Tan hori a wánfasi na ini den lasti dei disi
„Tjari oensrefi na wan fasi di warti a boen njoensoe . . . , taki oenoe e tanapoe kánkan na ini wán jeje, nanga wán sili, e feti sei na sei gi a bribi foe a boen njoensoe.” — FILIPISMA 1:27.
1. Sortoe difrenti de na mindri Jehovah Kotoigi nanga grontapoe?
DISI na „den lasti dei”. Sondro tweifri, disi na „moeilek ten, di tranga foe pasa” (2 Timoteus 3:1-5). Na ini a „ten [disi] foe a kaba”, nanga broeja na ini a libisma libimakandra, den Jehovah Kotoigi e difrenti krinkrin, bikasi den abi vrede nanga wánfasi (Danièl 12:4). Ma ibri sma di de wan pisi foe na osofamiri foe anbegiman foe Jehovah na heri grontapoe, abi a plekti foe wroko tranga foe tan hori a wánfasi disi.
2. San Paulus ben taki foe a tan di wi moesoe tan hori a wánfasi, èn sortoe aksi wi sa loekoe?
2 Na apostel Paulus ben froemane kompe kresten foe tan hori a wánfasi. A ben skrifi: „Tjari oensrefi na wan fasi di warti a boen njoensoe di abi foe doe nanga a Krestes, so taki awansi mi e kon foe loekoe oenoe, noso mi no de, taki mi kan jere den sani di abi foe doe nanga oenoe, taki oenoe e tanapoe kánkan na ini wán jeje, nanga wán sili, e feti sei na sei gi a bribi foe a boen njoensoe, èn sondro taki oenoe meki oen feanti skreki oenoe na wan noso tra fasi. A srefi sani disi na wan boeweisi foe a pori di den sa kisi, ma foe froeloesoe gi oenoe; èn disi na wan sani di Gado sori” (Filipisma 1:27, 28). Den wortoe foe Paulus e sori krinkrin taki wi moesoe wroko makandra leki kresten. Ma san sa jepi wi dan foe tan hori wi kresten wánfasi na ini den moeilek ten disi?
Saka oensrefi na ondro a wani foe Gado
3. O ten èn fa den fosi heiden di no ben besnij ben tron bakaman foe Krestes?
3 Wan fasi fa wi kan tan hori wi wánfasi, na te wi e saka wisrefi na ondro a wani foe Gado na ala ten. Foe doe disi a kan de fanowdoe foe kenki a fasi fa wi e denki. Loekoe den fosi djoe disipel foe Jesus Krestes. Di na apostel Petrus ben preiki fosi gi den heiden di no ben besnij, na ini 36 G.T., dan Gado ben gi santa jeje na den sma disi foe den nâsi, èn den ben teki dopoe (Tori foe den Apostel, kapitel 10). Te leki a ten dati, soso den djoe, proselietsma di ben teki a djoe bribi, èn Samariasma ben tron bakaman foe Jesus Krestes. — Tori foe den Apostel 8:4-8, 26-38.
4. San Petrus ben taki, baka di a ben froeklari san ben feni presi nanga Cornelius, èn sortoe tesi disi ben tjari kon gi den djoe disipel foe Jesus?
4 Di den apostel nanga den tra brada na Jerusalem ben jere foe a drai di Cornelius nanga tra heiden ben drai den libi, dan den ben abi belangstelling foe jere a verslag foe Petrus. Baka di na apostel ben tjari kon na krin san ben feni presi nanga Cornelius nanga den tra heiden di ben bribi, na apostel ben bosroiti nanga den wortoe: „Foe dati ede, efoe Gado ben gi den [den heiden di ben bribi] a srefi fri presenti [a santa jeje] soleki fa a ben doe toe gi wi [den djoe] di wi bribi a Masra Jesus Krestes, dan soema na mi taki mi ben sa man foe tapoe Gado?” (Tori foe den Apostel 11:1-17) Disi ben tjari wan tesi kon gi den djoe bakaman foe Jesus Krestes. Den ben sa saka densrefi na ondro a wani foe Gado èn ben sa erken den heiden di ben tron bribisma, leki den kompe anbegiman? Noso a wánfasi foe den foetoeboi foe Jehovah na grontapoe ben sa kon ini kefar?
5. Fa den apostel nanga den tra brada ben handri na tapoe a troetori taki Gado ben gi pardon na den heiden di ben sori berow, èn san wi kan leri foe a fasi disi foe denki?
5 A verslag e taki: „Now di den [den apostel nanga tra brada] ben jere den sani disi, den ben agri nanga dati, èn den ben gi glori na Gado, taki: ’We dan, Gado gi den sma foe den nâsi [na okasi] toe foe sori berow so taki den kan kisi libi’” (Tori foe den Apostel 11:18). A fasi dati foe denki ben tan hori a wánfasi, èn ben meki a wánfasi gro na mindri den bakaman foe Jesus. Na ini wan sjatoe pisiten nomo, a preikiwroko ben go na fesi na mindri den heiden noso sma foe den nâsi, èn a blesi foe Jehovah ben de na tapoe den sortoe aktiviteit disi. Wisrefi moesoe agri nanga sani te den e aksi taki wi moesoe wroko makandra te wan njoen gemeente e seti noso te wan theokrasia kenki meki na ondro a tiri foe a santa jeje foe Gado. Te wi e wroko makandra nanga wi heri ati, dan dati sa plisi Jehovah èn dati sa jepi wi foe tan hori wi wánfasi na ini den lasti dei disi.
Hori fasti na a waarheid
6. Sortoe krakti a waarheid abi na tapoe a wánfasi foe den anbegiman foe Jehovah?
6 Leki wan pisi foe den anbegiman foe na osofamiri foe Jehovah, wi e tan hori wi wánfasi bikasi wi alamala e „kisi leri foe Jehovah” èn wi e hori tranga na a waarheid foe en di a tjari kon na krin (Johanes 6:45; Psalm 43:3). Foe di den leri foe wi abi den gron tapoe Gado Wortoe, meki wi alamala e taki akroederi makandra. Nanga prisiri wi e teki a njanjan na jejefasi di Jehovah ben gi wi nanga jepi foe „a getrow èn koni srafoe” (Mateus 24:45-47). Den leri disi di de a srefi na ala presi, e jepi wi foe tan hori wi wánfasi na heri grontapoe.
7. Efoe wi persoonlijk abi problema foe froestan wan penti, san wi moesoe doe, èn san wi no moesoe doe?
7 Fa a de te wan foe wi persoonlijk abi problema foe froestan noso foe erken wan bepaalde leri? Wi moesoe begi foe kan kisi koni èn wi moesoe go ondrosoekoe sani na ini den Boekoe foe bijbel èn na ini kresten poeblikâsi (Odo 2:4, 5; Jakobus 1:5-8). A kan de wan jepi te wi e taki nanga wan owroeman. Efoe tokoe wi no man froestan a penti, dan a kan de moro boen foe no broko wi ede moro nanga a tori. Kande moro bodoi foe a penti sa tjari kon na doro baka ten, èn dan wi sa froestan en moro boen. Ma a ben sa fowtoe foe proeberi foe overtoigi trawan na ini a gemeente foe erken a fasi fa wi e si a tori, di e difrenti. Disi ben sa sai pratifasi, a no ben sa tan hori a wánfasi. O moro boen a de foe „waka na ini waarheid” èn foe gi tra sma deki-ati foe doe dati! — 3 Johanes 4.
8. Sortoe fasi foe denki foe a waarheid de joisti?
8 Na ini a fosi jarihondro Paulus ben taki: „Nownowde nanga wan isri spikri wi no e si sani krin, ma dan wi sa si fesi na fesi. Nownowde mi sabi wan pisi nomo, ma na a ten dati mi sa sabi soifri neleki fa den sabi mi soifri” (1 Korentesma 13:12). Ala di den fosi kresten no ben man si ala den finifini tori krinkrin, tokoe den ben tan na ini wánfasi. Nownowde wi abi wan moro krin froestan foe a prakseri foe Jehovah èn foe en Wortoe foe waarheid. Foe dati ede, meki wi de nanga tangi gi a waarheid di wi kisi nanga jepi foe a ’getrow srafoe’. Èn meki wi de nanga tangi taki Jehovah tiri wi nanga jepi foe en organisâsi. Ala di a no ala ten wi abi a srefi sortoe sabi, tokoe wi no e dede foe angri noso foe dreiwatra na jejefasi. Na presi foe dati, wi Skapoeman Jehovah, hori wi na ini wánfasi èn a sorgoe boen gi wi. — Psalm 23:1-3.
Gebroiki a tongo na wan reti fasi!
9. Fa wi kan gebroiki a tongo foe meki a wánfasi gro?
9 Te wi e gebroiki a tongo foe gi tra sma deki-ati, a de wan prenspari fasi foe meki wánfasi de èn wan firi foe bradafasi. A brifi di ben loesoe wan aksi di abi foe doe nanga a besnijdenis, di a tiri skin foe a fosi jarihondro ben seni, ben de wan fonten foe deki-ati. Baka di den heiden disipel na Antiokia ben leisi en, den „ben prisiri foe a deki-ati” di den ben kisi. Judas nanga Silas di ben seni kon foe Jerusalem nanga a brifi, „ben gi den brada deki-ati nanga foeroe lezing èn den ben tranga den”. Sondro tweifri, a de di Paulus nanga Barnabas ben de drape, ben gi kompe bribiman na Antiokia deki-ati so srefi èn ben tranga den (Tori foe den Apostel 15:1-3, 23-32). Wi kan doe pikinmoro a srefi sortoe sani te wi e kon makandra gi den kresten konmakandra èn ’e gi makandra deki-ati’, foe di wi de drape èn foe di wi e gi komentaar di e bow sma. — Hebrewsma 10:24, 25.
10. Foe tan hori a wánfasi, san wi abi foe doe kande efoe skempi de?
10 Ma a fowtoe fasi foe gebroiki a tongo kan de wan kefar gi a wánfasi foe wi. „A tongo na wan pikin memre èn tokoe a e djaf kefalek”, a disipel Jakobus ben skrifi. „Loekoe! So wan pikin faja de fanowdoe foe soetoe faja gi so wan bigi boesi!” (Jakobus 3:5) Jehovah no wani si sma na ai di e meki strei de (Odo 6:16-19). Den sortoe wortoe disi kan tjari pratifasi kon. Ma san dan, efoe skempi de, dati wani taki, a kosi di wan sma e kosi trawan noso e afrontoe en nomonomo? Den owroeman sa proeberi foe jepi a sma di doe ogri. Ma wan skempiman di no abi berow moesoe sluit uit, so taki a vrede, orde, nanga a wánfasi foe a gemeente kan tan de. Boiti dati, Paulus ben skrifi: „Stòp de ini a kompani foe wan sma, di den ben kari wan brada, di de . . . wan skempiman . . . , èn no njan nanga so wan sma srefi.” — 1 Korentesma 5:11.
11. Foe san ede a de prenspari foe abi sakafasi efoe wi taki wan sani di tjari span kon na mindri wi nanga wan kompe kresten?
11 Te wi e basi a tongo, dan dati e jepi foe tan hori a wánfasi (Jakobus 3:10-18). Ma meki wi taki dati wan sani di wi taki, tjari span kon na mindri wi nanga wan kompe kresten. A no ben sa fiti efoe wisrefi fosi e doe wan sani foe meki vrede nanga wi brada, foe di wi e aksi pardon efoe a de fanowdoe? (Mateus 5:23, 24) A troe, taki disi e aksi sakafasi, noso sakafasi foe jeje, ma Petrus ben skrifi: „Weri sakafasi foe jeje leki wan banti lontoe oen mindribere, gi makandra, bikasi Gado e kakafoetoe gi den heimemrewan, ma a e gi no-froedini boen-ati na den sakafasiwan” (1 Petrus 5:5). Sakafasi sa boeweigi wi foe ’feti na baka vrede’ nanga wi brada, te wi e erken den fowtoe foe wi èn wi e aksi pardon na wan fasi di fiti. Disi e jepi foe tan hori a wánfasi foe Jehovah en osofamiri. — 1 Petrus 3:10, 11.
12. Fa wi kan gebroiki a tongo foe meki wánfasi gro èn foe tan hori a wánfasi foe Jehovah en pipel?
12 Wi kan meki a jeje foe na osofamiri go na fesi na mindri den wan na ini Jehovah en organisâsi, efoe wi e gebroiki wi tongo na wan reti fasi. Foe di na dati na apostel Paulus ben doe, meki a ben man memre den Tesalonikasma: „Oenoe sabi heri boen fa wi ben tan froemane ibriwan foe oenoe èn ben trowstoe oenoe èn ben kotoigi gi oenoe, neleki fa wan papa e doe nanga en pikin, so taki oenoe ben sa tan waka na wan fasi di e fiti Gado” (1 Tesalonikasma 2:11, 12). Foe di Paulus ben gi wan heri moi eksempre ini a tori disi, meki a ben man gi den kompe kresten a deki-ati „foe gi trowstoe na den sili di brokosaka” (1 Tesalonikasma 5:14). Prakseri o foeroe boen wi kan doe te wi e gebroiki wi tongo foe gi trowstoe, foe gi deki-ati, èn foe bow tra sma. Ija, „wan wortoe di taki na a joisti ten — o boen a de!” (Odo 15:23) Boiti dati, den sortoe wortoe dati e meki wánfasi gro èn e tan hori a wánfasi foe a pipel foe Jehovah.
Gi pardon!
13. Foe san ede wi moesoe gi pardon?
13 Efoe wi wani tan hori wi kresten wánfasi dan a de toemoesi prenspari foe gi pardon na wan sma di doe wi ogri èn di aksi pardon. Èn omeni tron wi moesoe gi pardon? Jesus ben taigi Petrus: „No seibi tron, ma seibitenti na seibi tron” (Mateus 18:22). Efoe wi no e gi sma pardon, dan a no sa abi winimarki gi wi. Fa so? We, feantifasi nanga a kweki di wi e kweki bita-ati, sa poeroe a vrede foe jeje di wi abi. Èn efoe sma e kon sabi wi leki wan sma di abi ogri-ati èn di no e gi pardon, dan wi kan tjari problema kon na wi tapoe (Odo 11:17). Te wi e hori sma na ati, dan dati no e plisi Gado èn a kan meki wi doe wan toemoesi takroe sondoe (Lefitikus 19:18). Hori na prakseri taki den ben koti na ede foe Johanes a Dopoeman, leki wan plan di a godelowsoe Herodias ben meki, di ben „kweki bita-ati” gi en. — Markus 6:19-28.
14. (a) San Mateus 6:14, 15 e leri wi foe a gi di wi moesoe gi sma pardon? (b) Wi moesoe wakti ala ten fosi foe meki wan sma aksi pardon, bifo wi e gi en pardon?
14 A model begi foe Jesus abi den wortoe disi na ini toe: „Gi wi pardon foe wi sondoe, bikasi wi toe e gi ibriwan sma pardon di abi wan paiman na wi” (Lukas 11:4). Efoe wi no e gi sma pardon, dan a kefar de taki wan dei Jehovah Gado no sa gi wi pardon moro foe den sondoe foe wi, bikasi Jesus ben taki: „Efoe oenoe e gi sma pardon foe den sondoe foe den, dan oen hemel Tata sa gi oenoe pardon toe; ma efoe oenoe no e gi sma pardon foe den sondoe foe den, dan oen Tata no sa gi oenoe pardon toe foe den sondoe foe oenoe” (Mateus 6:14, 15). So boen, efoe troetroe wi wani foe doe wan sani foe wi sei foe tan hori a wánfasi na ini den anbegiman foe Jehovah en osofamiri, dan wi sa gi pardon, kande foe froegiti nomo wan sondoe di wan sma doe wi foe di a no prakseri fosi èn a no ben abi takroe reide gi dati. Paulus ben taki: „Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan. Soleki fa Jehovah gi oenoe pardon na wan fri fasi, na so oenoe moesoe doe toe” (Kolosesma 3:13). Te wi e gi sma pardon, dan wi e jepi foe tan hori a warti wánfasi foe Jehovah en organisâsi.
Wánfasi nanga persoonlijk bosroiti
15. San e jepi a pipel foe Jehovah foe tan hori a wánfasi te den e teki wan persoonlijk bosroiti?
15 Gado ben meki wi leki sma di abi wan fri wani foe kan teki wi eigi bosroiti, nanga a grani èn nanga a frantiwortoe foe teki persoonlijk bosroiti (Deuteronomium 30:19, 20; Galasiasma 6:5). Tokoe wi man tan hori wi wánfasi bikasi wi e gi jesi na den wet nanga gronprakseri foe bijbel. Wi e hori den na prakseri te wi e teki persoonlijk bosroiti (Tori foe den Apostel 5:29; 1 Johanes 5:3). Meki wi taki dati wan aksi opo di abi foe doe nanga a tan di wi e tan neutraal. Wi kan teki wan persoonlijk bosroiti di gron tapoe bodoi di wi abi, foe di wi e memre taki wi „no de wan pisi foe grontapoe” èn taki wi ’naki wi feti-owroe kon tron proegoe’ (Johanes 17:16; Jesaja 2:2-4). Na a srefi fasi, te wi moesoe teki wan persoonlijk bosroiti di abi foe doe nanga a banti di wi abi nanga lanti, dan wi e hori na prakseri san bijbel e taki foe a pai di wi moesoe pai „Gado den sani di de foe Gado”, ala di wi e saka wisrefi na ondro „den hei tirimakti” na ini grontapoe afersi (Lukas 20:25; Romesma 13:1-7; Titus 3:1, 2). Ija, te wi e hori den wet nanga den gronprakseri foe bijbel na prakseri te wi e teki persoonlijk bosroiti, dan dati e jepi foe tan hori wi kresten wánfasi.
16. Fa wi kan jepi foe tan hori a wánfasi te wi e teki bosroiti di no abi foe doe nanga bijbel tori? Gi wan eksempre.
16 Wi kan jepi foe tan hori wi kresten wánfasi srefi te wi e teki wan bosroiti di de krinkrin wan persoonlijk afersi èn di no abi foe doe nanga wan foe den wet noso gronprakseri foe bijbel. Fa so? Foe di wi e hori tra sma na prakseri na wan lobi fasi, tapoe soema a bosroiti foe wi kan abi krakti. Leki eksempre: Na ini a gemeente na fositen Korente, wan aksi ben opo di abi foe doe nanga meti di ben òfer gi kroektoe gado. A no de foe taki, dati wan kresten no ben sa abi wan prati na ceremonia di abi foe doe nanga anbegi foe kroektoe gado. Ma a no ben de wan sondoe foe njan den meti disi di en broedoe lon na a joisti fasi èn di de meti di tan abra, di sma ben seri na wan poebliki wowojo (Tori foe den Apostel 15:28, 29; 1 Korentesma 10:25). Ma tokoe a konsensi foe wan toe kresten ben trobi den foe njan a meti disi. Foe dati ede Paulus ben gi tra kresten a deki-ati foe no meki den naki foetoe fadon. Foe taki en leti, a ben skrifi: „Efoe njanjan e meki mi brada naki foetoe fadon, dan noiti moro mi sa njan meti, so taki mi no sa meki mi brada naki foetoe fadon” (1 Korentesma 8:13). So boen, srefi efoe a no abi foe doe nanga den wet noso gronprakseri foe bijbel, a ben sa de wan lobi sani foe hori tra sma na prakseri te wi e teki persoonlijk bosroiti di ben kan abi krakti na tapoe a wánfasi foe na osofamiri foe Gado!
17. San moro boen foe doe te wi moesoe teki wan persoonlijk bosroiti?
17 Efoe wi no sabi seiker sortoe pasi wi moesoe waka, dan a de wan koni sani foe teki bosroiti na wan fasi di e gi wi wan krin konsensi, èn tra sma moesoe lespeki a bosroiti di wi teki (Romesma 14:10-12). A no de foe taki, te wi moesoe teki wan persoonlijk bosroiti, dan wi moesoe soekoe a tiri foe Jehovah na ini begi. Leki a psalm singiman, wi kan begi nanga froetrow: „Poti joe jesi arki mi. . . . Bikasi joe na mi klipston di tanapoe leti-opoe èn mi fortresi; èn foe joe nen ede joe sa tjari mi èn tiri mi.” — Psalm 31:2, 3.
Tan hori a kresten wánfasi ala ten
18. Fa Paulus ben agersi a wánfasi foe a kresten gemeente?
18 Na ini 1 Korentesma kapitel 12, Paulus ben gebroiki a libisma skin foe agersi a wánfasi foe a kresten gemeente. A ben poti krakti na tapoe na abi di wi abi makandra fanowdoe èn o prenspari ibri memre de. „Efoe den alamala ben de wán memre, pe a skin ben sa de dan?” Paulus ben aksi. „Ma now den de foeroe memre, ma wán skin. Na ai no kan taigi na anoe: ’Mi no abi joe fanowdoe’; noso, ete wan tron, na ede no kan taigi a foetoe: ’Mi no abi joe fanowdoe’” (1 Korentesma 12:19-21). Na a srefi fasi, a no wi alamala na ini na osofamiri foe den anbegiman foe Jehovah e doe a srefi wroko. Ma tokoe wi de ini wánfasi, èn wi abi makandra fanowdoe.
19. Fa wi kan njan boen foe den sani di Gado seti na jejefasi, èn san wan owroe brada ben taki foe a tori disi?
19 Soleki fa a skin abi njanjan fanowdoe, sorgoe, nanga tiri, na so wi abi den sani fanowdoe di seti na jejefasi, di Gado e gi wi nanga jepi foe en Wortoe, en jeje, nanga en organisâsi. Efoe wi wani njan boen foe den sani disi di seti, dan wi moesoe de wan pisi foe na osofamiri foe Jehovah na grontapoe. Baka foeroe jari na ini a diniwroko foe Gado, wan brada ben skrifi: „Mi de nanga foeroe tangi taki mi libi akroederi a sabi foe den prakseri foe Jehovah, na ini den dei leti bifo 1914 di a waarheid no ben de so krin ete . . . te go miti den dei disi pe a waarheid e skèin leki a son na brekten. Wan sani di prenspari gi mi, de a tan di mi moesoe tan krosibei foe Jehovah en organisâsi di wi kan si. Den sani di mi ben ondrofeni froekoe kaba, ben leri mi o fowtoe a de foe froetrow tapoe a prakseri foe libisma. So esi leki mi ben teki wan bosroiti ini a tori disi, mi ben abi a fasti bosroiti foe tan na a getrow organisâsi. Na sortoe tra fasi wan sma kan kisi a boen-ati nanga a blesi foe Jehovah?”
20. San wi moesoe bosroiti foe doe nanga a wánfasi foe wi leki a pipel foe Jehovah?
20 Jehovah kari en pipel poeroe foe a doengroe èn pratifasi foe grontapoe (1 Petrus 2:9). A tjari wi kon na ini wan blesi wánfasi nanga ensrefi èn nanga wi kompe bribiman. A wánfasi disi sa de na ini a njoen seti foe sani di de so krosibei. Foe dati ede, na ini den moeilek lasti dei disi, meki wi go doro foe ’weri lobi gi wisrefi’ èn doe ala sani di wi man foe meki wánfasi gro èn tan hori wi diri wánfasi. — Kolosesma 3:14.
San joe ben sa piki?
◻ Foe san ede a doe di wi e doe a wani foe Gado èn e tan fasti na a waarheid, kan jepi wi foe tan hori a wánfasi?
◻ Fa wánfasi abi foe doe nanga a joisti gebroiki foe a tongo?
◻ San abi foe doe nanga a gi di wan sma e gi pardon?
◻ Fa wi kan tan hori a wánfasi te wi e teki persoonlijk bosroiti?
◻ Foe san ede wi moesoe hori a kresten wánfasi?
[Prenki na tapoe bladzijde 29]
Neleki fa a skapoeman disi e hori en skapoe na wán, na so Jehovah e hori en pipel na ini wánfasi
[Prenki na tapoe bladzijde 31]
Te wi e aksi pardon na wan sakafasi te wi sondoe teige wan sma, dan wi e jepi foe meki wánfasi gro