Fa wi leki Kresten kan abi trutru wánfasi?
1 San meki wánfasi de na mindri wan ipi fu moro leki siksi milyun sma, di komoto na 234 kondre èn di e taki sowan 380 difrenti sortu tongo? Soso na anbegi fu Yehovah Gado kan du dati (Mika 2:12; 4:1-3). Yehovah Kotoigi ondrofeni taki trutru Kresten wánfasi na wan tru sani na ini a ten disi. Neleki „wán ipi” na ondro a tiri fu a „wán skapuman” fu wi, wi abi a fasti bosroiti fu kakafutu gi a yeye fu a grontapu disi, di e tyari pratifasi kon.—Yoh. 10:16; Ef. 2:2.
2 A prakseri fu Gado di e kon tru ala ten, na taki ala mekisani nanga frustan, musu kon na wán ini a tru anbegi (Openb. 5:13). Fu di Yesus ben sabi o prenspari a tori disi de, meki a ben begi na wan opregti fasi efu den bakaman fu en ben kan abi a wánfasi dati (Yoh. 17:20, 21). San ibriwan fu wi kan du fu meki taki a wánfasi ini a Kresten gemeente tan?
3 Fa wi kan abi wánfasi: Sondro a Wortu fu Gado èn sondro a yeye fu en, wi no ben o man abi a wánfasi leki Kresten. Te wi e libi akruderi den sani di wi e leisi na ini Bijbel, dan wi e opo wisrefi gi a yeye fu Gado. Disi e yepi wi „fu tan hori a wánfasi fu yeye na ini a banti fu vrede di e tyari wánfasi kon” (Ef. 4:3). A e pusu wi fu frudrage makandra na ini lobi (Kol. 3:13, 14; 1 Petr. 4:8). Te wi e prakseri dipi fu a Wortu fu Gado ibri dei dan dati sa meki wi abi wánfasi. Yu e du dati?
4 A komando di wi abi fu preiki èn fu meki disipel e tyari wi kon na wán sosrefi. Te wi e wroko makandra nanga trawan na ini a Kresten diniwroko èn te wi „e feti leki wán man gi a bribi fu a bun nyunsu”, dan wi e „tron sma di e wroko nanga makandra ini a waarheid” (Fil. 1:27; 3 Yoh. 8). Te wi e du dati, dan a lobi di e hori a gemeente na wán e kon moro tranga. Fu san ede yu no e aksi wan sma nanga suma yu no wroko langa, fu wroko makandra nanga yu na ini a preikiwroko a wiki disi?
5 Wi abi a tumusi moi grani fu de wan pisi fu a wan-enkri tru bradafasi na heri grontapu! (1 Petr. 5:9) Na a „Gi Gado glori” internationaal kongres di hori no so langa pasa, dan dusundusun sma ondrofeni fa a de fu abi wánfasi na heri grontapu. Meki ibriwan fu wi yepi fu tan hori a tumusi moi wánfasi disi, fu di wi e leisi Gado Wortu ala dei, fu di wi e lusu kesekese na wan lobi-ati fasi, èn fu di wi e preiki a bun nyunsu „leki wán man”.—Rom. 15:6.