firi gi tra sma? Nôno, kwetikweti! A no de so, taki Gado noso en organisâsi no abi lobi. Jehovah e hari sma kon foe di a e sori lobi, èn ibri jari hondrohondro doesoen sma e tron wan pisi foe Jehovah en organisâsi foe di den wani èn nanga prisiri, nanga jepi foe dopoe di de leki simbôl foe a gi di den gi densrefi abra na Gado nanga den heri ati. Den e denki leki Josua, di ben gi den kompe Israèlsma a deki-ati: „Teki a bosroiti now gi oensrefi soema oenoe sa dini . . . Ma mi nanga mi osofamiri, wi sa dini Jehovah.” — Josua 24:15.
14. Foe san ede wi kan taki dati na organisâsi foe Jehovah de wan theokrasia?
14 Leki wan pisi foe Jehovah en osofamiri, wi no abi prisiri wawan, ma so srefi seikerfasi. Disi de so foe di en organisâsi de wan theokrasia. A Kownoekondre foe Gado de wan theokrasia (foe a Grikiwortoe the·osʹ, gado, èn kraʹtos, wan tiri). A de wan tiri foe Gado, di en poti èn seti. A salfoe „santa nâsi” foe Jehovah e saka ensrefi na ondro a tiri foe en èn foe dati ede a de wan theokrasia toe (1 Petrus 2:9). Nanga a Bigi Theokraat, Jehovah, leki wi Kroetoeman, a Sma di gi Wet, èn wi Kownoe, wi moesoe firi seikerfasi (Jesaja 33:22). Ma fa a de te wan kesekese wani opo kon èn tron wan kefar gi a prisiri foe wi, wi seikerfasi, èn wi wánfasi?
A Tiri Skin e handri
15, 16. Sortoe kesekese ben opo kon na ini a fosi jarihondro, èn foe san ede?
15 Foe tan hori a wánfasi foe wan osofamiri, dan kande wanwan leisi wan kesekese moesoe kisi wan loesoe. Kon meki wi taki dan taki wan problema di abi foe doe nanga jeje afersi ben moesoe loesoe foe tan hori a wánfasi foe den anbegiman foe Gado en osofamiri na ini a fosi jarihondro G.T. San moesoe doe dan? A tiri skin ben handri, èn ben teki bosroiti na ini jeje afersi. Wi abi wan verslag na ini bijbel foe so wan sortoe sani.
16 Na pikinmoro 49 G.T., a tiri skin ben kon makandra na Jerusalem foe loesoe wan serjoesoe problema èn foe tan hori a wánfasi foe „na osofamiri foe Gado” (Efeisesma 2:19). Pikinmoro 13 jari bifo dati, na apostel Petrus ben preiki gi Cornelius, èn den fosi heiden noso sma foe den nâsi, ben tron bribisma di ben teki dopoe (Tori foe den Apostel, kapitel 10). Na a fosi zendeling waka foe Paulus, foeroe heiden ben teki a krestendom (Tori foe den Apostel 13:1–14:28). Foe taki en leti, wan gemeente foe heiden di ben tron kresten, ben opo na Antiokia, Siria. Wan toe kresten di ben de djoe, ben bribi taki den heiden di ben drai den libi, ben moesoe besnij èn ben moesoe hori a Wet foe Moses, ma trawan no ben agri nanga dati (Tori foe den Apostel 15:1-5). A kesekese disi ben kan meki taki wánfasi no de srefisrefi, srefi na so wan fasi taki aparti djoe nanga heiden gemeente ben sa kan seti. Foe dati ede, a tiri skin ben handri wantewante foe tan hori a wánfasi di ben de na mindri kresten.
17. Foe sortoe theokrasia fasi foe doe sani, di de ini wánfasi, Tori foe den Apostel kapitel 15 e taki?
17 Akroederi Tori foe den Apostel 15:6-22, „den apostel nanga den owroeman ben kon makandra foe loekoe na afersi disi”. Tra sma ben de drape toe, so srefi wan toe sma foe Antiokia. Petrus ben froeklari na a fosi presi taki ’nanga en mofo den nâsi ben jere a boen njoensoe èn ben bribi’. Ne „a heri groepoe sma” ben arki di Barnabas nanga Paulus ben froeteri foe „den foeroe marki nanga wondroe di Gado ben doe nanga jepi foe den na mindri den nâsi”, noso den heiden. Baka dati, Jakobus ben gi wan idea fa a problema ben sa kan loesoe. Baka di a tiri skin ben teki wan bosroiti, den e taigi wi: „Den apostel nanga den owroeman nanga a heri gemeente ben feni en boen foe seni man di den ben froekisi na den mindri, go na Antiokia makandra nanga Paulus nanga Barnabas”. Den „man [disi] di den ben froekisi” — Judas nanga Silas — ben tjari wan brifi gi den kompe bribiman foe den, di ben gi den deki-ati.
18. Sortoe bosroiti a tiri skin ben meki di abi foe doe nanga a Wet foe Moses, èn fa disi ben abi krakti na tapoe den kresten di ben de djoe nanga heiden?
18 A brifi di ben meki a bosroiti foe a tiri skin bekènti, ben bigin nanga den wortoe: „Den apostel nanga den owroeman, brada, gi den brada na Antiokia nanga Siria nanga Silisia di de foe den nâsi: Odi!” Tra brada ben fisiti a prenspari konmakandra disi, ma soleki fa a sori, dan a tiri skin ben de „den apostel nanga den owroeman”. A jeje foe Gado ben tiri den, bikasi a brifi e taki: „A santa jeje nanga wi feni en boen foe no poti moro hebi na oenoe tapoe, boiti den sani disi di de fanowdoe: foe tan farawe foe sani di òfer leki srakti-ofrandi gi kroektoe gado èn foe broedoe èn foe sani di ben tjokro kiri èn foe hoeroedoe” (Tori foe den Apostel 15:23-29). A no ben de wan froeplekti gi kresten taki den moesoe besnij èn taki den moesoe hori a Wet foe Moses. A bosroiti disi ben jepi den kresten di ben de djoe nanga heiden, foe handri èn foe taki na ini wánfasi. A gemeente ben prisiri, èn a warti wánfasi ben tan de, neleki fa a de na ini na osofamiri foe Gado na heri grontapoe, di de na ondro a tiri na jejefasi di a Tiri Skin foe Jehovah Kotoigi e gi. — Tori foe den Apostel 15:30-35.
Dini na ini wan theokrasia wánfasi
19. Foe san ede wánfasi gro na ini den anbegiman foe na osofamiri foe Jehovah?
19 Wánfasi e gro te den memre foe wan osofamiri e wroko nanga makandra. Na so a de toe nanga den anbegiman foe Jehovah en osofamiri. Foe di den owroeman nanga tra sma na ini a gemeente foe a fosi jarihondro ben handri na wan theokrasia fasi, meki den ben dini Gado ala di den ben wroko makandra nanga a tiri skin dorodoro èn den ben erken den bosroiti di a tiri skin ben teki. Nanga a jepi foe a tiri skin, den owroeman ’ben preiki a wortoe’ èn moro foeroe foe den memre foe den gemeente ’ben taki akroederi makandra’ (2 Timoteus 4:1, 2; 1 Korentesma 1:10). So boen, den srefi sortoe bijbel waarheid ben gi na ini a diniwroko èn na den kresten konmakandra, awansi na Jerusalem, Antiokia, Rome, Korente, noso wan tra presi. So wan theokrasia wánfasi de na ini a ten disi.
20. San wi moesoe doe foe tan hori wi kresten wánfasi?
20 Foe tan hori a wánfasi foe wi, dan wi alamala di de wan pisi foe na osofamiri foe Jehovah na heri grontapoe moesoe doe moeiti foe sori theokrasia lobi (1 Johanes 4:16). Wi moesoe saka wisrefi na ondro a wani foe Gado èn wi moesoe sori dipi lespeki gi ’a getrow srafoe’ èn a Tiri Skin. Leki a gi di wi gi wisrefi abra na Gado, a no de foe taki dati a gi di wi e gi jesi, de foe di wi wani èn nanga prisiri (1 Johanes 5:3). Heri boen a psalm singiman ben taki fa prisiri abi foe doe nanga a gi di wan sma e gi jesi! A ben singi: „Prèise Jah! Kolokoe foe a man di e frede Jehovah, di na ini den komando foe en a abi prisiri srefisrefi.” — Psalm 112:1.
21. Fa wi kan sori taki wi e handri na wan theokrasia fasi?
21 Jesus, na Edeman foe a gemeente, e handri krinkrin na wan theokrasia fasi èn ala ten a e doe a wani foe en Tata (Johanes 5:30). Foe dati ede, meki wi waka na baka wi Eksempre, foe di na wan theokrasia fasi èn na ini wánfasi wi e doe a wani foe Jehovah ala di wi e wroko krinkrin makandra nanga En organisâsi. Dan nanga prisiri èn tangi na wi ati, wi kan singi so srefi a singi foe a psalm singiman: „Loekoe! O boen èn o switi a de te brada e libi makandra na ini wánfasi!”
Fa joe ben sa piki?
◻ Fa wi kresten wánfasi kan abi foe doe nanga Psalm 133?
◻ San na wan toe sani di e meki wánfasi de?
◻ Foe san ede theokrasia seti de prenspari gi a wánfasi foe a pipel foe Gado?
◻ Fa a fosi jarihondro tiri skin ben handri foe tan hori a wánfasi?
◻ San a wani taki gi joe foe dini na wan theokrasia wánfasi?
[Prenki na tapoe bladzijde 25]
A tiri skin ben handri foe tan hori a wánfasi